NABBABIYAGEETU OYSHAA

Leemiso 30:18, 19 xaafee “wodallinne geela7oi siiquwaa doommiyo doomettaa,” ‘malaalissiyaba’ giis. I woyganawu koyidee?

Geeshsha Maxaafaabaa keehi eriya amaridaageeta gujjin, daro asati he paydoti yootiyobaa akeekanawu metootoosona. He xiqisetun deꞌiya kumetta qofay hagaadan gees: “Tana heezzubati maalalissoosona; oiddanttoi ubba taayyo gelenna. Hegeetikka: arggantti saloora paalliyo paaluwaa, shooshshi shuchchaa bollaara sololiyo sololettaa, markkabee abbaa bollan solddiyo soldduwaanne wodallinne geela7oi siiquwaa doommiyo doomettaa.”—Lee. 30:18, 19.

Hagaappe kase, “wodallinne geela7oi siiquwaa doommiyo doomettaa” giya qofaa iitabaa qonccissiyabadan akeekida. Aybissi? He shemppuwan deꞌiya hara paydoti “gidana” geenna iitabata qonccissiyo gishshataassa. (Lee. 30:15, 16) Qassi paydo 20y, aybanne balaba oottabeykke giya ‘shaaramuxa maccaaseebaa’ yootees. Yaatiyo gishshawu, saluwara paalliya argganttay, shuchchaa bollaara sololiya shooshshay, woy beni markkabee abbaa bollaara waani solddiyakko akeekanawu metiyogaadan, issi uri oottiyobaa ooninne akeekennan aggana danddayees. Hegaa gishshawu, “wodallinne geela7oi siiquwaa doommiyo doomettaa” giyogee banaara pokkobaa oottanaadan yelagiyo cimmiya issi yelagay oottiyo iitabaa bessees giidi kase qoppida.

Shin, ha xiqiseti loꞌꞌobaa yootoosona giidi qoppiyo gaasoti deꞌoosona. Hegaa xaafee bana malaalissidabaa qonccissiis.

Ibraawettuwan koyro xaafettida he xiqiseti loꞌꞌobaa yootiyogaa qonccissoosona. Ibraawettuwan xaafettida Geeshsha Maxaafa qaalaa kochchay yootiyogaadan, Leemiso 30:18n ‘malaalissiyabaa’ geetetti birshshettida Ibraawetto qaalay “keehi dummabaa woy mule hanana danddayennaba” qonccissees.

Qassi Amarkkan Harbbardde Yuniveresttiya propeeseree Krowuford Howel Toyi ha Geeshsha Maxaafaa xiqiseti iitabaa yootokkona giidi kuuyiis. I hagaadan giis: “Hegaa xaafee xiqisetun odettidabati keehi malaalissiyogaa qonccissanawu maliis.”

Yaaniyo gishshawu, Leemiso 30:18, 19n deꞌiya qofay tumuppe malaalissiyabaa qonccissees giyogee bessiyaba. Geeshsha Maxaafaa xaafidaagaadan nunakka, argganttay xoqqa saluwan paalliyogee, shooshshay tohoy baynnaba gidikkonne shuchchaa bolli eesuwan sololiyogee, keehi darobaa caanida markkabee abbaa bolli solddiyogee, qassi wodallaynne geelaꞌiya siiqettidi issippe ufayssiya deꞌuwa deꞌiyogee malaalissees.