4 | Geeshsha Maxaafay Maaddiyaabaa Zorees

Hegee Woygiyoogee?

Geeshsha Maxaafay akkamuwaabaa yootiya maxaafaa gidenna. SHin an deꞌiya zoree guuggiyaa sahuwan waayettiyaageeta maaddana danddayees. Amarida leemisota beꞌa.

Hegee Waati Maaddii?

“Hargganchchatussippe attin, payyatuyyo aakime koshshenna.”—MAATIYOOSA 9:12.

Nuuni akkamettiyoogee koshshana danddayiyoogaa Geeshsha Maxaafay yootees. Guuggiyaa sahettiya daroti bantta harggiyaabaa eriyoogaaninne aakimiyaa maaduwaa demmiyoogan goꞌettidosona.

“Bollaa minttiyoogee . . . go77ees.”—1 XIMOOTIYOOSA 4:8.

Ne payyatettaa naaganawu maaddiyaabata oottiyoogee ne guuggiyaa payyatettay kaseegaappe loꞌꞌanaadan maaddana danddayees. Hegeetikka, ubba galla ispporttiyaa oottiyoogaa, payyatettawu maaddiya qumaa miyoogaanne gidiyaagaa keenaa xiskkiyoogaa.

“Wozani ufaittiyoogee asassi lo77o xale; shin kayyottiyoogee asau wolqqaa xaissees.”—LEEMISO 17:22.

Minttettiya Geeshsha Maxaafaa xiqiseta nabbabiyoogeenne polana danddayiyo halchchota kessiyoogee neeni ufayttanaadan maaddana danddayees. Neeni loꞌꞌobata qoppiyoogeenne hanotay sinttappe giiganaagaa ammaniyoogee guuggiyaa sahuwaa genccanaadan maaddana danddayees.

“Ashkketettaara aadhdhida eratettai yees.”—LEEMISO 11:2.

Neeni koyiyo ubbabaa nerkka oottana danddayakka, hegaa gishshawu harati maaddanaadan oychcha. Ne laggetinne soo asay nena maaddanawu koyikkonne, waatanaakko erennan aggana danddayoosona. Neeyyo koshshiyaabaa etawu yoota. Eti neeyyo darobaa oottanaadan naagoppa; qassi eti nena maaddiyoobawu ubbatoo eta galata.

Geeshsha Maxaafay Yootiyo Goꞌꞌiya Zoree Sahettiyaageeta Waati Maaddii?

“Taayyo loꞌꞌobay siyettennaagaa akeekido gishshawu, issi dottoreekko baas. A ta harggiyaabaa eraasu. Hegee taani ta sahuwaa akeekanaadaninne ta payyatettaa naaganaadan maaddiya loꞌꞌo akkamo qommota eranaadan maaddiis.”—Niikoolo,a baypolar disordder giyo guuggiyaa harggiyaa sahettiyaaro.

“Taani ta keettaayeera ubba galla Geeshsha Maxaafaa nabbabiyoogee ubbatoo loꞌꞌobaanne minttettiyaabaa qoppanaadan maaddidoogaa akeekaas. Issi issitoo taani genccanawu metootiyo wode, issi xiqisee tana minttettees.”—Pitera, guuggiyaa harggiyan waayettiyaagaa.

“Ta harggee tana yeellayiyo gishshawu hegaabaa haratussi yootanawu metootays. SHin ta mata laggiyaa ta yootiyoobaa loytta ezggawusu, qassi ta hanotaa akeekawusu. A taayyo sahoy kehanaadaaninne taani boorasennaadan maaddaasu.”—Jiiyo, qumaa maara maanawu metootiyaaro.

“Taani bessiyaagaadan qoppanaadan, gidiyaagaa keenaa xiskkanaadaninne oosuwaa bessiyaagaappe aaruwan oottennaadan Geeshsha Maxaafay tana maaddiis. Geeshsha Maxaafay yootiyo aadhdhida eratetta zoree taani ta harggiyaa ubbatoo genccanaadan maaddiis.”—Timetiy, obseessiv-komppelssiv disordder giyo harggiyan sahettiyaagaa.