Meretay Gattiyo Daafaabaa Geeshsha Maxaafay Woygii?

Geeshsha Maxaafay yootiyobaa

Ha wodiyan meretay gattiyo daafaabawu gaasoy Xoossaa gidenna; shin he daafan qohettiya asawu I qoppees. Xoossaa Kawotettay xayssiyobatuppe issoy, asay waayettanaadan oottiya, meretay gattiyo daafabaa. He wode gakkanaashin, meretay gattiyo daafaban qohettiyageeta Xoossay minttettees.—2 Qoronttoosa 1:3.

• Meretay gattiyo daafabay Xoossaa qixaate gidennaagaa ammanettana danddayiyoy aybissee?

• Meretay gattiyo daafabay nuuni wurssetta gallassan deꞌiyogaa bessiyabee?

• Meretay gattiyo daafaban qohettidaageeta Xoossay waati maaddii?

• Meretay gattiyo daafabawu giigetti uttanaadan Geeshsha Maxaafay maaddana danddayii?

• Meretay gattiyo daafaban qohettidaageeta minttettiya xiqiseta

Meretay gattiyo daafabay Xoossaa qixaate gidennaagaa ammanettana danddayiyoy aybissee?

Xoossay merettidabaa wolqqan waatidaakko Geeshsha Maxaafay yootiyobaappe meretay gattiyo daafaban haniyabay dummatees.

• Meretay gattiyo daafabay oonanne shaakkennan woreesinne qohees. Shin Xoossay pirddanawu oottidoban iitatu xallaa xayssidoogaa Geeshsha Maxaafay yootees. Leemisuwawu, Xoossay Sadoomanne Gamoora katamata beni xayssido wode, Looxanne A naaꞌꞌu macca naata ashshiis. (Doomettaabaa 19:29, 30) Xoossay he wode deꞌiya asatu wozanaa beꞌidi, I iita giyogeetu xallaa xayssiis.—Doomettaabaa 18:23-32; 1 Sameela 16:7.

• Meretay gattiyo daafabay darotoo asi darin erennan woy mule erennan doommees. Shin Xoossay merettidabatu wolqqan iitata xayssanaappe kasetidi erissiis. Xoossay yootidobaa azazettiyageeti bashshaappe attana danddayoosona.—Doomettaabaa 7:1-5; Maatiyosa 24:38, 39.

• Meretay gattiyo daafabay issi issi ogiyan asaa gaasuwan hanees. Waanidi? Merettidabaa qohiyabaa oottiyogaananne biittaa qaattay, diꞌoynne hegaa malabay qohiyo heeran keettaa keexxiyogaana. (Ajjuutaa 11:18) Asay hegaa malabaa oottidoban Xoossaa amassalana bessenna.—Leemisota 19:3.

Meretay gattiyo daafabay nuuni wurssetta gallassan deꞌiyogaa bessiyabee?

Ee, Geeshsha Maxaafay ‘wodiya wurssettan’ woy “wurssetta gallassatun” daafabay gakkanaagaa yootees. (Maatiyosa 24:3; 2 Ximootiyosa 3:1) Leemisuwawu, Yesuusi nu wodiyabaa, “Dumma dumma heeran koshay denddana, biittaykka qaaxxana” yaagiis. (Maatiyosa 24:7) Asay seelettanaadaaninne waayettanaadan oottiya daafabaakka hara ubbabaakka, Xoossay mata wode saꞌaappe xayssana.—Ajjuutaa 21:3, 4.

Meretay gattiyo daafaban qohettidaageeta Xoossay waati maaddii?

• Xoossay qohettidaageeta ba Qaalan, Geeshsha Maxaafan minttettees. Geeshsha Maxaafay Xoossay nuussi qoppiyogaanne nuuni waayettiyo wode I azzaniyogaa yootees. (Isiyaasa 63:9; 1 Pheexiroosa 5:6, 7) Qassi meretay daafabaa gattenna wodiya Xoossay ehaanaagaakka qonccissees.—“Meretay gattiyo daafaban qohettidaageeta minttettiya xiqiseta” giyagaa xeella.

• Xoossay baayyo goynniyageetu baggaara qohettidaageeta maaddees. Xoossay baayyo goynniya, saꞌan deꞌiya asata Yesuusi oottidoogaa malaa ootissees. Yesuusi ‘wozanay meqqidoogeetanne’ “azzaniyaageeta ubbata” minttettanaagee hiraagan odettiis. (Isiyaasa 61:1, 2) Xoossaayyo goynniyageetikka hegaadan oottanawu baaxetoosona.—Yohaannisa 13:15.

  Xoossay baassi goynniyageeti meretay gattiyo daafaban qohettidaageeta koshshiyaban maaddanaadan oottees.—Oosuwa 11:28-30; Galaatiya 6:10.

Meretay gattiyo daafabawu giigetti uttanaadan Geeshsha Maxaafay maaddana danddayii?

Ee. Geeshsha Maxaafay xaafettidoy meretay gattiyo daafabawu giigetti uttanaassa gidana xayikkonne, hegawu maaddiya maarata yootees. Leemisuwawu:

• Daafabay gakkiyo wode oottanabaa halchcha. Geeshsha Maxaafay, “Cincca asi iitaa be7idi, qosetti aattees” yaagees. (Leemisota 22:3) Daafabay gakkiyo wode waatanaakko halchchi uttiyogee loꞌꞌo. Daafabay gakkiyo wode ekkidi baana borssan koshshiyabaa yeggiyogeenne so asay he wode awan gayttanaakko haasayiyogeekka hegaadan halchchiyo oge.

• Ne deꞌoy neessi deꞌiya buquraappe aadhdhees. Geeshsha Maxaafay, “Nuuni ha saꞌaa aybanne ekkidi yibookko, qassi appe aybanne ekkidi baana danddayokko” yaagees. (1 Ximootiyosa 6:7, 8) Daafabaappe attanawu, nuuni nu keettaanne nuuyyo deꞌiyabaa aggidi baana koshshees. Nuussi deꞌiya aybippenne nu deꞌoy aadhdhiyogaa hassayana koshshees.—Maatiyosa 6:25.