[Haddirssappe ushachchi] Marsseela, Yoomaaro, qassi Iveera. Eti ubbaykka bireeliyan giigida Isppeenetto Ooratta Alamiyaa Birshshettaa oyqqidosona
Gubaaꞌee Eta Siiqiyoogaa Akeekidosona
YOOMAARA qassi I ishantti Marsseeloynne Iveeri Guwatemaalan deꞌiya qeeri kataman deꞌoosona. Yoomaara Yihoowa Markkatuura Geeshsha Maxaafaa xannaꞌiyoogaa doommaasu, qassi guyyeppe I ishanttikka xannaꞌiyoogaa doommidosona. SHin metiyaabay deꞌees. Eta heezzaa ayfeekka xeellenna; qassi bireeliyaakka nabbabana danddayokkona. Yaatiyo gishshawu, eta Geeshsha Maxaafaa xannaꞌissiyaagee menttotanne he timirttiyan deꞌiya xiqiseta nabbabees.
SHiiqota shiiqiyoogeekka eta metiyaaba. Eti 40 daqiiqaa hemettidi banttawu matan deꞌiya SHiiquwaa Addaraashaa banttarkka baana danddayokkona. SHin gubaaꞌiyan deꞌiya ishantti eti ubba shiiqota shiiqanaadan maaddidosona. Qassi saaminttawu gidduwan shiiqiyo shiiquwan etawu kifilee imettiyoogaa doommido wode, eti bantta kifiliyaa meezetanaadan ishantti maaddidosona.
Uddufune 2019n eti deꞌiyo heeran gubaaꞌe shiiqoy doomettiis. He wode, ubba wode aqinye gididi haggaaziya azinaynne machchiyaa eti deꞌiyo heeraa biidosona. Eti bireeliyaa nabbabiyoogaanne xaafiyoogaa erennaba gidikkonne, ayfee xeellenna gidida he xinaateta bireeliyaa nabbabiyoogaanne xaafiyoogaa tamaarissana koyidosona. Eti bireeliyaabaa eranawunne hegaa goꞌettidi harata tamaarissiyo hiillaa xannaꞌanawu laybreeriyaa biidosona.
Marsseeloy gubaaꞌe shiiquwan qofaa yootiiddi deꞌees
Amarida aginaa giddon eti heezzaykka bireeliyaa nabbabiyoogaa danddayidosona, qassi hegee eti ayyaanaaban diccanaadan maaddiis. Haꞌꞌi Yoomaara, Marsseeloynne Iveeri ubba wode aqinye gididi haggaazoosona. Marsseeloy gubaaꞌiyawu oottiyaagaa. Eti saaminttaa kumettaa Yihoowawu minnidi haggaazoosona. Eti Yihoowawu minnidi haggaaziyoogee, haratikka etaagaadan minnidi haggaazanaadan oottiis.
Yoomaaranne I ishantti gubaaꞌee eta siiquwan maaddido gishshawu keehi galatoosona. Yoomaara hagaadan gaasu: “Yihoowa Markkati nuuni etaara gayttido koyro wodiyaappe doommidi nuussi tumu siiquwaa bessidosona.” Marsseeloykka hagaadan giis: “Nu gubaaꞌiyan loꞌꞌo laggeti nuussi deꞌoosona. Qassi siiquwan issuwaa gidida so asay kumetta saꞌan nuussi deꞌees.” Yoomaaranne I ishantti saꞌay gannate gidiyo wodiyaa beꞌanawu yeemuwan naagoosona.—Maz. 37:10, 11; Isi. 35:5.