Etaagaadan Ammanite
1. Xiqimita 19, 2015n doommiya saaminttaappe doommidi Gubaaꞌiyaa Geeshsha Maxaafaa Xinaatiyan ay xannaꞌanee?
1 Xiqimita 19, 2015n doommiya saaminttaappe doommidi Gubaaꞌiyaa Geeshsha Maxaafaa Xinaatiyan Etaagaadan Ammanite giyo maxaafaa xannaꞌana. He maxaafay Geeshsha Maxaafan etabay odettido, mino ammanoy deꞌiyo 14 asatubaa qonccissees. He maxaafay he asati Yihoowayyo oottiyo wode banttana gakkida metuwaa genccidoogaa nuuni loytti akeekanaadan maaddiya ogiyan xaafettiis. He maxaafay nuuni he taarikiyaappe tamaaridobaa oosuwan peeshshanaadankka tamaarissees.—Ibr. 6:12.
2. Etaagaadan Ammanite giyo maxaafan deꞌiya issi issibaa yoota.
2 Deꞌiyaabaa: Taarikiyan qonccida asati awudenne awan deꞌidaakko bessiya wodiyaa malaataynne karttay he maxaafan deꞌees. Qassi ubba shemppotun, nuuni he taarikiyaa wotti denttidi qoppanaadaaninne tamaaridobaa oosuwan peeshshanaadan maaddiya, “Yereranawu Maaddiya Oyshaa” giya qofaykka deꞌees. Nuuni he taarikiyaa loytti akeekanawu maaddiya keehippe loꞌꞌiyaanne hanotaa loytti qonccissiya misiletikka he maxaafan deꞌoosona.
3. Nuuni ha maxaafaa xannaꞌiyo wode goꞌettanawu ay oottana danddayiyoo?
3 Waani Goꞌettanee? Doomettan deꞌiya, Bolla Gididi Heemmiyaagaa dabddaabbee kaallidi deꞌiyaagaadan minttettees: “He taarikiyaa loytti akeekanawu baaxetite. Etabay qonccido asatuyyo siyettidabay intteyyo siyetto; qassi eti beꞌidobaa beꞌite. Eta issibay gakkiyo wode eti waanidaakko, qassi inttena hegaa malabay gakkiyaakko intte waananaakko qoppite.” Nu qoppiyoobay coo mela qofa gidennan, Geeshsha Maxaafay yootiyoobaa eridi, he taarikiyan qonccida asatu hanotaa loytti akeekanawu maaddiyaaba. Hegaadan oottanawu wodiyaa bazzidi wotti denttidi qoppana koshshees. (Nah. 8:8) Issi shemppuwawu giddo heeran deꞌiya qofaappe doommidi xannaꞌiyaaba gidikko, kaalettiya ishay 30-60 sokonddiyan aadhida saaminttan tamaaridobaa zaarettidi doommees. Xannaꞌiyo shaahuwan “Yereranawu Maaddiya Oyshaa” giya qofay deꞌennaba gidikko, zaarettanawu issi woy naaꞌꞌu oyshaa oychana danddayettees.
4. Nuuni Etaagaadan Ammanite giyo maxaafaa xannaꞌana koshshiyoy aybissee?
4 Nuuni naagettana xayikko nu ammanuwaa shugissiya alamiyan deꞌoos. Ha maxaafaynne ha maxaafaa qofay ekettido Wochiyo Keelan deꞌiya huuphe yohoti, nu ammanuwaa minttanaadan Yihooway nuussi immidobata. (Yaaq. 1:17) Gubaaꞌiyaa Geeshsha Maxaafaa Xinaatiyan ubbatoo beettiyoogaaninne ha maxaafaa xannaꞌiyo wode nu qofaa yootiyoogan loytti goꞌettiyaageeta gidoos!