Nena Ziqqi Oottada Ashkketettan Ne Xoossaara Hemetta

1. Yihoowa ashkketettaa xeelliyaagan Daawiti woygidee?

NUUNI tumu Yihooway ashkke gaana danddayiyoo? Ee, danddayoos. Daawiti issi wode hagaadan giis: “Tana ashshiya ne gonddalliyaa neeni taayyo immadasa; ne lo77o ohettai [“ne ashkketettay,” NW] tana gitayees.” (2 Sam. 22:36; Maz. 18:35) Daawiti hegaa xaafido wode, hananabaa yootiya Sameeli sinttappe Israaꞌeela kawo gidana ura tiyanawu bantta soo yiido wodiyaa hassayennan waayi aggana. Daawiti hosppun naatuppe wurssetta kaalo naꞌa gidikkonne, Yihooway Kawuwaa Saaꞌoola sohuwan sunttanawu A dooriis.—1 Sam. 16:1, 10-13.

2. Nuuni ha huuphe yohuwan ay beꞌanee?

² Mazamure 113y, “I salotanne sa7aa xeellanau duge hokkees. I hiyyeesaa buhiyaappe xoqqu oottees; Metootanchchaakka . . . denttees, Denttidi . . . halaqatuura utissees” yaagidi Yihoowabaa odiyoobaa Daawiti maayettiyoogee qoncce. (Maz. 113:6-8) Yihooway ashkke gidiyoogaa waati bessidaakko pilggiyoogan, ha huuphe yohuwan koyro he eeshshaabaa keehi koshshiyaabaa tamaarana. Kaallidi, nuna ziqqi oottiyoogaa xeelliyaagan Kawuwaa Saaꞌoolappe, hananabaa yootiya Daaneelappenne Yesuusappe ay tamaaranaakko beꞌana.

YIHOOWA LEEMISUWAAPPE AY TAMAARANA DANDDAYIYOO?

3. Yihooway nunaara gayttidaagan waatii, qassi hegee ay bessii?

³ Yihooway nagaranchcha asaara gayttidaagan oottidobay I ashkke gidiyoogaa bessees. I nu goynuwaa ekkiyoogaa xalla gidennan, nuna ba dabbodankka xeellees. (Yaaq. 2:23) Yihooway nuuni aara dabbottana mala, kasetidi nu nagaraa gishshawu ba Naꞌaa yarshsho oottidi immiis. I nuussi keehi qarettiyoogaa bessiis!

4. Yihooway nuussi ay immidee, qassi aybissi?

⁴ Yihooway ashkke gidiyoogaa bessido harabaa qoppa. Yihooway nuna Medhdhidaagaa gidiyo gishshawu, nu waani deꞌanaakko kuuyana danddayennaadan oottidi medhdhana danddayees. SHin I hegaadan oottibeenna. I nuna ba leemisuwan medhdhiis; qassi koyidobaa dooriyo maataa nuussi immiis. Nuuni laafa asati A siiqidi qassi awu azazettiyoogee nuna goꞌꞌiyoogaa akeekidi wozanappe ayyo haggaazanaadan koyees. (Zaa. 10:12; Isi. 48:17, 18) Yihooway ashkke gidiyo gishshawu keehippe galatoos!

5. Nuuni nuna ziqqi oottanaadan Yihooway waati tamaarissii? (Koyro sinttan deꞌiya misiliyaa xeella.)

⁵ Yihooway nunaara gayttidaagan oottiyooban nuuni nuna ziqqi oottanaadan tamaarissees. Yihooway saluwaaninne saꞌan deꞌiya ooppenne aaruwan aadhdhida eranchcha. Gidikkokka, I haratu qofaa siyanawu eeno giis. Leemisuwawu, Yihooway ubbabaa medhdhiyo wode ba Naꞌaa banaara ootissiis. (Lee. 8:27-30; Qol. 1:15, 16) Qassi Yihooway ubbaa danddayiyaagaa gidikkokka, I haratussi maataa immees. Leemisuwawu, I ba Kawotettan Yesuusa Kawo oottidi sunttiis; qassi Yesuusaara issippe haarana 144,000 asatussi I maataa immana. (Luq. 12:32) Yesuusi Kawonne Qeese Ubbatu halaqaa gidanaadan Yihooway loohissidoogee qoncce. (Ibr. 5:8, 9) Yesuusaara issippe haaranaageeti banttawu imettida oosuwaa polanaadankka I loohissana; shin eti he aawatettaa waati poliyaakko ubbabaa I kaallenna. Yaatiyoogaappe, I ba sheniyaa eti polanaagaa ammanettees.—Ajj. 5:10.

6-7. Haratuyyo aawatettaa immiyoogaara gayttidaagan saluwan deꞌiya nu Aawaappe ay tamaarana danddayiyoo?

⁶ O maadoynne koshshenna, saluwan deꞌiya nu Aaway aawatettaa haratussi immikko, hegaappe aaruwan nuuni oottana koshshees! Leemisuwawu, neeni so asawu huuphee woy gubaaꞌe cimee? Haratussi aawatettaa immiyoogaaninne eti oosuwaa waati oottiyaakko ubbabaa kaallennan aggiyoogan Yihoowa milata. Neeni Yihoowa leemisuwaa kaalliyo wode oosoy polettiyoogaa xalla gidennan, harata neeni loohissananne eti banttanan ammanettidi oottanaadan maaddana. (Isi. 41:10) Aawatettay deꞌiyoogeeti Yihoowappe harabaa ay tamaarana danddayiyoonaa?

⁷ Kiitanchchatu qofaa siyanawu Yihooway koyiyoogaa Geeshsha Maxaafay yootees. (1 Kaw. 22:19-22) Yelidaageetoo, intte Yihoowa leemisuwaa waati kaallana danddayeetii? Koshshiyo wodiyan, issi oosuwaa waati oottana bessiyaakko intte naati bantta qofaa yootanaadan oychchite. Qassi eti yootidobay haniyaagaa gidikko, eti giidoogaadan oottite.

8. Yihooway Abrahaamanne Saaro danddayan waati oyqqidee?

⁸ Yihooway ashkke gidiyoogaa bessiyo hara ogee danddayanchcha gidiyoogaana. Leemisuwawu, Yihooway bawu haggaaziyaageeti I kuuyidobaa xeelliyaagan bonchchuwan oychchiyo wode danddayanchcha gidiyoogaa bessees. Yihooway Sadoomanne Gamoora giyo katamata xayssanawu kuuyidobaa xeelliyaagan Abrahaami bana qofissidabaa yootiyo wode A qofaa siyiis. (Doo. 18:22-33) Qassi Yihooway Abrahaama machchee Saariira gayttidaagan oottidobaa hassaya. Saara cima gidikkonne naꞌa yelanaagaa Yihooway yootin A miiccido wode I hanqqettibeenna woy yiillotibeenna. (Doo. 18:10-14) SHin, I Saaro bonchchuwan haasayissiis.

9. Yelidaageetinne cimati Yihoowa leemisuwaappe ay tamaarana danddayiyoonaa?

⁹ Yelidaageetoonne cimatoo, Yihoowa leemisuwaappe ay tamaarana danddayeetii? Intte naati woy gubaaꞌiyan deꞌiya amaridaageeti intte kuuyidobaa maayettennan ixxikko waateetii? Eti odiyoobay bala gidiyoogaa sohuwaara yooteetii? Woy eta qofaa akeekanawu maleetii? Aawatettay deꞌiyoogeeti Yihoowa leemisuwaa kaalliyo wode so asaynne gubaaꞌe goꞌettiyoogee qoncce. Hanno gakkanawu, nuuni nuna ziqqi oottiyoogaara gayttidaagan Yihoowappe ay tamaarana danddayiyaakko beꞌida. Xoossaa Qaalan etabay odettido asatu leemisuwaappe ashkketettaabaa ay tamaarana danddayiyaakko haꞌꞌi ane beꞌoos.

HARATU LEEMISUWAAPPE AY TAMAARANA DANDDAYIYOO?

10. Yihooway nuna tamaarissanawu haratu leemisuwaa waati goꞌettii?

¹⁰ Yihooway nu gita ‘asttamaare’ gidiyoogaadan, nuna tamaarissanawu ba Qaalan leemiso gidiyaageetubaa xaafissiis. (Isi. 30:20, 21) Ashkketettaanne Xoossaa ufayssiya hara eeshshata bessida asatubaa Geeshsha Maxaafay yootiyo taariketuppe nuuni tamaaroos. Hegaa mala loꞌꞌo eeshshata bessennan aggida asatubaappekka tamaaroos.—Maz. 37:37; 1 Qor. 10:11.

11. Saaꞌooli iitabaa oottidoogaappe nuuni ay tamaariyoo?

¹¹ Kawuwaa Saaꞌoola gakkidabaa qoppa. I yelagatettan ba abbiyaa pacaa eriya asa; ubba I aawatettaa ekkanawu mammottiis. (1 Sam. 9:21; 10:20-22) SHin guyyeppe, I otorettiyaagaa gidiis, qassi I oottana bessenna oosuwaa oottiis. I kawo gididi takkennan he iita eeshshaa bessiyoogaa doommiis. Issitoo, I hananabaa yootiya Sameela naagiyo wode danddayennan aggiis. Saaꞌooli bana ziqqi oottidi Yihooway ba asaa gishshawu issibaa oottanaagaa ammanettiyoogaa aggidi, I oottana bessennaba gidiyoogaa erikkonne, xuuggiyo yarshshuwaa shiishshiis. Hegaappe denddidaagan, Saaꞌooli Yihoowan nashettibeenna, qassi wurssettan Yihooway kawotettaappe A diggiis. (1 Sam. 13:8-14) Nuuni naagettanaadan odettida ha leemisuwaappe tamaaridi, nuussi maatay imettibeennabaa oottennan aggikko, akeekanchcha gidoos.

12. Daaneeli bana ziqqi oottiyoogaa waati bessidee?

¹² Saaꞌooli oottido kaallana bessennabaappe dummatiya, kaallana bessiya loꞌꞌobaa oottida hananabaa yootiya Daaneela hanotaa qoppa. Daaneeli ba deꞌo laytta ubban bana ziqqi oottidi deꞌiisinne Yihoowa kaaletuwaa ubbatoo oychchiis. Leemisuwawu, Daaneeli Naabukadanaxoori aymottido aymuwaa birshshanaadan Yihooway A goꞌettido wode, I hegaa ba eran birshshidoogaa yootibeenna. SHin, I bana ziqqi oottidi Yihooway bonchchettanaadaaninne sabettanaadan oottiis. (Dane. 2:26-28) Hegaappe nuuni ay tamaariyoo? Ishantti nu haasayaa dosikko woy nuuni haggaazuwan loꞌꞌo ayfiyaa demmikko, nuuni bonchcho ubbaa Yihoowayyo immana bessees. Yihooway maaddennan nuuni he oosota oottana danddayennaagaa nuna ziqqi oottidi ammanana bessees. (Pili. 4:13) Nuuni hegaadan oottiyo wode, Yesuusa leemisuwaakka kaalloos. Waatidi?

13. Yesuusi Yohaannisa 5:19, 30n yootidobaappe, nuna ziqqi oottiyoogaabaa ay tamaarana danddayiyoo?

¹³ Yesuusi wottiyoobi baynna Xoossaa Naꞌaa gidikkonne, I Yihoowan ammanettiis. (Yohaannisa 5:19, 30 nabbaba.) I saluwan deꞌiya ba Aawaa maataa ekkanawu mule mali erenna. Piliphphisiyuusa 2:6y Yesuusi “Xoossaa keeni wolqqan gidanau mali be7iyoogaa bessiyaabaadan” qoodibeennaagaa yootees. Azazettiya Naꞌaa gidida Yesuusi bawu danddayettennabaa akeekiisinne ba Aawaa maataa bonchchiis.

14. Yesuusi bawu maati baynnabaa immanaadan oyshettido wode woygidee?

¹⁴ Immanawu Yesuusawu maati baynnabaa Yaaqoobi, Yohaannisinne eta aayyiyaa oychchido wode, Yesuusi oottidobaa qoppa. Yesuusi Kawotettan appe ushachcha baggaaraanne haddirssa baggaara uttana danddayiyay oonakko dooriyay saluwan deꞌiya ba Aawaa xalla gidiyoogaa sohuwaara yootiis. (Maa. 20:20-23) Yesuusi bawu danddayettennabaa akeekiyoogaa bessiis. I bana ziqqi oottiyaagaa. Oottanaadan Yihooway aawatettaa immibeenna aybanne Yesuusi oottibeenna. (Yoh. 12:49) Nuuni Yesuusa leemisuwaa waati kaallana danddayiyoo?

15-16. Nuuni 1 Qoronttoosa 4:6n deꞌiya zoriyaa oosuwan waati peeshshana danddayiyoo?

¹⁵ Geeshsha Maxaafan, 1 Qoronttoosa 4:6n deꞌiya zoriyaa oosuwan peeshshiyoogan nuuni Yesuusa leemisuwaa kaalloos. Xiqisee, “Xoossaa maxaafan xaafettidaagaa bonchcha” yaagees. Hegaa gishshawu, harati zoriyaa nuna oychchiyo wode, eti nu qofaa ekkanaadan wolqqanttana woy he allaalliyaa xeelliyaagan loytti qoppennan mule haasayana bessenna. SHin Geeshsha Maxaafaaninne nu xuufetun deꞌiya zoriyaa eti akeekanaadan nuuni maaddana koshshees. Yaatiyoogan, nuuni ubbabaa wurssi erennaagaa akeekiyoogaa bessoos. Yaatiyo wode, Yihoowa zoree nuugaappe ubbatoo aadhdhiyoogaa akeekiyo gishshawu, nuna ziqqi oottiyoogaa bessoos.—Ajj. 15:3, 4.

¹⁶ Nuna ziqqi oottiyoogee Yihoowa bonchchissiyoogaa bolli, yaatana koshshiyo hara gaasotikka deꞌoosona. Nuna ziqqi oottiyoogee ufayttanaadaaninne haratuura sarotettan deꞌanaadan waati maaddiyaakko ane beꞌoos.

NUNA ZIQQI OOTTIYOOGEE LOꞌꞌO GIDIYOY AYBISSEE?

17. Banttana ziqqi oottiya asati ufayttiyoy aybissee?

¹⁷ Nuna ziqqi oottiyo wode darotoo nuuni ufayttana danddayoos. Aybissi? Nuuni oottana danddayennabay deꞌiyoogaa ammaniyo wode harati nuna maaddiyoobaa aybanne galatidinne ufayttidi ekkiyo gishshataassa. Leemisuwawu, inchchirichchay oyqqido tammu asata Yesuusi pattido wode hanidabaa qoppa. Etappe issoy ba wolqqan aynne oottana danddayennabaa Yesuusi oottidi, iita harggiyaappe A pattido gishshawu he bitaniyaa xallay galatanawu simmiis. Bana ziqqi oottiya he bitanee demmido maaduwaa gishshawu galatiis; qassi hegawu Xoossaa bonchchiis.—Luq. 17:11-19.

18. Nuna ziqqi oottiyoogee haratuura maayettidi deꞌanaadan waati maaddii? (Roome 12:10)

¹⁸ Banttana ziqqi oottiyaageeti darotoo haratuura sarotettan deꞌananne etawu mata lagge gidana danddayoosona. Aybissi? Haratussi loꞌꞌo eeshshati deꞌiyoogaa akeekiyoogaaninne etan ammanettiyoogan eti ufayttiyo gishshataassa. Banttana ziqqi oottiyaageeti harati banttawu imettida oosuwaa loytti oottiyo wode ufayttoosona, qassi sohuwaara eta galatoosonanne bonchchoosona.—Roome 12:10 nabbaba.

19. Nuuni otorettana bessenna amarida gaasoti aybee?

¹⁹ SHin, otorettiya asati banttawu sabettanawu koyiyo gishshawu, harata galatanawu metootoosona. Eti darotoo banttana haratuura geeddarssoosona qassi haratuppe aadhdhanawu baaxetoosona. Harata loohissiyoogaappenne etawu aawatettaa immiyoogaappe, eti hagaadan gaana danddayoosona: ‘Issi uri issibay I koyiyoogaadan maara oosettanaadan koyikko, hegaa baayyo oottana koshshees.’ Otorettiya uri darotoo haratuppe aadhdhanawu koyeesinne eti aagaappe loꞌꞌobaa oottiyo wode qanaatees. (Gal. 5:26) Hegaa mala asatuura harati dabbotanawu koyokkona. Nuuni otorettiyoogaa akeekikko, he iita eeshshay nu wozanan xaphuwaa yeddennaadan ‘nu qofaa muumeera dummayanawu’ Yihooway nuna maaddana mala A wozanappe woossana bessees.—Roo. 12:2.

20. Nuuni nuna ziqqi oottana koshshiyoy aybissee?

²⁰ Yihooway nuussi leemiso gidido gishshawu keehi galatoos! I ba ashkkaratuura gayttidaagan oottidobaappe ashkke gidiyoogaa akeekida; qassi nuuni A leemisuwaa kallana koyoos. Hegaa bollikka, banttana ziqqi oottidi Yihoowawu haggaazidaageetu leemisuwaa kaallanawu koyoos. Nuuni ubbatoo awu bessiya bonchchuwaanne sabaa immiyaageeta gidoos. (Ajj. 4:11) Nuuni hegeeta ubbaa oottikko, bana ziqqi oottiya asa Yihooway siiqiyo gishshawu merinawu A dabbo gidana danddayoos.