Yihoowayyo Haggaazanawu Ne Oottiyooban Ufaytta!

1. Yihooway haratuura nuna geeddarssennay aybissee?

ASAA gujjin ubbabay issi mala gidanaadan Yihooway koyenna. Asaa gujjin, maalaaliya A meretan hegee qoncciis. Nuuni ubbay dumma dumma. Hegaa gishshawu, Yihooway haratuura nena mule geeddarssenna. I neeni tumuppe ay mala asakko erana danddayees. (1 Sam. 16:7) Qassi I ne diccido hanotaa, neeni loytta oottana danddayiyoobaanne danddayennabaa erees. Hegaa bollikka, ne oottana danddayiyoobaappe aarobaa oottanaadan I koyenna. Nuuni aagaadan nuna xeellana koshshees. Yaatikko, nuuni nubaa likkiyaappe aattidi woy keehi guuttidi qoppennan aggiyoogan ‘wozannaama asa’ gidoos.—Roo. 12:3.

2. Haratuura nuna geeddarssiyoogee loꞌꞌo gidennay aybissee?

² Harati oottido loꞌꞌobaappe nuuni tamaarana danddayoos. Leemisuwawu, haggaaziyoogan keehi gooba gidida ishaa woy michchiyo nuuni erennan waayi aggana. (Ibr. 13:7) Haggaaziyoogan nuuni kaseppe waani qara gidana danddayiyaakko appe woy ippe tamaarana danddayoos. (Pili. 3:17) SHin issi uray oottido loꞌꞌobaappe tamaariyoogeenne nena aara geeddarssiyoogee dummatees. Nuuni haratuura nuna geeddarssikko, miqqaynnana, hidootaa qanxxana woy ubba nuna pattennabadan xeellana danddayoos. Hagaappe kasetiya huuphe yohuwan beꞌidoogaadan, gubaaꞌiyan deꞌiya haratuura annaacettiyoogee nuuni ayyaanaaban qohettanaadankka oottees. Yaatiyo gishshawu, Yihooway nuna siiquwan hagaadan zorees: “Asay ubbay huuphiyan huuphiyan ba oosuwaa qoro; yaatidi bana hara asaara geeddarssennan, ba huuphe ooso xalaalan keehi ufayttana.”—Gal. 6:4, NW.

3. Neeni Yihoowayyo goynniyoogan ufayttanaadan oottiyaabaa ay oottadii?

³ Neeni Yihoowayyo goynniyoogan kaseppe loꞌꞌo gidanawu oottido ubbaban ne ufayttanaadan koyees. Leemisuwawu, neeni xammaqettidaba gidikko, he halchchuwaa polidoogan ufayttana danddayaasa! Hegaa neeni ne huuphe kuuyadasa. Neeni Xoossaa siiqiyo gishshawu hegaadan oottadasa. He wodeppe haa simmin neeni oottido ubbabaa qoppa. Leemisuwawu, neeni Geeshsha Maxaafaa nabbabiyoogaanne xannaꞌiyoogaa kaseppe loyttada dosay? Kaseegaappe aaruwan neeni wozanappe woossay? (Maz. 141:2) Haggaaziyo wode kaseppe loyttada asaa haasayissay? Haggaazuwan goꞌettiyo miishshata kaseppe loytta goꞌettay? Neessi so asay deꞌikko, neeni loꞌꞌo azina, machcho, woykko aawa woy aayo gidanaadan Yihooway nena maaddidee? Neeni laamettido ubbaban keehi ufayttana danddayaasa.

4. Ha huuphe yohuwan nuuni ay beꞌanee?

⁴ Nuuni harati Yihoowayyo goynniyoogan kaseegaappe loꞌꞌo gidanawu eti oottiyooban ufayttanaadan maaddana danddayoos. Eti haratuura banttana geeddarssiyoogaa agganaadankka maaddana danddayoos. Yelidaageeti bantta naata waati maaddana danddayiyaakko, aqo laggeti issoy issuwaa waati maaddana danddayiyaakko, qassi cimatinne harati bantta ishanttanne michchontta waati maaddana danddayiyaakko ha huuphe yohuwan nuuni beꞌana. Wurssettan, nuuni oottana danddayiyoobaa halchchanaadan maaddana danddayiya amarida xiqiseta tobbana.

YELIDAAGEETINNE AQO LAGGETI WAATANA DANDDAYIYOONAA?

5. Efisoona 6:4y yootiyoogaadan, yelidaageeti aybippe naagettana koshshii?

⁵ Yelidaageeti issi naꞌa haraara geeddarssennaadan woy issi naꞌi oottana danddayiyoogaappe aarobaa oottanaadan koyenna mala naagettana koshshees. Yelidaageeti hegaadan oottikko, eti bantta naata hidootaa qanxxissana danddayoosona. (Efisoona 6:4 nabbaba.) Sachikob giyo michchiyaa hagaadan gaasu: “Ta asttamaareti taani tanaara tamaariyaageetuppe aarobaa oottanaadan koyoosona. Qassi Yihoowa Markka gidenna ta asttamaaretinne ta aaway Yihoowa asaabaa loꞌꞌobaa qoppanaadan taani timirtte keettan gooba gidanaadan ta aayyiyaa koyawusu. A taani timirtte keettaa paaciyan 100ppe 100 ehanaadan koyawusu, shin hegee danddayettennaba. Taani timirttiyaa wurssoosappe daro layttay aadhdhiis, shin taani tawu danddayettidaagaa keena oottikkonne Yihooway tanan waayi ufayttana gaada haꞌꞌikka issi issitoo qoppays.”

6. Mazamure 131:1, 2⁠ppe yelidaageeti ay tamaarana danddayiyoonaa?

⁶ Mazamure 131:1, 2y yelidaageeti tamaarana koshshiyaabaa yootees. (Nabbaba.) Kawuwaa Daawiti ‘gitabaa’ woy I oottana danddayennabaa amottibeennaagaa yootiis. I bana ziqqi oottido gishshawu, bawu deꞌiyaaban ufayttidi saruwan deꞌiis. Yelidaageeti Daawiti yootidobaappe ay tamaarana danddayiyoonaa? Yelidaageeti banttana ziqqi oottiyaageeta gidikko, banttappekka bantta naatuppekka keehi darobaa naagokkona. Yelidaageeti bantta naati loytti oottana danddayiyoobaanne danddayennabaa akeekidi, eti gakkana danddayiyo halchchuwaa halchchiyoogan naati pattikke giidi qoppennaadan maaddana danddayoosona. Maarino giyo michchiyaa hagaadan gaasu: “Ta aayyiyaa tana ta ishanttuura woy hara naatuura mule geeddarssa erukku. Asa ubbawu dumma dumma eray deꞌiyoogaanne nuna ubbaa Yihooway xoqqu ootti xeelliyoogaa tana tamaarissaasu. A hegaadan tamaarissido gishshawu, taani haratuura tana geeddarssa erikke.”

7-8. Azinay ba machchiyo bonchchiyoogaa waati bessana danddayii?

⁷ Kiristtaane azinay ba machchiyo bonchchana bessees. (1 PHe. 3:7) Leemisuwawu, issi azinay ba machchiyo xoqqu ootti xeelliyoogan O bonchchiyoogaa bessees. A oottana danddayiyoogaappe aarobaa oottanaadan I koyenna. Qassi O hara maccaasaara mule geeddarssenna. Azinay hegaadan oottikko, issi maccaaseeyyo aybi siyettanee? Roozo giyo michchiyo Yihoowa Markka gidenna I azinay O hara maccaasaara ubbatoo geeddarssees. I meqetti baynnabaa haasayiyoogee Rooza babaa iitabaa qoppanaadan oottiyoogaa xalla gidennan, bana hara asi tumuppe siiqenna gaada siranaadankka oottiis. A, “Yihooway tana xoqqu ootti xeelliyoogaa ubbatoo tawu hassayisso koshshiis” yaagaasu. SHin Kiristtaane azinay ba machchiyo bonchchees. I hegaadan oottiyoogee Yihoowaarakka ba machcheerakka dabbotido dabbotaa minttiyoogaa erees.c

⁸ Ba machchiyo bonchchiya azinay O sabbees, siiqiyoogaa iyyo yooteesinne O galatees. (Lee. 31:28, 29) Hagaappe kasetiya huuphe yohuwan ibay odettido Katrina pattennabadan bana xeellido wode, I azinay hegaadan oottiyoogan O maaddiis. Katrina naatettan deꞌiyo wode I aayyiyaa O borawusunne darotoo I laggetuuranne hara macca naatuura geeddarssawusu. Yaatiyo gishshawu, Katrina haratuura bana geeddarssiyoogaa doommaasunne Yihoowa Markka gida simmadakka yaatiyoogaa aggabeykku! SHin I azinay A hegaadan oottiyoogaa agganaadaaninne babaa suurebaa qoppanaadan O maaddiis. A hagaadan gaasu: “I tana siiqees, taani oottiyo loꞌꞌobaa gishshawu tana galateesinne taassi woossees. Qassi maalaalissiya Yihoowa eeshshata I tana hassayisseesinne taani iitabaa qoppiyoogaa agganaadan tana maaddees.”

SIIQIYA CIMATINNE HARAATI WAATANA DANDDAYIYOONAA?

9-10. Issi michchiyaa haratuura bana geeddarssennaadan keha cimati waati maaddidonaa?

⁹ Haratuura banttana geeddarssiyaageeta cimati waati maaddana danddayiyoonaa? Naatettan harati darin galati erenna Hanuno giyo michchee hanotaa qoppa. A hagaadan gaasu: “Taani dungguuxa gidiyo gishshawu hara naati taappe eran aadhdhiyaabadan qoppays. Taani naatettaappe doommada haratuura tana geeddarssays.” Hanuna tuma siya simmadakka, haratuura bana geeddarssiyoogaa aggabeykku. Hegaappe denddidaagan, gubaaꞌiyan daro maaddennabadan iyyo siyettiis. SHin A haꞌꞌi aqinye gidada ufayttaydda haggaazawusu. A ba qofaa laammanaadan O aybi maaddidee?

¹⁰ Keha cimati bana maaddidoogaa Hanuna yootaasu. Eti gubaaꞌiyan A maaddiyoogaa yootidosonanne loꞌꞌoban leemiso gidiyo gishshawu O galatidosona. A hagaadan gaasu: “Maadoy koshshiyo amarida michchontta taani minttettanaadan cimati tana issi issi wode oychchidosona. Hegee taani maaddiya asa gidiyoogaa akeekanaadan oottiis. Taani amarida yelaga michchontta minttettido gishshawu siiqiya cimati tana galatido wodiyaa hassayays. He wode eti taayyo 1 Tasalonqqe 1:2, 3 nabbabidosona. Hegee tana keehi ufayssiis! He siiqiya cimati oottidobaa gaasuwan, taani gubaaꞌiyan maaddiyoogaa haꞌꞌi eraas.”

11. Mazamure 34:18y yootiyoogaadan, ‘wozanay meꞌꞌidoogeetanne bantta ayyaanan liiqidaageeta’ nuuni waati maaddana danddayiyoo?

¹¹ Mazamure 34:18 nabbaba. Yihooway ‘wozanay meꞌꞌidoogeetussinne bantta ayyaanan liiqidaageetuyyo’ loytti qoppees. Cimatu xalla gidennan, nuuni ubbay hegaa mala siiqo ishanttanne michchontta minttettana danddayoos. Nuuni eta minttettana danddayiyo issi ogee etawu qoppiyoogaa bessiyoogaana. Yihooway eta keehi siiqiyoogaa nuuni bessanaadan koyees. (Efi. 5:1, 2) Nuuni nuna ziqqi oottiyaageetanne nu eran ceeqettennaageeta gidiyoogankka nu ishanttanne michchontta maaddana danddayoos. Harati nuna qanaatanaadan nuuni koyenna gishshawu, asay nunan xeelaa wottanaadan koyokko. Qassi nuuni ubbay haasayiyoobaaninne oottiyooban nu ishantta minttettanawu koyoos.—1 PHe. 4:10, 11.

12. Ashkke asay Yesuusakko shiiqidoy aybissee? (Koyro sinttan deꞌiya misiliyaa xeella.)

¹² Nuuni Yesuusi bana kaalliyaageeta oyqqido ogiyaa loytti qoppiyoogan harata waati oyqqanaakko darobaa tamaarana danddayoos. Saꞌan deꞌida ay asappenne I aadhdhees. Gidikkonne, I “ashkkenne wozanappe kauyyiyaagaa” woy bana ziqqi oottiyaagaa. (Maa. 11:28-30) I aadhdhida eranchcha gidiyoogaaninne ubbabaa eriyoogan mule otorettibeenna. Asaa I tamaarissido wode, akeekanawu metenna qaalatanne leemisota goꞌettiis; qassi hegee ashkke asatu wozanaa denttettiis. (Luq. 10:21) Yesuusi haymaanootiyaa kaalettiya otoranchcha asatu mala gidenna. I harati Xoossay banttana xoqqu ootti xeelliyoogaa akeekanaadan oottiis. (Yoh. 6:37) I maati baynna coo asaa bonchchiis.

13. Yesuusi bana kaalliyaageeta oyqqido hanotan kehanne siiqiyaagaa gidiyoogaa waati bessidee?

¹³ Yesuusi bana kaalliyaageeta oyqqido hanotan kehanne siiqiyaagaa gidiyoogaa bessiis. Eta eraynne eta hanotay dumma dumma gidiyoogaa I erees. Yaatiyo gishshawu, eti ubbay issi malabaa oottana woy haggaazuwan issi mala ayfiyaa demmana danddayokkona. SHin, eti ubbay banttawu danddayettidaagaa keenaa oottiyoogan I ufayttiis. Biraabaa yootiya leemisuwan Yesuusi hegaa qonccissiis. He leemisuwan, goday ashkkaratu ubbawu “eta wolqqaa keenaa” oosuwaa immiis. Naaꞌꞌu gooba ashkkaratuppe issoy haratuugaappe aaruwan worissiis. SHin goday eta naaꞌꞌakka hagaadan giidi issi mala qaalan galatiis: “Hayyanaashsho! Neeni lo77onne ammanettiya ashkkara!”—Maa. 25:14-23.

14. Harata oyqqiyoogan Yesuusa waani milatana danddayiyoo?

¹⁴ Yesuusi nuna ubbatoo siiqeesinne nuuyyo kehees. Nu eraynne nu hanotay dumma dumma gidiyoogaa I erees, qassi nuuni nuuyyo danddayettida ubbabaa oottiyo wode ufayttees. Nuuni Yesuusa milatana koshshees. Issi ishay woy michchiyaa haratuugaa keenaa oottana danddayennaagaa gaasuwan bana pattennabadan xeellanaadan woy yeellatanaadan nuuni mule oottana koshshenna. Nu ishanttinne michchontti Yihoowawu haggaazanawu banttawu danddayettida ubbabaa oottiyo gishshawu, nuuni ubbatoo eta galatana bessees.

NE OOTTANA DANDDAYIYOOBAA HALCHCHA

15-16. Issi michchiyaa oottana danddayiyoobaa halchchiyoogan waana goꞌettadee?

¹⁵ Nuuni Yihoowawu haggaazanawu halchchiyo wode, loꞌꞌo deꞌuwaa deꞌoosinne keehi ufayttoos. SHin nuuni nu danddayiyoobaa xallaa halchchana bessees. Haratuugaara issi malabaa halchchana koshshenna. Nuuni yaatikko, azzanananne hidootaa qanxxana danddayoos. (Luq. 14:28) Midoro giyo aqinyee hanotaa qoppa.

¹⁶ Yihoowa Markka gidenna Midori aaway O I ishanttuuranne michchonttuura, qassi iira tamaariyaageetuura geeddarssiyoogan O yeellayees. Midora, “taani pattennabadan tana xeellaas” yaagaasu. SHin A diccido wode, babaa loꞌꞌobaa qoppiyoogaa doommaasu. A hagaadan gaasu: “Geeshsha Maxaafay Yihooway tana siiqiyoogaa taani akeekanaadan maaddiyo gishshawu ubbatoo A nabbabays.” Qassi A oottana danddayiyo halchchota halchchada, he halchchidobata oottanaadan maaddana mala woossaasu. Hegee Midora Yihoowawu oottana danddayiyooban ufayttanaadan maaddiis.

NEEYYO DANDDAYETTIDA UBBAN YIHOOWAYYO OOTTIYOOGAA AGGOPPA

17. Nuuni nu qofaa laammanaadan nuna aybi maaddana danddayii, qassi hegee ayba ayfiyaa demissii?

¹⁷ Nuuni nuna xeelliyo ogiyaa laammiyoogee wode ekkiyaaba. Yaatiyo gishshawu, Yihooway nuna hagaadan giidi zorees: “Intte wozanainne qofai muleera ooraxxanau bessees.” (Efi. 4:23, 24) Yaatanawu, nuuni woossana, Xoossaa Qaalaa xannaꞌananne wotti dentti qoppana koshshees. Hegaa gishshawu, hegeeta aggennan ootta, qassi Yihooway wolqqaa immanaadan woossa. A geeshsha ayyaanay neeni haratuura nena geeddarssennaadan maaddana. Neeni qanaatiyaabanne otorettiyaaba gidikko, hegaa erada eesuwan laamettanaadan Yihooway nena maaddana.

18. Naaꞌꞌantto Hanidabaa Odiya 6:29, 30n deꞌiya qofay nena waati minttettana danddayii?

¹⁸ Naaꞌꞌantto Hanidabaa Odiya 6:29, 30 nabbaba. Yihooway nuuyyo siyettiyaabaa erees. Nuuni alamiyaappe gakkiya iitabaaranne nu oottiyo balabaa gaasuwan gakkiyaabaara baaxetiyoogaakka I erees. Nuuni hegeeta eqettanawu keehi baaxetiyoogaa Yihooway beꞌiyo wode, kaseegaappe aaruwan nuna siiqees.

19. Yihooway nuna siiqiyoogaa waati qonccissidee?

¹⁹ Yihooway nuna ay keena siiqiyaakko qonccissanawu issi aayyeenne I naꞌaa giddon deꞌiya siiquwaabaa yootiis. (Isi. 49:15) Richel giyo michchee hanotaa qoppa. A hagaadan gaasu: “Ta naꞌiyaa Istepana wodee gakkennan yelettaasu. Taani koyro O beꞌido wode, A keehi guuttanne wolqqi baynnaba milatawusu. SHin hosppitaaliyan A deꞌiyo koyro aginan taani O ubbatoo idimmanaadan dottoree tawu paqqadiis. He wode, ta naꞌiyaanne taani keehi siiqettida. Haꞌꞌi iyyo layttay usuppuna, qassi A ba lagge gidida haratuppe guuxxawusu. Gidikkonne, deꞌuwan A deꞌanawu keehi baaxetido gishshawunne taani wozanappe ufayttanaadan oottido gishshawu, O keehi siiqays.” Nuuni nuuyyo danddayettida keenan Yihoowayyo oottanawu baaxetiyoogaa I beꞌiyo wode, nuna keehi siiqiyoogaa eriyoogee nuuni ufayttanaadan oottees!

20. Yihoowa ashkkarati ufayttiyoy aybissee?

²⁰ Neeni Yihoowa ashkkara gidiyo gishshawu, A keetta asaappe issuwaa, qassi hegee neeyyo keehi gita maata. Yihooway nena baakko ehiidoy neeni haratuppe aadhdhiyo gishshataassa gidenna. I ne wozanaa beꞌiyo wode neeni appe tamaaranawunne laamettanawu eeno giya ashkke asa gidiyo gishshawu nena baakko ehiis. (Maz. 25:9) Neeni ayyo haggaazanawu neeyyo danddayettida ubbabaa oottiyo wode, I ufayttiyoogaa ammanettana danddayaasa. Ne genccaynne ammanoy neeyyo ‘loꞌꞌonne tumu wozanay’ deꞌiyoogaa bessees. (Luq. 8:15) Yaatiyo gishshawu, neeyyo danddayettida keenan Yihoowayyo haggaaziyoogaa aggoppa. Yaatikko, neeni ‘ne huuphe ooso xalaalan keehi ufayttana.’