Yihoowa Markkati Asay Immiyo Miishshan Ay Oottiyonaa?
Nuuni asay immiyo miishshan nu dirijjitiyan haymaanootebaa oottoosinne qohettida asaa maaddoos. Nuuni asay Kiristtoos Yesuusa kaallanaadan maaddiyo nu waanna oosuwappe issuwadan he oosuwa oottoos.—Maatiyosa 28:19, 20.
Asay immiyo he miishshan ay asinne duretenna. Cimassi woy haggaaziya oossinne miishsha qanxxokko, qassi sooppe soo biidi haggaazanawu Yihoowa Markkatussi miishshi imettenna. Oosuwa Kaalettiya Citaa yaratinne macara biirotuuninne Waanna Biiruwan oottiya haratikka haymaanoote wogawu aqida asata, qassi etawu damoozi imettenna.
Nu Oottiyobatuppe Amaridabata
Attamuwa: Nuuni layttan layttan, daro miiloone Geeshsha Maxaafatanne hara xuufeta daro doonatun birshshidi, attamidi, caani efiidi asawu immoos; he ubbabawu miishsha oychchokko. Hegaadankka, miishshaa oychchennan woy miishsha demmanawu erissennan jw.org saytiyaninne JW Library appiyan nu xuufeta kessoos.
Keexxiyogaanne Giigissiyogaa: Nuuni kumetta saꞌan nu galchchatu asay issippe shiiqidi Xoossaa sabbanawu injjetiya, goynuwawu shiiqiyo sima keettata keexxoosinne giigissoos. Macara biirotanne birshshettaa biirotakka hegaadan oottoos. He oosotuppe darota bantta dosan maaddiyageeti oottiyo gishshawu, daro miishshaa kessokko.
Aysuwa: Nu waanna biiruwan, macara biirotuuninne birshshettaa biirotun oosettiyabawunne yuuyidi haggaaziyageeti oottiyobawukka kumetta saꞌan oosettiyabawu asay immiyo miishshay maaddees.
Sabbakiyogaa: Mishiraachchuwa yootanawunne asaa “Xoossaa qaalaa” tamaarissanawu Yihoowa Markkatussi miishshay imettenna. (2 Qoronttoosa 2:17) Shin koyro xeetu layttaa Kiristtaanetuugaadan, sabbakiiddi daro wodiya wurssiya, haggaazanawu doorettidanne loohida asatuyyo keettawunne deꞌuwawu koshshiya harabawu amarida miishshay imettees.—Piliphphisiyusa 4:16, 17; 1 Ximootiyosa 5:17, 18.
Tamaarissiyogaa: Asay immiyo miishshay gita shiiquwawu koshshiyabawukka maaddees. Hegaa bollikka, Geeshsha Maxaafaa timirttiya cenggurssaaninne biiduwan giigissoos. Qassi cimatinne ubba wode haggaaziyageeti bantta oosuwa loytti oottanaadan tamaarissoos.
Daafabaappe Shemppissiyo Oosuwa: Meretaynne asi ehiido daafabay qohidoogeeta qumaa, haattaanne keettaa immiyogan maaddoos. ‘Ammanuwan nunaara dabbotiyageetu’ xalla gidennan, Yihoowa Markka gidennaageetakka he oosoy maaddees.—Galaatiya 6:10.