Xammaqetta Simmadakka “Ooratta Meretaa” Maayiyoogaa Aggoppa

1. Nu eeshshay darotoo aybiira gayttii?

NUUNI xammaqettoosappe amarida gallassa woy daro laytta gidin, nuuni ubbay Yihooway dosiyo eeshshay deꞌiyoogeeta gidanawu koyoos. Nuuni hegaa mala asa gidanawu qoppiyooban naagettana koshshees. Aybissi? Nu eeshshay nuuni qoppiyoobaara darotoo gayttiyo gishshataassa. Nuuni ubbatoo nuna ufayssiyaabaa qoppikko, iitabaa haasayoos woy oottoos. (Efi. 4:17-19) SHin nuuni loꞌꞌobaa qoppikko, nu Aawaa Yihoowa ufayssiyaabaa haasayana woy oottana danddayoos.—Gal. 5:16.

2. Nuuni ha huuphe yohuwan beꞌana oyshati awugeetee?

² Hagaappe kasetiya huuphe yohuwan qonccidaagaadan, iita qofaa qoppiyoogaa muleera aggana danddayokko. SHin he qofaa polennan agganawu doorana danddayoos. Yihooway ixxiyoobata haasayiyoogaanne oottiyoogaa nuuni xammaqettanaappe kase aggana koshshees. Hagee ceega asatettaa xayssanawu nuuni oottana koshshiya waannaba. SHin nuuni Yihoowa loytti ufayssanawu “ooratta meretaa [maayite]” giya azazuwaakka azazettana bessees. (Qol. 3:10) Ha huuphe yohuwan kaallidi deꞌiya oyshatu zaaruwaa nuuni beꞌana: ‘Ooratta meretay’ aybee? Nuuni ooratta meretaa waati maayana danddayiyoo, qassi hegaa maayidi deꞌanawu waatana danddayiyoo?

‘OORATTA MERETAY’ AYBEE?

3. ‘Ooratta meretay’ aybee, qassi issi uri hegaa waati maayii? (Galaatiyaa 5:22, 23)

³ “Ooratta meretaa” maayida uri Yihoowa milatees. Issi uri Xoossaa ayyaanaa ayfiyaa ayfiyoogan, ba qofaanne oosuwaa geeshsha ayyaanay laammanaadan paqqadiyoogan ooratta asatettaa maayees. (Galaatiyaa 5:22, 23 nabbaba.) Leemisuwawu, I Yihoowanne A asaa siiqees. (Maa. 22:36-39) I metuwaa genccidi deꞌiyo wodekka ubbatoo ufayttees. (Yaaq. 1:2-4) I sigettiya asa. (Maa. 5:9) I haratuura gayttidaagan danddayanchchanne keha. (Qol. 3:13) I loꞌꞌobaa doseesinne oottees. (Luq. 6:35) I saluwan deꞌiya ba Aawaa mintti ammaniyoogaa ba oosuwan bessees. (Yaaq. 2:18) Harati bana yiilloyiyo wode woppu gees, qassi paacee gakkiyo wode bana naagees.—1 Qor. 9:25, 27; Tii. 3:2.

4. Nuuni ooratta meretaa maayanawu, Galaatiyaa 5:22, 23ninne Geeshsha Maxaafan hara xiqisetun odettida eeshshati deꞌiyoogeeta gidana koshshiyoy aybissee?

⁴ Nuuni ooratta meretaa maayanawu, Galaatiyaa 5:22, 23ninne Geeshsha Maxaafan hara xiqisetun odettida ubba eeshshati deꞌiyoogeeta gidana koshshees.b Ha eeshshati nuuni dumma dumma maayiyo maayotu mala gidokkona. Qassi ha eeshshatuppe daroti hara eeshshatuura issi mala. Leemisuwawu, neeni wozanappe ne shooruwaa siiqiyaaba gidikko, A danddayananne ayyo kehana. Qassi neeni tumuppe loꞌꞌo asa gidikko, ashkkenne nena naagiyaagaa gidaasa.

NUUNI OORATTA MERETAA WAATI MAAYANA DANDDAYIYOO?

5. “Nuussi Kiristtoosa wozanai” woy qofay deꞌees giyoogee woygiyoogee, qassi Yesuusa deꞌuwaabaa nuuni xannaꞌana koshshiyoy aybissee? (1 Qoronttoosa 2:16)

⁵ Koyro Qoronttoosa 2:16 nabbaba. Nuuni ooratta asatettaa maayanawu “nuussi Kiristtoosa wozanai” woy qofay deꞌana koshshees. Hegaa giyoogee nuuni Yesuusa qofaa tamaarananne A milatana koshshees giyoogaa. Xoossaa ayyaanaa ayfiyaa Yesuusi wottiyoobi baynna ogiyan ayfiis. I Yihoowa eeshshata wottiyoobi baynna ogiyan bessiis. (Ibr. 1:3) Nuuni Yesuusaagaadan loytti qoppiyo wode, aagaadan loytti oottoos; qassi aagaa mala eeshshaa loytti bessiyaageeta gidoos.—Pili. 2:5.

6. Nuuni ooratta asatettaa maayanawu baaxetiyo wode ay hassayana koshshii?

⁶ Yesuusa leemisuwaa kaalliyoogee tumuppe nuussi danddayettiyaabee? Nuuni hagaadan qoppana danddayoos: ‘Yesuusi wottiyoobi baynna asa. Taani wottiyoobi baynna ogiyan A mala gidana danddayikke!’ Neessi hegaadan siyettikko, ha hanotata hassaya. Koyruwan, neeni Yihoowanne Yesuusa leemisuwan merettadasa. Hegaa gishshawu, amarida hanotan neeni eta milatana danddayaasa. (Doo. 1:26) Naaꞌꞌanttuwan, Xoossaa geeshsha ayyaanay saluwan saꞌan aybippenne aadhdhiya wolqqa. Neeni nerkka mule oottana danddayennabaa geeshsha ayyaanaa maaduwan oottana danddayaasa. Heezzanttuwan, neeni ha wodiyan wottiyoobi baynna ogiyan ayyaanaa ayfiyaa ayfanaadan Yihooway naagenna. Saꞌan merinawu deꞌanawu hidootiyaageeti wottiyoobi baynnaageeta gidanaadan nu siiqo Aaway 1,000 layttaa keeriis. (Ajj. 20:1-3) Ha wodiyan nuuni nuussi danddayettida ubbabaa oottanawu baaxetanaadaaninne Yihooway nuna maaddiyoogaa ammanettanaadan I nuuppe koyees.

7. Nuuni haꞌꞌi ay beꞌanee?

⁷ Yaatin, nuuni Yesuusa waati milatana danddayiyoo? Nuuni Xoossaa ayyaanaa ayfiyaa macaratuppe oyddata pilggana. Eta huuphiyan huuphiyan pilggiyo wode, he eeshshata Yesuusi bessido ogiyaappe nuuni tamaarana danddayiyoobaa akeekana. Qassi, nuuni ooratta asatettaa ay keena loytti maayidaakko nuna qoranawu maaddana danddayiya amarida oyshata beꞌana.

8. Yesuusi siiqiyoogaa waati bessidee?

⁸ Yesuusi Yihoowa keehi siiqiyo gishshawu, ba Aawaassinne nuussi bana yarshshiis. (Yoh. 14:31; 15:13) Yesuusi asaa keehi siiqiyoogaa saꞌan deꞌido deꞌuwan bessiis. Amaridaageeti A eqettikkonne, I ubba galla asaa siiqiisinne asawu qarettiis. I asaa siiqiyoogaa bessido waanna ogee Xoossaa Kawotettaabaa asaa tamaarissiyoogaa. (Luq. 4:43, 44) Yesuusi tuggatanawunne nagaranchchatu kushiyan hayqqanawu eeno giyoogan Xoossaanne asaa ba goꞌꞌaa aggi bayidi siiqiyoogaakka bessiis. Yaatiyoogan, nuuni ubbay merinaa deꞌuwaa demmanaadan ogiyaa dooyiis.

9. Nuuni Yesuusaagaadan siiqiyoogaa waati bessana danddayiyoo?

⁹ Nuuni saluwan deꞌiya nu Aawaa siiqiyo gishshawu, nuna awu sheedhdhidi xammaqettida. Yaatiyo gishshawu, nuuni asaa Yesuusaagaadan oyqqiyoogan Yihoowa siiqiyoogaa bessana koshshees. Kiitettida Yohaannisi hagaadan giis: “Be7ido ba ishaa siiqennaagee be7ibeenna Xoossaa siiqanau waani danddayii?” (1 Yoh. 4:20) Nuna hagaadan oychchana danddayoos: ‘Taani asaa loytta siiqiyaanaa? Harati tawu meqetta iitikkonne, taani etawu qarettiyaanaa? Harati Yihoowabaa eranaadan maaddanawu ta wodiyaanne ta aquwaa goꞌettanaadan siiqoy tana denttettii? Taani baaxetiyo baaxiyaa daro asay nashshenna wode woy tana eti eqettiyo wode taani hegaadan oottanawu eeno giyaanaa? Erissiyo ashkkara oottiyo oosuwaa kaseppe loytta oottanawu wodiyaa demmana danddayiyaanaa?’—Efi. 5:15, 16.

10. Yesuusi saruwan deꞌanawu waatidee?

¹⁰ Yesuusi saruwan deꞌiya asa. Asay A bolli iitabaa oottido wode, I iitabaa ootti zaaribeenna. SHin I hegaappe aarobaa oottiis. I saruwan deꞌiis; qassi harati sigettanaadan minttettiis. Leemisuwawu, eti Yihooway bantta goynuwan ufayttanaadan koyikko, bantta ishanttuura sigettana koshshiyoogaa I eta tamaarissiis. (Maa. 5:9, 23, 24) Qassi kiitettidaageeti bantta giddon ubbaappe ooni gitakko palamettiyoogaa agganaadan Yesuusi eta darotoo maaddiis.—Luq. 9:46-48; 22:24-27.

11. Nuuni sigettiyaageeta waani gidana danddayiyoo?

¹¹ Nuuni sigettiyaageeta gidanawu, ooshshay merettennaadan naagettiyoogaappe aarobaa oottana koshshees. Nuuni haratuura sigettanawunne nu ishanttinne michchontti bantta giddon merettidabaa giigissanaadan minttettanawu baaxetana koshshees. (Pili. 4:2, 3; Yaaq. 3:17, 18) Nuuni nuna ha oyshata oychchana danddayoos: ‘Taani haratuura sigettanawu ay agga bayanawu eeno giyaanaa? Issi ishay woy michchiyaa tana azzanttiyo wode, taani uluwan lancciyaa oyqqiyaanaa? Hara uri tanaara sigettanaashin naagiyaanaayye, metuwawu gaasoy hara uraa gaada taani qoppikkonne, kasetada sigettiyaanaa? Ooyettidaageeti sigettanaadan koshshiya wodiyan minttettiyaanaa?’

12. Yesuusi kehatettaa waati bessidee?

¹² Yesuusi keha. (Maa. 11:28-30) Metiyaabay deꞌishinkka, qarettiyoogaaninne hanotaadan haniyoogan I kehatettaa bessiis. Leemisuwawu Kanaane biittaa maccaasiyaa ba naꞌiyo I pattanaadan mintta oychchaasu, A oychchidobaa I koyro oottibeenna; shin A gita ammanuwaa bessido gishshawu I naꞌiyo kehatettan pattiis. (Maa. 15:22-28) Yesuusi keha gidikkonne, zorana bessiyo wode zoriis. I siiqiyoogeeta issi issitoo mintti zoriyoogan kehatettaa bessiis. Leemisuwawu, PHeexiroosi Yesuusi Yihoowa sheniyaa oottiyoogaa digganawu malido wode, hara erissiyo ashkkaratu sinttan Yesuusi A seeriis. (Mar. 8:32, 33) I hegaadan oottidoy PHeexiroosa kawushshanaassa gidennan, A loohissanaassanne hara erissiyo ashkkarati otorettennaadan zoranaassa. PHeexiroosi guuttaa yeellatidaba gidikkonne, he seeran I goꞌettidoogee qoncce.

13. Nuuni waanidi wozanappe kehana danddayiyoo?

¹³ Neeni siiqiyoogeetuyyo wozanappe kehanawu, eta issi issitoo neeni zoriyoogee koshshana danddayees. Neeni yaatiyo wode, Xoossaa Qaalan deꞌiya maaraadan zoriyoogan Yesuusa milataasa. Ashkke gida. Etabaa loꞌꞌobaa qoppa, Yihoowanne nena siiqiyaageeti neeni siiquwan zoriyo zoriyaa siyanaagaa ammanetta. Ha oyshata nena oychcha: ‘Taani siiqiyo uri balabaa oottiyo wode, he uraa zoranawu taani xalee? Taani zorana koshshiyo wode, kehatettan haasayiyaanaayye, meqetti baynna hanotan haasayiyaanaa? Taani zoranaadan oottiya gaasoy aybee? Taani he uri tana hanqqetissido gishshawu zoriyaanaayye, taani A maaddanawu koyiyo gishshawu zoriyaanaa?’

14. Yesuusi loꞌꞌotettaa waati bessidee?

¹⁴ Yesuusi loꞌꞌobaa eriyoogaa xalla gidennan, loꞌꞌobaa wozanappe oottiis. Yesuusi ba Aawaa siiqiyo gishshawu, ubbatoo loꞌꞌobaa oottiis. Loꞌꞌo asi ubba wode harata maaddiyo ogiyaa koyeesinne etawu loꞌꞌobaa oottees. Loꞌꞌobaa oottana koshshiyoogaa eriyoogaa xallay gidenna; nuuni wozanappe qoppidi loꞌꞌobaa oottana koshshees. Nuuni hagaadan qoppana danddayoos: ‘Iitabaa qoppidi loꞌꞌobaa oottiyoogee danddayettiyaabee?’ Ee danddayettiyaaba. Leemisuwawu, Yesuusi hiyyeesatussi imotaa immida asatubaa yootiis, shin eti bantta imotaa harati eranaadan oottidosona. Immiyoogee loꞌꞌo ooso gidikkonne, Yihooway etan ufayttibeenna.—Maa. 6:1-4.

15. Nuuni waani tumuppe loꞌꞌo gidana danddayiyoo?

¹⁵ Nuuni nu xalla siiqennan aggidi suurebaa oottikko, tumuppe loꞌꞌo asa gidana danddayoos. Nena hagaadan oychchana danddayaasa: ‘Taani suurebaa oottana koshshiyoogaa eriyoogaa xalla gidennan, tumuppe hegaa oottiyaanaa? Taani loꞌꞌobaa oottiyoy aybissee?’

NU OORATTA MERETAY MOORETTENNAADAN WAATI NAAGANA DANDDAYIYOO?

16. Nuuni ubba galla ay oottana koshshii, qassi aybissi?

¹⁶ Ooratta meretaa maayiyoogee xammaqettiyo wode wuriis giidi nuuni qoppana koshshenna. Ooratta meretay nuuni ubbatoo loꞌꞌo hanotan oyqqana koshshiyo “ooratta maayuwaa” mala. Nuuni ubba galla Xoossaa ayyaanaa ayfiyaa ayfiyo ogiyaa koyiyoogee yaatana danddayiyo issi oge. Aybissi? Yihooway issibaa oottanawu ba ayyaanaa goꞌettiyo gishshataassa. (Doo. 1:2) Hegaa gishshawu, Xoossaa ayyaanaa ayfe macara ubbay nuuni issibaa oottanaadan nuna denttettana danddayeesinne denttettana bessees. Leemisuwawu, erissiyo ashkkaraa Yaaqoobi hagaadan giis: “Oosoi shaahettido ammanoi haiqqidaagaa.” (Yaaq. 2:26) Xoossaa ayyaanaa ayfiyaa macara gidida hara ubbawukka hegaadan gaana danddayettees. Nuuni eta bessiyo wode ubban, Xoossaa ayyaanay nuna maaddiyoogaa qonccissoos.

17. Nuuni ayyaanaa ayfiyaa ayfennan aggiyo wode waatana koshshii?

¹⁷ Xammaqettoosappe daro laytta gidido Kiristtaanetikka, ayyaanaa ayfiyaa issi issitoo ayfennan aggana danddayoosona. SHin nuuni ha eeshshata bessanawu ubbatoo baaxetiyoogee keehi koshshiyaaba. Ha leemisuwaa qoppa. Neeni dosiyo maayoy peerettiyaakko, hegaa sohuwaara oluutee? CHii, olakka. Danddayettikko, neeni he peerettaa loyttada sikkennan waaya aggana. Qassi hegaappe simmada neeni loytta naagettaasa. Hegaadan, neeni issi wode issi uraa kehatettan, danddayan woy siiquwan oyqqana xayikko, hidootaa qanxxoppa. He uraara dabbotaa minttada deꞌanawu wozanappe maarotaa oychcha. Qassi sinttappe loꞌꞌobaa oottanawu murtta.

18. Nuuni ay ammanettana danddayiyoo?

¹⁸ Yesuusi nuussi leemiso gidiyo gishshawu nuuni A keehi galatoos! Nuuni A qofaa loytti kaalliyo wode, aagaadan oottanawu metootokko. Nuuni Yesuusaagaadan loytti oottiyo wode, ooratta meretaa loytti maayana. Ha huuphe yohuwan, Xoossaa ayyaanaa ayfiyaa macaratuppe oyddaa xalla beꞌida. Ayyaanaa ayfe gidida hara eeshshata xannaꞌanawunne neeni he eeshshata waata loytta bessanaakko wotta dentta qoppanawu amarida wodiyaa bazziyoogee neessi loꞌꞌo. Ha allaalliyaabaa yootiya huuphe yohota Yihoowa Markkati Geeshsha Maxaafaa Xannaꞌanawu Maaddiya Xuufiyaa giyaagaa garssan “Kiristtaanetu Deꞌuwaa” giyaasan “Geeshsha Ayyaanaa Ayfiyaa” giddon demmana danddayaasa. Neeni ooratta meretaa maayada deꞌanawu baaxetikko, Yihooway nena maaddanaagaa ammanettana danddayaasa.