Hassayay?

Ha laytti kiyida Wochchiyo Keelaa loytta nabbabadii? Yaatikko, neeni kaallidi deꞌiya oyshata zaarana danddayiyakkonne beꞌa:

Nuuni Yihoowa bonchchana koshshiyoy aybissee?

Nuuni Yihoowa keehi sabbiyonne siiqiyo gishshawu bonchchoos. Harati A eranaadan koyiyo gishshawukka A bonchchoos.—w25.01, sinttaa 3.

Issi uri nuna yiilloyiyo wode, kaseegaappe aaruwan waati atto gaana danddayiyoo?

Nuuyyo siyettiyabaa xaasayi xeellokko; shin yiillotiyogaanne uluwan lancciya oyqqiyogaa aggiyogee keehi hanqqettiyogan nuuni qohettennaadan maaddana danddayees.—w25.02, sinttaa 15-16.

Yesuusa kaalliya Marqqoosi yelaga ishatussi loꞌꞌo leemiso gidiyoy aybissee?

Marqqoosi haggaazanawu eeno giis. Marqqoosi issi hanotan yiillotidabanne qohettidaba milatees; shin haggaaziyogaa aggibeenna. I Phawuloosaaranne kayma Kiristtaanetuura dabbotido dabbotaa kaseppe minttiis.—w25.04, sinttaa 27.

Yesuusi “Taani etawu ne sunttaa erissaas” giidi woossido wode woyganawu koyidee? (Yohaannisa 17:26)

A kaalliyageeti Xoossaa sunttay oonakko eriyogee qoncce. Shin Yesuusi A halchchuwa, I oottiyobaanne A eeshshaa gujjin, A oonatettaa etawu erissiis.—w25.05, sinttaa 20-21.

Nuuni ashkke gidikko, ay akeekana danddayiyoo?

Nuuni erenna issi issibati deꞌiyogaa akeekoos. Leemisuwawu, wurssettay awude yaanaakko woy Yihoowi he wode ay oottanaakko erokko. Qassi wontto hananabaa woy Yihoowi nuna ay keena eriyakko wurssi akeekana danddayokko.—w25.06, sinttaa 15-18.

Issi huuphe yohuwappe woy issi dere haasayaappe goꞌettanawu nuna aybi maaddana danddayii?

Nuna hagaadan oychchana danddayoos: ‘Ezggiyageeta ammanttanawu odettiiddi deꞌiya naqaashay aybee? Taani tamaarissiyo wode goꞌettana danddayiyo loꞌꞌo leemisoy deꞌii? Ha huuphe yohuwan ooni ufayttana danddayii?’—w25.07, sinttaa 19.

Xoossay Daawita maaridoogaappe ay tamaariyoo?

Daawiti gita nagaraa oottidaba gidikkonne, I zilꞌꞌettidi laamettido wode Yihoowi A maariis. (1 Kaw. 9:4, 5) Xoossay issi urawu atto giikko, he nagaraa gaasuwan sinttappe A qaxxayenna woy hegaa zaarettidi hassayenna.—w25.08, sinttaa 17.

Ne xinaate issi qofaa akeekanawu metootikko waatana danddayay?

Neeni issi qofaa Geeshsha Maxaafaappe loytta qonccissanawu baaxetinkka I akeekanawu metootikko kaalliyagaakko kanttada hegaa haroode qonccissanawu halchcha.—w25.09, sinttaa 24.

Nagarawu ‘balettiyo wolqqay’ deꞌiyogaa Geeshsha Maxaafay yootees. (Ibr. 3:13) Shin waati balettii?

Nagaray balabaa oottanaadan nuna cimmana danddayees. Qassi Xoossay nuna tumuppe siiqiyaakkonne nuuni siranaadan oottana danddayees.—w25.10, sinttaa 16.

Kaseegaappe loytti woossanaadan nuna maaddana danddayiya heezzubati awugeetee?

(1) Nuuni Yihoowa eeshshatubaa wotti dentti qoppana danddayoos. (2) Nuuni gencciyo metuwa qoppananne haratuyyo atto gaanaadan maaddana mala woossana danddayoos. (3) Adussidi woossana danddayoos. Hageeti nuuni wozanappe woossanaadan maaddana danddayoosona.—w25.10, sinttaa 19-20.

Nuuni cimidaageeta waati maaddana danddayiyoo?

Cimidaageeta biidi oychchana woy etawu dawalana danddayoos. Qassi aakime keettaa keeruwawu etaara baana danddayoos. Woy dumma dumma haggaazo qommotun etaara haggaazana danddayoos.—w25.11, sinttaa 6-7.

Issi Kiristtaaniya bullachchay bonchchissiyagaa gidanaadan koshshiya waannabati awugeetee?

Hegaara gayttidaagan kawotettay kessiyo ay higgetussinne azazettite. Intte bullachchaa gibiran Xoossaa ayyaanaa ayfiya macarata bessanawu baaxetite. Maayiyobaaninne alleeqettiyoban ashkke gidiyogaa bessite; qassi Geeshsha Maxaafaara maayettenna wogata kaallennaadan naagettite. Bullachchawu halchchiyo wode loytti haasayite.—w25.12, sinttaa 21-24.