Dabloosi Yesuusa Paacciis

Yesuusi haattan muuketti simmin, geeshsha ayyaanay a bazzo kaalettiis. I 40 gallassawu aynne mibeenna gishshawu, keehi namisettiis. He wode Dabloosi Yesuusa paaccanawu yiidi ayyo, ‘Neeni Xoossaa Naꞌa gidikko, ane ha shuchati oytta gidana mala azaza’ yaagiis. SHin Yesuusi Geeshsha Maxaafaappe hagaadan giidi zaariis: ‘Deꞌanawu qumaappe aadhiyaabay koshshiyoogee odettiis. Yihoowi yootiyo qaala ubbaa neeni siyana koshshees.’

Kaallidi, Dabloosi Yesuusa hagaadan giidi paacciis: ‘Neeni Xoossaa Naꞌaa gidikko, Xoossaa garuwa xeeraappe ane duge guppa. Xoossay ba kiitanchata neeyyo azazanaagee odettiis. SHin Yesuusi haranttuwaa Geeshsha Maxaafaappe hagaadan zaariis: ‘Yihoowa paaccoppa geetettiis.’

Hegaappe guyyiyan, Seexaanay Yesuusa saꞌan deꞌiya kawotetta ubbaa, qassi eta aquwaanne eta bonchchuwaa bessiis; bessidi, ‘Neeni taayyo issitoo xalla goynnikko, taani ha kawotetta ubbaanne eta bonchuwaa neeyyo immana’ yaagiis. SHin, Yesuusi, ‘Laa ha Seexaanawu haakka; Yihoowa xalaalawu goynna geetettiis’ yaagiis.

Hegaappe guyyiyan Dabloosi biis; bin kiitanchati yiidi Yesuusi maanaadan qumaa immidosona. He wodeppe doommidi, Yesuusi Kawotettaa mishiraachuwaa sabbakiis. I he oosuwaa oottanawu saꞌaa kiitettiis. Asay Yesuusi tamaarissiyoobaa dosiyo gishshawu, eti i biyo ubbasaa a kaallidi biidosona.