Nuuni ‘Maarotettay Darido’ Xoossawu Haggaazoos

1. Maariya uraa neeni waata qonccissana danddayay, qassi nuuni maariya uraabaa tamaaranaadan maaddiya taarikee awugee?

NUUNI maariya asabaa qoppiyo wode, keha, siiqiya, qarettiyaanne kehatettan immiya asa qoppana danddayoos. Yesuusi Samaare biittaa bitaniyaabaa yootido taarikiyaa hassayana danddayoos. Panggati qohido Ayhuda bitaniyawu ‘kehidi’ woy qarettidi maaddida hara biittaa bitaniyaa hassayoos. Samaare biittaa bitanee qohettida Ayhuda bitaniyawu ‘qarettido’ gishshawu assi koshshiyaabaa siiquwan kunttiis. (Luq. 10:29-37) Ha leemisoy ufayssiya nu Xoossaa eeshshaa, hegeekka maarotaa loytti qonccissees. Xoossay maariyaagaa gidiyo gishshawu I nuna siiqees. qassi I ubba gallassi daro ogiyan nuna maarees.

2. Maarotettaa bessiyo hara ogee aybee?

² Issi uri maarotettaa bessana danddayiyo hara ogeekka deꞌees. Maariya uri qaxxayettana koshshiya uraa qaxxayennan agganawu kuuyana danddayees. Hegaadan, Yihooway nuna ubbaa maaridoogee qoncce. Mazamuraawee ‘I nuna nu nagaraadan oottennaagaa’ yootiis. (Maz. 103:10) SHin hara wodetun, Yihooway nagaraa oottida uraa minttidi seerana danddayees.

3. Nuuni pilggana oyshati awugeetee?

³ Ha huuphe yohuwan, heezzu oyshatu zaaruwaa beꞌana: Yihooway maarotettaa bessiyoy aybissee? Minttidi seeriyoogeenne maarotettay gayttii? Qassi maarotettaa bessanaadan nuna aybi maaddana danddayii? Xoossaa Qaalay ha oyshata waatidi zaariyaakko ane beꞌoos.

YIHOOWAY MAAROTETTAA BESSIYOY AYBISSEE?

4. Yihooway maarotettaa bessiyo aybissee?

⁴ Maariyoogaa Yihooway dosees. Xoossay ‘maarotettay daridoogaa’ gidiyoogaa kiitettida PHawuloosi yootiis. PHawuloosi ha sohuwan Xoossay maariyaagaa gidiyo gishshawu nagaranchcha gidida tiyettida ba ashkkaratussi saluwaa biyo hidootaa immidoogaa yootiis. (Efi. 2:4-7) Gidoppe attin, Yihooway maarotettaa bessiyoy tiyettida ba ashkkaratu xallaassa gidenna. Mazamuraawee Daawiti hagaadan giis: “Yihooway ubbawu loꞌꞌo; qassi A maarotettay I medhdhido ubbaban qoncciis.” (Maz. 145:9, NW) Yihooway asaa siiqiyo gishshawu, maaranaadan oottiyaabay deꞌiyo wode awudenne maarees.

5. Yesuusi Yihoowa maarotettaabaa waati eridee?

⁵ Yihooway maariyoogaa keehi dosiyoogaa oogaappenne aaruwan Yesuusi erees. Yesuusi saꞌaa yaanaappe daro wodiyaappe kase Yihoowaynne Yesuusi saluwan issippe deꞌidosona. (Lee. 8: 30, 31) Yesuusi ba Aaway nagaranchcha asawu maarotettaa bessidoogaa darotoo beꞌiis. (Maz. 78: 37-42) Yesuusi tamaarissido timirttiyan ha ufayssiya ba Aawaa eeshshaa darotoo qonccissiis.

6. Yesuusi ba Aaway maariyaagaa gidiyoogaa nuuni akeekanaadan waati maaddidee?

⁶ Hagaappe kasetiya huuphe yohuwan qonccidaagaadan, Yihooway maariyoogaa keehi dosiyoogaa nuuni loytti akeekanaadan maaddanawu Yesuusi bayida naꞌaabaa leemisuwaa yootiis. He naꞌay sooppe kiyidi biis, biidi “hegan miishshaa ohettaa mooridi, ba miishshaa laaliis.” ( Luq. 15:13) Guyyeppe, pokkobaa oottiyoogaa aggiis, bana ziqqi oottiisinne soo simmiis. A aaway waatidee? Yesuusi hagaadan giis: “I [naꞌay] biron haahuwan de7ishin, a aawai a be7idi, ayyo mishettiis; woxxi qoommidi, a yeriis.” Aaway ba naꞌaa kawushshibeenna. Ba yelaga naꞌawu qarettidi sohuwaara atto giisinne so A mokki ekkiis. Bayida naꞌay gita nagaraa oottidaba gidikkonne I hegaappe simmido gishshawu, A aaway awu atto giis. Leemisuwan qonccida maarida aaway Yihoowa bessiyaaba. Ha ufayssiya ogiyan, Yesuusi ba Aaway wozanappe bantta nagaraappe simmiyaageetussi atto gaanawu eeno giyoogaa qonccissiis.—Luq. 15:17-24.

7. Yihoowa maarotettay I keehi aadhdhida eranchcha gidiyoogaa waati qonccissii?

⁷ Yihooway zawi baynna ba aadhdhida eratettaa gaasuwan maarotettaa bessees. Yihooway ba meretatussi loꞌꞌobaa ubbatoo kuuyees. ‘Bollappe yiya aadhdhida eratettay maarotettay kumidoogaa’ gidiyoogaa Geeshsha Maxaafay yootees. (Yaaq. 3:17) Siiqiya aawaagaadan, Yihooway ba maarotay ba naata maaddiyoogaa erees. (Maz. 103:13; Isi. 49:15) Eti nagaranchcha gidikkonne, Xoossaa maarotettay etassi hidootay deꞌanaadan oottees. Yaatiyo gishshawu, zawi baynna Yihoowa aadhdhida eratettay I maaranaadan oottiyaabi deꞌiyo wode awudenne maaranaadan A denttettees. SHin, Yihooway maarotaa awude bessennan agganaakko erees. I aadhdhida eranchchaa gidiyo gishshawu, maariyoogee iitabaa xaasayi xeellanaadan oottiyo wode I mule maarenna.

8. Issi issitoo waatiyoogee bessiyaabee, qassi aybissi?

⁸ Xoossawu oottiya issi uri shori baynna deꞌuwaa deꞌanawu kuuyiis giidi qoppite. Yaatikko nuuni waatana bessii? Gubaaꞌee he uraara ‘issippe gayttiyoogaa agganaadan’ PHawuloosi yootana mala Yihooway azaziis. (1 Qor. 5:11) Ba nagaraappe simmenna uri gubaaꞌiyaappe bohettees. Yaatiyoogee ammanettida ishanttanne michchontta qohuwaappe naaganawunne Yihooway geeshshatettawu kessido maaraa kaallanawu bessiyaaba. Gidikkonne, issi uri bohettiyo wode Xoossay A maaribeenna giidi amaridaageeti qoppoosona. Hegee tumee? Ane beꞌoos.

ISSI URAA BOHIYOOGEE MAARIYOOGAA BESSIYAABEE?

9-10. Ibraawe 12:5, 6y yootiyoogaadan, bohiyoogee maarotettaa bessiyaaba gaana danddayiyoy aybissee? Leemisuwan yoota.

⁹ Nuuni eriyoonne siiqiyo uri “hagaappe simmin Yihoowa Markka gidenna” giya erissuwaa gubaaꞌiyaa shiiquwan siyiyo wode keehi azzanoos. Nuuni siiqiyo uri bohettiyoogee bessiyaabee giidi qoppana danddayoos. Issi uraa bohiyoogee tumuppe maarotettaa bessiyaabee? Ee, bessiyaaba. Seeray koshshiyo ura seerennan aggiyoogee maariyoogaa woy siiqiyoogaa bessiyaaba gidenna. (Lee. 13:24) Ba nagaraappe simmenna uraa bohiyoogee I laamettanaadan maaddana danddayii? Ee, danddayees. Gita nagaraa oottida daroti bantta mooruwaa akeekanaadan, bantta deꞌuwaa laammanaadaaninne siiqiya Yihoowakko simmanaadan cimati mintti seeridoogee maaddidoogaa akeekidosona.—Ibraawe 12:5, 6 nabbaba.

¹⁰ Ha leemisuwaa qoppa. Issi henttanchchay ba dorssatuppe issoy harggidoogaa akeekiis. He harggiyaappe pattanawu sahettida dorssaa hara wudiyaappe dummayana koshshiyoogaa I erees. SHin dorssati wudiyaara walahettanawu koyiyo gishshawu, haratuppe shaakkiyo wode waayissoosona. SHin, henttanchchay dorssaa dummayiyoogee I meqettaa iita woy qarettennaagaa gidiyoogaa bessiyaabee? CHii, gidenna. Harggida dorssay wudiyaara gayttikko, harggee wudiyaa oyqqanaagaa I erees. I harggida dorssaa dummayiyoogan, kumetta wudiyaa qohuwaappe naagees.—Wogaabaa 13:3, 4⁠ra gatta xeella.

11. (a) Bohettida uri harggida dorssaa mala gidana danddayiyoy ayba ogetuunee? (b) Bohettidaageeti ay oottana danddayiyoonaa, qassi eti maaduwaa awuppe demmana danddayiyoonaa?

¹¹ Issi Kiristtaanee bohettikko, A harggida dorssaadan qoppana danddayoos. I ayyaanaaban harggiis. (Yaaq. 5:14) Ayyaanaabaa harggee, hara harggiyaadan asappe asa eesuwan oyqqana danddayees. Hegaa gishshawu, nagaraa oottida uraa issi issi hanotatun gubaaꞌiyaappe bohiyoogee bessiyaaba. Ha seeray gubaaꞌiyan deꞌiya ammanettidaageeta Yihooway siiqiyoogaa qonccissiyaaba, qassi nagaraa oottida uri ba mooruwaa akeekanaadaaninne hegaappe simmanaadan oottana danddayees. Bohettida uri ayyaanaabaa qumaa maananne ayyaanaaban bana minttana danddayiya shiiqota shiiqana danddayees. I nabbabanawunne xannaꞌanawu xuufiyaa ekkananne JW Broadcasting^® beꞌana danddayees. Qassi cimati I laamettiyoogaa beꞌidi, ayyaanaaban kaseegaadan minnanaadaaninne zaaretti Yihoowa Markka gidanaadan maaddanawu issi issitoo zorananne assi kaaletuwaa immana danddayoosona.b

12. Cimati nagaraa oottida uraa siiqiyoogaanne maariyoogaa bessiyaabaa ay oottana danddayiyoonaa?

¹² Bantta nagaraappe simmibeennaageetu xallay bohettiyoogaa hassayana koshshees. Cimati issi uraa bohanawu kuuyanaappe kase, akeekan qoppana bessiyoogaa eroosona. Yihooway “likke pirddan” seeriyoogaa eti eroosona; qassi etikka hegaadan oottanaadan I koyees. (Erm. 30:11) Eti bantta ishantta siiqiyo gishshawu, ayyaanaaban eta qohiyaaba aybanne oottanawu koyokkona. SHin, nagaraa oottida uraa amarida wodiyawu gubaaꞌiyaappe bohiyoogee siiquwaanne maarotettaa bessiyaaba.

13. Qoronttoosan deꞌiya issi Kiristtaanee bohettana koshshidoy aybissee?

¹³ Ba nagaraappe simmibeenna uraa xeelliyaagan kiitettida PHawuloosi oottidobaa qoppa. Qoronttoosa gubaaꞌiyan deꞌiya issi Kiristtaane ba aawaa machcheera pokkobaa oottiis. Hegee keehi sheneyiyaaba. Yihooway Israaꞌeelatussi yootidobaa PHawuloosi erees: “Ba aawaa keettaayeera zin77ida asi ba aawaa kaushshiis; eti naa77aikka haiqqona. Eta suuttaa acoi eta bollaana.” (Wog. 20:11) He bitaniyaa worana koshshees giidi PHawuloosi gubaaꞌiyawu yootibeenna. SHin, Qoronttoosa Kiristtaaneti A bohanaadan yootiis. He bitanee oottiyo pokkobay gubaaꞌiyan deꞌiya harata qohiis. Ubba qassi amaridaageeti hegee gita nagara giidi qoppibookkona!—1 Qor. 5:1, 2, 13.

14. PHawuloosi Qoronttoosan deꞌiya bohettida bitaniyawu maarotaa waatidi bessidee, qassi aybissi? (2 Qoronttoosa 2:5-8, 11)

¹⁴ Amarida wodiyaappe simmin, he bitanee tumuppe laamettidoogaa PHawuloosi siyiis. Nagaraa oottidaagee ba nagaraappe wozanappe simmiis! He bitanee gubaaꞌiyaa yeellayiyaabaa oottikkonne, cimati ‘yohuwaa darissana’ woy deexettenna mala PHawuloosi yootiis. I etassi hagaadan odiis: “Intte ayyo atto gaanaunne a minttettanau bessees.” “Hegaa gishshau he bitanee keehi daro azzanenna mala” giidi PHawuloosi eti hegaadan oottanaadan yootidoy aybissakko akeeka. Ba nagaraappe simmida bitaniyawu PHawuloosi qarettiis. He bitanee keehi azzanidi kase oottidobay atto geetettanaadan koyiyoogaa aggana mala PHawuloosi koyibeenna.—2 Qoronttoosa 2:5-8, 11 nabbaba.

15. Cimati waatidi maarananne mintti seerana danddayiyoonaa?

¹⁵ Yihoowagaadan, cimati maarotettaa bessiyoogaa dosoosona. Nagaraa oottida uraa koshshiyo wode eti minttidi seeroosona; shin danddayettikko eti maarotettaa keehi bessoosona. Cimati nagaraa oottida uraa mule seerennan aggikko, eti maarotettaa bessibookkona. Hegee eti iitabaa coꞌꞌu gi xeelliyoogaa bessiyaaba. SHin, maarotettaa bessana koshshiyay cimatu xallee?

NUUNI UBBAY MAAROTAA BESSANAADAN AYBI MAADDANA DANDDAYII?

16. Leemiso 21:13y maarennaageeta Yihooway waatanaagaa yootii?

¹⁶ Yihoowagaadan maariyaageeta gidanawu ubba Kiristtaaneti baaxetoosona. Aybissi? Issi gaasoy harata maarennaageetu woosaa Yihooway siyenna gishshataassa. Geeshsha Maxaafay hagaadan gees: “Metootanchcha uraa waasuwaa siyanaappe giidi, ba hayttaa tucciya uri, ikka waassana; waassin alliyaabay xayana.” (Leemiso 21:13, NW.) Nuuppe ooninne Yihooway nu woosaa siyennan ixxanaadan koyokko, yaatiyo gishshawu nuuni maarennaageeta gidenna mala naagettana koshshees. Waayettiya nu mala Kiristtaanee yootiyoobaa siyennan ixxana koshshenna, qassi “metootanchcha uraa waasuwaa” siyanawu ubbatoo giigi uttana bessees. Hegaa gishshawu, ha Geeshsha Maxaafaa xiqisiyaa oosuwan peeshshanawu nuussi danddayettidabaa oottana koshshees: “Asa maaribeenna uraa Xoossai maarennan pirddana.” (Yaaq. 2:13) Nuussi maarotay keehi koshshiyoogaa nu nuna ziqqi oottidi hassayikko, maarotettaa bessiyaageeta gidoos. Ubba qassi nagaraa oottida uri gubaaꞌiyaa simmiyo wode maarotettaa loytti bessanawu koyoos.

17. Kawuwaa Daawiti wozanappe maariyoogaa waati bessidee?

¹⁷ Nuuni maariyaageeta gidanaadaaninne meqettaa iita gidennaadan naagettana mala Geeshsha Maxaafan etabay odettidoogeetu taarikee nuna maaddana danddayees. Leemisuwawu, Kawuwaa Daawita hanotaa qoppa. I ubbatoo wozanappe maariyoogaa bessiis. Saaoꞌoli A woranawu koyiyaaba gidikkonne, Daawiti Xoossay tiyido kawuwaa maariis. I Saaꞌoolawu haluwaa kiyanawu woy A qohanawu mule malibeenna.—1 Sam. 24:9-12, 18, 19.

18-19. Daawiti maarotaa bessibeenna naaꞌꞌu wodeti awugeetee?

¹⁸ Gidoppe attin, Daawiti muletoo maaribeenna. Leemisuwawu, meqettaa iita asa gidida Naabaali Daawita cayiis, qassi Daawitassinne A asatussi qumaa immennan ixxiis. Hegan Daawiti keehi hanqqettidi Naabaalanne A son deꞌiya attuma asa ubbaa woranawu kuuyiis. SHin, Naabaala machchiyaa Abigaala kehanne danddayanchcha gidiyo gishshawu Daawitassi qumaa eesuwan immaasu. Yaatiyo gishshawu Daawiti Naabaalanne A asata woribeenna.—1 Sam. 25:9-22, 32-35.

¹⁹ Hara wode, issi hiyyeesa bitanee keehi dosiyo dorssiyo, wolqqan ekkida issi dure bitaniyaabaa hananabaa yootiya Naataani Daawitassi yootiis. Daawiti hanqquwan eexxi kiyidi hagaadan giis: “GODAI ero! Hagaa oottida bitanee haiqqana bessees.” (2 Sam. 12:1-6) Daawiti Muuse Higgiyaa erees. Kaysoy issi dorssaa wuuqqikko, I wuuqqido bitaniyawu oyddu dorssaa qanxxana koshshees. (Kes. 22:1) Gidoppe attin, kaysoy hayqqana koshshees giyoogee meqettaa iita gidiyoogaa bessiyaaba. Daawiti iita kobabaa oottidoogaa akeekanaadan maaddanawu Naataani he taarikiyaa yootiis. Naataani yootido leemisuwan dorssaa wuuqqidaagawu Daawiti oottidoogaappe aadhdhiya maarotaa Yihooway Daawitawu bessiis!—2 Sam. 12:7-13.

20. Daawita hanotaappe nuuni ay tamaarana danddayiyoo?

²⁰ Daawiti keehi hanqqettido wode, Naabaalinne A attuma asa ubbay hayqqana bessees giidi kuuyiis. Guyyeppe, Naataani yootido leemisuwan qonccida dure bitanee oottidobaa gishshawu hayqqana koshshees giidi Daawiti pirddiis. SHin, Daawiti keha asa, yaatin I he kaysuwaa bolli meqettaa iitidi pirddidoy aybissee? Daawita deꞌuwan gakkidabaa ane qoppa. He wode, Daawiti bana mooranchchadan xeellees. Issi uri hara urawu meqettaa iitidi pirddikko, hegee I ayyaanaaban loꞌꞌo gidennaagaa bessees. Yesuusi bana kaalliyaageetussi hagaadan giis: “Xoossai intte bolli pirddenna mala, inttekka haratu bolli pirddoppite. Aissi giikko, intte haratu bolli pirddiyoogaadan, Xoossai intte bolli pirddana.” (Maa. 7:1, 2) Meqettaa iita gidennaadan naagettanawunne nu Xoossaagaadan ‘maarotettay kumidoogeeta’ gidanawu nuussi danddayettida ubbabaa oottana koshshees.

21-22. Nuuni maarotettaa bessana danddayiyo ogeti aybee?

²¹ Nuuni maariyaageeta gidikko, haratussi qarettiyoogaappe aarobaa oottoos. Maariya asay harata maaddiyaabaa oottees. Yaatiyo gishshawu, nuuni ubbay nu son, nu gubaaꞌiyaaninne nu heeran maadoy koshshiyoogeeta koyana danddayoos. Maarotettaa bessana danddayiyo daro injjeti deꞌoosona! Nuuni minttettana danddayiyo metootida uri deꞌii? Geella qumaa efiiyoogan woy issi issibaa oottiyoogan maaddana danddayiyoo? Bohetti simmida Kiristtaaniyawu A minttettiya loꞌꞌo lagge koshshii? Minttettiya mishiraachchuwaa haratussi yootana danddayiyoo? Hagee nunaara gayttiya ubbawu maarotaa bessana danddayiyo keehi loꞌꞌo ogetuppe issuwaa.—Iyy. 29:12, 13; Roo. 10:14, 15; Yaaq. 1:27.

²² Issi urawu hegaa malabay koshshiyoogaa akeekikko, nu yuushuwan deꞌiya ubbawu nuuni maarotaa bessiyo injje hanotay deꞌiyoogaa eroos. Nuuni maarotettaa bessikko, ‘maarotettay kumidoogaa’ gidida saluwan deꞌiya nu Aawaa keehi ufayssoos!