‘Biidi Tana Kaalliyaageeta Oottite’ 2020 LAYTTAA XIQISIYAA:

1-2. Yesuusa duufuwaakko biida maccaasatussi issi kiitanchchay ay odidee, qassi Yesuusi ayba azazuwaa etawu yootidee?

WODEE Niisaane 16, 33 M.L, maallado guura. Xoossawu yayyiya keehi azzanida amarida maccaasati 36 saatiyaappe kase Godaa Yesuus Kiristtoosa anhaa moogido sohuwaa boosona. Eti Yesuusi moogettido sohuwaa gakkido wode, A anhaa shittuwaaninne tiyiyooban tiyanawu qoppidosona, shin duufoy mela deꞌiyoogaa beꞌidi eti maalaalettidosona! Issi kiitanchchay he maccaasatussi Yesuusi hayquwaappe denddidoogaa yootiis; gujjidi hagaadan giis: “I intteppe kasetidi, Galiilaa bees; intte a yaani be7ana.”—Maa. 28:1-7; Luq. 23:56; 24:10.

² He maccaasati duufuwaa matappe bi simmin, Yesuusi etakko shiiqidi hagaadan giis: “Ta ishantti Galiilaa baana mala, biidi etau yootite; eti tana yaani be7ana.” (Maa. 28:10) Hagee Yesuusi hayquwaappe denddi simmidi etaara shiiqiyo koyro shiiqo gidiyo gishshawu, I etayyo yootiyo keehi koshshiya kaaletoy deꞌennan waayi aggana.

AZAZOY IMETTIDOY OOSSEE?

3-4. Nuuni Maatiyoosa 28:19, 20n deꞌiya azazoy kiitettidaageetu xallawu imettidaagaa gidenna gaana danddayiyoy aybissee? (Koyro sinttan deꞌiya misiliyaa xeella.)

³ Maatiyoosa 28:16-20 nabbaba. Yesuusi giigissido shiiquwan, bana kaalliyaageeti koyro xeetu layttan oottana bessiyo keehi koshshiya oosuwaa etawu yootiis; hegee ha wodiyan nuuni oottiyo oosuwaara issi mala. Yesuusi hagaadan giis: “Hegaa gishshau, intte biidi, asa ubbaa tana kaalliyaageeta oottite; . . . taani inttena azazidobaa ubbaa eti naagana mala, eta tamaarissite.”

⁴ Yesuusi bana kaalliyaageeti ubbay sabbakanaadan koyees. I hagaa ammanettida 11 kiitettidaageetu xallay oottanaadan azazibeenna. Hegaa waati erana danddayiyoo? Yesuusi bana kaalliyaageeta oottanaadan azazido wode, Galiila deriyan deꞌiyaageeti kiitettidaageetu xalla gidokkona. Hegaa nuuni waati eriyoo? Kiitanchchay he maccaasatussi, “Intte a [Galiilan] be7ana” giidoogaa hassayite. Hegaa gishshawu, ammanettida maccaasatikka he sohuwan deꞌennan waayi aggana. SHin hegaa xalla gidenna. Yesuusi, “Ichchashu xeetaappe dariya ishatussi issitoo [qonccidoogaa]” Kiitettida PHawuloosi yootiis. (1 Qor. 15:6) Awan?

5. Koyro Qoronttoosa 15:6⁠ppe nuuni ay tamaariyoo?

⁵ PHawuloosi 1 Qoronttoosa 15:6n deꞌiya qofaa haasayiyo wode Maatiyoosa 28n odettida, Galiila deriyan shiiqido shiiquwaa hassayiis gaanaadan oottiya gaasoti deꞌoosona. He gaasoti aybee? Koyroy, Yesuusa kaalliyaageetuppe dariya baggati Galiila asata. Hegaa gishshawu, Yerusalaamen issi uraa son shiiqiyoogaappe Galiila deriyan daro asay shiiqiyoogee bessiyaaba. Naaꞌꞌanttoy, Yesuusi hayquwaappe denddi simmidi, Yerusalaamen issi uraa son 11 kiitettidaageetuura gayttiis. Kiitettidaageetu xallay sabbakanaadaaninne erissiyo ashkkara oottanaadan Yesuusi koyidaba gidiyaakko, kiitettidaageeta, maccaasatanne harata Galiila deriyan shiishshiyoogaappe Yerusalaamen etayyo yootana danddayees.—Luq. 24:33, 34, 36.

6. Maatiyoosa 28:20n deꞌiya azazoy ha wodiyawu oottiyoogaa bessiyaabay aybee, qassi ha wodiyan asay he azazuwaa waati azazettiiddi deꞌii?

⁶ Heezzantto gaasuwaa akeeka. Yesuusi bana kaalliyaageeta oottanaadan azazidoogeeti koyro xeetu layttan deꞌiya Kiristtaanetu xalla gidokkona. Nuuni hegaa waati eriyoo? Yesuusi bana kaalliyaageetussi immido azazuwaa wurssettan hagaadan giis: “Taani wodiyaa wurssettai gakkanaassikka ubba wode inttenaara de7iyoogaa akeekite.” (Maa. 28:20) Yesuusi yootidoogaadan, ha wodiyan daroti erissiyo ashkkara oottiyo oosuwaa oottoosona. Layttan layttan 300,000 gidiyaageeti xammaqettidi Yesuus Kiristtoosi erissiyo ashkkarata gididi Yihoowa Markka gidoosona. Hagee maalaalissiyaaba!

7. Nuuni haꞌꞌi ay xannaꞌanee, qassi aybissi?

⁷ Geeshsha Maxaafaa xannaꞌiya daroti ayyaanaaban diccidi xammaqettoosona. Gidikkonne, nunaara Geeshsha Maxaafaa xannaꞌiyaageetuppe amaridaageeti erissiyo ashkkara gidanawu yayyiyaaba milatoosona. Eti xannaꞌiyoogan ufayttiyaaba gidikkonne, ayyaanaaban diccidi xammaqettokkona. Neeni Geeshsha Maxaafaa xannaꞌissiyo uri deꞌikko, ne xinaatee tamaariyoobaa oosuwan peeshshanaadaaninne I Kiristtoosi erissiyo ashkkara gidanaadan maaddanawu neeni koyiyoogee qoncce. Nuuni nu xinaatiyaa wozanaa waati denttettana danddayiyaakko, qassi ayyaanaaban I diccanaadan waati maaddana danddayiyaakko ha huuphe yohoy qonccissana. Nuuni ha huuphe yohuwaa pilggana koshshiyoy aybissee? Nuuni xannaꞌissanawu woy agganawu kuuyanaadan oottiya gaasoy issi issitoo deꞌana danddayiyo gishshataassa.

NE XINAATEE YIHOOWA SIIQANAADAN MAADDANAWU BAAXETA

8. Nuuni xannaꞌissiyoogeeti Yihoowa siiqanaadan maaddiyoogee issi issitoo metiyaaba gidiyoy aybissee?

⁸ Asay siiqoy denttettin baayyo haggaazanaadan Yihooway koyees. Hegaa gishshawu, nu halchchoy nu xannaꞌissiyoogeeti Yihooway etawu huuphiyan huuphiyan qoppiyoogaanne eta keehi siiqiyoogaa akeekanaadan maaddiyoogaa gidana koshshees. Yihooway “aawi bainna naatussi aawa; qassi azinai haiqqido maccaasata naagiyaagaa” gidiyoogaa eti akeekanaadan maaddanawu koyoos. (Maz. 68:5) Neeni xannaꞌissiyoogeeti Xoossay eta keehi siiqiyoogaa akeekiyo wode, eti A siiqiyoogaa doommana danddayoosona. Eta aawati etayyo siiquwaa bessi erenna gishshawu, xannaꞌiya issoti issoti Yihoowa siiqiya Aawadan xeellanawu metootana danddayoosona. (2 Xim. 3:1, 3) Hegaa gishshawu, neeni xannaꞌissiyo wode, ufayssiya Yihoowa eeshshata qonccissa. Neeni xannaꞌissiyoogeeti merinaa deꞌuwaa demmanaadan siiqiya Xoossay koyiyoogaanne eti hegaa demmanaadan maaddanawu I giigi uttidoogaa akeekanaadan eta maadda. Nuuni harabaa ay oottana danddayiyoo?

9-10. Geeshsha Maxaafaa xannaꞌissanawu goꞌettana bessiya maxaafati awugeetee, qassi hegeeta goꞌettiyoy aybissee?

⁹ “Geeshsha Maxaafay Nuna Ay Tamaarissii?” qassi “Xoossaa Siiquwan Deꞌa” giya maxaafata goꞌetta. Nuuni xannaꞌissiyoogeetu wozanaa denttettanaadan maaddanawu ha xuufeti giigidosona. Leemisuwawu, Nuna Ay Tamaarissii giyo maxaafan shemppo 1y kaallidi deꞌiya oyshata zaarees: Xoossay nuussi qoppii?, Asay metootiyo wode Xoossawu aybi siyettii?, qassi Yihoowa dabbo gidana danddayay? Xoossaa Siiquwan Deꞌa giya maxaafay shin? Geeshsha Maxaafay yootiyo maarata oosuwan peeshshiyoogee tamaariya deꞌoy giiga gidanaadaaninne I Yihoowakko kaseegaappe aaruwan shiiqanaadan oottiyoogaa tamaaree akeekanaadan he maxaafay maaddana. Neeni he xuufeta kase hara asaa xannaꞌissikkokka, ubba xinaatetussi loytta giigetta, qassi issi issi xinaatiyawu koshshiyaabaa qoppa.

¹⁰ SHin, leemisuwawu, Tamaarissanawu Goꞌettiyo Waanna Miishshatun gidennan, hara xuufetun deꞌiya issi huuphe yohuwan tobbanawu xinaatee koyikko, waatuutee? Qommoora odettida maxaafata neeni aggennan xannaꞌissana mala, I ba koyiyo qofaa buzo nabbabanaadan minttettana danddayaasa.

11. Geeshsha Maxaafaa xannaꞌissiyo wode nuuni woosan doommana koshshiyoy awudee, qassi hegee keehi koshshiyaabaa gidiyoogaa xinaatee akeekanaadan waati maaddana danddayiyoo?

¹¹ Xannaꞌissiyoogaa woosan doomma. Geeshsha Maxaafaa ubbatoo xannaꞌissiyoogaa doommoogaappe guyyiyan, danddayettida ubban xinaatiyaa woossidi doommiyoogee loꞌꞌo. Nuuni Xoossaa Qaalaa akeekana danddayiyoy Xoossaa ayyaanaa maado xallaana gidiyoogaa tamaaree eranaadan maaddana koshshees. Geeshsha Maxaafaa xannaꞌissiya issoti issoti xannaꞌissiyo wode woossiyoy aybissakko qonccissanawu Yaaqooba 1:5 nabbaboosona: “Intteppe ooninne baayyo aadhdhida eratettai xayikko, . . . Xoossaa woosso.” Yaatidi xannaꞌissiyaagee ba xinaatiyaa, “Aadhdhida eratettaa immanaadan nuuni Xoossaa waati oychchana danddayiyoo?” yaagidi oychchees. Nuuni Xoossaa woossana koshshiyoogaa xinaatee maayana danddayees.

12. Issi xinaatee ba wozanan deꞌiyaabaa mammottennan Yihoowayyo woosan yootanaadan maaddanawu Mazamure 139:2-4n deꞌiya qofaa waata goꞌettuutee?

¹² Waati woossanaakko ne xinaatiyaa tamaarissa. I wozanappe woossiyoogaa Yihooway siyana koyiyoogaa qonccissa. Nuuni buzo woosan, nuuyyo siyettiyaabaanne hara oossinne odanawu koyennabaa ubbaa Yihoowassi yootana danddayiyoogaa qonccissa. Yihooway nu wozanaa qofaa ubbaa eriyoogaa hassaya. (Mazamure 139:2-4 nabbaba.) Nu xannaꞌissiyo uri bala qofaa laammanawunne iita meezeta xoonanawu Xoossay maaddana mala oychchanaadan minttettana danddayoos. Leemisuwawu, amarida wodiyawu Geeshsha Maxaafaa xannaꞌiiddi takkida issi uri denddoy eeqa goyno gidido issi baalaa keehi dosees giidi qoppoos. Hegee bala gidiyoogaa I erees, shin I he baalaara gayttida issi issibay A ufayssees. I bawu siyettiyaabaa Yihoowassi qoncciyan yootanaadan, qassi Xoossay dosiyoobaa xallaa I dosanaadan maaddana mala woossanaadan minttetta.—Maz. 97:10.

13. (a) Nu xinaateta sohuwaara shiiqota shoobbana koshshiyoy aybissee? (b) Xinaatee SHiiquwaa Addaraashan boorasennaadan waati oottana danddayiyoo?

¹³ Ne xinaatee sohuwaara shiiqota shiiqanaadan shoobba. Ne xinaatee Kiristtaane shiiqotun siyiyoobaynne beꞌiyoobay I Yihoowassi haggaazanaadan denttettananne ayyaanaaban diccanaadan maaddana danddayees. Kawotettaa Addaraashan Oosettiyaabay Aybee? giya biiduwaa bessa, yaatada nenaara shiiquwaa baanaadan A shoobba. Danddayettikko, shiiquwaa A ekkada ba. Aassiya dumma dumma asati nenaara xannaꞌissanaadan shoobbiyoogee keehi loꞌꞌo. Yaatiyo wode, ne xinaatee gubaaꞌiyan deꞌiya haratuura erettana, qassi I shiiqota shiiqiyo wode boorasennan aggana danddayees.

NE XINAATEE AYYAANAABAN DICCANAADAN MAADDA

14. Xinaatee ayyaanaaban diccanaadan aybi denttettana danddayii?

¹⁴ Nu halchchoy Geeshsha Maxaafaa xannaꞌiyaageeti ayyaanaaban diccanaadan maaddiyoogaa. (Efi. 4:13) Issi uri Geeshsha Maxaafaa xannaꞌanawu maayettiyo wode, xannaꞌiyoogee A loytti goꞌꞌiyoogan I keehi ufayttana danddayees. SHin, I Yihoowa siiqiyo siiqoy gujjiyo wode, gubaaꞌiyaa yara gididaageeta gujjin, harata I waati maaddanaakko qoppiyoogaa doommana danddayees. (Maa. 22:37-39) Hanotay injjetiyo wode, Kawotettaa oosuwaa miishshan maaddiyoogee maata gidiyoogaa yootanawu mammottoppa.

15. Nu xinaatee metoy merettiyo wode bessiyaabaa oottanaadan waati maaddana danddayiyoo?

¹⁵ Metoy merettiyo wode waatanaakko ne xinaatiyaa tamaarissa. Leemisuwawu, xammaqettibeenna aassiya ne xinaatee, gubaaꞌiyan deꞌiya issi uray bana yiilloyidoogaa neessi yootiis gaada qoppa. Ooni likkekko woy ooni mooridaakko yootiyoogaappe, I waatanaadan Geeshsha Maxaafay yootiyaakko ayyo qonccissa. I he ishawu atto giidi he yohuwaa dogana danddayees. Woy I hegaadan oottana danddayennaba gidikko, ashkketettaaninne siiquwan ‘ba ishaa balaappe zaaranawu’ halchchidi A haasayissana koshshees. (Maatiyoosa 18:15⁠ra geeddarssa.) Ne xinaatee haasayanabaa kasetidi giigettanaadan maadda. Neeni ne xinaatee JW Library^® aplikeshiniyaa, Yihoowa Markkati Geeshsha Maxaafaa Xannaꞌanau Maaddiya Xuufiyaa, qassi jw.org^® saytiyaa goꞌettidi he metuwaa waati giigissana danddayiyaakko bessa. I xammaqettanaappe kase loytti loohikko, xammaqetti simmidi gubaaꞌiyan deꞌiya haratuura dabbotaa minttana danddayees.

16. Hara aassiyaageeti nenaara xannaꞌissanaadan shoobbiyoogee loꞌꞌo gidiyoy aybissee?

¹⁶ Nenaara xannaꞌissanaadan gubaaꞌiyan deꞌiya harata, qassi woradaa xomoosiya ishaa I gubaaꞌiyaa xomoosiyo wode shoobba. Aybissi? Kasetidi beꞌido gaasotuppe kareera, neeyyo injjetenna wode aassiya harati ne xinaatiyaa maaddanaadan immana danddayaasa. Leemisuwau, ne xinaatee sijaaraa uyiyoogaa agganawu darotoo baaxetikkokka, aggibeenna gaada qoppa. Iita meeziyaa agganawu darotoo baaxetidi, guyyeppe he meeziyaa aggida issi Yihoowa Markkay nenaara A xannaꞌissanaadan shoobba. Ne mala Kiristtaanee he xinaatiyawu koshshiya zoriyaa zorana danddayees. Kayma ishaara xannaꞌissiyoogee neeyyo injjetennaba gidikko, he wode I xannaꞌissanaadan shoobba. Harati nenaara xannaꞌissanaadan neeni shoobbiyo wode, ne xinaatee etappe darobaa goꞌettana danddayees. Nu halchchoy xinaatee ayyaanaaban diccanaadan maaddiyoogaa gidiyoogaa hassaya.

XANNAꞌISSIYOOGAA TAANI AGGANA KOSHSHII?

17-18. Xannaꞌissiyoogaa neeni aggana bessiyaakko bessennaakko kuuyiyo wode ay qoppana koshshii?

¹⁷ Neeni xannaꞌissiyo uri ba deꞌuwan laamettennaagaa gidikko, nena hagaadan oychcha: ‘Taani xannaꞌissiyoogaa aggana koshshii?’ Neeni hegaa kuuyanaappe kase, he uraa abbiyaa yuushsha qoppana koshshees. Ayyaanaaban dicciyoogee issi issi asawu haratuugaappe daro wodiyaa ekkana danddayees. Nena hagaadan oychcha: ‘Ta xinaatee ba abbiyaa keenaa dicciiddi deꞌii?,’ ‘I tamaariyoobata “akeekiyoogaa” woy oosuwan peeshshiyoogaa doommidee?’ (Maa. 28:20) I erissiyo ashkkara gidanawu adussa wodiyaa ekkana danddayees. SHin loddan loddan I ba deꞌuwan laamettana koshshees.

¹⁸ SHin nuuni issi uraa amarida wodiyawu xannaꞌissin, he uri tamaaridobaa nashshiyoogaa bessana xayikko, waatana koshshii? Ane hagaa qoppa: Ne xinaatee Nuna Ay Tamaarissii giyo maxaafaa xannaꞌidi wurssiis; qassi Xoossaa Siiquwan Deꞌa giyo maxaafaa doommennan aggenna; shin issi shiiqokka, ubba qassi Godaa Kahuwaa baalaa bonchchanawukka shiiqi erenna! I pattenna gaasuwan darotoo xinaatiyaa aggibayees. Ne xinaatee hegaa mala gidikko, neeni aara qoncciyan haasayana koshshees.b

19. Issi uri xannaꞌiyoogaa nashshennaba gidikko, woygana danddayay, qassi neeni qoppana koshshiyaabay aybee?

¹⁹ Neeni hagaadan oychchana danddayaasa: ‘Yihoowa Markka gidennaadan nena diggiyaabay aybee?’ Xinaatee hagaadan zaarana danddayees: ‘Taani Geeshsha Maxaafaa xannaꞌiyoogaa dosays, shin mulekka Yihoowa Markka gidikke!’ Amarida wodiyawu xannaꞌi simmin A qofay hegaa mala gidikko, aggennan xannaꞌissana koshshiyo gaasoy deꞌii? SHin, ne xinaatee dichchaa bessennaadan bana diggidabaa neeyyo yootana danddayees. Leemisuwawu, I sooppe soo biidi haggaazanawu mule danddayennabadan qoppana danddayees. Ayyo siyettiyaabaa neeni eriyo wode, A waata maaddanaakko loytta akeekana danddayaasa.

20. Oosuwaa 13:48 akeekiyoogee nuuni issi xinaatiyaa xannaꞌissiyoogaa aggana bessiyaakko bessennaakko kuuyanawu waati maaddana danddayii?

²⁰ Issi issi xinaateti Hizqqeela wode deꞌida Israaꞌeelatu mala gidiyoogee azzanttiyaaba. Etabaa Yihooway Hizqqeelawu hagaadan giis: “Be7a, neeni etayyo issi siiqo mazamuriyaa lo77o cenggurssan yexxiyaanne diittaa loittidi diixxiya asa mala. Aissi giikko, eti neeni odiyoogaa siyoosona; shin issuwaakka oottokkona.” (Hiz. 33:32) Issi ura xannaꞌissiyoogaa agganaagaa yootiyoogee nuna metana danddayees. Giddoppe attin, “wodee wuriis.” (1 Qor. 7:29) Nuuni dichchaa bessenna xinaatiyaa xannaꞌissiiddi daro wodiyaa wurssiyoogaappe ‘merinaa deꞌuwaa’ demmanawu suure wozanaa koshshay deꞌiyo hara uraa koyana koshshees.—Oosuwaa 13:48 nabbaba.

21. Laytta xiqisee 2020gee aybee, qassi hegee nuuni ay oottanaadan maaddanee?

²¹ Nuuni erissiyo ashkkara oottiyo oosuwan kaseegaappe waani qara gidanaakko qoppanaadan 2020 laytta xiqisee nuna maaddana. Hagee Galiilan issi deriyan shiiqido shiiquwan Yesuusi haasayidobatuppe amaridabaa bessees: “Intte biidi, . . . tana kaalliyaageeta oottite; . . . , xammaqite.”—Maa. 28:19.