Nabbabiyaageetu Oyshaa

Yesuusi “taani sa7aassi sarotettaa ehaanau yiidobaa inttessi milatoppo” giido wode woyganawu koyidee?

▪ Yesuusi asay issoy issuwaara sarotettan deꞌanaadan tamaarissiis. SHin I kiitettidaageetussi hagaadan giis: “Taani sa7aassi sarotettaa ehaanau yiidobaa inttessi milatoppo; taani tooraa ehaanau yiidoogaappe attin, sarotettaa ehaanau yabeikke. Aissi giikko, taani na7aa a aawaappe, na7iyo i aayeeppe, na7aa machchiyookka i bolloteeppe shaakkanau yaas.” (Maa. 10:34, 35) Yesuusi woyganawu koyidee?

So asaa yarati issoy issuwaappe shaahettanaadan Yesuusi koyibeenna; shin I tamaarissiyoobay so asay shaahettanaadan oottana danddayiyoogaa I eriis. Gidoppe attin, xammaqettidi Kiristtoosi erissiyo ashkkara gidanawu koyiyaageeti, eta soo asay issi issitoo eti kuuyidoban ufayttennaagaa akeekana koshshees. Eta aqo laggeti woy eta soo asaa yara gidida harati issi issitoo eta eqettiyoogee eti Kiristtoosi tamaarissiyooban ammanettidi deꞌanawu metootanaadan oottana danddayees.

Kiristtaaneti ‘asa ubbaara sarotettan deꞌanaadan’ Geeshsha Maxaafay minttettees. (Roo. 12:18) SHin Yesuusi tamaarissidobay issi issi so asawu “tooraa” mala gidana danddayees. So asaa yaraappe issoy Yesuusi tamaarissido timirttiyaa kaalliyo wode, harati hegaa ixxiyoogee woy eqettiyoogee toora mala gidees. Hegaadan gidikko, tumaa tamaariiddi deꞌiya urawu he soo asaa yarati ‘morkke’ gidoosona.—Maa. 10:36.

Haymaanootiyan issi mala gidenna keettan deꞌiya Kiristtoosi erissiyo ashkkarati Yihoowanne Yesuusa siiqiyo siiqoy paacettanaadan oottiya metoy issi issitoo eta gakkana danddayees. Leemisuwawu, ammanenna dabboti haymaanoote baalaa bonchchanaadan eta wolqqanttanawu malana danddayoosona. He wode eti oona ufayssanaakko kuuyana koshshees. Yesuusi hagaadan giis: “Ba aawaa woi ba aayyiyo taappe aattidi siiqiyaagee tabaa gidanau bessenna.” (Maa. 10:37) Erissiyo ashkkara gidanawu tumaa tamaariiddi deꞌiyaageeti banttana yelidaageeta loytti siiqiyoogaa aggana koshshees giidi Yesuusi yootibeennaagee qoncce. SHin I eti bantta deꞌuwan keehi koshshiyaabaa waati kuuyanaakko tamaarissiis. Ammanenna nu soo asaa yarati nuuni Yihoowawu goynniyoogaa eqettikkokka, nuuni eta siiqiyoogaa aggana koshshenna; shin nuuni Xoossaa siiqiyo siiquwaa aybippenne aaruwan kaseyana koshshiyoogaa eroos.

So asay eqettiyoogee nuuni keehi azananaadan oottana danddayees. SHin erissiyo ashkkarati I giidobaa hassayana koshshees: “Ba waayiyaa mittaa ekkennaageenne ta geeduwaa kaallennaagee tabaa gidanawu bessenna.” (Maa. 10:38, NW) Qassi Kiristtaaneti so asaappe gakkiya yedetaa, Kiristtoosi erissiyo ashkkarati bantta dosan ekkana bessiya waayiyaappe issuwaadan xeelloosona. SHin, eti bantta soo asaa yarati bantta qofaa laammidi Geeshsha Maxaafay yootiyoobaa tamaaranawu koyanaagaa hidootan naagoosona.—1 PHe. 3:1, 2.