Ubba Asay Sinttappe Ufayssiya Deꞌuwaa Deꞌanawu Koyees
Sinttappe ay mala deꞌuwaa deꞌanawu koyay? Daro asaagaadan, neeninne ne so asay sinttappe ufayssiya ishalo deꞌuwaa, tumu ufayssaa, payyatettaanne sarotettaa demmanawu koyiyoogee qoncce.
SHin daro asay sinttappe hegaa mala deꞌuwaa deꞌanaagaa sirees. Korona harggiyaa mala asay qoppennan gakkiyaabati asa deꞌuwaa keehi qohoosonanne hiyyeesatettaa kaalettoosona; ubba qassi daroti hayqqanaadan oottoosona. Hegaappe denddidaagan, eti sinttappe ufayssiya deꞌuwaa deꞌanaagaa siroosona.
Asay sinttappe hananabaa erenna gishshawu, ufayssiya deꞌuwaa demmanawu maaddiyaabaa keehi koyees. Issoti issoti qaadaa ammanoosona. Daro asay, xoqqa timirttiyaa tamaariyoogeenne duretiyoogee ufayssiya deꞌuwaa deꞌanawu maaddees giidi qoppees. Harati qassi loꞌꞌo asa gidiyoogaa xallay ufayssiya deꞌuwaa deꞌanawu maaddees giidi qoppoosona.
Qommoora odettidabati neeni sinttappe ufayssiya deꞌuwaa deꞌanaadan maaddanee? Neeni hegaa zaaruwaa demmanawu kaalliya oyshata loytta qoppana koshshees:
Sinttappe ne deꞌoy ufayssiyaagaa gidanaadan aybi maaddanee?
Ufayssiya deꞌuwaa deꞌanawu timirtteenne miishshay maaddana danddayii?
Ufayssiya deꞌuwaa deꞌanawu loꞌꞌo asa gidiyoogaa xallay maaddii?
Sinttappe ufayssiya deꞌuwaa deꞌanawu maaddiya ammanttiya kaaletuwaa awuppe demmana danddayay?
Ha Wochchiyo Keelaa maxeetee neeni he oyshatu zaaruwaa demmanaadan maaddana.