Ufayssiya Deꞌuwaa Demmanawu Haꞌꞌi Doorana Danddayaasa

Xoossaa Yihooway baayyo goynniyaageeti ufayssiya deꞌuwaa demmanawu oottana koshshiyaabaa xeelliyaagan 3,500 gidiya layttaappe kase hagaadan giis: “Taani intte sinttan de7uwaanne haiquwaa, anjjuwaanne qanggettaa wottidoogau hachchi saluwaanne sa7aa intte bolli markkayana; simmi inttenne intte zaree de7uwan de7ana mala, de7uwaa doorite.”—Zaarettido Wogaa 30:19.

Eti ufayssiya deꞌuwaa demmanawu likkebaa doorana koshshiis. Ha wodiyan nuunikka etaagaadan doorana koshshees. Ufayssiya deꞌuwaa demmiyo ogiyaa xeelliyaagan Geeshsha Maxaafay hagaadan gees: ‘Yihoowa intte Xoossaa siiqite; A qaalaa siyite.’—Zaarettido Wogaa 30:20.

YIHOOWA SIIQANAWUNNE I YOOTIYOOBAA SIYANAWU WAATANA DANDDAYIYOO?

GEESHSHA MAXAAFAAPPE TAMAARA: Neeni Yihoowa siiqanawu, koyro Geeshsha Maxaafaappe abaa tamaarana koshshees. Hegaadan oottiyo wode, I neeni loꞌꞌobaa demmanaadan koyiya siiqiya Xoossa gidiyoogaa akeekaasa. I neeyyo “qoppiyo gishshau” baakko woossanaadan nena shoobbees. (1 PHeexiroosa 5:7) Neeni akko shiiqanawu baaxetikko, ‘ikka neekko shiiqanaagaa’ Geeshsha Maxaafay yootees.—Yaaqooba 4:8.

TAMAARIDOBAA OOSUWAN PEESHSHA: Xoossay yootiyoobaa siyiyoogaa giyoogee, Geeshsha Maxaafan deꞌiya hayyoy deꞌiyo A kaaletuwaa kaalliyoogaa giyoogaa. Neeni hegaadan oottikko, “neeyyo ubbabaikka injjetananne giigana.”—Yaasa 1:8.