YELAGATI OYCHCHIYO OYSHAA
Tana Yelidaageeti Ufayssiya Aybanne Taani Oottennaadan Diggiyoy Aybissee?
Ne laggeti ha saaminttaa wurssettan issi gibirawu nena shoobbidosona. Neeni baana danddayiyakkonne nena yelidaageeta oychchaasa, shin eti “Chii baakka” giidi zaaridosona. Hegan aynne malaalettabaakka. Neeni hegaappe kase oychchidobaakka eti hegaadan zaaridosona.
Ha huuphe yohuwan
Tana yelidaageeti ubbatoo eeno geennay aybissee?
Nena yelidaageeti ne oychchidobaa ubbatoo diggiyaba milatikko, eti neeni aybinkka allaxxennaadan koyiyabadan qoppana danddayaasa.
Maariyo giyo yelagiya silkkiya koyro oyqqido wode iyyo hegaadan siyettiis. A hagaadan gaasu: “Ta aaway taani awugaa appiya dawunlodanaakko, silkkiya ooyyo ooyyo dawalanaakko, qassi ay keena wodiya etaara haasayanaakko higgiya kessiis. Shin ta laggeti bantta koyidobaa oottana danddayoosona!”
Qoppana koshshiyabaa: Maari aaway tumuppe A ufayttennadan digganawu koyidee? A qofissida harabay ayba gidaneeshsha?
Kaamiya ay keena eesuwan laagganaakko kessido higgee ne koyidoogaadan laaggennaadan diggees, gidikkokka hegee nena gakkana danddayiya qohuwappe naagees; nena yelidaageeti kessiyo higgeekka hegaara issi mala.
Ane hagaa mala: Neeni yelida uradan hanada, biron silkkiya oyqqida yelaga naꞌay neeyyo deꞌiyabadan qoppa. Nena qofissanabay aybee? Nena qofissidabaa qonccissanawu ayba higgiya kessuutee? Ne yelaga naꞌi, neeni I (woy A) ufayttennaadan koyiyabadan yootiyakko woyguutee?
“Ta aaway ubbatoo, ‘Ane yelida asadan hanada, ta sohuwan nena wotta’ yaagees. Hegaadan oottiyogee, taani I kessido higgetu goꞌꞌaa xalaala gidennan, hegeeta kessido gaasuwakka akeekanaadan maaddiis. Taayyo naati deꞌiyaba gidiyakko, taani oottanaadan ta aaway koyiyogaa malabaa eti oottanaadan koyana.”—Taaniyo.
Tana yelidaageeti eeno gaanaadan waatana danddayiyanaa?
“Cancciyogee aynne maaddenna, hegee neeninne nena yelidaageeti salettanaadan oottees. Neeni palamettikko, nena yelidaageeti neeni gasttabeennaabadan qoppidi, laꞌatettaa gujjidi immokkona.”—Richardda.
“Darotoo tana yelidaageeti higgiya kessiyo loꞌꞌo gaasoy deꞌees. Eti taani ufayttiyobaa oottennaadan digganawu koyokkona; taani iitabaa kaalettiyaban woy metuwan yeggiyaban gidennan loꞌꞌoban ufayttanaadan koyoosona.”—Iivo.
Geeshsha Maxaafaa maaraa: “Eeyya asi ba hanqquwaa yeddi bessees; shin aadhdhida era asi ba hanqquwaa mittees.”—Leemiso 29:11.
“Ta silkkiya waata goꞌettanaakko ta aaway kessido higgiya I beꞌennan kanttays. Saꞌaa qamettada ta laggetuyyo kiitaa yeddanawu woy ta aaway paqqadibeennabata dawunlodanawu malays. Guyyeppe I hegaa eriyo wode, tana ammanenna gishshawu kaseegaappe aaruwan higgiya yaa minttees. Qosettidi higgeta kanttanawu maliyogee eeyyatetta.”—Maariyo.
“Danddayanchcha gida. Nena yelidaageeti kessido higgiya kaseegaappe giigissanawu daro wodiya ekkana danddayees, shin he higgeta neeni azazettiyogaa eti akeekiyo wode, neeyyo kaseegaappe aaro laꞌatettaa immana danddayoosona.”—Melinddo.
Geeshsha Maxaafaa maaraa: “Inttena yelidaageetuyyo ubbaban azazettite.”—Qolasiyaasa 3:20.
“Neeni koyiyobaa demmanawu iisettiyogee hanotay hirattanaadan woy neeni koyiyobaa demmanaadan maaddenna.”—Naataliyo.
“Yelidaageeti bantta naꞌi loꞌꞌo kuushshaa kuuyiyakkonne beꞌanawu koyoosona. Yaatiyo gishshawu, issibaa tana yelidaageetuyyo ta koshshaadan gidennan, ammanttiya ogiyan yootays. Taani yaatiyo wode, eti ta oychchidobaa poloosona.”—Jooseefa.
Geeshsha Maxaafaa maaraa: “Ne aawaanne ne aayyiyo bonchcha.”—Efisoona 6:2.