Xoossaa Waatidi Loytti Erana Danddayiyo?

Geeshsha Maxaafay yootiyobaa

Xoossaabaa tamaariyogaaninne A ufayssiyabata oottiyogan A loyttidi erana danddayoos. Yaatikko, Xoossay ‘neekko shiiqana.’ (Yaaqooba 4:8) Geeshsha Maxaafay, “Xoossay nuussi ubbaassi mata” gidiyogaa yootees.—Oosuwa 17:27.

• Xoossaa eranawu neeni oottana koshshiyabaa

• Xoossaa eriyogaara gayttidaagan asay qoppiyo bala qofa

Xoossaa eranawu neeni oottana koshshiyabaa

Geeshsha Maxaafaa nabbaba

• Geeshsha Maxaafay yootiyoba: “Geeshsha Maxaafati ubbay Xoossay kaalettin xaafettidosona.”—2 Ximootiyosa 3:16.

• Birshshettaa: Geeshsha Maxaafaa xaafissidaagee Xoossaa. I Geeshsha Maxaafaa xaafeti ba qofaa xaafanaadan oottiis. Dumma gidida ha maxaafaa baggaara, nuuni ay mala deꞌuwa deꞌanaadan koyiyakko Xoossay qonccissiis. I nuuni A loytti eranaadan oottiyabatakka, hegeekka A siiquwa, suure pirddaanne A maarotaabaa nuussi qonccissiis.—Kessaabaa 34:6; Zaarettido Wogaa 32:4.

• Waatana danddayay? Geeshsha Maxaafaa galla galla nabbaba. (Yaasa 1:8) Ne nabbabidobaa wotta dentta qoppa; nena hagaadan oychcha: ‘Hagee taani Xoossaabaa loytta eranaadan waati maaddii?’—Mazamure 77:12.

  Leemisuwawu, Ermmaasa 29:11 nabbabada nena hagaadan oychcha: ‘Xoossay taassi halchchidobay aybee, sarotettayye, iitabee? I halo kessiya Xoosseeyyee sinttappe tawu loꞌꞌobaa halchchiya Xoossee?’

Meretaa loytta xeella

• Geeshsha Maxaafay yootiyoba: “Xoossaa beꞌana danddayennaba gidikkonne, . . . saꞌay merettoosappe doommidi qoncci beettees; Xoossay medhdhidobaappe asay hegaa akeekana danddayees.”—Roome 1:20.

• Birshshettaa: Issi misilee A medhdhida izaawubaa loytti qonccissiyogaadan, woy muttumurettidi giigida issi maashinee A giigissida izaawu hanotaabaa loytti qonccissiyogaadan, Xoossay medhdhidobatikka abaa loytti qonccissoosona. Leemisuwawu, asaa guuggiya hakkaynne I mutumurettidi giigido hanotay Xoossaa hayyuwa bessees, qassi awaa ayfiyaaninne xoolintetun deꞌiya wolqqay A wolqqay aykeenaakko qonccissees.—Mazamure 104:24; Isiyaasa 40:26.

• Waatana danddayay? Meretaabaa tamaaranawunne eta loytta xeellanawu wodiya bazza. Yaatiyo wode, nena hagaadan oychcha: ‘Meretay merettido maalaaliya hanotay Xoossaabaa ay qonccissii?’a Meretati nuna Medhdhidaagaabaa ubbabaa wurssi yootana danddayennaagee qoncce. I Geeshsha Maxaafaa nuussi immidoy hegaassa.

Xoossaa sunttaa goꞌetta

• Geeshsha Maxaafay yootiyoba: “I ta sunttaa erido gishshau, taani a naagana. I tana xeegiyo wode, taani ayyo koyana.”—Mazamure 91:14, 15.

• Birshshettaa: A sunttay Yihoowa gidido Xoossay, ba suntta eridi hegaa bonchchuwan goꞌettiyageeta xoqqu oottidi xeellees.b (Mazamure 83:18; Milkkiyaasa 3:16) Xoossay ba buzo sunttaa nuussi yootiyogan, nuuni A eranaadan oottiis. I, “Taani [Yihoowa]; hegee ta sunttaa” yaagiis.—Isiyaasa 42:8.

• Waatana danddayay? Abaa yootiyo wode ubbatoo A sunttaa goꞌetta.

Woossiyo wode Yihoowa suntta goꞌetta

• Geeshsha Maxaafay yootiyoba: “[Yihoowi] bana xeesiya ubbau, tuman bana xeesiya ubbau matan de7ees.”—Mazamure 145:18.

• Birshshettaa: Yihoowi ammanettidi bana woossiyageetukko shiiqees. Woosay nuuni Xoossawu bonchchuwan goynniyogaa bessiyo ogetuppe issuwa.

• Waatana danddayay? Ubbatoo Xoossaa woossa. (1 Tasalonqqe 5:17) Nena qofissidabaanne neeyyo siyettiyabaa ayyo yoota.—Mazamure 62:8.c

Xoossan mintta ammana

• Geeshsha Maxaafay yootiyoba: “Ammanoy baynnan Xoossaa ufayssana danddayettenna.”—Ibraawe 11:6.

• Birshshettaa: Nuuni Xoossaakko shiiqanawu an ammanettana bessees. Geeshsha Maxaafay, ammaniyogaa giyogee coo Xoossay deꞌiyogaa eriyogaa xalaala gidennaagaa yootees. Hegaa giyogee, muleera an ammanettiyogaa, hegeekka I qaalaa gelidobatanne A maarata ammaniyogaa giyogaa. Issi uraara nu dabbotaa minttidi deꞌanawu ammanoy keehi koshshees.

• Waatana danddayay? Mino ammanoy eran baasettees. (Roome 10:17) Yaatiyo gishshawu, Geeshsha Maxaafaa xannaꞌa, qassi Xoossanne I immiyo zoriya ammaniyogaa bessa. Yihoowa Markkati nena Geeshsha Maxaafaa xannaꞌissiyogan ufayttoosona.d

Xoossaa ufayssiyabaa ootta

• Geeshsha Maxaafay yootiyoba: “Xoossaa siiqiyogee A azazota naagiyogaa.”—1 Yohaannisa 5:3

• Birshshettaa: A azazuwa naaganawu banttawu danddayettida ubbabaa oottiyogan, A siiqiyogaa bessiyagetukko Yihoowi shiiqees.

• Waatana danddayay: Geeshsha Maxaafaa xannaꞌiyo wode Xoossay dosiyobanne ixxiyobaa akeeka. Nena hagaadan oychcha, ‘Tana Medhdhidaagaa ufayssanawu taani ta deꞌuwan ay giigissana danddayiyanaa?’—1 Tasalonqqe 4:1.

Xoossay nena zoriyobaa oosuwan peeshshiyogan A maaduwa akeeka

• Geeshsha Maxaafay yootiyoba: “GODAI keha gidiyoogaa xeelli be7ite.”—Mazamure 34:8.

• Birshshettaa: Xoossay I loꞌꞌo gidiyogaa neeni xeella beꞌanaadan shoobbees. A siiquwanne I nena maaddiyogaa ne deꞌuwan akeekiyo wode, kaseegaappe aaruwan akko shiiqanawu koyana.

• Waatana danddayay: Geeshsha Maxaafaa nabbabiyo wode, Xoossay nena zoriyobaa oosuwan peeshsha, qassi hegaadan oottiyogee demissiyo goꞌꞌaa akeeka. (Isiyaasa 48:17, 18) Xoossay maaddin, metuwa genccidi aattididogan bantta deꞌoynne bantta so asaa deꞌoy giigido, qassi tumu ufayssa demmida asatu deꞌuwan hanidabaakka akeeka.e

Xoossaa eriyogaara gayttidaagan asay qoppiyo bala qofa

Bala qofaa: Xoossay xuura gidiyo gishshawu, nuuni A erana danddayokko.

Tumaa: Xoossaara gayttidaagan issi issibata, hegeekka I ayyaanaa gididoogaa muleera akeekana danddayokko. Gidikkokka, nuuni Xoossaa erana danddayoos. Hegaa bollikka, nuuni merina deꞌuwa demmanawu koyikko, Xoossaa erana koshshiyogaa Geeshsha Maxaafay yootees. (Yohaannisa 17:3) Nuna medhdhida Xoossaabaa nuuni eranaadan Geeshsha Maxaafay A oonatettaa, I asawunne saꞌawu halchchidobaa, qassi I kessido xillotettaa maaratubaa nuussi qonccissees. (Isiyaasa 45:18, 19; 1 Ximootiyosa 2:4) Qassi Geeshsha Maxaafaa baggaara ba sunttaa nuussi qonccissiis. (Mazamure 83:18) Yaatiyo gishshawu, Xoossaa eriyogaa xalla gidennan, akko shiiqanakka danddayoos.—Yaaqooba 4:8.