Xoossaa Qaalan Odettidabaa—Betetussi Hidootaa!

Layttan layttan, miilooniyan qoodettiya asay ba shemppuwa ashshanawu ba heeraappe baqatana koshshiyabadan qoppees. Nenakka hegaa mala yashshiyabay gakkiiddi deꞌii? Hegaadaana gidikko, nena maaddana danddayiya uri deꞌiyogaa ammanetta—Xoossay sinttappe ufayssiya deꞌuwa immanawu qaalaa geliis, hegaabaa Geeshsha Maxaafaappe tamaarana danddayaasa.

“Betetuyyonne bantta qatuwappe laalettidaageetuyyoa koshshiyay haꞌꞌissawu maaddiyoba xalla gidennan, . . . hidootaykka koshshiyaba” gidiyogaa Awurooppaa Issippetettaa komishineeree,b Kristtoos Isttiliyanideesi yootiis. Hidootay deꞌiyo asay sintta wodiyabaa loꞌꞌobaa qoppees. Shin betetuyyo hidoota xalla gidennan, eti banttana gakkidabaa genccanaadan qofankka minttettoy koshshees.

“Ta soo asaa aggada ta biittaappe betido wode, mela attidabadan qoppaas. Keehi yayyaas, azzanaasinne hirggaas.”—Imanuweela, Hayte.

Neeyyokka hegaadan siyettii? Neeni ne sooppe betidaba gidikko, neeyyo minttettoynne hidootay koshshees. Xoossaa Qaalay, Geeshsha Maxaafay nena waati maaddana danddayii?

Xoossaa Qaalan Deꞌiya Minttettuwa

Geeshsha Maxaafay hagaadan gees: ‘Yihoowic beteta siiqees.’—Zaarettido Wogaa 10:17, 18.

Geeshsha Maxaafay hagaadan gees: “GODAI bana xeesiya . . . ubbau matan de7ees.”—Mazamure 145:18.

Geeshsha Maxaafay hagaadan gees: “Ubbaa Danddayiya Xoossai iitabaa mulekka oottenna. . . . [I] suure pirddaa geellayenna.”—Iyyooba 34:10, 12.

Hegee Xoossay neeni tuggatanaadan oottenna giyogaa. I nena qaxxayiiddi deꞌenna, woy ne deꞌoy metanaadan oottidi nena paacciiddi deꞌenna.

Xoossaa Qaalan Deꞌiya Hidootaa

Geeshsha Maxaafay Xoossay sinttappe nuussi ay oottanaakko yootees. Bantta sooppe betidaageeta ha hidootay waatidi maaddiiddi deꞌiyakko akeeka.

Geeshsha Maxaafay hagaadan gees: “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.”—AJJUUTAA 21:4.

Hegee nuuni waayiyappe woppaa demmana giyogaa. Ha wodiyan neeni hidootaa qanxxanaadan oottana danddayiya metota ubbaa xayssanawu Xoossay qaalaa geliis.

“Xoossay ha wodiyan gakkiiddi deꞌiya pirdda pacaanne iitabaa xayssana. He hidootay taani metoy ubbay xayiyo wodiya ubbatoo qoppanaadan maaddees.”—Karllo, El Salvaadoore.

Geeshsha Maxaafay hagaadan gees: “Kasebai ubbai hassayettennanne qofettenna.”—Isiyaasa 65:17.

Hegee nuuni hassayiyo unꞌꞌissiyabaappe laꞌa kiyana giyogaa. Xoossay neeni nena gakkida iitabaa hassayada merinawu unꞌꞌettaydda deꞌanaadan oottenna.

“Nuna gakkida seelaaninne pacan unꞌꞌettiyogaa nuuni mule hassayenna wodee yaanaagaa Geeshsha Maxaafay yootees. Mata wode ubbabay laamettanaagaa taani eriyo gishshawu ha hidootay nuna gakkiya metuwa genccanaadan tana maaddees.”—Nataliyo, Yukireene.

Geeshsha Maxaafay hagaadan gees: “Saluwaa Xoossai . . . kawotettaa essana. He eqqida kawotettai he kawotettata ubbaa gaaceretti xaissana.”—Daaneela 2:44.

Hegee wottiyobi baynna saluwa kawotettay saꞌaa haarana giyogaa. Xoossay mata wode saꞌan deꞌiya kawotetta ubbaa sohuwan saluwan deꞌiya ba kawotettay haaranaadan oottana. Ha kawotettay asa ubbawu tumu sarotettaanne woppaa, qassi tumu pirddaanne ishaluwa ehaana.—Mikiyaasa 4:3, 4.

“Asaa gakkiya unꞌꞌuwa, zaggiyogaa, siriyogaanne zariyan ixxiyogaa mala metoy xayanaagaa eriyogee tana minttettiis; Yihoowa Kawotettay matan ha ubba metota xayssana.”—Musxxafa, Giddo Arshsho.

Xoossaa Qaalan Deꞌiya Hayyuwa

Geeshsha Maxaafan deꞌiya hayyoy neeni nena gakkidabaa gencciyo wode maaddana danddayees. Hegee aquwaban xayidabaa gujjin, kaseegaappe dummatiya ne hanotaa genccanaadankka maaddana danddayees. Kaallidi deꞌiya maarati beteta waati maaddiiddi deꞌiyakko akeeka:

Geeshsha Maxaafay hagaadan gees: “Issi asassi darobay deꞌikkonne, A aqoy ayyo deꞌo demissenna.”—Luqaasa 12:15.

Hayyoy deꞌiyo ha qofay genccanaadan nena waati maaddii? Neeni dagammananne xayidaban keehi azzanana danddayaasa. Shin ne deꞌoy aybippenne aaruwan alꞌꞌo gidiyogaa takki gaada qoppiyogee neeni xayidabawu keehi azzanennaadan maaddana danddayees.

“Deꞌoy buquraappe keehi aadhdhees. Issi issi hanotatun aqoy woy miishshay nena aynne maaddana danddayenna.”—Nataliyo, Yukireene.

Geeshsha Maxaafay hagaadan gees: “ ‘Ha77i wodiyaappe kase aadhdhida wodee aissi keha gididee?’ gaada oichchoppa.”—Eranchchaa 7:10.

Hayyoy deꞌiyo ha qofay genccanaadan nena waati maaddii? Neeni haꞌꞌi deꞌiyo hanotay keehi metiyagaa gidana danddayees, shin hegaa ne kase deꞌuwara geeddarissennan aggiyogee neeni yibbaatennaadan maaddana.

“Ta hanotaa ammana ekkiyogee taani loꞌꞌobaa qoppanaadan maaddiis.”—Eela, Ruwandda.

Geeshsha Maxaafay hagaadan gees: “Nuuni miyobaaninne maayiyoban ufayttidi deꞌana.”—1 Ximootiyosa 6:8.

Hayyoy deꞌiyo ha qofay genccanaadan nena waati maaddii? Deꞌuwawu koshshiyaban ufayttada deꞌanawu mala. Deꞌiyaban ufayttada deꞌiyogee neeni keehi unꞌꞌettennaadan maaddana danddayees.

“Geeshsha Maxaafay taani hanotaa dumma ogiyan xeellanaadaaninne xayidaban xeelaa wottennaadan maaddiiddi deꞌees. Ta keettaayyiyanne taani sarotettay deꞌiyo heeran paxa deꞌiyogan ufayttoos.”—Ivaana, Yukireene.

Geeshsha Maxaafay hagaadan gees: “Hegaa gishshawu, asay intteyyo oottanaadan intte koyiyo ubbabaa inttekka etayyo oottana bessees.”—Maatiyosa 7:12.

Hayyoy deꞌiyo ha qofay genccanaadan nena waati maaddii? Neeni danddayanchchanne keha gidanawu neeyyo danddayettida ubbabaa oottikko, kaseegaappe aaruwan haratuura sarotettan deꞌana danddayaasa. Neeni oottiyobay asay nena coo ixxennaadaaninne ne biido heeran deꞌiya asaara maayettada deꞌanaadan nena maaddana danddayees.

“Daro asay neeni eta bonchchiyogaa, etawu kehiyogaanne eta siiqiyogaa nashshees. Hegee neeni heeran deꞌiya asaara saro deꞌanaadan maaddees.”—Anjjelo, Siri Lankka.

Geeshsha Maxaafay hagaadan gees: “Ubbabaa Xoossaayyo woosan yootite; . . . qassi asi akeekana danddayenna sarotettaa Xoossay intteyyo immana.”—Piliphphisiyusa 4:6, 7.

Hayyoy deꞌiyo ha qofay genccanaadan nena waati maaddii? Neeyyo siyettiyabaa, neeni koyiyobaa, nena yashshiyabaanne qofissiyabaa Xoossaayyo woosan yoota. Hegaadan woossiyogee neeni woppu gaanaadaaninne ne hanotan keehi unꞌꞌettennaadan maaddana danddayees.

“Tana metoy gakkiyo wode awudenne Xoossaa woossays, qassi I ta woosaa zaarees. Taani Geeshsha Maxaafaappe tamaaridobay tumuppe woppu gaanaadan oottiis.”—Yol, Tohossa Suudaane.

“Geeshsha Maxaafay yootiyo loꞌꞌo zoree taani ha metiya hanotaa genccanawu koshshiya woppaa demmanaadan maaddees.”—Valentino, Yukireene.

“Yihoowi tumuppe ufayssiya deꞌuwa ehanawu qaalaa gelidoogaa eriyogee tana minttettees.”—Imanuweela, Hayte

Geeshsha Maxaafay minttettuwaranne hidootaara gayttidaagan yootiyobaa, qassi neeni hegeetun ammanettana danddayiyo gaasuwa gujjada eranawu koyay? Miishsha qanxxennan Yihoowa Markkatuura Geeshsha Maxaafaa xannaꞌanawu oychcha. Eti nena ufayssan maaddanawu koyoosona.