Xoossay Woosa Ubbaa Zaarennay Aybissee?

“Intte woossiyo wode, . . . mela [issibaa zaari zaaridi] biddoppite.”—Maatiyoosa 6:7.

Yihooway nuuni kase hassayiyo woosata zaaretti zaaretti woossanaadan woy woosaa maxaafaappe hegaa nabbabanaadan koyenna. I nuuni wozanappe haasayanaadan koyees. Issi laggee gallassan gallassan neeyyo issi malabaa zaaretti zaaretti yootiyaakko, niyo aybi siyettanaakko qoppa. Loꞌꞌo laggee aynne ashshennan wozanappe haasayees. Nuuni saluwan deꞌiya nu Aawaakko wozanappe woossiyo wode hegee nuuni A nu dabbodan xeelliyoogaa bessees.

“Xoossaa intte woossiyo wode, . . . intte qofai iita gidiyo gishshau demmekketa.”—Yaaqooba 4:3.

Xoossay nuuni oottanaadan woy nuussi deꞌanaadan koyennabaa eriiddi A oychchiyaaba gidikko, I nu woosaa zaarennaagaa eroos. Leemisuwawu, ceeriyaa kaaꞌiya issi uri ceeriyan xoonidi miishshaa maanaadan bana maaddana mala Xoossaa woossiyaakko, Yihooway A woosaa zaaranee? I nuuni yaaretennaadaaninne tuma gidennaban, hegeekka qaadan ammanennaadan geeshshidi yootiis. (Isiyaasa 65:11; Luqaasa 12:15) Yihooway hegaa mala woosaa zaarees giidi mule naagokko! Nu woosaa Xoossay zaaranaadan koyikko, nu woossiyoobay Geeshsha Maxaafan I yootidobaara maayiyakkonne shaakki erana bessees.

“Higgiyaa siyanaappe giidi, ba haittaa wora zaariya uraa woosai GODAA sheneyiyaabaa.”—Leemiso 28:9.

Beni wodiyan, Xoossay ba kessido xillotettaa higgiyawu azazettibeenaageetu woosaa zaaribeenna. (Isiyaasa 1:15, 16) Xoossay laamettibeenna. (Milkkiyaasa 3:6) Nuuni Xoossay nu woosaa zaaranaadan koyikko, A higgiyawu azazettanawu nuuyyo danddayettida ubbabaa oottana bessees. Gidoppe attin, nuuni balabaa kase oottidaageeta gidikko shin? Hegaa giyoogee Yihooway nu woosaa mule siyenna giyoogee? CHiikka! Nu oottido balaa gishshawu maarotaa oychchiyaabanne A ufayssanawu nuussi danddayettida ubbabaa oottiyaaba gidikko, Xoossay siiquwan nuussi atto gaana.— Oosuwaa 3:19, 20.