Xoossaanne SHooruwaa Waatidi Siiqana Danddayiyoo?

Kiristtaaneti Muuse higgiyaa kaallennaba gidikkokka, he higgiyan deꞌiya, Xoossaanne shooruwaa siiqanaadan yootiya naaꞌꞌu gita azazoti haꞌꞌikka Xoossay nuuppe koyiyoobaa qonccissoosona. (Maa 22:37-39) Hegaa mala siiqoy zariyaappe laattiyooba gidenna. Nuuni hegaayyo baaxetana bessees. Waatidi? Hegawu keehi maaddiyaabaappe issoy ubbatoo Geeshshaa Maxaafaa nabbabiyoogaa. Geeshsha Maxaafan qonccida, Xoossaassi deꞌiya dumma dumma eeshshata qoppiyo wode, “GODAA lo77otettaa” akeekoos. (Maz 27:4) Yaatikko, ayyo deꞌiya siiqoy gujji gujji beesinne nuuni aagaa mala qofay deꞌiyoogeeta gidoos. Hegee nuuni nu goꞌꞌaa aggidi harata siiqanaadan yootiyaagaa gujjin, Xoossaa azazuwawu azazettanaadan denttettees. (Yoh 13:34, 35; 1Yoh 5:3) Hagaappe kaallidi Geeshsha Maxaafaa ufayssiya ogiyan nabbabanawu maaddiya heezzubata beꞌana:

• Haniyaabaa qoppite, qassi hanotaa akeekite. He sohuwan deꞌiyaabadan qoppite. Intte beꞌiyoobaynne siyiyoobay, qassi inttena sawiyaabay aybee? He asatussi aybi siyettidee?

  

• Dumma dumma ogiyaa malite. Kaallidi deꞌiyaagaadan oottana danddayeeta: Cenggurssaa xoqqu oottidi nabbabite, woy duuqettidaagaa dooyidi nabbabiyo wode kaallite. SHemppota maaraara coo nabbabiyoogaappe Geeshsha Maxaafan odettida issi asa taarikiyaa nabbabite. Leemisuwawu, Yesuusabaa nabbabanawu Ooratta Alamiyaa Geeshsha Maxaafaa Birshshettan Gujo Qofaa giddon A7 woykko B12 goꞌettite. Gallassaa xiqisee ekettido shemppuwaa nabbabite. Geeshshaa Maxaafay xaafettido kasiyaa kaaluwan nabbabite.

  

• Akeekanawu nabbabite. Wurssana xallawu cora shemppota nabbabiyoogaappe hachchi hachchi issi shemppuwaa akeekidinne wotti dentti qoppidi nabbabiyoogee daro maaddees. Hanotaa akeekite. A giddon qonccidabata yiggite. Karttaanne geeddarssanawu maaddiya harata goꞌettite. Intte akeekanawu metootido, baa giishin issi qofaa pilggite. Danddayikko, intte nabbabanawu bazziyo wodeenne wotti dentti qoppanawu bazziyo wodee issi keena gido.