“Taakko Simmite”

1. Yihoowayyo haggaaziyoogaa aggida uri zaarettidi haggaaziyoogaa doommiyo wode Yihoowawu aybi siyettii?

HAGAAPPE kasetiya huuphe yohuwan nuuni beꞌidoogaadan, ba dorssata ubbaa qaretan heemmiya loꞌꞌo henttanchchaara Yihooway bana geeddarssiis. Qassi I bayidaagaa koyees. Yihooway bana aggidi biida Israaꞌeelatuyyo hagaadan giis: “Taakko simmite; taanikka inttekko simmana.” ‘I laamettibeenna’ gishshawu ayyo haꞌꞌikka hegaadan siyettiyoogaa nuuni eroos. (Mil. 3:6, 7) Bayida A ashkkaratuppe issi uri akko simmiyo wode Yihoowaynne kiitanchchati keehi ufayttiyoogaa Yesuusi yootiis.—Luq. 15:10, 32.

2. Ha huuphe yohuwan nuuni ay xannaꞌanee?

² Yihoowappe haakkidaageeta maaddiyo ogiyaa xeelliyaagan keehi koshshiyaabaa tamaaranawu, Yesuusi yootido heezzu leemisota ane beꞌoos. Bayida dorssati Yihoowakko simmanaadan maaddanawu nuuyyo koshshiya amarida eeshshata xannaꞌana. Qassi ayyaanaaban shuggidaageeti Yihoowakko simmanaadan maaddanawu minnidi oottiyo wode nuuni keehi ufayttanaagaa akeekana.

BAYIDA SANTTIMIYAA KOYITE

3-4. Luqaasa 15:8-10n odettida maccaasiyaa bayida ba drakimaa loytta koyidoy aybissee?

³ Yihoowakko simmanawu koyiyaageeta demmanawu nuuni loytti baaxetana koshshees. Luqaasa Wonggeliyan odettida leemisuwan, Yesuusi shilinggiyaa woy drakimaa giyo alꞌꞌo santtimee bayido maccaasee taarikiyaa yootiis. Ha taarikiyan odettida waannabay maccaasiyaa santtimiyaa koyanawu keehi baaxetidoogaa.—Luqaasa 15:8-10 nabbaba.

⁴ Maccaasiyaa bayida ba alꞌꞌo drakimaa demmido wode keehi ufayttidoogaa Yesuusi yootiis. Yesuusi saꞌan deꞌiyo wode, Israaꞌeela biittan issi macca naꞌiyaa azinaa geliyo wode, I aayyiyaa iyyo tammu drakimaa santtimiyaa issi issitoo immawusu. Bayida santtimee aayyiyaa immido santtimetuppe issuwaa gidennan waayi aggana. Maccaasiyaa santtimee wuygen bayiis gaada qoppaasu. Yaatiyo gishshawu, A xomppiyaa xomppada koyaasu, shin aybanne demmabeykku. I kuraazee biraa santtimiyaa guuttaa A demmanaadan loytti pooꞌissennan aggana danddayees. Wurssettan, A so giddon ubbasaa loytta pittaasu. Pituwaa giddon I alꞌꞌo drakimay kuraaziyaa pooꞌuwan phoolees. A hegaa demmidoogan keehi ufayttaasu! A he mishiraachchuwaa yootanawu ba laggetanne ba shoorota xeesaasu.

5. Ayyaanaaban shuggidaageeta demmiyoogee baaxeyiyaaba gidiyoy aybissee?

⁵ Issibay bayiyo wode, nuuni hegaa demmanawu loytti baaxetana koshshiyoogaa Yesuusi yootido taarikiyaappe tamaaroos. Hegaadan, ayyaanaaban shuggidaageeta demmanawu nuuni loytti baaxetiyoogee koshshana danddayees. Eti haggaaziyoogaa woy nunaara shiiqiyoogaa aggoosappe daro laytta gidana danddayees. Eti ishanttinne michchontti eta erenna heeri beennan aggokkona. SHin, he shuggidaageetuppe amaridaageeti Yihoowakko simmanawu wozanappe koyiyoogee erettidaagaa. Eti bantta ishanttuuranne michchonttuura Yihoowawu zaarettidi haggaazanawu koyiyaaba gidikkonne, etawu nu maadoy koshshees.

6. Ayyaanaaban shuggidaageeta koyiyoogan gubaaꞌiyan deꞌiya ubbay waati maaddana danddayii?

⁶ Ayyaanaaban shuggidaageeta koyiyoogan ooni maaddana danddayii? Cimata, aqinyetanne shuggidaageetu so asaa gujjin, gubaaꞌiyan deꞌiya aassiyaageeti ubbay ayyaanaaban shuggidaageeta koyiyoogan maaddana danddayoosona. Neeyyo ayyaanaaban shuggida laggee woy dabboy deꞌii? Neeni sooppe soo woy dabaaban haggaazishin ayyaanaaban shuggida uri nenaara gayttikko, neeni waatana koshshii? Biidi he izaawa oychchanaadan I koyikko, A adrashaa woy silkke payduwaa gubaaꞌe cimatussi neeni immanawu koyiyoogaa yoota.

7. Toomaasa giyo gubaaꞌe cimay yootidobaappe neeni ay tamaaray?

⁷ Yihoowakko simmanawu koyiyaageeta demmanawu cimati waatana danddayiyoonaa? Isppeenen deꞌiya Toomaasab giyo gubaaꞌe cimay yootidobaa akeeka. I 40⁠ppe dariya Yihoowa Markkati gubaaꞌiyaa simmanaadan maaddiis. Toomaasi hagaadan giis: “Koyro, ishanttinne michchontti shuggidaageeti deꞌiyo sohuwaa eriyaakkonne taani eta oychchays. Woy qassi shiiqota shiiqiyoogaa aggida uraa aassiyaageeti hassayiyaakkonne oychchays. Gubaaꞌiyan deꞌiyaageetuppe daroti etikka koyiyoobadan qoppiyo gishshawu maaddiyoogan ufayttoosona. Yaatada, taani ayyaanaaban shuggida ishantta woy michchontta oychchanawu biyo wode, eta naatubaanne eta dabbotubaa oychchays. Ayyaanaaban shuggida amaridaageeti bantta naata shiiqota kase ehoosona, qassi he naati kase aassiyaageeta gidennan aggokkona. Yihoowakko simmanaadan etawukka maadoy koshshana danddayees.”

YIHOOWA ATTUMA NAATINNE MACCA NAATI BAYIDAAGEETA ZAARETTIDI EHIITE

8. Bayida naꞌaabaa yootiya Luqaasa 15:17-24n deꞌiya leemisuwan, ba mooruwan zilꞌꞌettidi simmida naꞌaa A aaway waati oyqqidee?

⁸ Yihoowakko simmanawu koyiyaageeta maaddanawu nuussi koshshiya eeshshati aybee? Sooppe aggidi biida naꞌaabaa Yesuusi yootido leemisuwaappe nuuni tamaarana danddayiyo amaridabaa akeeka. (Luqaasa 15:17-24 nabbaba.) Naꞌay I keehi eeyya gidiyoogaa wurssettan akeekidoogaanne soo simmanawu kuuyidoogaa Yesuusi yootiis. Aaway ba naꞌaa demmidi woxxi biidi, qarettidi A qoommido gishshawu naꞌay ba aaway bana siiqiyoogaa eriis. Naꞌay kahan zilꞌꞌettido gishshawu, ba aawawu naꞌa geetettana bessennabadan awu siyettiis. Naꞌay bawu siyettiyaabaa ba aawawu yootido gishshawu aaway ba naꞌawu qarettiis. Yaatidi aaway ba naꞌay soo simmidoogan ufayttidoogaa bessanawu issi issibaa oottiis. Aaway A ashkkaradan gidennan siiqiyo naꞌadan oyqqiis. Hegaa bessanawu aaway gibiraa giigissiis, qassi ba mooruwan zilꞌꞌettidi simmida naꞌawu ubbaappe loꞌꞌiya maayuwaa ehiissiis.

9. Ayyaanaaban shuggidaageeti Yihoowakko simmanaadan maaddanawu nuussi deꞌana bessiya eeshshati aybee? (“Simmanawu Koyiyaageeta Nuuni Maaddiyo Ogiyaa” giya saaxiniyaa xeella.)

⁹ Yihooway he leemisuwan odettida aawaa mala. Ayyaanaaban shuggida ishanttanne michchontta I siiqees, qassi eti baakko simmanaadan koyees. Yihoowa leemisuwaa kaalliyoogan, simmanaadan nuuni eta maaddana danddayoos. Yaatanawu, nuuni danddayanchcha, qarettiyaageeta, maariyaageetanne siiqiyaageeta gidana koshshees. Nuuni he eeshshata bessana koshshiyoy aybissee, qassi waatidi bessana danddayiyoo?

10. Issi uri Yihoowakko zaarettidi shiiqanaadan maaddanawu nuuni danddayanchcha gidana koshshiyoy aybissee?

¹⁰ Issi uri Yihoowakko simmiyoogee daro wodiyaa ekkiyaaba gidiyo gishshawu, nuuni danddayanchcha gidana koshshees. Kase ayyaanaaban shuggidaageetuppe daroti eti zaarettidi Yihoowayyo haggaaziyoogaa doommanaappe kase gubaaꞌiyan deꞌiya cimatinne harati eta darotoo oychchana koshshidoogaa yootoosona. Tohossa Isiyan Arshsho baggan deꞌiya Nansso giyo michchiyaa hagaadan gaasu: “Gubaaꞌiyan deꞌiya mata laggiyaa tana keehi maaddaasu. A tana bayra michchodan siiqawusu. Nuuni kase issippe aattido loꞌꞌo wodiyaa A tana hassayissaasu. Taani ta qofaa yootiyo wode A danddayan ezggawusu, qassi tana zoranawu A mammottabeykku. A tana ubbatoo maaddiyoogan tumu lagge gidiyoogaa bessaasu.”

11. Lanccida uraa maaddanawu nuuni qarettana koshshiyoy aybissee?

¹¹ Issi uri lancciyoogee keehi sakkiya masunttaadan qohana danddayees. Qarettiyoogee he uri paxanaadan maaddana danddayiya wolqqaama xale mala. Ayyaanaaban shuggida amaridaageeti gubaaꞌiyan deꞌiya issi uran daro layttappe kase lanccidosona, qassi eti haꞌꞌikka keehi azzanoosonanne hanqqettoosona. Hegaa gaasuwan, eti Yihoowakko simmanawu koyokkona. Amaridaageeti naaqettidabadan qoppana danddayoosona. Eti yootiyoobaa ezzgiyaanne eta qofaa akeekiya uri etawu koshshana danddayees. (Yaaq. 1:19) Kase ayyaanaaban shuggida Maariya hagaadan gaasu: “Ta yootiyoobaa ezggiya, tana minttettiya, qassi tana loꞌꞌo zoriyaa zoriyaanne maaddiya uri taassi koshshiis.”

12. Yihoowa siiqoy wodoro mala gidiyoy ayba ogiyaanee?

¹² Yihooway ba asaa siiqiyo siiqoy wodoro mala gidiyoogaa Geeshsha Maxaafay yootees. Xoossaa siiqoy ayba ogiyan wodoro malee? Ha leemisuwaa beꞌa: Abbaa beetay keehi wolqqaamidi nena efiiddi deꞌiyaabadan qoppa; issi uri nena ashshanawu neekko shemppuwaa ashshiyaabaa olees. Hegee neeni abban mukkettennaadan oottiyo gishshawu, he maaduwaa neeni nashshiyoogee qoncce. SHin neeni paxa attanawu shemppuwaa ashshiyaabaa xallay gidenna. Haattay keehi irxxa gidiyo gishshawu, shemppuwaa ashshiyaa wolwoloy gakkana xayikko neeni paxa attakka. Neeyyo wodoruwaa olidi shemppuwaa ashshiya wolwoluwaakko nena goochchiya ura koshshees. Yihooway bayida Israaꞌeelatubaa hagaadan giis: ‘Eta taani siiquwaa wodoruwan goochchaas.’ (Hoo. 11:4) Xoossaayyo haggaaziyoogaa aggidaageeta, qassi metuwaaninne hirggan qohettidaageeta xeelliyaagan ha wodiyankka awu hegaadan siyettees. I eta siiqiyoogaa eti eranaadaaninne eta baakko ehaanawu koyees. Qassi Yihooway eta siiqiyoogaa eti eranaadan neeni maaddanawu I nena goꞌettana danddayees.

13. Harati Yihoowakko simmanaadan nu siiqoy maaddana danddayiyoogaa Pabla gakkidabay waati qonccissii?

¹³ Yihoowaykka nuunikka ayyaanaaban shuggidaageeta siiqiyoogaa nuuni etawu yootiyoogee keehi koshshiyaaba. Hagaappe kasetiya huuphe yohuwan abay odettido Pabloy ayyaanaaban 30⁠ppe dariya layttawu shuggiis. I hagaadan giis: “Issi galla maallado, taani ta sooppe kiyishin, keha gidida issi cima michchiyaa tanaara gayttada siiqiyoogaa bessiya ogiyan tana haasayissaasu. Taani qii naꞌadan yeekkaas. A tana haasayissanaadan Yihooway O kiittidoba taassi milatidoogaa taani issi yootaas. Taani Yihoowakko simmanawu kuuyidoy he wode.”

SHUGGIDAAGEETA SIIQUWAN MAADDITE

14. Luqaasa 15:4, 5n deꞌiya leemisoy yootiyoogaadan, henttanchchay bayida dorssaa demmi simmidi waatidee?

¹⁴ Ayyaanaaban shuggidaageeta nuuni aggennan maaddana koshshees. Yesuusi yootido leemisuwan qonccida bayida naꞌaadan, eti qofan qohettidaageeta gidana danddayoosona. Qassi eti Seexaanaa alamiyaappe banttana gakkidabaa gaasuwan ayyaanaaban shuggidaageeta gidana danddayoosona. Eti zaarettidi Yihoowaara dabbotanaadan nuuni eta maaddana koshshees. Yesuusi bayida dorssaabaa yootido leemisuwan, henttanchchay dorssaa hashiyan tookkidi wudiyaakko efiyoogaa qonccissiis. Henttanchchay bayida dorssaa koyiiddi wodiyaanne wolqqaa wurssiis. SHin, dorssaayyo daro maadoy koshshiyoogaa I erees. Dorssay barkka wudiyaakko guyye hemetti baana danddayenna gishshawu, I tookkidi A efiis.—Luqaasa 15:4, 5 nabbaba.

15. Yihoowakko simmanawu koyiya shuggidaageeta nuuni waati maaddana danddayiyoo? (“Maaddiya Miishshaa” giya saaxiniyaa xeella.)

¹⁵ Ayyaanaaban shuggidaageeti Yihoowayyo zaaretti haggaazanaadan etawu meto gididabaa eti xoonanaadan nuuni maaddanawu daro wodiyaanne wolqqaa koshshana danddayees. SHin, Yihoowa ayyaanaa, A Qaalaanne A dirijjitee giigissido xuufeta goꞌettidi ayyaanaaban minnanaadan nuuni eta maaddana danddayoos. (Roo. 15:1) Nuuni hegaadan waati maaddana danddayiyoo? Hegaadan oottiyoogan meezee deꞌiyo issi cimay hagaadan giis: “Yihoowayyo zaarettidi haggaazanawu kuuyida, ayyaanaaban shuggida daroti Geeshsha Maxaafaa xannaꞌana koshshees.”c Hegaa gishshawu, ayyaanaaban shuggida uraa neeni xaanꞌissanaadan issi cimay nena oychchiyo wode, neeni danddayikko he aawatettaa ufayssan ekkana koshshees. He cimay gujjidi hagaadan giis: “Xannaꞌissiya aassiyaagee ayyaanaaban shuggida uri ammanettiyoonne mammottennan haasayissiyo loꞌꞌo lagge gidana koshshees.”

SALUWANKKA SAꞌANKKA UFAYSSAA

16. Kiitanchchati nuna maaddanaagaa nuuni waati eriyoo?

¹⁶ Yihoowakko simmanawu koyiya, ayyaanaaban shuggidaageeta demmanaadan kiitanchchati nuna maaddiyoogaa bessiya, deꞌuwan hanida darobay deꞌees. (Ajj. 14:6) Leemisuwawu, ayyaanaaban shuggida Silviyo giyo Ekuwadoren deꞌiya ishay gubaaꞌiyaa simmanawu bana maaddanaadan Yihooway issi ura kiittana mala woossiis. I woossishin, A karee qoxettiis. Naaꞌꞌu cimati A penggen deꞌoosona. Eti A oychchanawu biido wode, koshshiyaaban A maaddiyoogaa doommidoogan ufayttidosona.

17. Ayyaanaaban shuggidaageeta maaddiyoogee ayba anjjo demissii?

¹⁷ Ayyaanaaban shuggidaageeti Yihoowakko simmanaadan nuuni maaddiyoogan keehi ufayttana. Ayyaanaaban shuggidaageeta loytti maaddanawu baaxetiya Salvador giyo aqinyee yootidobaa akeeka: “Taani issi issitoo ufayttada yeekkiyoogaa agganawu metootays. Yihooway Seexaanaa alamiyaappe ba alꞌꞌo dorssata ashshiyoogaanne ha oosuwan taani aara hashetiyo maatay taayyo deꞌiyoogaa qoppiyoogee tana keehi ufayssees.”—Oos. 20:35.

18. Neeni ayyaanaaban shuggida ura gidikko, ay ammanettana danddayay?

¹⁸ Neeni ayyaanaaban shuggida ura gidikko, Yihooway nena haꞌꞌikka siiqiyoogaa ammanetta. I neeni baakko simmanaadan koyees. Neeni akko simmanawu baaxetana koshshees. Gidoppe attin, Yesuusi yootido leemisuwan odettida aawaagaadan, Yihooway neeni simmanaagaa naageesinne neeni simmiyo wode I ufayssan mokki ekkees.