“Yesuusa Ammaniyogaa”—Attanawu Yesuusa Ammaniyogee Xallay Gidii?

Geeshsha Maxaafay yootiyobaa

Kiristtaaneti Yesuusi asaa nagaraa gishshawu hayqqidoogaa ammanoosona. (1 Pheexiroosa 3:18) Shin, attanawu Yesuusi ashshiyagaa gidiyogaa ammaniyogaappe aarobaa oottana koshshees. Daydanttati Yesuusi “Xoossaa Naꞌaa” gidiyogaa eroosona, shin eti xayana, attokkona.—Luqaasa 4:41; Yihudaa 6.

• Taani attanawu ay oottana bessii?

• Attanawu “Nagaranchchaa Woosaa” giyobaa woossana koshshii?

• “Nagaranchchaa Woosaa” giyobay waani doommidee?

Taani attanawu ay oottana bessii?

• Yesuusi nu nagaraa gishshawu ba shemppuwa yarshshidoogaa neeni ammanana bessees. (Oosuwa 16:30, 31; 1 Yohaannisa 2:2) Yesuusi tumuppe deꞌida ura gidiyogaanne Geeshsha Maxaafay abaa yootiyo ubbabaykka tuma gidiyogaa ammanana bessees.

• Geeshsha Maxaafay tumuppe tamaarissiyobaa era. (2 Ximootiyosa 3:15) Kiitettida Phawuloosinne Sillaasee qasho keettaa naagiyagawu, “Godaa Yesuusa ammana, yaatikko neeni attana” yaagidoogaa Geeshsha Maxaafay yootees. Hegaappe simmin, eti qasho keettaa naagiyagaa “Yihoowaa qaalaa” tamaarissiyogaa doommidosona. (Oosuwa 16:31, 32) Qasho keettaa naagiyagee Xoossaa qaalay tamaarissiyobaa akeekana xayikko, I tumuppe Yesuusa ammanana danddayennaagaa hegee bessees. I Geeshsha Maxaafay tamaarissiyobaa geeshshidi erana koshshees.—1 Ximootiyosa 2:3, 4.

• Zilꞌꞌettada laametta. (Oosuwa 3:19) Qassi neeni zilꞌꞌettada laamettana woykko kase qoppidobaaninne oottidoban keehippe azzanana bessees. Neeni Xoossaa ufayssennabaa oottiyogaa aggada “laamettidoogaa bessiyabaa” oottiyo wode zilꞌꞌettada laamettidoogaa harati erana.—Oosuwa 26:20.

• Haattan muuketta. (Maatiyosa 28:19) Yesuusi bana kaalliyageeti haattan muukettana koshshiyogaa yootiis. Qommoora abaa yootido, qasho keettaa naagiyagee haattan muukettiis. (Oosuwa 16:33) Hegaadankka, kiitettida Pheexiroosi cora asaa Yesuusabaa tumaa tamaarissi simmin, “I yootiyobaa ufayttidi ekkida asay haattan muukettiis.”—Oosuwa 2:40, 41.

• Yesuusa timirttiyawu azazetta. (Ibraawe 5:9) Yesuusi azazido ‘ubbabaa naagiyageeti’ A kaalliyogaa bantta kumetta deꞌuwan bessoosona. (Maatiyosa 28:20) Eti “qaalawu azazettiyageetappe attin, sissa xalla siyiyageeta” gidokkona.—Yaaqooba 1:22.

• Wurssettay gakkanaashin gencca. (Marqqoosa 13:13) Yesuusa kaalliyageeti attanawu “genccana koshshees.” (Ibraawe 10:36) Leemisuwawu, kiitettida Phawuloosi Yesuusi tamaarissidobawu ubbatoo azazettiisinne Xoossaayyo ammanettidi deꞌiis, qassi I Kiristtaane gidido gallassaappe doommidi hayqqana gakkanaashin genccidi deꞌiis.—1 Qoronttoosa 9:27.

Attanawu “Nagaranchchaa Woosaa” giyobaa woossana koshshii?

Issi issi haymaanootiyan asay “Nagaranchchaa Woosaa,” qassi “Atotettaa Woosaa” woossees. He woosata woossiya asati darotoo bantta nagaraa paaxoosonanne Yesuusi eta nagaraa gishshawu hayqqidoogaa ammaniyogaa qonccissoosona. Qassi eti Yesuusi bantta wozanan woykko bantta deꞌuwan gelanaadan oychchoosona. Shin Geeshsha Maxaafay “Nagaranchchaa Woosaa” giyogaa mala zaari zaari woossiyobaa yootenna, qassi hegaadan woossanaadan minttettenna.

Issoti issoti issi asi “Nagaranchchaa Woosaa” woossi simmidi, I attanaagaa ammanettees giidi qoppoosona. Shin woossido gishsha xallawu asi atotettaa demmenna. Nuuni nagaranchcha gidiyo gishshawu, balabaa oottiyogee attenna. (1 Yohaannisa 1:8) Yesuusi bana kaalliyageeti nagaray atto geetettanaadan ubbatoo woossanaadan yootidoy hegaassa. (Luqaasa 11:2, 4) Hegaa bollikka, issi issi Kiristtaaneti Xoossaappe wora simmido gishshawu, merinaa deꞌuwa demmana danddayiiddi aggidosona.—Ibraawe 6:4-6; 2 Pheexiroosa 2:20, 21.

“Nagaranchchaa Woosaa” giyobay waani doommidee?

“Nagaranchchaa Woosaa” giyobay waani doommidaakko eranchchati yootiyobay issuwagee haraagaappe dummatees. Issoti issoti he wogay Protesttantte Haymaanootiya Laamiya wode doommidoogaa yootoosona. Harati 18ttanne 19tta haymaanootetu qaattaa wode asay “Nagaranchchaa Woosaa” giyobaa doommiis giidi qoppoosona. Shin hegaa mala woosaa Geeshsha Maxaafay minttettenna; hegee Geeshsha Maxaafay tamaarissiyobaa phalqqees.