Iita Amuwa Waati Xoonana Danddayiyoo?

1. Nuuni ubbay baaxetiyobay aybee?

NEENI Yihoowi ufayttennabaa oottanawu keehi amotta eray? Yaatikko, hidootaa qanxxoppa. Geeshsha Maxaafay hagaadan gees: “Hara asaagaappe dumma paace paacettibeekketa.” (1 Qor. 10:13) Hegaa giyogee neeyyo paace gidida iita amoy ayba gidinkka harati hegaa eqettiiddi deꞌoosona giyogaa. Neeni nerkka deꞌakka, qassi Yihoowi maaddin he paaciya xoonana danddayaasa.

2. Amarida Kiristtaanetuyyonne Geeshsha Maxaafaa xannaꞌiyageetuyyo paace gidana danddayiya iita amoti awugeetee? (Misiliyakka xeella.)

² Geeshsha Maxaafay hagaadankka gees: “Asay ubbay A amoy A piredan oyqqanawu maliyo wode paacettees.” (Yaaq. 1:14) Issi ura piredan oyqqiyabay hara uraagaappe dummatana danddayees. Leemisuwawu, issi issi Kiristtaaneti mattuman banttappe dummatiya uraara, harati qassi mattuman banttanaara issi mala gidida uraara pokkobaa oottanawu paacettana danddayoosona. Pornograafiya beꞌiyogaa aggidaageeti qassi hegaa zaarettidi beꞌanawu keehi amottana danddayoosona. Jallissiyabaa goꞌettiyogaa woy ushshaa darissidi uyiyogaa aggida daroti hegaa zaarettidi doommanawu paacettana danddayoosona. Hageeti issi issi Kiristtaanetuyyonne Geeshsha Maxaafaa xannaꞌiyageetuyyo paace gididabatuppe amaridaageeta. Issi wode nuuyyo ubbawukka kiitettida Phawuloosaagaadan siyettennan aggenna; I hagaadan giis: “Taani suurebaa oottana koyiyo wode, tanan iitabay deꞌees.”—Roo. 7:21.

3. Issi uri issi iita amuwa xoonanawu darotoo baaxetikko woygi qoppana danddayii?

³ Neeni darotoo issi iita amuwa xoonanawu baaxetaydda deꞌikko, hegaa eqettanawu neessi wolqqi baynnabadan qoppana danddayaasa. Neeni iitabaa amottido gishshawu, Yihoowi nena qaxxayana gaada neeyyo hidooti baynnabadan qoppana danddayaasa. Shin ha qofatuppe awugeenne tuma gidennaagaa ammanettana danddayaasa! Hagaadan giyoy aybissakko akeekanawu ha huuphe yohuwan naaꞌꞌu oyshatu zaaruwa beꞌana: (1) Neeni neessi wolqqaynne hidootay baynnabadan qoppanaadan koyiyay oonee? (2) Neeni iita amota xoonanawu waatana danddayay?

‘SEEXAANAY’ NUUNI WOYGI QOPPANAADAN KOYII?

4. (a) Nuna paacee gakkiyo wode nuuni ay qoppanaadan Seexaanay koyii? (b) Paaciya eqettanawu nuussi wolqqay deꞌees giyoy aybissee?

⁴ Seexaanay nuuni paacettiyo wode nuuyyo wolqqi baynnabadan qoppanaadan koyees. Yesuusi bana kaalliyageeta woosaabaa tamaarissiyo wode hegaa loytti qonccissiis: “Paaciyan gelennaadan nuna maadda, qassi Seexaanaappe nuna ashsha.” (Mat. 6:13) Seexaanay asay iitabaa oottanawu paacettiyo wode Yihoowawu azazettenna yaagees. (Iyy. 2:4, 5) Seexaanay hegaadan qoppiyoy aybissee? Seexaanay ba amuwa piriyan oyqettidi Yihoowawu ammanettidi deꞌanawu koyibeenna. Aagaadan nuunikka paacee gakkiyo wode Yihoowa sohuwara aggana giidi I qoppiyogee qoncce. Seexaanay wottiyobi baynna Xoossaa Naꞌaykka paaciyan xoonettana danddayees giidi qoppiis! (Mat. 4:8, 9) Shin ane qoppa: Iita amuwa eqettanawu tumuppe nuuyyo wolqqi baawee? Chii, deꞌees! Kiitettida Phawuloosa qofan nuunikka maayettoos; I hagaadan giis: “Taayyo wolqqaa immiyagan an ubbabaassi tawu minotettay deꞌees.”—Pili. 4:13.

5. Nuuni iita amota eqettana danddayiyogaa Yihoowi ammanettiyogaa waati eriyoo?

⁵ Seexaanaappe dumma hanotan, nuuni iita amota eqettana danddayiyogaa Yihoowi loytti ammanettees. Nu hegaa waati eriyoo? Bantta suuretettaa naagiya zaway baynna daro asati gita waayiyappe attanaagaa Yihoowi kasetidi yootido gishshataassa. Hegee woygiyogaakko qoppa. Worddotenna Yihoowi amarida asatu xalaalay gidennan, “bootta maayuwaa maayida,” hegeekka Yihoowi eta geeshshadan xeelliyo keehi daro asay gannatiya gelanaagaa yootiis. (Ajj. 7:9, 13, 14) Iita amota eqettanawu nuussi wolqqi baynnabadan Yihoowi qoppennaagee qoncce.

6-7. Nuuni paacettiyo wode nuussi hidooti baynnabadan qoppanaadan Seexaanay koyiyoy aybissee?

⁶ Neeni iitabaa amottido gishshawu Yihoowi nena qaxxayana gaada, neeni neessi wolqqi baynnabadaaninne hidooti baynnabadan qoppanaadan Seexaanay koyees. Nuuni hegaadan qoppanaadan Seexaanay koyiyoy aybissee? Seexaanawu hidooti baawa; ayssi giikko, ayyo merinaa deꞌoy bessenna giidi Yihoowi pirddiis. (Doo. 3:15; Ajj. 20:10) Nuussi merinaa deꞌuwa hidootay deꞌiyo gishshawu Seexaanay keehi hanqqettiyogee qoncce. Yaatiyo gishshawu, nuuyyokka aagaadan sinttappe hidooti baawa giidi nuuni qoppanaadan oottanawu keehi baaxetees. Shin nuuyyo hidooti deꞌees. Yihoowi nuna qaxxayanawu gidennan, maaddanawu koyiyogaa Geeshsha Maxaafay yootees. “I asay ubbay zilꞌꞌettidi laamettanaadan koyeesippe attin, ooninne xayanaadan koyenna.”—2 Phe. 3:9.

⁷ Nuuni iita amuwara baaxetiyo wode nuuyyo wolqqi baynnabadan woy hidooti baynnabadan qoppikko, Seexaanay koyiyogaadan qoppoos. Hegaa akeekiyogee nuuni A mintti eqettanawu murttanaadan nuna maaddana danddayees.—1 Phe. 5:8, 9.

NUUNI NAGARANCHCHA GIDIYO GISHSHAWU AY QOPPANA DANDDAYIYOO?

8. Nagaraa giya qaalay balabaa oottiyogaappe harabaa ay qonccissii? (Mazamure 51:5) (“Qonccissido Qaalaa” giyagaakka xeella.)

⁸ Nuuni iita amuwara baaxetiyo wode, nuuyyo wolqqi baynnabadaaninne hidooti baynnabadan qoppanaadan oottana danddayiyay Seexaana xalla gidennan, harabaykka deꞌees. Hegee aybee? Nu koyro aawaappenne aayeeppe nuuni ubbay laattido nagaraa.a—Iyy. 14:4; Mazamure 51:5 nabbaba.

9-10. (a) Nagaray Addaamanne Hewano waati qohidee? (Misiliyakka xeella.) (b) Nagaray nuna waati qohii?

⁹ Nagaray Addaamanne Hewano ay keena qohidaakko qoppa. Eti Yihoowawu azazettennan ixxi simmidi qosettidosonanne bantta kalluwa kammanawu malidosona. Geeshsha Maxaafaa Loytti Akeekiyogaa (Inggilizettuwa) giyo maxaafay he hanotaa hagaadan qonccissees: “Nagaray eti banttana mooranchchadan xeellanaadan, unꞌꞌettanaadan, woppaa xayanaadaaninne yeellatanaadan oottiis.” Hegee Addaamenne Hewana oyddu kifile xallay deꞌiyo gordda deꞌiya keettan deꞌiyogaa mala. Eti issi kifiliyappe hara kifiliya baana danddayiyaba gidikkonne, he keettaappe kiyana danddayokkona. Addaamenne Hewana nagaraappe laꞌa kiyana danddayibookkona.

¹⁰ Nu hanotay Addaamenne Hewaniigaa mala gidennaagee tuma. Ayssi giikko, eti wozuwappe goꞌettana danddayokkona. Shin wozoy nu nagaray atto geetettanaadaaninne nuuni Xoossaara dabbotanaadan maaddees. (1 Qor. 6:11) Gidikkokka, nuuni nagaraa laattida. Yaatiyo gishshawu nuunikka nuna mooranchchadan xeelloos, unꞌꞌettoos, woppaa xayoos, qassi yeellatoos. Nagaray asaa keehi qohiyogaa Geeshsha Maxaafay yootees. Qassi “nagaraa Addaameegaadan [oottibeenna]” asa ubbaakka nagaray qohiiddi deꞌees. (Roo. 5:14) Shin nuuni nagaranchcha gididi yelettido gishshawu, nuussi wolqqaynne hidootay baynnabadan qoppana koshshenna. Nuuni he iita qofaa eqettana danddayoos. Waatidi?

11. Nuussi wolqqi baynnabadan nuuni qoppiyo wode waatana koshshii, qassi aybissi? (Roome 6:12)

¹¹ Nuuni nagaranchcha gidiyo gishshawu iita amota eqettana danddayennabadan issi issitoo qoppana danddayoos. Hegee nuuni iita amota mule eqettana danddayennabadan nu huuphe giddon yootiya cenggurssaa mala. Shin nuuni he cenggurssaa siyana bessenna. Aybissi? Nuna ubbatoo nagaray ‘kawodan haaranaadan’ nuuni eeno gaana koshshennaagaa Geeshsha Maxaafay yootiyo gishshataassa. (Roome 6:12 nabbaba.) Hegaa giyogee nuuni iita amota polennan agganawu doorana danddayoos giyogaa. (Gal. 5:16) Yihoowi nuuni paaciya eqettana danddayiyogaa ammanettees; hegaadan gidennaakko, I nuuni yaatanaadan azazenna. (Zaa. 30:11-14; Roo. 6:6; 1 Tas. 4:3) Iita amota eqettanawu nuussi wolqqay deꞌiyogee qoncce.

12. Nuuni hidootaa qanxxiyo wode waatana koshshii, qassi aybissi?

¹² Hegaadankka, nuuni iitabaa amottido gishsha xallawu Yihoowi nuna qaxxayana gi qoppidi hidoota qanxxana danddayoos. Hegee nuuni iita amota mule eqettana danddayennabadan nu huuphe giddon yootiya cenggurssaa mala. Shin nuuni he cenggurssaa siyana bessenna. Aybissi? Nuuni nagaranchcha gididi yelettidoogaa Yihoowi akeekiyogaa Geeshsha Maxaafay yootiyo gishshataassa. (Maz. 103:13, 14) Nuuni laattido nagaray nuna ubbaa dumma dumma ogiyan qohidoogaa gujjin, I nubaa “ubbabaa erees.” (1 Yoh. 3:19, 20) Nuuni iita amuwa eqettidi hegaa oottennan aggikko, Yihoowi nuna geeshshadan xeellana. Nuuni hegaa ammanettana danddayiyoy aybissee?

13-14. Nuuni iitabaa amottida giyogee Yihoowa ufayssana danddayokko giyogee? Qonccissa.

¹³ Iitabaa amottiyogaanne iitabaa oottiyogaa giddon deꞌiya gita dummatettaa Geeshsha Maxaafay yootees. Iitabaa amottiyogaape ubbatoo naagettana danddayokko; shin he amuwa polennaadan naagettana danddayoos. Leemisuwawu, koyro xeetu layttan Qoronttoosan deꞌiya Kiristtaanetuppe amaridaageeti kase attuma asa gidiiddi attuma asaara zinꞌꞌiyageeta. Phawuloosi hagaadan giis: “Intteppekka issoti issoti kase hegaa mala asa.” Hegaa giyogee eti mattuman bantta mala gididaageetuura zinꞌꞌanawu zaarettidi mule amottibookkona giyogee? Gidennan aggana danddayees; ayssi giikko, hegaa mala amuwa aggiyogee darotoo keehi metees. Shin banttana naagiyanne bantta amuwa polenna Kiristtaaneti Yihoowan sabettoosona. I eta ‘geeyidabadan’ xeellees. (1 Qor. 6:9-11) I nenakka hegaadan xeellana danddayees.

¹⁴ Neeni baaxetaydda deꞌiyo iita amoy awugaa gidinkka, xoonana danddayaasa. Neeni hegaa muleera xayssana danddayennaba gidikkonne, nena naagana danddayaasa; qassi ‘ne qoppiyobaanne ne ashoy koyiyobaa oottennan’ aggana danddayaasa. (Efi. 2:3) Yaatin neeni iita amota xoonanawu nena maaddana danddayiya issi issibati aybee?

PAACIYA WAATA XOONANA DANDDAYAY?

15. Nuuni iita amuwa xoonanawu nu shugo miyyeta akeekana koshshiyoy aybissee?

¹⁵ Neeni iita amuwa xoonanawu ne shugo miyyeta akeekana bessees. “Worddobaa qoppiyogan” nena cimmennaadan naagetta. (Yaaq. 1:22) Leemisuwawu, ushshaa darissidi uyiya issi uri harati aagaappe aaruwan uyiyogaa qoppidi aagee daro iita gidennabadan ayyo siyettana danddayees. Woy qassi pornograafiyara gayttidaagan metootiya issi uri harata mooranchcha kessidi hagaadan gaana danddayees, ‘Ta machchiya tana loytta siiqiyaba gidiyakko hegaa beꞌanawu koyikke.’ Neeni hegaadan qoppiyogaa doommikko sohuwara paaciyan kunddana danddayaasa. Yaatiyo gishshawu, ne oottiyo iitabawu gaaso shiishshoppa. Neeni oottiyobawu oyshettiyay nena.—Gal. 6:7.

16. Neeni suurebaa oottanawu kaseppe aaruwan waana murttana danddayay?

¹⁶ Ne shugo miyyeta shaakka eriyogaa xalaala gidennan, etan xoonettennan agganawu kaseppe aaruwan murttana koshshees. (1 Qor. 9:26, 27; 1 Tas. 4:4; 1 Phe. 1:15, 16) Nena keehi paacciyabaanne neeni keehi paacettiyo wodiya akeeka. Neeyyo paace gidida issibay deꞌana danddayees; woy neeni keehi paacettiyo wodee deꞌana danddayees. Leemisuwawu, neeni keehi daafuriyo wode, woy qamma bilahe paaciya eqettanawu keehi metootay? Yaatikko, giigetta, qassi paacee gakkiyo wode waatanaakko kuuya. Hegawu keehi loꞌꞌo wodee paacee gakkanaappe kase hegaadan oottiyogaa.—Lee. 22:3.

17. Yooseefappe nuuni ay tamaarana danddayiyoo? (Doomettaabaa 39:7-9) (Misiliyakka xeella.)

¹⁷ Phoxiifaara machchiya Yooseefi banaara zinꞌꞌanaadan cimmanawu malido wode I waatidaakko qoppa. I hegaadan oottennaagaa sohuwara iyyo yootiis. (Doomettaabaa 39:7-9 nabbaba.) Nuuni hegaappe ay tamaariyoo? Yooseefi Phoxiifaara machchiya iira zinꞌꞌanaadan cimmanaappe kase suurebaa oottanawu murtti uttiis. Hegaadankka, neeni paacee gakkanaappe kase suurebaa oottanawu loytta murttana danddayaasa. Yaatikko nena paacee gakkiyo wode waatanaakko neeni kasetada kuuyaychchido gishshawu suurebaa oottanawu metootakka.

“UBBATOO PAACCITE”

18. Iita amuwa xoonanawu neeni waatana danddayay? (2 Qoronttoosa 13:5)

¹⁸ Neeni iita amuwa xoonanawu nena ‘ubbatoo paaccana,’ hegeekka ne hanotaa akeekanawu nena ubbatoo qorana koshshees. (2 Qoronttoosa 13:5 nabbaba.) Issi issitoo ne qofaanne oosuwa yigga, qassi giigissana koshshiyabata giigissa. Leemisuwawu, neeni paaciya eqettidaba gidikkokka, nena hagaadan oychchana danddayaasa: ‘Taani sohuwara ixxis giidanaa?’ Neeni sohuwara ixxis gabeennaagaa akeekikko, keehi yiillotoppa. Kaalliya wodiyawu neeni giigissana danddayiyobata qoppa. Nena hagaadan oychcha: ‘Iitabaa qoppiyogaa taani sohuwara aggana danddayiyanaa? Taani allaxxanawu dooriyobay paaciya eqettanawu keehi metootanaadan oottii? Pokkobaa bessiya misiletuppe sohuwara ta ayfiya wora zaariyanaa? Yihoowawu azazettanaayyo tana naaganawu minna baaxetana koshshikkokka, yaatiyogee taayyo ubbatookka loꞌꞌo gidiyogaa akeekiyanaa?’—Maz. 101:3.

19. Nuuni eeyyatettan kuuyiyo guutta milatiyabati iita amuwa eqettanawu metootanaadan waati oottiyonaa?

¹⁹ Neeni nena qoriyo wode ne iita eeshshawu gaaso shiishshennaadan naagetta. Geeshsha Maxaafay hagaadan gees: “Asa wozani ubbabaappe aadhdhi cimmiyaabaanne keehi daro iita.” (Erm. 17:9) Wozanaappe “iita qofay” kiyiyogaa Yesuusi yootiis. (Mat. 15:19) Leemisuwawu, pornograafiya beꞌiyogaa aggida issi uri amarida wodiyappe simmin, mattumaa gaytettaa koshshaa denttettiya misileti kallo deꞌiya asaa bessiyaba gidenna gishshawu eta beꞌiyogee qohenna giidi qoppana danddayees. Woy I hagaadan qoppana danddayees, ‘Taani iitabata oottana xayikko, hegeeta poliyogaabaa qoppiyogee bala gidenna.’ Issi uri hegaadan qoppikko, hegee ‘ashoy amottiyobaa waati oottanaakko kasetidi qoppiyogaa’ mala. (Roo. 13:14) Neeni hegaappe waana naagettana danddayay? Nagaraa oottiyogaa mala gita eeyyatetta kuushshaa kuuyanaadan oottiya guutta eeyyatetta kuushshaa shaakka erada hegeetuppe naagetta.b Balabaa oottanawu gaaso shiishshanaadan oottiya qofa ubbaa woy ‘iita qofaa’ eqetta.

20. Sinttanaa xeelliyagan nuussi deꞌiya hidootay aybee, qassi ha wodiyan nuna aybi maaddanee?

²⁰ Nuuni beꞌidoogaadan, paaciya eqettiyo wolqqaa Yihoowi nuuyyo immees. Qassi A maarotaappe denddidaagan, nuuni ooratta alamiyan merinawu deꞌiyo hidootay nuussi deꞌees. Geeshsha qofaaninne wozanan Yihoowawu haggaaziyo wodee keehi woppissiyagaa gidana! He wodee gakkanaashin, iita amuwa eqettanawu nuussi wolqqaynne hidootay deꞌiyogaa ammanettana danddayoos. Nu baaxiya Yihoowi anjjin nuuni xoonana danddayoos!