Isiyaasa 41:10—“Taani Nenaara De7iyo Gishshau Yayyoppa”

“Taani nenaara deꞌiyo gishshawu yayyoppa. Taani ne Xoossaa gidiyo gishshawu hirggoppa. Taani nena minttana; ee, taani nena maaddana; taani nena ta xillotettaa ushachcha kushiyan mintta oyqqana.”—Isiyasa 41:10, Ooratta Alamiya Birshshettaa.

“Taani nenaara de7iyo gishshau yayyoppa; taani ne Xoossaa gidiyo gishshau dagammoppa. Taani nena minttana; qassi taani nena maaddana. Taani nena ta xooniya ushachcha kushiyan kaafada oiqqana.”—Isiyaasa 41:10, Wolayttatto Geeshsha Maxaafaa.

Isiyaasa 41:10 Birshshettaa

Xoossaa Yihoowia ammanettidi bawu goynniyageeta ayba metoy gakkikkokka, eta maaddanawu qaalaa geliis.

“Taani nenaara [deꞌays.]” Yihoowi bawu goynniyageeti yayyana koshshenna gaasuwa qonccissiis; eti banttarkka deꞌokkona. I eta bolli gakkiyabaa beꞌiyonne eta woosaa siyiyo gishshawu, I eta matan deꞌiyogaa mala.—Mazamure 34:15; 1 Pheexiroosa 3:12.

“Taani ne Xoossaa.” Yihoowi ba asay deꞌiyo hanotay ayba gidikkokka, I eta Xoossa gidiyogaanne eta goynuwan ufayttiyogaa aggibeennaagaa hassayissiyogan eta woppissees. Xoossay eta gishshawu issibaa oottennaadan ayba hanotaykka A teqqana danddayennaagaa eti ammanettana danddayoosona.—Mazamure 118:6; Roome 8:32; Ibraawe 13:6.

“Taani nena minttana; ee, taani nena maaddana; taani nena ta xillotettaa ushachcha kushiyan mintta oyqqana.” Yihoowi issi qofaa qonccissiya heezzubaa yootiyogan A maadoy ammanttiyogaa bessiis. I ba asawu maadoy koshshiyo wode oottanabaa leemiso hanotan qonccissiis. Issi uri kunddikko, Xoossay A denttanawu ba ushachcha kushiya miccana danddayees.—Isiyaasa 41:13.

Xoossay bawu goynniyageeta minttettiyonne maaddiyo waanna ogee A Qaalaa Geeshsha Maxaafaa. (Yaasa 1:8; Ibraawe 4:12) Leemisuwawu, Xoossaa Qaalay hiyyeesatettaa, harggiya woy siiqiyo uri hayqqin kayyottiyogaa mala metoy gakkiyogeetuyyo maaddiya hayyuwa yootees. (Leemiso 2:6, 7) Xoossay bawu goynniyageeti suure qoppanaadaaninne banttana gakkiya metuwan likkiyappe aaruwan unꞌꞌettennaadan maaddanawu ba geeshsha ayyaanaakka goꞌettana danddayees.—Isiyaasa 40:29; Luqaasa 11:13.

Isiyaasa 41:10 yuushuwan deꞌiya qofaa

Guyyeppe Baabiloone biitti omoodettidi biida ammanettida Ayhudata ha qofay minttettiis. Ayhudati omoodduwan takkido wodiya wurssettaa heeran, yuushuwan deꞌiya dereta xayssiyanne Baabiloone biittaara gaaddetiya morkkee yaanaagaa qonccissiyabati odettanaagaa Yihoowi kasetidi yootiis. (Isiyaasa 41:2-4; 44:1-4) Baabiloone biittaynne yuushuwan deꞌiya dereti hegaa mala odotu gaasuwan yashshan maashikkokka, Ayhudati Yihoowi eta naagiyo gishshawu hirggana koshshenna. I eta “yayyoppite” giidi heezzutoo minttettiis.—Isiyaasa 41:5, 6, 10, 13, 14.

Xoossaa Yihoowi Isiyaasa 41:10n deꞌiya qofaa koyro yootidoy Baabiloonen omoodduwan deꞌiya ammanettida Ayhudatussa gidikkokka, awu goynniya ubbay minettanaadan he qofay xaafetti uttanaadan oottiis. (Isiyaasa 41:10; 40:8; Roome 15:4) I ba ashkkarata beni maaddidoogaadan, ha wodiyankka maaddees.