Cimidaageetoo—Galchchaa Daro Ogetun Maaddeeta

Neenikka yelagatettan oottiyo darobata haꞌꞌi waaya oottana. Neeni daro layttawu ammanettada Yihoowawu haggaazidaba gidikkonne, kase neeni oottidobaa haꞌꞌi ne oottiyobaara geeddarssiyo wode kaseegaadan oottana danddayenna gishshawu hidootaa qanxxana danddayaasa. Ne hanotaykka hegaa mala gidikko, ufayttanaadan nena aybi maaddana danddayii?

YIHOOWI NEENI AY OOTTANAADAN KOYII?

Neeni ay oottanaadan Yihoowi koyiyakko qoppa. Zaarettido Wogaa 6:5n, “Neeni GODAA ne Xoossaa ne kumetta wozanaappe, ne kumetta shemppuwaappenne ne kumetta wolqqaappe siiqa” giya qofay nena minttettana danddayees.

He xiqisee yootiyogaadan, Yihoowi neeni ne kumetta wozanaappe, shemppuwappenne wolqqaappe awu haggaazanaadan koyees. Hegee ne oottiyobaa harati oottiyobaara, woy ne yelagatettan oottidobaara geeddarissennaadan maaddana danddayees.

Hagaa qoppa: Neeni yelagatettan deꞌiyo wode Yihoowawu ay keena haggaazadii? Yihoowa asaappe daroti banttawu danddayettida keenaa awu loytti haggaazidoogaa yootana danddayoosona. Neenikka yelagatettan Yihoowawu loytta haggaazennan aggakka. Shin ne hanotay laamettidaba gidikkonne, haꞌꞌi neeyyo danddayettida keenan Yihoowawu loytta haggaazaydda deꞌaasa. Neeni hegaadan qoppikko, haꞌꞌikka kaseegaadan haggaazaydda deꞌiyogaa akeekana danddayaasa. Neeni he wode loytta haggaazadasa; haꞌꞌikka loytta haggaazaydda deꞌaasa.

HARATA LOYTTA MAADDANA DANDDAYAASA

Hara ginaa ane qoppa: Cimatettaa gaasuwan ne oottana danddayennabaa qoppiyogaappe, neeni harata maaddana danddayiyo daro ogeta qoppa. Neeni cimiyo wodiyan yelagatettan oottana danddayenna issi issibata oottana danddayaasa. Leemisuwawu, kaallidi deꞌiyabata oottana danddayaasa:

Ne deꞌuwan hanidabaa haratussi yoota. Geeshsha Maxaafan deꞌiya kaalliya qofaa beꞌa:

Kawuwa Daawita: “Taani kase yelaga; ha77i simmi cimaas; shin xillo asi coo attin, woikko a naati miyoobaa woossin, taani mulekka be7a erikke.”—Maz. 37:25.

Yaasa: “Ha77i simmi taani haiqqana mataas. GODAI intte Xoossai intteyyo immana giido lo77o ubbaappe issibinne attibeennaagaa intte ubbai intte wozanaaninne shemppuwan ereeta. I intteyyo immana giidobaappe issibinne attennan, ubbai polettiis.”—Yaa. 23:14.

Daawitinne Yaasu daro layttawu Yihoowawu haggaazidosonanne bantta deꞌuwan darobaa beꞌidosona. Eti bantta deꞌuwan beꞌidobaa yootido gishshawu, eti haasayidobaa xoqqu ootti xeellana bessees.

Neeni Yihoowawu adussa wodiyawu haggaazidaba gidikko, hegaadan oottiyogan ne demmido anjjota haratussi yootana danddayaasa. Yihoowi ba asaa anjjishin ne beꞌido ufayssiya wodiya hassayay? Yaatikko, hegaabaa haratussi yoota! Nena gakkidabaa yootiyogee minttettana danddayees. Yihoowawu haggaazaydda ne demmido ufayssiyabata yootiyogan ne ishatanne michchota minttettana danddayaasa.—Rom. 1:11, 12.

Danddayettida keenan galchchaa shiiqota Shiiquwa Addaraashaa baada shiiqiyogankka harata minttettana danddayaasa. Hegee nenakka haratakka minttettana danddayees. Qommoora ibaa denttido Keena hagaadan gaasu: “Shiiqota biyogee taani hidootaa qanxxennaadan maaddees. Shiiquwa Addaraashan ishatinne michchoti tana siiqiyogaa bessiyo wode ufayttays. Guuttabaa immiyogan harata nashshiyogaa bessanawu baaxetays. Qassi ayyaanaabaa oosota oottiyogan tawukka minettanawunne haratakka minttettanawu baaxetiyogaa aggikke.”

INTTE AMMANETTIDI HAGGAAZIYOGAA YIHOOWI NASHSHEES

Eti kaseegaa keenaa oottana xayikkonne, Yihoowi siiqiyo daro asatubay Geeshsha Maxaafan deꞌees. Yesuusi yelettido wode deꞌida Simoona giyo cima Israaꞌeela bitaniya hanotaa beꞌa. Simooni Xoossaa garuwa biyo wode, keehi koshshiyabaa oottiya yelagata yan beꞌennan aggenna. Shin Simooni ay qoppidee? I he yelagatuugaadan Yihoowawu haggaazana danddayenna gishshawu, Yihoowawu maaddenna asadan bana qoppennan aggenna. Shin, Yihoowi issibaa asaagaadan qoppenna. I Simoona “Xoossawu yayyiya xillo” asaadan xeelliis; qassi guutta naꞌaa Yesuusa beꞌiyo maataa immiyogan anjjiis. Ubba qassi Yihoowi sinttappe Mase gidana he naꞌaabaa hiraagaa yootanawu Simoona goꞌettiis; “qassi geeshsha ayyaanay A” bolli deꞌees. (Luq. 2:25-35) Yihoowi Simoona cimatettaa bolli gidennan, A mino ammanuwa bolli xeelaa wottiis.

Kaseegaa keenaa oottennaba gidikkokka, neeni ammanettada awu haggaaziyogaa Yihoowi nashshiyogaa ammanettana danddayaasa. Yihoowi, “issi asi danddayennabaa gidennan, danddayiyobaa immanaadan” koyees.—2 Qor. 8:12.

Hegaa gishshawu, neeni oottana danddayiyobaa bolli xeelaa wotta. Leemisuwawu, guutta wodiyassi gidikkonne neeni haggaazana danddayiyo dumma dumma ogeta qoppa. Qassi, silkkiya dawaliyogan woy dabddaabbiya xaafada kiittiyogan harata minttettana danddayaasa. Siiqiyogaa bessiya guuttabaa oottiyogee, ubba qassi neegaadan Yihoowawu daro layttaa haggaazida uri oottiyobay ne ishatanne michchota keehi minttettana danddayees.

Cimidaageetoo, inttessi abbee paca gidikkonne Yihoowawu darobaa oottana danddayeeta. “Hegee I Deꞌuwa Ashshiis” giya saaxiniyan Arshsho Afirkkaa biittatuppe issuwan deꞌiya michchiya yootido deꞌuwan hanidabaa beꞌa.

Neeni daro layttawu Yihoowawu haggaaziyogan leemiso gididoogeenne haꞌꞌikka aggennan awu ammanettada haggaaziyogee harata keehi minttettana danddayiyogaa hassaya. Gencciyogan neeni loꞌꞌo leemiso, qassi ha qofan amanettana danddayaasa: “Xoossay suurebaa oottees; hegaa gishshawu, intte geeshshatuyyo haggaazidoogaaninne haggaaziiddi deꞌiyogan oottidobaa, qassi A sunttaa siiqidoogaa I dogenna.”—Ibr. 6:10.

HARATA MAADDANAWU NEEYYO DANDDAYETTIDA KEENAA BAAXETA

Xinaateti bessiyogaadan harata maaddiya cimida darotussi payyatettay loꞌꞌo, eti qoppiyoban gooba, qassi adussa layttaa deꞌoosona.

Haratussi loꞌꞌobaa oottiyogee cimatettaa gaasuwan yiya ubba metuwa xayssennaagee qoncce. Cimatettaa gaasuwan yiya metuwanne Addaameppe laattido hayquwanne nagaraa muleera xayssanay Xoossaa Kawotetta xalaala.—Rom. 5:12.

Shin haꞌꞌikka, Yihoowi neeppe koyiyobaa oottiyogee, hegeekka harati A eranaadan maaddiyogee ne hidootaa mintteesinne ne payyatettawukka maaddana danddayees. Cimidaageetoo, Yihoowi intte awu oottiyobaa xoqqu oottidi xeelliyogaa, qassi galchchay intte mino ammanuwa nashshiyogaa hayyanintta hassayite.