Qommon haddirssa: Marek M. Berezowski/Anadolu Agency via Getty Images; garssan haddirssa: Halfpoint Images/Moment via Getty Images; gidduwan: Zhai Yujia/China News Service/VCG via Getty Images; qommon ushachcha: Ismail Sen/Anadolu Agency via Getty Images; garssan ushachcha: E+/taseffski/via Getty Images
NAAGI UTTITE!
2023: Daro Asay Unꞌꞌettanaadan Oottida Layttaa—Geeshsha Maxaafay Woygii?
Saꞌaa yuushuwan 2023n hanidabay Geeshsha Maxaafay “wurssetta gallassi” giyo wodiyan nuuni deꞌiyogaa qonccissiya naqaasha. (2 Ximootiyoosa 3:1) Ha wodiyan haniiddi deꞌiyabati Geeshsha Maxaafay nu wodiyan hananaagaa kaseti yootidobaara issi mala gidiyogaa akeeka.
Geeshsha Maxaafaanne kumetta saꞌan haniiddi deꞌiyabata
‘Olaanne olaa oduwa.’—Maatiyosa 24:6.
“Iita ooshshay alamiyan darosan gujji gujji biidi deꞌees.”a
“Aynne Mooribeenna Asaa Ashshanay Oonee?” giyagaanne “Kumetta Saꞌan Olaara Gayttidabawu 2 Triiloone Amarkkaa Doolaariyappe Dariyagee Kiyiis” giya huuphe yohota xeella.
“Dumma dumma heeran biittay qaaxxana.”—Marqqoosa 13:8.
“Alame yuushuwan 2023 doomettaappe doommidi biittaa qaattaa likkiyoban 7ppe bolla gidida 13 biittaa qaattay denddiis; biittaa qaattaa mazggafiyogaa doommoosappe hegee issi laytta giddon keehi daro gididaageetuppe issuwa.”b
“Wolqqaama Biittaa Qaattay Turkkenne Sooriya Keehi Qohiis” giya huuphe yohuwa xeella.
“Yashshiyabaa beꞌana.”—Luqaasa 21:11.
“Alamee hombbiyogee attiis; alamee penttiyo wodee yiis.”— Anttoniyo Gutereeza Kawotettatu Issipetettaa waanna xaafiya.c
“Kumetta Saꞌan 2023 Hombbiya Aginatun Hoꞌoy Keehi Gujjiis” giya huuphe yohuwa xeella.
“Koshay denddana.”—Maatiyosa 24:7.
“2023: Bantta so asawu koshshiya qumaa demmanawu metootiyageetussi keehi waayissiya hara laytta.”d
“Olaanne Carkkuwa Hanotaa Laamiya Gaasuwan Kumetta Saꞌan Suullida Kattaa Qaxuwatuwa” giya huuphe yohuwa xeella.
‘Wayssiya wodiya.’—2 Ximootiyoosa 3:1.
“Alamiyan hosppun asaappe issoy guuggiya sahettees.”e
“Guuggiya Sahettiya Yelagatu Qooday Gujjiiddi Deꞌees” giya huuphe yohuwa xeella.
Nuuni 2024n aybi hanana giidi qoppiyoo?
Ooninne 2024n hananabaa erana danddayenna. Shin alamiyan haniiddi deꞌiyabay, mata wode Xoossaa Kawotettay woykko saluwan deꞌiya haaroy asaa kawotettaa sohuwa haaranaagaa, qassi waayiyawunne unꞌꞌuwawu gaaso gidida ubbabaa xayssanaagaa qonccissees.—Daaneela 2:44; Ajjuutaa 21:4.
Hegee gakkanaashin, nuuni unꞌꞌettiyo wode Xoossan zemppana danddayoos. Geeshsha Maxaafay hagaadan gees:
“Taani yayyido wode, nenan ammanettais.”—Mazamure 56:3.
Nuuni Xoossan ammanettiyogaa waati bessana danddayiyoo? Sinttappe yaana, waayee baynna wodiya xeelliyagan Geeshsha Maxaafay yootiyobaa gujjada eranaadan nena shoobboos. Neeninne ne so asay Geeshsha Maxaafay qaalaa gelidobaappe goꞌettanawu miishsha qanxxennan Geeshsha Maxaafaa xannaꞌiyo prograamiya goꞌetta.
a Kare Biittaa Allaalliya, “Alamee Olan Deꞌees: Alamiyan Denddiya Iita Ooshshawu Gaasoy Aybee?” Emmaa Biilisinne Piter Salisberri, giigissidoogaa Xiqimita 30, 2023.
b Biittaa Qaattaa Oduwa, “2023 Layttaa: Wolqqaama Biittaa Qaattay Mazggafettido Qoodaa,” Uddufune, 2023.
c Kawotettatu Issippetettaa, “Waanna Xaafee Carkkuwa Hanotaara Gayttida Shiiquwan Doometta haasayaa,” Isiine 27, 2023.
d Alamiyan Kattaara Gayttidabaa Oottiya Dirijjitiya, “Alamiyan Kattay Qaxuwatiis.”
e Alamiya payyatettaa Dirijjitiya, “Alamiya Guuggiya Payyatettaa Gallassaa 2023,” Xiqimita 10, 2023.