YELAGATI OYCHCHIYO OYSHAA
Aqo Oyqqanawu Qoppidi Wodiya Aattiyogaa—Shaaho 2: Taani Aqo Oyqqanawu Qoppada Wodiya Aattiyo Wode Akeekana Bessiyabay Aybee?
Neeni issi ura beꞌada dosadasa, qassi neeninne he uri issoy issuwawu haniya loꞌꞌo aqo lagge gidana danddayiyakkonne eranawu issippe wodiya aattanawu kuuyideta. Issoy issuwa loytti eranawu issippe wodiya aattiyo wode akeekana bessiyabay aybee?
Ha huuphe yohuwan
Issoy issuwara aynne qottennan haasayana bessees
Intte issippe wodiya aattiyo wode issoy issuwa loytti erana danddayeeta. Ne issippe wodiya aattiyo uri oottiyobaa beꞌada, ayyo deꞌiya eeshshaa erana.
Gidikkokka, intte naaꞌꞌay aynne qottennan haasayana koshshiyabati deꞌoosona. Hegaadan oottiyo wode, danddayettida keenan intte akeekidobaadan kuuyite, qassi intte koshshay bala gididabaa coꞌꞌu giidi kanttanaadan oottenna mala naagettite.
Intte naaꞌꞌay issippe haasayana bessiyabatu giddon deꞌiyabata:
Miishshaara gayttidabaa. Neeni acotidobi deꞌii? Neeni miishshaa maaraa goꞌettanawu metoota eray? Intte aqo oyqqiyo wode, intte naaꞌꞌaykka demmiyo miishshaa akeekan waati goꞌettana danddayeetii?
Payyatettaa. Neeyyo loꞌꞌo payyatettay deꞌii? Hagaappe kase nena payyatettaa pacay gakki erii?
Halchchiyobaa. Neeni ne deꞌuwan polana koyiyobay aybee? Ne halchchoynne ne ekkanawu woy gelanawu qoppiyo ura halchchoy issi malee? Neeni aqo oyqqa simmin, ne hanotay neeni halchchidobaa polennaadan diggikkokka ufayttada deꞌuutii?
So asaa. Haꞌꞌi ne maadoy koshshiyo so asi deꞌii? Sinttappe neeyyo hegaa mala aawatettay deꞌana danddayees gaada qoppay? Naata yelanawu koyay? Koyikko, aappun naata?
Hegaa malabaa haasayiyo wode, issoy issuwawu aynne qottennan tumaa haasayite. Haraa ufayssanawu giidi tumaa genttoppite woy worddotoppite.—Ibraawe 13:18.
Qoppana koshshiyabaa: Aqo oyqqanawu qoppada issippe wodiya aattiyo uraabaa neeni erana koshshiyabay aybee? I woy A nebaa ay erana koshshii? Haꞌꞌi aynne genttennan tumaa haasayiyogee intte aqo oyqqanawu kuuyikko, sinttappe haasayiyo wode tumanchcha gidanaadan inttena waati maaddanee?
Geeshsha Maxaafaa Maaraa: ‘Tumaa haasayite.’—Efisoona 4:25.
“Maccaara ‘usuppun aginan gaannaa kiittennan aggenna’ gaada qoppana danddayawusu, shin attumaagee layttaa takkanawu qoppana danddayees. Maccaara hegee sohuwara hananaadan koyiyo gishshawu qohettananne unꞌꞌettana danddayawusu. Eti issoy issuwa qofaa loyttidi erana koshshees.”—Ariyano, aqo oyqqoosappe issi laytta.
Intte qoppiyobay dummatana danddayiyogaa akeekite
Naaꞌꞌu asay ubbaban issi mala gidana danddayenna. Yaatiyo gishshawu, neeni aqo oyqqanawu qoppada wodiya aattiyo uraara ubbaban maayettana woy issi mala qofay deꞌana gaada qoppoppa. Leemisuwawu, ne diccido wogaynne hanotay ne qoppiyobay haraagaappe dummatanaadan oottana danddayees.
Qoppana koshshiyabaa: Intte qofay guuttaban dummatiyo wode, Geeshsha Maxaafan deꞌiya maaraara phalqqettennaba gidikko, sarotettay deꞌanaadan intte qofaa agguuteetii?
Geeshsha Maxaafaa Maaraa: “Asai ubbai intte ashkketettaa ero.”—Piliphphisiyuusa 4:5.
“Intte qoppiyo darobay issi mala giidi qoppiyaba gidikkokka, intte giddon dummatettay deꞌana. Qofan maayettiyogee keehi koshshiyaba gidikkokka, dummatettay deꞌiyo wode issoy issuwawu bessiyo eeshshay hegaappekka aaruwan keehi koshshiyaba.”—Matiwu, aqo oyqqoosappe ichchashu laytta.
Aqo oyqqanawu qoppidi issippe wodiya aattiyogee unꞌꞌissana danddayees
Aqo oyqqanawu qoppidi issippe wodiya aattiyogee daro wodiya ekkees; hegee neeni unꞌꞌettanaadan oottana danddayees. Aybi maaddana danddayii?
Issippe aattana wodiya bazza. Neeni aqo oyqqanawu qoppada issippe wodiya aattiyogee, neeyyo deꞌiya aawatettaanne ne hara laggeta sheneho gaanaadan oottana bessenna. Aqo oyqqoosappe ichchashu laytta gidido Alena hagaadan gaasu: “Ne aqo oyqqa simminkka, ne laggeti neeyyo koshshoosona, etikka nena koyoosona. Aqo oyqqanawu qoppada wodiya aattiyogaa doommido gishshawu eta sheneho gooppa.”
Neeni aqo oyqqiyo wode, ubbabawu bessiya wodiya immana koshshiyogaa akeeka. Aqo oyqqanawu wodiya aattiyo wode hegaa oosuwan peeshshiyogee maaddana danddayii?
Qoppana koshshiyabaa: Neeni aqo oyqqanawu qoppada issippe wodiya aattiyo uri harabaa aggi bayidi daro wodiya nenaara aattanaadan koyay? I woy A neeppe darobaa koyiyabadan qoppay? Issippe daro wodiya aattanawu koyiyogan issoy issuwa salettennaadan ay oottana danddayeetii?
Geeshsha Maxaafaa Maaraa: “Ubbabau wodee de7ees; . . . oosettiyaabau ubbau a laittai laittai de7ees.”—Eranchchaa 3:1.
“Aqo oyqqanawu qoppidi issippe wodiya aattiyageeti issippe oottiyobay allaxxiyogaa xalla gidikko, aqo deꞌoy eti unꞌꞌettanaadan oottana danddayees. Eti galla galla oottiyobata, shammiyobaa, so giddon oottiyobaanne goynuwa malabata issippe oottiyogee loꞌꞌo. Hegee sinttappe eta aqo deꞌoy minnanaadan oottees.”—Daaneela, aqo oyqqoosappe naaꞌꞌu laytta.
Aqo oyqqanawu qoppidi issippe wodiya aattiyogee, intte aqo oyqqanawu woy he uraara siiqettiyogaa agganawu kuuyiyo guutta wode gidiyogaa akeekite. Ha kaalli kaalli kiyiya huuphe yohuwan shaaho 3y, intte hegaadan kuuyiyo wode akeekana koshshiyabaa qonccissees.