‘Issoy Issuwaa Minttettiyoogaa’ Aggoppite

1. Koyro Tasalonqqe 5:11 yootiyoogaadan, nuuni ubbaykka oottana koshshiyo oosoy aybee?

INTTE gubaaꞌiyaa SHiiquwaa Addaraashay keexetti woy bottokonetti erii? Hegaadan gidikko, he ooratta addaraashan intte koyro shiiqido wodiyaa dogennaagee qoncce. Intte Yihoowa keehi galatideta. Intte keehi ufayttido gishshawu yeekkennaaninne doometta mazamuriyaa yexxanawu metootennan waayi aggana. Loytti keexettida nu SHiiquwaa Addaraashati Yihooway sabettanaadan oottoosona. SHin, nuuni he goyno sohota yiya asata minttettiyo wode, hegaappe aaruwan Yihooway sabettanaadan oottoos. Kiitettida PHawuloosi ha huuphe yohuwawu denddo gidida 1 Tasalonqqe 5:11n deꞌiya qofaa xaafido wode hegaa qoppiis.—Nabbaba.

2. Nuuni ha huuphe yohuwan ay beꞌanee?

² Kiitettida PHawuloosi ba mala Kiristtaaneta waati minttettanaakko eriyoogan nuussi loꞌꞌo leemiso. I etassi qarettiis. Ha huuphe yohuwan, I ba ishanttinne michchontti (1) metuwaa genccanaadan, (2) issoy issuwaara sarotettan deꞌanaadan, qassi (3) Yihoowa mintti ammanaadan waati maaddidaakko beꞌana. Nuuni PHawuloosa milatiyoogan ha wodiyan nu ishanttanne michchontta waati minttettana danddayiyaakko ane beꞌoos.—1 Qor. 11:1.

PHAWULOOSI BA ISHANTTINNE MICHCHONTTI METUWAA GENCCANAADAN MAADDIIS

3. PHawuloosi oosuwaanne haggaazuwaa bessiyaagaadan waati xeellidee?

³ PHawuloosi ba ishantta keehi siiqees. A daro metoy gakkiis. Yaatiyo gishshawu, I ba mala Kiristtaaneta metoy gakkiyo wode etawu qarettana danddayees. Issi wode, PHawuloosa miishshay metido gishshawu, I baassinne ba laggetussi koshshiyaabaa kunttanawu oosuwaa koyana koshshiis. (Oos. 20:34) PHawuloosi dunkkaaniyaa sikkees. I Qoronttoosa gakkido wode, aagaadan dunkkaaniyaa sikkiya Aqiilaranne PHirisqqiliira koyro oottiis. SHin ‘sambbata ubban’ I Ayhudatuyyoonne Giriiketuyyo sabbakiis. Hegaappe simmin, Sillaasinne Ximootiyoosi yaa gakkido wode PHawuloosi “qaalaa yootuwaa toliis.” (Oos. 18:2-5) PHawuloosi Yihoowawu haggaaziyoogee ba deꞌuwan waanna halchcho gidiyoogaa mule dogibeenna. PHawuloosi minnidi haggaaziyoogaaninne ba deꞌuwawu koshshiyaabaa kunttiyoogan loꞌꞌo leemiso gidiyo gishshawu, ba ishanttanne michchontta minttettana danddayiis. Deꞌuwan gakkiya metoynne so asawu koshshiyaabaa kunttiyoogee A ishanttinne michchontti ‘keehi koshshiyaabaa,’ hegeekka Yihoowa goynuwaara gayttida ubbabaa xaasayi xeellanaadan oottenna mala I eta hassayissiis.—Pili. 1:10, NW.

4. PHawuloosinne Ximootiyoosi bantta mala Kiristtaaneti yedeta genccanaadan waati maaddidonaa?

⁴ Tasalonqqen gubaaꞌee eqqin daro takkennan, mati Kiristtaane gididaageeta wolqqaama yedetay gakkiis. Eqettiya asatussi PHawuloosinne Sillaasi beettennan ixxin, eti “issi issi ishantta katamaa halaqatukko” goochchi efiidosona; yaatidi bantta cenggurssaa xoqqu oottidi, “Hageeti . . . Qeesaara azazuwaa menttoosona” giidi haasayidosona. (Oos. 17:6, 7) Mati Kiristtaane gididaageeti kataman deꞌiya asay banttana eqettiyoogaa beꞌidi ay keena yayyidaakko qoppite! Eti Yihoowawu minnidi haggaazennan aggana danddayoosona, shin eti yaatanaadan PHawuloosi koyibeenna. Inne Sillaasi katamaappe baana koshshikkonne, ooratta gubaaꞌiyaa maaddiya ura kiittidosona. PHawuloosi Tasalonqqe Kiristtaaneta hagaadan hassayissiis: ‘Inttena zoranaadaaninne intte ammanuwan inttena minttanaadan nu ishaa, Ximootiyoosa inttekko kiittida. Ha waayiyaa gaasuwan intteppe ooninne guyye simmenna mala, A kiittida.’ (1 Tas. 3:2, 3) Ximootiyoosa I yelettido Lisxxira kataman yedetay gakkennan aggenna. PHawuloosi yan deꞌiya ishantta loytti minttettidoogaa Ximootiyoosi beꞌiis. Qassi, Yihooway Lisxxiran deꞌiyaageeta maaddidoogaa Ximootiyoosi akeekiis; yaatiyo gishshawu, I Tasalonqqen deꞌiya mati Kiristtaane gididaageetakka Yihooway maaddanaagaa yootidi eta minttettana danddayees.—Oos. 14:8, 19-22; Ibr. 12:2.

5. Briyantta giyo ishay issi cimay maaddidoogan waani goꞌettidee?

⁵ PHawuloosi ba mala Kiristtaaneta minttettido hara ogee aybee? PHawuloosinne Barnnaabaasi Lisxxira, Iqooniyoonenne Anxxookiyaa zaarettidi biido wode ubba gubaaꞌetun ‘cimata’ sunttidosona. (Oos. 14:21-23) He sunttettida cimati ha wodiyan deꞌiya cimatuugaadan gubaaꞌeta minttettidoogee qoncce. Briyantta giyo ishay yootidobaa akeeka. I hagaadan giis: “Tawu layttay 15 gidido wode ta aaway sooppe kiyidi biis; qassi ta aayyiyaa bohettaasu. Hegaappe denddidaagan, tarkka attidabadan tawu siyettiis, qassi hidootaa qanxxaas.” Hegaa mala hanotaa genccanaadan Briyantta maaddidabay aybee? I hagaadan giis: “Toona giyo issi cimay gubaaꞌe shiiquwaa wodenne hara wodetun tana haasayissees. I metoy deꞌishinkka, ufayttiyaageetubaa taayyo yootiis. I Mazamure 27:10n deꞌiyaagaa tawu nabbabiis. A aaway loꞌꞌo leemiso gidenna wodiyankka ammanettidi haggaazida Hizqqiyaasabaa taayyo darotoo yootiis.” Hegee Briyantta waati maaddidee? I hagaadan giis: “Tooni tana minttettido gishshawu, ufayssiya ubba wode haggaazuwaa wurssettan doommaas.” Cimatoo, Briyanttaagaadan minttettiya ‘shonggaara deꞌiya haasayay’ koshshiyoogeeta maaddanawu giigi uttite.—Lee. 12:25.

6. PHawuloosi ba ishanttanne michchontta minttettanawu Geeshsha Maxaafan etabay odettido asatu taarikiyaa waati goꞌettidee?

⁶ Yihooway maaddin metuwaa genccida ‘shaaraadan daro markkatubaa’ PHawuloosi ba mala Kiristtaaneta hassayissiis. (Ibr. 12:1) PHawuloosi kase metuwaa genccidaageetu taarikee ba ishanttinne michchontti xala gidanaadaaninne ‘deꞌo Xoossay deꞌiyo katamaabaa’ ubbatoo qoppanaadan maaddanaagaa erees. (Ibr. 12:22) Ha wodiyankka hanotay hegaa mala. Yihooway Geedoona, Baaraaqa, Daawita, Sameelanne hara darota maaddido taarikiyaa nabbabiyoogan minettennay oonee? (Ibr. 11:32-35) Qassi ha wodiyan ammanuwan leemiso gidiyaageetubaa shin? Ha wodiyan Yihoowawu ammanettidi haggaaziyaageetu taarikiyaa nabbabidoogan bantta ammanoy minnidoogaa qonccissiya dabddaabbiyaa daro ishanttinne michchontti waanna biiruwawu xaafidosona.

PHAWULOOSI BA ISHANTTINNE MICHCHONTTI ISSOY ISSUWAARA SAROTETTAN DEꞌANAADAN MAADDIIS

7. PHawuloosi Roome 14:19-21n yootido zoriyaappe ay tamaaray?

⁷ Nuuni gubaaꞌiyan sarotettay deꞌanaadan maaddiyaabaa haasayiyoonne oottiyo wode nu ishanttanne michchontta minttettoos. Nuuni issoy issuwaappe qofan dummatiyoogee nu giddon shaahotettay deꞌanaadan oottana bessenna. Qassi Geeshsha Maxaafay yootiyo maaraara phalqqettana xayikko, nuuni nu maataa bonchissanawu iisettana koshshenna. Ane issi leemisuwaa beꞌa. Roome gubaaꞌiyan Ayhudatinne Ayhuda gidenna Kiristtaaneti deꞌoosona. Muuse Higgee shaaretti simmin, Yihoowawu goynniyaageeti issi issi qumaa meennan aggiyoogaara gayttida higgiyaa kaallana koshshenna. (Mar. 7:19) He wodeppe simmin, amarida Ayhuda Kiristtaaneti ubba qommo qumaa maana koshshiyaabadan etawu siyettees. SHin, hara Ayhuda Kiristtaanetussi yaatana koshshiyaabadan siyettenna. Hegaa gaasuwan gubaaꞌee shaahettiis. Ubbatoo sarotettaa naagiyoogeenne kaalliyoogee keehi koshshiyoogaa PHawuloosi hagaadan giidi yootiis: “Asho meennan woi ushsha uyennan aggiyoogee woikko ne ishaa xubbiyaabaa aibanne oottennan aggiyoogee lo77o.” (Roome 14:19-21 nabbaba.) Hegaa gishshawu, PHawuloosi ooshshay issi ura gidin, kumetta gubaaꞌiyaakka ay keena qohiyaakko ba mala Kiristtaaneti akeekanaadan maaddiis. I harata xubbiyoogaappe naagettanawu ba eeshshaa laammanawukka eeno giis. (1 Qor. 9:19-22) Hegaadankka, nuuni harati dooriyo issi allaalliyaabaa palamettennan aggiyoogan, harata minttettananne sarotettay deꞌanaadan oottana danddayoos.

8. Issi allaalliyaa xeelliyaagan gubaaꞌiyaa sarotettaa mooriyaabay merettido wode PHawuloosi waatidee?

⁸ Keehi koshshiya issi allaalliyaa xeelliyaagan, maayettenna asatuura sarotettan deꞌiyoogan PHawuloosi nuuyyo loꞌꞌo leemiso. Leemisuwawu, koyro xeetu laytta gubaaꞌiyan deꞌida issoti issoti Kiristtaane gidida Ayhuda gidennaageeti qaxxarettana koshshiyoogaa yootidosona. Eti hegaadan giidoy harati banttana borennaadan naagettanawu qoppido gishshawu gidennan aggenna. (Gal. 6:12) PHawuloosi he qofan maayettibeenna, shin harati A qofaa kaallanaadan iisettiyoogaappe bana ziqqi oottidi Yerusalaamen deꞌiya kiitettidaaageetuppenne cimatuppe zoriyaa oychchiis. (Oos. 15:1, 2) PHawuloosi hegaadan oottidoogee gubaaꞌiyan deꞌiya Kiristtaaneti ufayssaaninne sarotettan deꞌanaadan maaddiis.—Oos. 15:30, 31.

9. Nuuni PHawuloosa leemisuwaa waati kaallana danddayiyoo?

⁹ Ooshshay merettiyo wode, Yihooway gubaaꞌiyaa maaddanaadan sunttidoogeetuppe kaaletuwaa demmanawu koyiyoogan sarotettay deꞌanaadan oottoos. Darotoo Geeshsha Maxaafaa qofay deꞌiyo kaaletuwaa nu xuufetuppe woy Yihoowa dirijjitee giigissido harabatuppe demmana danddayoos. Harati nu qofaa kaallanaadan oottiyoogaappe he kaaletota nuuni loytti kaalliyo wode gubaaꞌiyan issippetettay deꞌanaadan oottoos.

10. PHawuloosi gubaaꞌiyan sarotettay deꞌanaadan maaddiya harabaa ay oottidee?

¹⁰ PHawuloosi ishanttussinne michchonttussi deꞌiya iita eeshshata gidennan, loꞌꞌo eeshshata yootiyoogan sarotettay deꞌanaadan oottiis. Leemisuwawu, PHawuloosi Roomen deꞌiyaageetussi xaafido dabddaabbiya wurssettan daro asatu sunttaa qonccissiis; qassi darotoo etabaa loꞌꞌobaa yootiis woy issi issi asatubaa loytti qonccissiis. Nuuni nu ishanttussinne michchonttussi deꞌiya loꞌꞌo eeshshaa yootiyoogan PHawuloosa milatana danddayoos. Nuuni yaatiyo wode gubaaꞌiyan deꞌiyaageeti issoy issuwaara dabbotaa minttanaadaaninne loytti siiqettanaadan maaddoos.

11. Metoy merettiyo wode nuuni zaarettidi sarotettaa medhdhanawu waatana danddayiyoo?

¹¹ Issi issitoo kayma Kiristtaanetikka issoy issuwaara ooyettana woy palamettana danddayoosona. PHawuloosi ba mata laggiyaa Barnnaabaasaara ooyettiis. Eti naaꞌꞌantto misoonaawe buussan Marqqoosa banttanaara efanaakko agganaakko maayettibookkona. “Eta gidduwan pala ooshshai” kiyido gishshawu, eti issippe beennan agganawu kuuyidosona. (Oos. 15:37-39) SHin PHawuloosi, Barnnaabaasinne Marqqoosi zaarettidi bantta giddon sarotettay deꞌanaadan oottidosona; hegee eti gubaaꞌiyaa sarotettaanne issippetettaa xoqqu ootti xeelliyoogaa bessees. PHawuloosi guyyeppe Barnnaabaasabaanne Marqqoosabaa loꞌꞌobaa yootiis. (1 Qor. 9:6; Qol. 4:10) Nuunikka gubaaꞌiyan deꞌiya haratuura merettana danddayiya ay metuwaakka giigissananne etawu deꞌiya loꞌꞌo eeshshan ubbatoo xeelaa wottana koshshees. Nuuni yaatiyoogan, gubaaꞌiyan sarotettaynne issippetettay deꞌanaadan oottoos.—Efi. 4:3.

PHAWULOOSI BA ISHANTTUNNE MICHCHONTTU AMMANOY MINNANAADAN MAADDIIS

12. Nu ishanttanne michchontta gakkiya paacetuppe amaridaageeti aybee?

¹² Nuuni nu ishanttinne michchontti Yihoowa mintti ammananaadan oottiyo wode, eta minttettoos. Issota issota ammanenna eta so asay, etaara issippe oottiyaageeti woy issippe tamaariyaageeti qilliiccoosona. Amaridaageeti wolqqaama sahuwaa sahettoosona woy harati eta qohidobaa doganawu baaxetiiddi deꞌoosona. Qassi harati eti xammaqettoosappe daro layttay aadhdhido gishshawu, adussa wodiyawu ha alamiyaa wurssettaa naagiiddi deꞌoosona. Hegaa mala hanotati ha wodiyan deꞌiya Kiristtaanetu ammanuwaa paaccana danddayoosona. Koyro xeetu laytta gubaaꞌiyan deꞌiyaageeta hegaa mala paacee gakkiis. PHawuloosi ba ishanttanne michchontta minttettanawu ay oottidee?

13. Bantta ammanuwaa gaasuwan harati qilliiciyoogeeta PHawuloosi waati maaddidee?

¹³ PHawuloosi Geeshsha Maxaafaa goꞌettidi ba ishanttunne michchonttu ammanuwaa minttiis. Leemisuwawu, Ayhuda haymaanootee Kiristtaanetuugaappe aadhdhees giidi ammanenna so asay yootiyo wode Ayhuda Kiristtaaneti etawu woygi zaaranaakko erennan aggana danddayoosona. PHawuloosi Ibraawen deꞌiyaageetussi xaafido dabddaabbee he Kiristtaaneta keehi minttettidoogee qoncce. (Ibr. 1:5, 6; 2:2, 3; 9:24, 25) Eti ammanenna bantta so asawu woygi zaaranaakko eranawu, PHawuloosi yootido ammanttiya naqaashaa goꞌettana danddayoosona. Ha wodiyan harati qilliicciyo nu mala Kiristtaaneta Geeshsha Maxaafaa qofay deꞌiyo xuufeta goꞌettidi bantta ammanuwaabaa waati qonccissanaakko maaddana danddayoos. Qassi yelagati meretan ammaniyo gishshawu harati eta qilliiccikko, Deꞌon Deꞌiyaabay Merettidee? (Amaarattuwaa) qassi Deꞌuwaa Doomettaa—Oychchana Koshshiyo Ichchashu Oyshata (Amaarattuwaa) giyo brooshuretun deꞌiya qofaa goꞌettidi eti meretan ammaniyoy aybissakko qonccissanaadan nuuni eta maaddana danddayoos.

14. PHawuloosi minnidi sabbakiyaabanne tamaarissiyaaba gidikkonne, I oottido harabay aybee?

¹⁴ PHawuloosi ba ishanttinne michchontti “lo77o oosuwaa” oottiyoogan siiquwaa bessanaadan minttettiis. (Ibr. 10:24) I ba ishanttanne michchontta haasayiyooba xallan gidennan, oottiyoobankka maaddiis. Leemisuwawu, Yihudan deꞌiya ba mala Kiristtaaneti koshan qohettido wode, PHawuloosi ba mala Kiristtaanetussi koshshiyaabay gakkanaadan maaddiis. (Oos. 11:27-30) PHawuloosi minnidi sabbakiyaabanne tamaarissiyaaba gidikkonne, asatettan maadoy koshshiyoogeeta ubbatoo maaddiyo ogiyaa koyees. (Gal. 2:10) Yaatiyoogan, I ba mala Kiristtaaneti Yihooway etawu koshshiyaabaa kunttiyoogaa ammanettanaadan maaddiis. Ha wodiyan nuunikka nu wodiyaa, wolqqaanne eraa goꞌettidi daafabay gakkidoogeeta maaddanawu nu dosan eeno giikko, nu ishanttunne michchonttu ammanoy minnanaadan oottoos. Kumetta saꞌan oosettiya oosuwawu ubbatoo miishshaa immiyoogankka hegaadan oottana danddayoos. Hageetuuninne hara ogetun, Yihooway eta mule aggennaagaa nu ishanttinne michchontti ammanettanaadan maaddoos.

15-16. Ammanuwan shuggidaageeta nuuni waati minttettana koshshii?

¹⁵ PHawuloosi ammanuwan shugo gididaageeta minttettiyoogaa aggibeenna. I etawu qarettiis, qassi minttettiyaanne ufayssiya ogiyan eta haasayissiis. (Ibr. 6:9; 10:39) Leemisuwawu, PHawuloosi Ibraawetussi xaafido kumetta dabddaabbiyan I zoridobaa ikka oosuwan peeshshana koshshiyoogaa qonccissanawu, “nuuni” qassi, “nuuyyo” giya qaalata darotoo goꞌettiis. (Ibr. 2:1, 3) PHawuloosaagaadan, nuuni ammanuwan shugo gididaageeta minttettiyoogaa aggokko. Nuuni etawu wozanappe qoppiyoogan eta minttettana danddayoos. Yaatiyoogan, nuuni eta siiqiyoogaa qonccissoos. Minttettiyaabaa haasayiyoogaa xalla gidennan, nuuni haasayiyo ogee liiqonne shonggaara deꞌiyaagaa gidana bessees.

¹⁶ PHawuloosi ba ishanttinne michchontti oottido loꞌꞌobaa Yihooway eriyoogaa yootidi eta minttettiis. (Ibr. 10:32-34) Ammanuwan shuggida issi Kiristtaaniyaa maaddiyo wode, nuunikka hegaa malabaa oottana danddayoos. I tumaa waati siyidaakko nuussi yootanaadan oychchana woy Yihooway A waati maaddidaakko qoppanaadan minttettana danddayoos. I Yihoowa siiqido siiquwaa Yihooway dogennaagaanne sinttappe A aggennaagaa he injjiyaa goꞌettidi awu yootana danddayoos. (Ibr. 6:10; 13:6) Hegaadan haasayiyoogee, nu siiqo ishanttinne michchontti Yihoowawu aggennan haggaazanaadan minttettana danddayees.

UBBATOO ‘ISSOY ISSUWAA MINTTETTITE’

17. Nuuni kaseegaappe aaruwan oottana koshshiyaabay aybee?

¹⁷ Keexuwaa oosuwaa oottiya uri wodiyaappe wodiyan qara gidi gidi biyoogaadan, nuunikka issoy issuwaa kaseegaappe aaruwan minttettana danddayoos. Kase metuwaa genccidaageetu hanotaa haratussi yootiyoogan, eti metuwaa gencciyo minotettaa demmanaadan nuuni eta maaddana danddayoos. Nuuni haratuyyo deꞌiya loꞌꞌo eeshshaa yootiyoogan, sarotettaa mooriyaabay merettiyo wode hegaa naaganawu baaxetiyoogan, qassi ooshshay merettiyo wode sigettiyoogan sarotettay deꞌanaadan oottana danddayoos. Qassi nuuni nu ishanttussinne michchonttussi Geeshsha Maxaafaa tumaa yootiyoogan, koshshiyaaban maaddiyoogaaninne ayyaanaaban shuggidaageeta ubbaa maaddiyoogan eta ubbatoo minttettana danddayoos.

18. Neeni ay oottanawu murttadii?

¹⁸ Yihoowa dirijjitee goꞌettiyo keettata keexxiyaageeti keehi ufayttoosona. Nuunikka nu ishanttunne michchonttu ammanoy minnanaadan oottiyo wode keehi ufayttoos. Keettay daro wodiyaappe guyyiyan moorettees. SHin hegaappe dumma hanotan, ayyaanaaban harata minttettiyoogee merinawu maaddees! Nuuni ubbatoo ‘issoy issuwaa minttettanawu’ murttidaageeta gidoos.— 1 Tas. 5:11.