Kehatettay Nena Denttetto

LIISAa hagaadan gaasu: “Kiristtaane ishanttinne michchontti bessido kehatettay tana keehi maaddiis.” A tumaa koyro siyanaadan oottidabaa yootaasu. Hegee Aana yootidobaara issi mala, A hagaadan gaasu: “Taani tumaa koyro siyanaadan oottidabay Yihoowa Markkati tamaarissidoba gidennan, eta kehatettaa.” Ha naaꞌꞌu michchonttikka haꞌꞌi Geeshsha Maxaafaa nabbabiyaageetanne hegaa wotti dentti qoppiyaageeta gidikkonne, kehatettay eta keehi maaddiis.

Harata minttettiya ogiyan kehatettaa waati bessana danddayiyoo? Ane naaꞌꞌu ogeta beꞌoos; hegeetikka, nu haasayiyoobaaninne oottiyooban. Yaatidi nuuni oossi kehatettaa bessana koshshiyaakko pilggana.

KEHATETTAN HAASAYIYOOGAA

Leemiso shemppo 31 kehatettan haasayiya wozannaama machcheebaa yootees. (Lee. 31:26) A ay haasayanaakko, qassi waata haasayanaakko kuuyanaadan kehatettay O maaddiis. Aawatikka kehatettan haasayana bessees. Yelida daroti haasayiyo iita haasayay bantta naata qohana danddayiyoogaanne hegee eta naati eti yootiyoobaa siyennan ixxanaadan oottana danddayiyoogaa eroosona. Yelidaageeti kehatettan haasayiyoogee eti yootiyoobaa eta naati siyanawunne azazettanawu metootennaadan oottana.

Neeni yelidaagaa gidin aggin, kehatettan waata haasayana danddayay? Leemiso 31:26 doomettan deꞌiya qofay hegaa akeekanaadan nuna maaddees: “Aadhdhida eran a haasayausu.” Hegee nu haasayiyoobaanne nu haasayiyo ogiyaa akeekan dooriyoogaara gayttidaba. Hegee nuuni ubbatoo nuna hagaadan oychchanaadan maaddees: ‘Taani haasayiyoobay siyiyaageeti hanqqettanaadan oottiiyye, sarotettay deꞌanaadan oottii?’ (Lee. 15:1) Ee, haasayanaappe kase qoppiyoogee loꞌꞌo.

Hara leemisoy hagaadan gees: “Akeekennan haasayiyo haasayai cu[b]edan caddees.” (Lee. 12:18) Nuuni haasayiyoobaynne haasayiyo ogee haratussi aybi siyettanaadan oottiyaakko qoppiyoogee haasayiyooban naagettanaadan nuna maaddana danddayees. Ee, nuuni kehatettan haasayikko, harata qohiya qaalaa goꞌettokko woy qareti baynna ogiyan haasayokko. (Efi. 4:31, 32) Iita qofaanne haasayaa aggidi kehanne shonggaara deꞌiya qaalaa goꞌettoos. Yihooway yayyida ba ashkkara Eelaasa minttettido wode hegaara gayttidaagan leemiso gidiyaabaa oottiis. Yihooway kiittin yiida kiitanchchay ‘saasukkidi’ haasayiis. (1 Kaw. 19:12) Gidoppe attin, keha gidiyoogee keha qaalaa haasayiyoogaa xalla gidenna. Keha gidiyoogaa bessiyaabaakka nuuni oottana koshshees. Waatidi?

KEHATETTAN OOTTIYOOBAY HARATA MAADDEES

Keha qaalaa haasayiyoogaaninne kehabaa oottiyoogan Yihoowa milatoos. (Efi. 4:32; 5:1, 2) Qommoora ibaa denttido Liisa Yihoowa Markkati bessido kehatettaa hagaadan gaada yootaasu: “Yihoowa Markka gidida naaꞌꞌu azinatinne machchoti nu soo asay qoppennan harasaa baana koshshido wode issi issibaa qachchiyoogan nuna maaddanawu bantta ooso keettaappe shemppuwaa ekkidosona. Haray atto, taani he wode Geeshsha Maxaafaa xannaꞌiyoogaa doommabeykke!” Kehatettan hegaadan oottidobay Liisa tumaa loytta pilgganaadan maaddiis.

Qassi ha huuphe yohuwaa doomettan ibaa denttido Aana, Yihoowa Markkati bessido kehatettaa gishshawu eta keehi galataasu. A hagaadan gaasu: “Alamiyaa asaa hanotaa gaasuwan taani keehi siriya asa gidaas. Asaa ammanettanawu taani metootays.” A gujjada hagaadan gaasu: “Taani Yihoowa Markkatuura gayttido wode, eta ammanettabeykke. Taani, ‘Eti tana maaddiyoy aybissee?’ gaada qoppaas. SHin tana Geeshsha Maxaafaa xannaꞌissiyaara taassi wozanappe kehidoogee taani iini ammanettanaadan oottiis.” Hegee ayba loꞌꞌo ayfiyaa demissidee? “Taani tamaariyoobaa guyyeppe loytta qoppiyoogaa doommaas.”

Gubaaꞌiyan deꞌiyaageeti kehatettan oottidobay Liisanne Aana tumaa tamaaranawu koyanaadan eta maaddidoogaa akeeka. Gubaaꞌee bessido kehatettay Yihoowaaninne A asan ammanettanaadan eta maaddiis.

HARATUYYO KEHIYOOGAN XOOSSAA MILATA

Amaridaageeti bantta diccido wogaa gaasuwan liiqo qaalaa haasayananne moocu gaana danddayoosona. Amarida asay ba wogaa woy ba eeshshaa gaasuwan ashkke gidiyoogee loꞌꞌoba. SHin, nuuni nu wogaa woy nu eeshshaa xallan ashkke gidikko, kehatettaa bessiyoogan Xoossaa milatana danddayokko.—Oosuwaa 28:2​ra gatta xeella.

Tumu kehatettay Xoossaa geeshsha ayyaanaa ayfiyaa macaratuppe issuwaa. (Gal. 5:22, 23) Hegaa gishshawu, nuuni tumu kehatettaa bessanawu, nu qofaanne oosuwaa Xoossaa ayyaanay kaalettanaadan eeno gaana koshshees. Nuuni yaatikko, Yihoowanne Yesuusa milatana. Qassi Yesuusaagaadan, harata wozanappe maaddoos. Hegaa gishshawu, nuuni Xoossaa Yihoowa siiqiyoogeenne asaa siiqiyoogee yaatanaadan nuna denttettees. Qassi nuuni kehatettaa wozanappe bessiyoogee harata maaddeesinne Xoossaa ufayssees.

NUUNI OOSSI KEHATETTAA BESSANA KOSHSHII?

Nuussi kehidaageetuyyo woy nuuni eriyoogeetuyyo kehatettaa bessiyoogee metennaba gidana danddayees. (2 Sam. 2:6) Eta galatiyoogee yaatiyo issi oge. (Qol. 3:15) Issi urawu kehatettay bessenna giidi nuuni qoppikko shin?

Ane hagaa qoppa: Aaro kehatettaa bessiyoogan Yihooway ooppenne aadhdhiya leemiso; qassi he eeshshaa bessiyoogaa xeelliyaagan A Qaalaappe nuuni keehi koshshiyaabaa tamaaroos. Giriikettuwan Xaafettida Geeshsha Maxaafan “aaro kehatettaa” giya qaalay daro sohuwan deꞌees. Xoossay nuuyyo kehatettaa waati bessii?

Yihooway miilooniyan qoodettiya asawu deꞌuwaassi koshshiyaabaa kunttiyoogan bessido kehatettaabaa qoppa. (Maa. 5:45) Ubba qassi, asay Yihoowa eranaappe kase, I etawu kehatettaa bessiis. (Efi. 2:4, 5, 8) Leemisuwawu, I baayyo deꞌiya aybippenne aadhdhiya, ba siiqiyo mexi issi Naꞌaa asa ubbawu aatti immiis. Kiitettida PHawuloosi Yihooway ba “aaro kehatettaa daruwaadan” wozuwaa giigissidoogaa yootiis. (Efi. 1:7) Hegaa bollikka, nuuni nagaraa oottiyaageetanne Yihoowa azzanttiyaageeta gidikkonne, I nuna ubbatoo kaaletteesinne tamaarissees. A kaaletoynne A qaalay ‘diifiyaa’ mala. (Zaa. 32:2) I nuuyyo bessido kehatettaa ubbawu koshshiyaagaa keenaa kushe zaarana danddayokko. Qassi, Yihooway nuussi aaro kehatettaa bessennaakko, nuuyyo sinttanaa hidootay baynnaagaa eroos.—1 PHeexiroosa 1:13​ra gatta xeella.

Yihoowa kehatettay ufayssiyaagaanne oosuwawu denttettiyaagaa gidiyoogee qoncce. Hegaappe denddidaagan, nuuni amarida asatu xallawu kehatettaa bessiyoogaa aggidi, haratussi ubba galla kehiyoogan Yihoowa milatanawu baaxetana koshshees. (1 Tas. 5:15) Nuuni ubbatoo kehatettaa bessikko, meeggiya gallassan hoꞌꞌiyo tamaa mala gidoos. Nuuni nu soo asaa, nu mala Kiristtaaneta, nunaara oottiyaageeta, nunaara tamaariyaageetanne nu shoorota minttettoos.

Neeni kehatettan haasayiyoobaaninne oottiyooban goꞌettiya ne soo asaa woy gubaaꞌiyaa qoppa. Sooninne daarinchchan oottiyooban woy shammiyoogaa mala ubbatoo oottiyooban maaddana koshshiyo uri ne gubaaꞌiyan deꞌennan aggenna. Qassi, maadoy koshshiyo uri haggaazuwan nenaara gayttikko, amarida ogiyan maaddana danddayay?

Nuuni Yihoowa milatiyoogan ubbatoo kehatettan haasayiyaageetanne oottiyaageeta gidoos.