Neeni Unꞌꞌettiyo Wode Waana Genccana Danddayay?

‘UNꞌꞌETTIYOOGEE’ nu wozanawu deexo tooho mala gidana danddayees. (Lee. 12:25, NW) Unꞌꞌettiyoogaa gaasuwan neeni waayetta eray? Hegaa genccana danddayennabadan neessi siyetti erii? Yaatikko, hegaa malabay gakkiyoy ne xalla gidenna. Nuuppe daroti sahettiyaageeta harggissiyaageeta, siiqiyo uri hayqqidoogeeta, meretay gattiyo daafabaa gaasuwan qohettidaageeta, woy asatettan, guuggiyaaninne qofan daafuranaadan oottiya harabay gakkidoogeeta gidana danddayoos. SHin, unꞌꞌettiyo wode genccanaadan nuna aybi maaddana danddayii?a

Kawuwaa Daawita hanotaa xannꞌiyoogan unꞌꞌettiyo wode nuuni waani genccanaakko darobaa tamaarana danddayoos. A keehi metiya hanotati gakkidosona, ubba issi wode hayqqichchi attiis. (1 Sam. 17:34, 35; 18:10, 11) Daawiti unꞌꞌettido wode genccanaadan A aybi maaddidee? Nuuni A waati milatana danddayiyoo?

DAAWITI UNꞌꞌETTIDO WODE GENCCANAADAN A AYBI MAADDIDEE?

Daawita daro metoy issi wode gakkiis. Kawuwaa Saaꞌooli Daawita woranawu malin I baqatido wode A gakkidabaa qoppa. Daawitinne A asati olaappe simmido wode, morkketi eta aquwaa wuuqqidoogaa, eta keettaa xuuggidoogaanne eta soo asaa omooddidoogaa beꞌidi eti dagammidosona. Daawiti waatidee? “Daawitinne aara issippe de7iya asai bantta wolqqai ixxana gakkanaashin waassidi yeekkidosona.” He wode, Daawita A asati “shuchchan caddanau haasayido” gishshawu I keehi unꞌꞌettiis. (1 Sam. 30:1-6) Heezzu gita metoti Daawita issi wode gakkidosona: A soo asay metiya hanotan deꞌees, A asati A worana koyoosona, qassi Kawuwaa Saaꞌooli A yedettiiddi deꞌees. Yaatiyo gishshawu, Daawiti keehi unꞌꞌettennan waayi aggana.

Daawiti kaallidi ay oottidee? I sohuwaara “GODAN ba Xoossan minettiis.” Daawiti hegaadan waati oottana danddayidee? Daawiti maaduwaa demmanawu Yihoowa ubbatoo woossidoogaanne Yihooway kase A waati maaddidaakko I wotti dentti qoppidoogaa nuuni eroos. (1 Sam. 17:37; Maz. 18:2, 6) Daawiti Yihoowa kaaletuwaa oychchana koshshiyoogaa akeekido gishshawu, I waatana koshshiyaakko Yihoowa oychchiis. Daawiti Yihoowa kaaletuwaa ekki simmidi, eesuwaara oosuwan peeshshiis. Hegaappe denddidaagan, anne A asaa Yihooway anjjiis, qassi eti bantta soo asaa ashshidosonanne bantta aquwaa wotti ekkidosona. (1 Sam. 30:7-9, 18, 19) Daawiti oottido heezzubata akeekadii? I Yihooway maaddanaadan woossiis, Yihooway kase baassi oottidobaa wotti dentti qoppiis, qassi Yihoowa kaaletuwaa azazettiis. Nuuni Daawita waati milatana danddayiyoo? Heezzu ogeta ane beꞌoos.

UNꞌꞌETTIYO WODE DAAWITA LEEMISUWAA KAALLA

1. Woossa. Nuuni unꞌꞌettiyo wode ubban, maaduwaanne aadhdhida eratettaa demmanawu Yihoowa woossana danddayoos. Nuna qofissiya ubbabaa ayyo yootiyoogee nuuni woppu gaanaadan maaddana danddayees. Woy he wode nuussi hanotay injjetikko, cenggurssaa sissennan qantta woosaa woossana danddayoos. Nuuni Yihooway nuna maaddana mala oychchiyo wode ubban, “GODAI tau wogga zaallaa; taani olaappe naagettiyo miixaa; i tana ashshiyaagaa. Ta Xoossai taani akko baqatiyo ta wogga zaallaa” yaagida, Daawitaagaadan an ammanettiyoogaa bessoos. (Maz. 18:2) Woosay tumuppe maaddii? Kaaliyo giyo aqinye michchiyaa hagaadan gaasu: “Woossa simmida taani woppu gays. Woosay ta qofay Yihoowa qofaara maayettanaadaaninne an kaseegaappe loytta ammanettanaadan tana maaddees.” Woosay unꞌꞌissiyaabaa nuuni genccanaadan maaddanawu Yihooway immiyo imota.

2. Wotta dentta qoppa. Neeni nena kase gakkidabaa hassayiyo wode, Yihooway nena maaddido gishshawu neeni genccido metota qoppana danddayay? Yihooway kase ba ashkkarata waati maaddidaakko nuuni wotti dentti qoppiyo wode, keehi woppu goosinne Yihoowan kaseegaappe aaruwan ammanettoos. (Maz. 18:17-19) Joshuwa giyo issi cimay hagaadan giis: “Zaaruwaa demmido woosata xaafa oyqqays. Hegee taani issibaa Yihoowa woossido wodiyaanne taassi koshshiyaabaa I immido wodiyaa taani hassayanaadan maaddiis.” Ee, Yihooway nuna darotoo waati maaddidaakko nuuni yuushshi qoppiyo wode, nuna unꞌꞌissiyaabata genccanawu ubbatoo baaxetanaadan koshshiya minotettaa demmoos.

3. Azazetta. Issi hanotaa xeelliyaagan waatanaakko nuuni kuuyanaappe kase, keehi ammanttiya kaaletuwaa demmanawu Xoossaa Qaalaa pilggana danddayoos. (Maz. 19:7, 11) Daroti issi xiqisiyaa pilggiyo wode, he xiqisiyaa bantta deꞌuwan waatidi oosuwan peeshshanaakko loytti akeekana danddayiyoogaa eridosona. Jeerada giyo issi cimay hagaadan giis: “Pilggiyoogee taani issi xiqisiyaa loytta eranaadaaninne Yihooway tawu yootiyoobaa akeekanaadan maaddees. Hegee taani nabbabiyoobaa wozanappe ammananaadan maaddiyo gishshawu, taani A kaaletuwaa azazettana danddayays.” Nuuni Yihoowa kaaletuwaa Geeshsha Maxaafaappe pilggiyo wodenne hegaa kaalliyo wode, unꞌꞌssiyaabay merettikkokka, woppu gaananne ufayttana.

GENCCANAADAN YIHOOWAY NENA MAADDANA

Daawiti unꞌꞌettiyoogaa genccanawu Yihoowa maadoy baassi koshshiyoogaa akeekiis. I Yihooway A maaddido gishshawu keehi galatidi hagaadan giis: ‘Ta Xoossan taani eta miixaa xeeraara guppa aadhdhays. Taayyo wolqqaa immiyaagee Xoossaattennee.’ (Maz. 18:29, 32) Nu metoy nuuni giigissana woy genccana danddayennaagaa keena wolqqaama giidi qoppana danddayoos. SHin wolqqaama metuwaakka Yihoowa maaduwan genccana danddayoos! Ee, nuuni Yihooway nuna maaddanaadan woossiyo wode, I nuussi oottidobaa wotti dentti qoppiyo wodenne A kaaletuwaa azazettiyo wode, unꞌꞌissiyaabaa genccanawu nuussi koshshiya wolqqaanne aadhdhida eratettaa Yihooway immanaagaa ammanettana danddayoos!