Ajjuutaa Maxaafay Ne Sinttanaa Deꞌuwaabaa Yootiyoobay Aybee?

1. Asa ubbay kuuyana koshshiyo gitabay aybee?

ASAY ha wodiyan issi gitabaa kuuyana bessees. Eti saluwaa saꞌaa haariyo maatay deꞌiyo Xoossaa Yihoowawu exataneeyye, awu suutta morkke gidida Seexaanaa Dabloosawu exatanee? Eti naaꞌꞌaappe gidduwan deꞌana danddayokkona. Eti kuuyiyoobay eti merinawu deꞌanaadan woy deꞌennaadan oottana. (Maa. 25:31-33, 46) ‘Gita waayiyaa’ wode, eti attanaagaa woy xayanaagaa erissiya malaatay eta bolli wodhdhana.—Ajj. 7:14; 14:9-11; Hiz. 9:4, 6. 

2. (a) Ibraawe 10:35-39y nuuni ay oottanaadan minttettii? (b) Ajjuutaa maxaafay nuna waati maaddana danddayii?

² Ibraawe 10:35-39 nabbaba. Neeni Yihoowa haaruwawu exatanawu doorikko, loꞌꞌobaa kuuyadasa. Neeni haꞌꞌi harati suurebaa kuuyanaadan maaddanawu koyaasa. Eta maaddanawu Ajjuutaa maxaafan deꞌiya qofaa goꞌettana danddayaasa. He maalaalissiya maxaafay Yihoowa morkketu bolli gakkanabaa yootikkonne, ammanettidi A haaruwawu exatiyaageeti demmana anjjotakka yootees. Nuuni ha keehi koshshiya tumaa xannaꞌana bessees. Yaatiyoogee aggennan Yihoowawu haggaazanawu nuuni murttido murttiyaa yaa minttana. Hegaa bollikka, nuuni tamaaridobaa harati Yihoowawu haggaazanawu kuuyanaadaaninne aggennan awu haggaazanaadan eta maaddanawu goꞌettana danddayoos.

3. Nuuni ha huuphe yohuwan ay beꞌanee?

³ Ha huuphe yohuwan, nuuni ha oyshata beꞌana: Xoossaa haaruwawu exatiyaageeti ay demmanee? Qassi, Ajjuutaa maxaafan qonccida zoꞌo doꞌawu exatanawu dooriyaageetu bolli aybi gakkanee?

YIHOOWAWU AMMANETTIYAAGEETI AY DEMMANEE?

4. Kiitettida Yohaannisi beꞌido, Yesuusaara saluwan deꞌiya citay awugee?

⁴ Kiitettida Yohaannisi Yihoowa haaruwawu exatiyaanne merinaa anjjota demmiya naaꞌꞌu citaa ajjuutan beꞌiis. Koyro citaa paydoy 144,000. (Ajj. 7:4) Eti Yesuusaara saluwan kawotanawu saꞌaappe doorettidosona. Eti aara saꞌaa haarana. (Ajj. 5:9, 10; 14:3, 4) Eti Yesuusaara saluwan Xiyoone Deriyaa bolli eqqidoogaa Yohaannisi ajjuutan beꞌiis.—Ajj. 14:1.

5. Ayyanan tiyettida 144,000ppe attidaageeti matan waananee?

⁵ Kiitettidaageetu wodiyaappe doommidi hanno gakkanawu, 144,000tu yara gidanawu shaꞌan qoodettiya asay doorettiiddi takkiis. (Luq. 12:32; Roo. 8:17) Gidoppe attin, Yohaannisi etappe attidaageetu woy guuttatu xallay wurssetta gallassatun saꞌan deꞌanaagaa yootiis. Tiyettidaageetuppe ‘attidaageeti’ Yihoowan sabettiyoogaa bessiya wurssetta ‘maatafay’ gita waayee doommanaappe kase eta bolli wodhdhana. (Ajj. 7:2, 3; 12:17, NW) Tiyettidaageetuppe attidaageeti, ammanettidi hayqqida 144,000tu yara gidida haratuura gayttanawu gita waayiyaa wode saluwaa boosona. Yan eti Xoossaa Kawotettan Yesuusaara haarana.—Maa. 24:31; Ajj. 5:9, 10.

6-7. (a) Yohaannisi kaallidi beꞌido citay awugee, qassi nuuni etabaa eriyoobay aybee? (b) Tiyettidaageetuppe attidaageetinne ‘zawi baynna daro asay’ Ajjuutaa shemppo 7n odettidabay polettiyoogaa yeemuwan naagana koshshiyoy aybissee?

⁶ Yohaannisi saluwan deꞌiya citaa beꞌi simmidi “zawai bainna daro asaa” beꞌiis. SHin Geeshsha Maxaafay ha citan aappun asay deꞌiyaakko yootenna. (Ajj. 7:9, 10) Yaatin etabaa nuuni ay eriyoo? Yohaannisi hagaadan giis: “Hageeti daro waayiyaa waayidi yiidaageeta. Eti bantta maayuwaa Dorssaa suuttan meeccidi booxissidaageeta.” (Ajj. 7:14) ‘Zawi baynna daro asay’ gita waayiyaappe atti simmidi, saꞌan deꞌananne maalaalissiya anjjota demmana.—Maz. 37:9-11, 27-29; Lee. 2:21, 22; Ajj. 7:16, 17.

⁷ Nuuni saluwaa baanawu doorettidaageeta woy hagan saꞌan deꞌanaageeta gidin, Ajjuutaa shemppo 7n odettidabay polettiyoogaa nuuni beꞌanaagaa ammaniyoo? Nuuni ammanana koshshees. Xoossawu haggaaziya naaꞌꞌu citatussikka hegee keehi ufayssiya wode gidana! Nuuni Yihoowa haaruwawu exatanawu doorikko, keehi ufayttana. Ajjuutaa maxaafay gita waayiyaa xeelliyaagan nuussi harabaa ay yootii?—Maa. 24:21.

XOOSSAA MORKKETU BOLLI GAKKANABAY AYBEE?

8. Gita waayee waani doommanee, qassi daro asay waatanee?

⁸ Hagaappe kasetiya huuphe yohuwan beꞌidoogaadan, worddo haymaanoote ubbaa xaaxa waaxiya Gita Baabiloono kawotettati mata wode xayssana. (Ajj. 17:16, 17) Hegee gita waayiyawu doometta gidana. SHin daro asay hegaa gaasuwan Yihoowawu haggaaziyoogaa doommanee? CHii. Ubba qassi, Yihoowawu haggaazenna asay deretun leemisettida ha alamiyaa kawotettatuppenne zalꞌꞌiyaa dirijjitetuppe he wodiyan naaguwaa demmanawu koyanaagaa Ajjuutaa shemppo 6y yootees. He asay Xoossaa Kawotettawu exatenna gishshawu, Yihooway eta morkkedan xeellees.—Luq. 11:23; Ajj. 6:15-17.

9. Gita waayiyaa wode Xoossawu haggaazennaageetuppe Yihoowa asay dummatiyoogaa hara asay waati akeekana danddayii, qassi Yihoowa asaa bolli gakkanabay aybee?

⁹ Ammanettida Yihoowa ashkkarati Xoossawu haggaazennaageetuppe gita waayiyaa wode dummatanaagee tuma. He wode saꞌan Xoossaa Yihoowawu haggaaziyaynne ‘doꞌawu’ exatennan ixxiyay Yihoowa ashkkaratu xalla gidana. (Ajj. 13:14-17) Eti Yihoowawu ammanettidi deꞌiyo gishshawu, Yihoowa morkketi keehi hanqqettana. Hegaappe denddidaagan, issippe denddiya kawotettati kumetta saꞌan deꞌiya Xoossaa asa ubbaa qohana. Geeshsha Maxaafay he qohuwaa Maagooga Googa qohuwaa gees.—Hiz. 38:14-16.

10. Ajjuutaa 19:19-21n qonccidaagaadan, Yihooway ba asaa bolli qohoy gakkiyo wode waatanee?

¹⁰ Ha gita qohoy gakkiyo wode Yihooway waatanee? I hagaadan giis: “Ta hanqqoi suullana.” (Hiz. 38:18, 21-23) Ajjuutaa shemppo 19y kaallidi hananabaa yootees. Yihooway Ba asaa naaganawunne eta morkketa xayssanawu Ba Naꞌaa kiittees. ‘Saluwaa olanchchata’ gidida ammanettida kiitanchchatinne 144,000ti Yesuusaara issippe Maagooga Googaara olettana. (Ajj. 17:14; 19:11-15) Ha olay ay kaalettanee? Yihoowa morkke gidida ubba asaynne citati muleera xayana!—Ajjuutaa 19:19-21 nabbaba.

OLAAPPE SIMMIN DEꞌIYA BULLACHCHAA

11. Ajjuutaa maxaafay yootiyo keehi ufayssiyaabay aybee?

¹¹ Xoossaa morkketi muleera xayiyo wode saꞌan paxa attida ammanettidaageeti ay keena ufayttanaakko qoppa! He wodee keehi ufayssiya wode gidana! Gita Baabiloona xayiyo wode, saluwan deꞌiyaageeti keehi ufayttikkonne, hegaappe aaruwan ufayttanaadan oottiya harabay deꞌees. (Ajj. 19:1-3) Ajjuutaa maxaafay ‘Dorssaa bullachchay’ keehi ufayssiyaaba gidiyoogaa yootees.—Ajj. 19:6-9.

12. Ajjuutaa 21:1, 2y yootiyoogaadan, Dorssaa bullachchay awudee?

¹² He bullachchay awudee? Armmageedoona olaappe guutta kasetidi 144,000ti ubbay saluwaa baana. SHin, hegee Dorssaa bullachchaa wode gidenna. (Ajjuutaa 21:1, 2 nabbaba.) Dorssaa bullachchay Armmageedoona olaappe guyyiyan Xoossaa morkketi ubbay xayi simmin gidana.—Maz. 45:3, 4, 13-17.

13. Dorssaa bullachchan aybi hananee?

¹³ Dorssaa bullachchan aybi hananee? Aqo deꞌoy attumaageenne maccaara issuwaa gidanaadan oottees. Hegaadankka, Dorssaa bullachchay Kawuwaa Yesuus Kiristtoosinne awu “bullashettiya” 144,000ti issuwaa gidanaadan oottees. Ha bullachchay 1,000 layttawu saꞌaa haarana ooratta kawotettay eqqanaadan oottana.—Ajj. 20:6.

GITA KATAMIYOONNE NE SINTTANAA DEꞌUWAA

14-15. Ajjuutaa shemppo 21, 144,000ta aybiira geeddarissii? (Koyro sinttan deꞌiya misiliyaa xeella.)

¹⁴ Kaallidi, Ajjuutaa shemppo 21, 144,000ta keehi loꞌꞌiya ‘Ooratta Yerusalaamo’ geetettiya katameera geeddarssees. (Ajj. 21:2, 9) Ha katamiyaa “Dorssai kiittido tammanne naa77atu sunttai xaafettido” 12 shuchchatun baasettaasu. Yohaannisi hagan ufayttidoy aybissee? He shuchchatuppe issuwan ba sunttay xaafettidoogaa I beꞌido gishshataassa. Hegee gita maata!—Ajj. 21:10-14; Efi. 2:20.

¹⁵ Ha katamiyaa hara katamaa mala gidukku. Katamee wogga ogee geeshsha worqqa, 12 penggeti inqquwaa giyo alꞌꞌo shuchchan oosettidosona, dirssaynne hiixettida shuchchay bonchchettida shuchchatun alleeqettiis, qassi “geesai, gomppainne xoqqatettai issi mala.” (Ajj. 21:15-21) SHin Yohaannisi issibay baynnaagaa akeekiis! Yohaannisi hagaadan giis: “Godai, Ubbaappe Wolqqaama Xoossainne Dorssai katamee Beeta Maqidase gidiyo gishshau, taani he katamen Beeta Maqidase be7abeikke. Katameeyyo poo7iya awi woi agini koshshenna. Aissi giikko, Xoossaa bonchchoi he katamen poo7ees; Dorssaikka he katameeyyo xomppe.” (Ajj. 21:22, 23) Ooratta Yerusalaame yarati Yihoowaara deꞌana. (Ibr. 7:27; Ajj. 22:3, 4) Hegaa gishshawu, Yihoowaynne Yesuusi he katamee beeta maqidase.

16. Xoossaa Kawotettaa SHaꞌu Layttaa Haaruwan asay ay demmanee?

¹⁶ Tiyettidaageeti he katameebaa wotti dentti qoppiyoogan keehi ufayttoosona. SHin saꞌan deꞌanawu hidootiyaageetikka he katamen ufayttana koshshees. Xoossaa Kawotettaa SHaꞌu Layttaa Haaruwan, Oorattaa Yerusalaama saꞌawu zawi baynna anjjuwaa ehaana. Yohaannisi he anjjoti ‘deꞌo haattaa shaafaadan’ goggishin beꞌiis. Qassi ‘zare ubbaa harggiyaappe pattiya’ bonccoy deꞌiyo “de7o mittai” shaafaappe hefintta baggaaranne hafintta baggaara deꞌees. (Ajj. 22:1, 2) He wode deꞌiya asa ubbay he loꞌꞌobatuppe goꞌettana. Yihoowayyo azazettiya asay loddan loddan wottiyoobi baynnaagaa gidana. Yan sahoy, tuggaynne yeehoy deꞌenna.—Ajj. 21:3-5.

17. Ajjuutaa 20:11-13y yootiyoogaadan, SHaꞌu Layttaa Haaruwaappe goꞌettanay oonee?

¹⁷ He maalaalissiya loꞌꞌobatuppe goꞌettanay oonee? Goꞌettiya koyroogeeti Armmageedoonappe attiya zawi baynna daro asatanne ooratta alamiyan yelettana naata. SHin Ajjuutaa shemppo 20y hayqqidaageeti denddanaagaakka yootees. (Ajjuutaa 20:11-13 nabbaba.) Ammanettidi kase hayqqida ‘xillotikka,’ Yihoowabaa tamaariyo injjiyaa demmennan hayqqida ‘worddotikka’ saꞌan deꞌanawu denddana. (Oos. 24:15; Yoh. 5:28, 29) Hegaa giyoogee hayqqida asa ubbay SHaꞌu Layttaa Haaruwaa wode denddana giyoogee? Gidenna. Hayqqanaappe kase Yihoowawu haggaaziyo injjiyaa ixxida iitati denddokkona. Eti Yihoowaabaa tamaariyo injjiyaa demmikkonne, Gannate gidida saꞌan deꞌanawu bessennaageeta gidiyoogaa qonccissidosona.—Maa. 25:46; 2 Tas. 1:9; Ajj. 17:8; 20:15.

WURSSETTA PAACIYAA

18. SHaꞌu layttaa wurssettan saꞌan aybi hananee?

¹⁸ SHaꞌu layttaa wurssettan, saꞌan deꞌiya ubba asay wottiyoobi baynnaagaa gidana. Addaameppe laattido nagaraa gaasuwan ooninne waayettenna. (Roo. 5:12) Addaame nagaraa gaasuwan gakkida qanggettay muleera attana. Qassi saꞌan deꞌiya asay ‘denddana,’ hegaa giyoogee eti 1,000 layttaa wurssettan wottiyoobi baynnaageeta gidana giyoogaa.—Ajj. 20:5.

19. Wurssetta paacee koshshidoy aybissee?

¹⁹ Seexaanay Yesuusa paaccido wodekka Yesuusi Xoossawu ammanettidi deꞌidoogaa nuuni eroos. SHin Seexaanay wottiyoobi baynna asa ubbaa paacciyo wode eti Yihoowawu ammanettidi deꞌanee? Seexaanay 1,000 layttaa wurssettan ciimma ollaappe birshshettiyo wode, Yihoowawu ammanettiyoogaa ubba asay huuphiyan huuphiyan bessana danddayees. (Ajj. 20:7) Ha wurssetta paaciyaa wode ammanettidaageeti merinaa deꞌuwaanne tumu laꞌatettaa demmana. (Roo. 8:21) Makkalanchchati Dabloosaaranne A daydanttatuura merinawu xayana.—Ajj. 20:8-10.

20. Ajjuutaa maxaafan deꞌiya ufayssiya hiraagata xeelliyaagan neessi aybi siyettidee?

²⁰ Ajjuutaa maxaafaa qanttan zaaretti simmin neeyyo aybi siyettidee? Ha maalaalissiya hiraagati polettiyoogaa neeni beꞌiyoogan keehi ufayttikkii? Harati nu Xoossawu geeshsha goynuwaa goynnanaadan neeni shoobbanawu koyanaadan hagee nena denttettidoogee qoncce. (Ajj. 22:17) Hegeeti sinttappe hananaagaa nuuni tamaaridoogan ufayttida, qassi nuunikka kiitettida Yohaannisaagaadan, “Amin77i. Godaa Yesuusaa, neeni haaya” yaagoos.—Ajj. 22:20.