Arbba, Xiqimita 17
Poo7uwan de7iya asaadan poo7uwan hemettite.—Efi. 5:8.
Nuuni “poo7uwan de7iya asaadan” ubbatoo hemettanawu Xoossaa geeshsha ayyaanaa maadoy nuussi koshshees. Aybissi? Ha shori baynna alamiyan geeshsha gididi deꞌiyogee deexiyaba gidiyo gishshataassa. (1 Tas. 4:3-5, 7, 8) Issibaa Yihoowagaadan xeellenna ha alamiya asaa qofaa eqettanaadan geeshsha ayyaanay nuna maaddana danddayees. Geeshsha ayyaanay nuuni ‘loꞌꞌotettaanne xillotettaa ubbaa’ ayfanaadankka maaddana danddayees. (Efi. 5:9) Nuuni geeshsha ayyaanaa demmana danddayiyo issi ogee woossiyogaa. Yihooway ‘bana woossiyageetussi geeshsha ayyaanaa immanaagaa’ Yesuusi yootiis. (Luq. 11:13) Qassi nuuni Kiristtaane shiiqotun Yihoowa sabbiyo wodekka geeshsha ayyaanaa demmoos. (Efi. 5:19, 20) Xoossaa geeshsha ayyaanay nuna maaddin, nuuni Xoossaa ufayssiya ogiyan deꞌana danddayoos. w24.03 23-24 ¶13-15
Qeeraa, Xiqimita 18
Salettennan oychchite, inttessi imettana; salettennan koyite, intte demmana; qassi salettennan kariya qoxxite, inttessi dooyettana.—Luq. 11:9.
Intte kaseegaappe aaruwan danddayanchcha gidanawu koshshii? Yaatikko, hegaassi woossite. Danddayay Geeshsha ayyaanaa ayfiyaa macaratuppe issuwaa. (Gal. 5:22, 23) Yaatiyo gishshawu, nuuni geeshsha ayyaanaa demmanawunne geeshsha ayyaana ayfiyaa ayfanaadan Yihooway nuna maaddana mala woossana danddayoos. Nuuni danddayanchcha gidanawu metootanaadan oottiya hanotay merettiyo wode, danddayanchcha gidanawu maaddana mala geeshsha ayyaanaa demmanawu ‘aggennan woossoos.’ (Luq. 11:13) Issibaa Yihooway xeelliyoogaadan xeellanaadan I nuna maaddanaadankka woossana danddayoos. Nuuni woossi simmidi ubba galla danddayanchcha gidanawu nuussi danddayettida ubbabaa oottana koshshees. Nuuni danddayanchcha gidanawu ubbatoo woossikko, qassi hegaa bessanawu ubbatoo baaxetikko, kase danddayanchcha asa gidana xayikkonne kaseegaappe aaruwan danddayanchcha gidanaadan Yihooway nuna maaddana. Geeshsha Maxaafaa taariketa wotti dentti qoppiyoogeekka maaddees. Danddayanchcha gidida daro asatu taarikiyaa Geeshsha Maxaafay yootees. He taariketa wotti dentti qoppiyoogan nuuni danddayanchcha gidiyoogaa bessiyo ogeta erana danddayoos. w23.08 22 ¶10-11
Woggaa, Xiqimita 19
Moliya oyqqanawu intte giteta yeggite.—Luq. 5:4.
Yesuusi Yihooway kiitettida Pheexiroosawu koshshiyaabaa kunttanaagaa I ammanettanaadan oottiis. Yesuusi hayquwaappe denddi simmidi, Pheexiroosinne I kiittidoogeeti maalaalissiya ogiyan moliyaa haranttuwaa oyqqanaadan oottiis. (Yoh. 21:4-6) Ha maalaalissiyaabay Yihooway Pheexiroosassi deꞌuwawu koshshiyaabaa kunttana danddayiyoogaa I ammanettanaadan oottidoogee qoncce. ‘Kasetidi Xoossaa Kawotettaa koyiyaageetuyyo’ koshshiyaabaa Yihooway kunttanaagaa Yesuusi yootidoogaa Pheexiroosi hassayennan aggenna. (Maa. 6:33) Ha ubbabay, Pheexiroosi moliyaa oyqqiyo oosuwaa gidennan, ba deꞌuwan sabbakuwaa oosuwaa kaseyanaadan maaddiis. Pheexiroosi 33 M.Ln, Phenxxaqosxxe gallassan xalatettan sabbakiis, qassi hegee daro shaꞌu asati mishiraachchuwaa siyanaadan oottiis. (Oos. 2:14, 37-41) Hegaappe simmin, Samaariyaa asatinne Ayhuda gidennaageeti Kiristtoosa ammananaadan I maaddiis. (Oos. 8:14-17; 10:44-48) Dumma dumma asay gubaaꞌiyaa yaanaadan Yihooway maalaalissiya ogiyan Pheexiroosa goꞌettidoogee tuma. w23.09 20 ¶1; 23 ¶11