Cimatussi Gubaaꞌiyan Deꞌiya Aawatettaa

1. Yihoowa asaa giddon issippetettay deꞌiyo issi gaasoy aybee?

YIHOOWA keettaa asa gididoogee nuna ufayssees. Nuuni sarotettaaninne issippetettan deꞌiyoy aybissee? Nuuni Yihooway amarida aawatettaa immidoogeeta bonchchiyoogee hegawu issi gaaso. Yihooway immido aawatettaa nuuni loytti akeekiyo wode, nu issippetettay minnees.

2. Nuuni ha huuphe yohuwan zaarana oyshati awugeetee?

² Gubaaꞌiyan aawatettay deꞌiyoogeeti oonakko nuuni ha huuphe yohuwan xannaꞌana. Qassi ha oyshata zaarana: Michchonttussi imettida oosoy aybee? Ishantti ubbay michchonttu ubbaa bolli tumukka aawatiyoonaa? Cimati ishanttunne michchonttu bolli aawatiyoogee issi aaway ba machcheenne ba naatu bolli aawatiyoogaara issi malee? Nuuni michchontta waati xeellana koshshiyaakko koyro xannaꞌana.

NUUNI MICHCHONTTA WAATI XEELLANA KOSHSHII?

3. Nu michchontti oottiyoobaa kaseegaappe aaruwan nashshanaadan nuna maaddanabay aybee?

³ Bantta so asaa xeelliyoogan, mishiraachchuwaa sabbakiyoogaaninne gubaaꞌiyan harata maaddiyoogan minni oottiya michchontta nuuni keehi nashshoos. Yihoowaynne Yesuusi eta waati xeelliyaakko nuuni qoppiyo wode, eta kaseegaappe aaruwan nashshana. Nuuni kiitettida PHawuloosi macca asaa waati oyqqidaakko akeekiyoogankka, eta waati oyqqana koshshiyaakko tamaaroos.

4. Yihooway macca asaakka attuma asaakka nashshiyoogaa Geeshsha Maxaafay waati qonccissii?

⁴ Yihooway macca asaakka attuma asaakka nashshiyoogaa Geeshsha Maxaafay qonccissees. Leemisuwawu, kiitettidaageetu wodiyan macca asaykka attuma asaykka dumma dumma qaalan haasayiyoogaa mala maalaaliyaabaa oottanaadan Yihooway ba ayyaanaa etawu immidoogaa Geeshsha Maxaafay yootees. (Oos. 2:1-4, 15-18) Macca asaykka attuma asaykka geeshsha ayyaanan tiyettiis, qassi eti Kiristtoosaara haarana. (Gal. 3:26-29) Macca asaykka attuma asaykka saꞌan merinaa deꞌuwaa woytuwaa demmana. (Ajj. 7:9, 10, 13-15) Qassi mishiraachchuwaa sabbakiyoonne tamaarissiyo oosoy macca asawukka attuma asawukka imettiis. (Maa. 28:19, 20) Leemisuwawu, Oosuwaa maxaafay PHirisqqilo giyo michcheebaa yootees. Anne I azinay Aqiili keehi tamaarida Aphiloosa giyo bitaniyawu tumaa loytti qonccissidosona.—Oos. 18:24-26.

5. Luqaasa 10:38, 39, 42​y Yesuusi macca asaa bonchchiyoogaa waati bessii?

⁵ Yesuusi macca asaa bonchchiis. Macca asay attuma asaappe laafa giidi qoppiya Parisaawetu leemisuwaa I kaallibeenna. Eti asaa sinttan macca asaara haasayokkona, qassi Geeshsha Maxaafaabaa etawu yootokkona. SHin Yesuusi keehi koshshiya tumaa macca asaakka attuma asaakka tamaarissiis.b (Luqaasa 10:38, 39, 42 nabbaba.) Qassi I sabbakanawu biyoosaa macca asata ekkidi biis. (Luq. 8:1-3) Hegaa bollikka, Yesuusi hayquwaappe denddidoogaa macca asati kiitettidaageetussi yootanaadan oottidi eta bonchchiis.—Yoh. 20:16-18.

6. Kiitettida PHawuloosi macca asaa bonchchiyoogaa waati bessidee?

⁶ Kiitettida PHawuloosi Ximootiyoosi macca asaa bonchchanaadan ayyo yootiis. PHawuloosi “cima maccaasa [ba] aayeedan” qassi “yelaga maccaasa [ba] michcheedan” bonchchanaadan Ximootiyoosawu yootiis. (1 Xim. 5:1, 2) PHawuloosi Ximootiyoosa ammanoy minnanaadan darobaa oottikkonne, “geeshsha maxaafata” Ximootiyoosa koyro tamaarissidaageeti A aayyiyoonne A aayee aayyiyo gidiyoogaa yootiis. (2 Xim. 1:5; 3:14, 15) PHawuloosi Roome Kiristtaanetussi xaafido dabddaabbiyan michchonttu sunttaa xeesidi eta sarotiis. PHawuloosi michchontti oottidobaa akeekiis, qassi eti oottidobawu eta galatiis.—Roo. 16:1-4, 6, 12; Pili. 4:3.

7. Nuuni haꞌꞌi beꞌana oyshati awugeetee?

⁷ Geeshsha Maxaafay macca asay attuma asaappe laafa geennaagaa hagaappe kasetiya menttoti qonccissidosona. Siiqiyaanne keha nu michchontti gubaaꞌiyaa keehi maaddoosona, qassi gubaaꞌiyan sarotettaynne issippetettay deꞌanaadan eti maaddiyoogaa cimati ammanettoosona. SHin kaallidi deꞌiya oyshata nuuni zaarana koshshees: Issi michchiyaa issi issitoo ba huuphiyaa kammanaadan Yihooway koyiyoy aybissee? Gubaaꞌiyaa cimanne gubaaꞌiyaawu oottiyaageeta gidiyaageeti ishanttu xalla gidiyo gishshawu, gubaaꞌiyan ishantti ubbay michchonttu ubbaa bolli aawatoosona giyoogee?

ISHANTTI UBBAY MICHCHONTTU UBBAA BOLLI AAWATIYOONAA?

8. Efisoona 5:23y yootiyoogaadan, ishanttu ubbawu michchonttu ubbaa bolli aawatettay deꞌii? Qonccissa.

⁸ Gubaaꞌiyan deꞌiya ishantti ubbay michchonttu ubbaa bolli aawatiyoonaa? Akkay. (Efisoona 5:23 nabbaba.) Son azinay ba machchee bolli aawatees. Xammaqettida attuma naꞌay ba aayee bolli aawatenna. (Efi. 6:1, 2) Qassi gubaaꞌiyan cimati ishanttunne michchonttu bolli amaridaban aawatoosona. (1 Tas. 5:12; Ibr. 13:17) Bana yelidaageetuura deꞌenna, azina gelabeenna michchiyaa shin? A bana yelidaageeta bonchchikkonne, I aawaayyo I bolli aawatettay deꞌenna. Qassi A cimata bonchchikkokka, gubaaꞌiyan deꞌiya ishanttuugaadan iyyookka huuphe gidiyay Yesuusa xalaala.

9. Michchontti issi issitoo bantta huuphiyaa kammana koshshiyoy aybissee?

⁹ Gidoppe attin, tamaarissuwaaninne goynuwan gubaaꞌiyan sintta xeera gidanaadan Yihooway attuma asata sunttidoogeenne macca asawu he maataa immibeennaagee tuma. (1 Xim. 2:12) Aybissi? I attuma asaa bolli Yesuusawu aawatettaa immidoogaadan, gubaaꞌee maara deꞌanaadan hegaadan oottiis. Issi michchiyaa issi ishay oottiyoobaa oottana koshshikko, A ba huuphiyaa kammanaadan Yihooway koyees.c (1 Qor. 11:4-7) Michchontti yaatanaadan Yihooway koyiyoy eti banttana laafa asadan xeellanaadaana gidennan, I kessido maaraa bonchchanaadaana. Haꞌꞌi nuuni ha oyshaa zaarana: Bantta keettaa ayssiyaageetunne gubaaꞌe cimatu aawatettay aybee?

BANTTA KEETTAA AYSSIYAAGEETUNNE CIMATU AAWATETTAA

10. Issi cimay gubaaꞌiyawu higgiyaa kessanawu issi issitoo koyana danddayiyoy aybissee?

¹⁰ Cimati Kiristtoosa siiqoosona; qassi eti heemmanaadan Yihoowaynne Yesuusi eta oychchido ‘dorssatakka’ siiqoosona. (Yoh. 21:15-17) Issi cimay I gubaaꞌiyaa heemmiyo gishshawu, bana gubaaꞌiyan deꞌiyaageetussi aawa mala giidi qoppana danddayees. Yaatiyo gishshawu, I ba keettaa ayssiya uri eta naaganawu higgiyaa kessana bessikko, issi cimaykka Xoossaa asaa naaganawu higgiyaa kessana bessees giidi qoppana danddayees. Qassi amarida ishanttinne michchontti banttabaa cimati kuuyanaadan oychchiyoogan, cimati yaatanaadan minttettana danddayoosona. SHin gubaaꞌiyaa cimatunne bantta keettaa ayssiyaageetu aawatettay issi malee?

11. Bantta keettaa ayssiyaageetu aawatettay cimatu aawatettaara aybin issi malee?

¹¹ Cimatu aawatettay bantta keettaa ayssiyaageetu aawatettaara amaridaban issi mala gidiyoogaa kiitettida PHawuloosi yootiis. (1 Xim. 3:4, 5) Leemisuwawu, so asay banttana ayssiyaagawu azazettanaadan Yihooway koyees. (Qol. 3:20) Qassi I gubaaꞌiyan deꞌiyaageeti cimatussi azazettanaadan koyees. Bantta keettaa ayssiyaageetikka gubaaꞌe cimatikka eti heemmiyoogeeti Yihoowa siiqanaadan eta tamaarissoosona. Naaꞌꞌaykka eta aawatettaa giddon deꞌiyaageeti banttana harati siiqiyoogaa ammanettanaadan oottoosona. Cimati ba keettaa ayssiya loꞌꞌo asadan gubaaꞌiyan deꞌiya metootidaageeta maaddoosona. (Yaaq. 2:15-17) Hegaa bollikka, Yihooway ba higgiyaa harati azazettana mala cimatinne bantta keettaa ayssiyaageeti maaddanaadan koyees. Qassi I eti Geeshsha Maxaafan ‘xaafettidabaa’ kanttennaadan yootiis.—1 Qor. 4:6.

12-13. Roome 7:2y qonccissiyoogaadan, bantta keettaa ayssiyaageetu aawatettay cimatu aawatettaappe aybin dummatii?

¹² SHin, issi cimaa aawatettay ba keettaa ayssiya ura aawatettaappe keehi dummatees. Leemisuwawu, Yihooway cimati pirddanaadan sunttiis; qassi bantta nagaraappe simmennaageeta gubaaꞌiyaappe bohanaadan I etawu aawatettaa immiis.—1 Qor. 5:11-13.

¹³ SHin Yihooway bantta keettaa ayssiyaageetussi cimatussi immibeenna aawatettaa immiis. Leemisuwawu, bantta keettaa ayssiyaageeti bantta soossi higgiyaa kessanaadaaninne he higgiyaa polissanaadan I aawatettaa immiis. (Roome 7:2 nabbaba.) Leemisuwawu, ba keettaa ayssiya uri ba naati omarssi soo simmana koshshiyo saatiyaa kuuyanawu ayyo maatay deꞌees. Eti he higgiyaa naagana xayikko qaxxayanawukka ayyo maatay deꞌees. (Efi. 6:1) Ba keettaa siiquwan ayssiya uri ba keettaayeera “issi asa” gidiyo gishshawu, ba keettawu higge kessanaappe kase iira zorettees.d—Maa. 19:6.

KIRISTTOOSI GUBAAꞌIYAWU HUUPHE GIDIYO GISHSHAWU A BONCHCHA

14. (a) Yihooway Yesuusa gubaaꞌiyawu huuphe oottidoogee bessiyaaba gidiyoogaa Marqqoosa 10:45y waati qonccissii? (b) Bolla Gididi Heemmiyaagaa aawatettay aybee? (“Bolla Gididi Heemmiyaagaa Aawatettaa” giya saaxiniyaa xeella)

¹⁴ Gubaaꞌiyan deꞌiya ubbatu deꞌuwaanne Yesuusa ammaniya hara O deꞌuwaakka ‘Yihooway’ wozuwaa qanxxidi shammiis. (Marqqoosa 10:45 nabbaba; Oos. 20:28, NW; 1 Qor. 15:21, 22) Yaatiyo gishshawu, ba deꞌuwaa nuussi yarshshida Yesuusa I gubaaꞌiyawu huuphe oottidi sunttidoogee bessiyaaba. Asay, so asaynne gubaaꞌiyan deꞌiya ubbay ay oottana koshshiyaakko higgiyaa kessiyo aawatettay Yesuusawu imettidoy hegaassa. Qassi he higgeta polissiyo maatay ayyo deꞌees. (Gal. 6:2) SHin Yesuusi oottiyoobay higgiyaa kessiyoogaa xalla gidenna. I nuna ubbaa loytti heemmeesinne siiqees.—Efi. 5:29.

15-16. Marli giyo michchiyaanne Benjjaamina giyo ishay yootidobaappe ay tamaaray?

¹⁵ Michchontti Kiristtoosi eta heemmanaadan sunttido attumaageetussi azazettiyoogan, A bonchchiyoogaa bessoosona. Amarkkan deꞌiya Marli giyo michchiyaa yootidobaa daro michchontti maayoosona. A hagaadan gaasu: “Machchonne gubaaꞌiyan michcho gidiyoogan oottiyoogee taani keehi nashshiyooba. Yihooway ta azinawunne cimatussi immido aawatettaa bonchchanawu taani ubbatoo baaxetana koshshees. Gidikkokka, ta azinaynne gubaaꞌiyan deꞌiya ishantti tana bonchchiyoogeenne taani oottiyoobaa gishshawu galatiyoogee taani aawatettaa maataa bonchchanawu metootennaadan maaddiis.”

¹⁶ Ishantti michchontta bonchchiyoogan bantta bolli aawatettay deꞌiyoogaa bonchchiyoogaa bessoosona. Inggilize biittan deꞌiya Benjjaamina giyo ishay hagaadan giis: “Michchontti shiiqotun yootiyo qofaappe, hegaa bollikka waati xannaꞌanaakko, qassi waatidi loytti sabbakanaakkonne tamaarissanaakko eti yootiyoobaappe darobaa tamaaraas. Eti keehi maaddiyaabaa oottoosona.”

17. Yihooway haratussi amarida aawatettaa immidoogaa nuuni bonchchana koshshiyoy aybissee?

¹⁷ Attumaageeti, maccaageeti, bantta keettaa ayssiyaageetinne cimati ubbaykka haratussi Yihooway maataa immidoogaa bonchchiyo wode, gubaaꞌee sarotettan deꞌees. Hegaappekka aaruwan, nuuni saluwan deꞌiya nu Aaway Yihooway sabettanaadan oottoos.—Maz. 150:6.