Polotikay Asay SHaahettanaadan Oottiyoy Aybissee?—Geeshsha Maxaafay Woygii?

Kumetta saꞌan, polotikaa gaasuwan daro asay shaahettiis. Piw Riserch Senter geetettiya dirijjitee 2022n xannaꞌidobay qonccissiyoogaadan, “xinaatee oosettido 19 biittatun deꞌiya gastta asatuppe 65 kushe gidiyaageeti eta biittan deꞌiya dumma dumma polotikaa kaafiya asatu giddon wolqqaama shaahotettay deꞌiyoogaa yootidosona.”

Neeni deꞌiyo heerankka asay awudeegaappenne aaruwan polotikaa gaasuwan shaahettiyoogaa akeekadii? Hegawu gaasoy aybee? Hegee giigana danddayii? Geeshsha Maxaafay yootiyoobaa akeeka.

SHaahotettay deꞌanaadan oottiya eeshshaa

‘Wurssettaa gallassaa’ geetettiya nu wodiyan, daro asawu deꞌiya eeshshay issippetettan deꞌiyoogee metanaadan oottanaagaa Geeshsha Maxaafay kasetidi yootiis.

• “Wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, . . . sigettennaageeta [gidana.]”—2 Ximootiyoosa 3:1-3.

Daro asay loꞌꞌo kawotettay deꞌanaadan baaxetikkonne, hegee hanana danddayibeenna. Asay qoppiyooban issoy issuwaara maayettennaagee, metuwaa giigissanawu issippetettan oottennaadan diggiis. Hegaa gaasuwaa Geeshsha Maxaafay daro wodiyaappe kase yootiis.

• “Asi bau de7iya haariyo maataa hara asa qohanau [goꞌettees.]”—Eranchchaa 8:9.

SHin hegee giigana danddayiyo ogiyaabaa, hegeekka asay ha wodiyan waayettanaadan oottiya metota xayssana danddayiya issi uri haarana kawotettaabaa Geeshsha Maxaafay yootees.

Nuussi qoppiya haaranawu danddayiyaagaa

Geeshsha Maxaafay he metota muleera xayssana danddayiya haariya Yesuus Kiristtoosabaa yootees. Asay issippetettaaninne sarotettan deꞌanaadan oottanawu Yesuusawu wolqqay, maataynne koshshay deꞌees.

• “I de7iyo laitta ubban xillotettai daayo; . . . sarotettai daro.”—Mazamure 72:7.

• “Kawotettati ubbai ayyo kiitettona.”—Mazamure 72:11.

Yesuusi loꞌꞌo kawo, ayssi giikko I asawu, ubba qassi naaqettidaageetussi qoppeesinne eta maaddanawu koyees.

• “A xeesiya hiyyeesata, naaqettidaageetanne maaddiyaabi bainnaageeta i ashshees. Hiyyeesatussinne manqqotussi i qarettees; hiyyeesatu shemppuwaa ashshees. Eta naaquwaappenne makkalaappe i wozees.”—Mazamure 72:12-14.

Yesuusi haariyo Xoossaa Kawotettaabaa gujjada era. He haaroy nena waati maaddiyaakko, qassi he haaruwawu neeni waana exatana danddayiyaakko akeeka.

• Xoossaa Kawotettay Aybee? giya biiduwaa beꞌa.

• “Xoossaa Kawotettaa—Balibakkoy Baynna Kawotettaa” giya huuphe yohuwaa nabbaba.