Geeshsha Maxaafaa nabbabana koyada, qommo asatuugaadan neeyyo siyettido gishshawu agga eray? Daroti Geeshsha Maxaafaa nabbabanawu yayyoosona. SHin Geeshsha Maxaafay neeni keehi ufayttanaadan oottana danddayiyoogaa eriyaakko waatuutee? Qassi neeni ufayttada nabbabanaadan maaddana danddayiya amarida qofaa eriyaakko waatuutee? Geeshsha Maxaafay yootiyoobaa eranawu neeni koyanee?

Geeshsha Maxaafaa nabbabiyoogaa doommidi keehi goꞌettida amarida asati yootidobaa beꞌa.

Layttay 20 heera gidido Izikeli hagaadan giis: “Kase ta hanotay awu biyaakko erennan kaamiyaa coo laaggiya asaagaa mala. SHin Geeshsha Maxaafaa nabbabiyoogee ta deꞌoy keehi ufayssiyaagaa gidanaadan maaddiis. Geeshsha Maxaafan tana galla galla maaddiya zoree deꞌees.”

Layttay 20 heera gidido Fredakka hagaadan gaasu: “Taani kase sohuwaara hanqqettiya asa. SHin Geeshsha Maxaafaa nabbabiyoogee taani ta huuphiyaa naaganaadan maaddiis. Hegee taani asaara saruwan deꞌanaadan maaddido gishshawu, haꞌꞌi tawu daro laggeti deꞌoosona.”

Layttay 50 heera gidido Yunesa Geeshsha Maxaafaa xeelliyaagan, “Taani kaseegaappe loꞌꞌo asa gidanaadan, qassi tawu deꞌiya iita eeshshaa agganaadan maaddiis” yaagaasu.

Ha asatuugaadaaninne miilooniyan qoodettiya haratuugaadan, Geeshsha Maxaafaa nabbabiyoogan ne deꞌuwan keehi ufayttana danddayaasa. (Isiyaasa 48:​17, 18) Geeshsha Maxaafay neeni (1) loꞌꞌobaa kuuyanawu, (2) loꞌꞌo laggeta dooranawu, (3) unꞌꞌissiyaabaa genccanawu (4) ubbaappe aaruwan, Xoossaabaa tumaa eranawu maaddees. Geeshsha Maxaafan deꞌiya zoree Xoossaagaa gidiyo gishshawu, he zoriyaa kaallikko balabaa mule oottakka. Xoossay mule iita zore zorenna.

Waannabay doommiyoogaa. Geeshsha Maxaafaa nabbabiyoogaa doommanawunne nabbabidi keehi ufayttanawu maaddiya issi issibay aybee?

Neeni Geeshsha Maxaafaa ufayttada nabbabanawunne nabbabidoban keehi goꞌettanawu nena aybi maaddanee? Darota keehi maaddida ichashu qofaa akeeka.

Loꞌꞌo sohuwaa doora. Cenggurssay baynna sohuwaa koya. Neeni nabbabiyoobaa akeekanawu qofay shaahettanaadan oottiyaabaa digga. Loytti pooꞌiyaanne carkkiya sohuwan nabbabiyoogee neeni keehi goꞌettanaadan maaddana danddayees.

Bessiyaabaa qoppa. Geeshsha Maxaafan deꞌiya qofay saluwan deꞌiya nu Aawaagaa gidiyo gishshawu, siiqiya aawaappe tamaaranawu koyiya naꞌadan qoppikko, hegaappe keehi goꞌettaasa. Geeshsha Maxaafaa xeelliyaagan bessennabaa woy likke gidennabaa qoppiyaaba gidikko, Xoossay nena tamaarissanaadan hegaa mala qofaa qoppiyoogaa aggabaya.​—⁠Mazamure 25:⁠4.

Nabbabanaappe kase woossa. Geeshsha Maxaafay Xoossaa qaala gidiyo gishshawu, hegaa akeekanawu a maaduwaa oychiyoogee bessiyaaba. Xoossay ‘bana woossiyaageetussi geeshsha ayyaanaa immanaw⁠u’ qaalaa geliis. (Luqaasa 11:13) Geeshsha ayyaanay neeni Xoossaa qofaa akeekanawu maaddees. Qassi, he ayyaanay neeni ‘haray atto geemettida yohuwaara ubbaa qoranaw⁠u’ maaddana.​—⁠1 Qoronttoosa 2:⁠10.

Akeekanawu nabbaba. Wurssana xallawu nabbaboppa. Nabbabiyoobaa loytta qoppa. Hagaadan gaada nena oycha: ‘Ha taarikiyan qonccida urawu deꞌiya eeshshay aybee? Hagaa ta deꞌuwan waata oosuwan peeshshana danddayiyaanaa⁠?’

Hoolliyaa kessa. Geeshsha Maxaafaa nabbabiyoogan goꞌettanawu, nabbabiyoobaappe nena keehi maaddiya issibaa demmanawu halcha. Hagaadan halchana danddayaasa: ‘Taani Xoossaabaa loytta erana koyays⁠.’ ‘Loꞌꞌo asa, loꞌꞌo azina woy loꞌꞌo macho gidana koyays⁠.’ Neeni he hoolliyawu gakkanaadan maaddiya Geeshsha Maxaafaa shaahuwaa doora.a

Ha ichashu qofay neeni nabbabiyoogaa doommanaadan maaddees. SHin neeni nabbabiyoogan waana keehi ufayttana danddayay? Kaalliya huuphe yohoy amarida qofaa qonccissees.

Geeshsha Maxaafaa nabbabiyoogee nena salettiiyye ufayssii? Neeni nabbabiyo hanotay salettanaadan woy ufayttanaadan oottana danddayees. Neeni nabbabanawu koyanaadaaninne ufayttanaadan maaddiyaabaa ane beꞌoos.

Ammanttiyaanne ha wodiyan birshshettida Geeshsha Maxaafaa doora. Neeni nabbabiyoobay akeekanawu metiyaanne eranawu waayissiya ogiyan xaafettidaagaa gidikko, hegaa ufayttada nabbabennaagee qoncce. Yaatiyo gishshawu, akeekanawu metenna qaalan giigida, wozanaa denttettiya Geeshsha Maxaafaa koya. Gidikkokka, hegee akeekan giigida, suure birshshetta gidana bessees.a

Ha wodiyaa tekinolojiyaa goꞌetta. Ha wodiyan Geeshsha Maxaafay maxaafa mera xallan gidennan elektiroonike merankka giigees. Issi issi Geeshsha Maxaafaa Intternneetiyan nabbabana woy komppiyuteriyan, taableetiyan woy moobayliyan dawunlode ootti wottana danddayettees. Amarida Geeshsha Maxaafay issi xiqisiyaa qofaa hara xiqisiyaa qofaara gatti xeellanawu, ubba qassi hara Geeshsha Maxaafaa birshshettatun deꞌiya qofaara geeddarssanawu danddayiyo hanotan giigiis. Neeni nabbabiyoogaappe cenggurssan giigidaagaa siyanawu koyiyaaba gidikko, issi issi qaalan hegaadan giigida Geeshsha Maxaafaykka deꞌees. Daro asay kaamiyaaninne hegaa malaban issisaappe harasaa biiddi, maayuwaa meecciiddi woy harabaa oottiiddi cenggurssan giigidaagaa ezggees. Neenikka neessi injjetiyaagaa goꞌettana danddayaasa.

Geeshsha Maxaafaa xannaꞌanawu maaddiya miishshata goꞌetta. Geeshsha Maxaafaa ­xannaꞌanawu maaddiya miishshati neeni nabbabiyoobaa loytta akeekanaadan oottana danddayoosona. Neeni nabbabiyo taarikiyan odettida biittatubaa loytta eranawu maaddiya Geeshsha Maxaafan odettida biittatu karttati deꞌoosona. Ha maxeetiyan woy jw.org saytiyan kiyiya huuphe yohotu malay neeni Geeshsha Maxaafan deꞌiya daro qofaa akeekanawu maaddana danddayees.b

Dumma dumma ogiyan nabbaba. Geeshsha Maxaafaa doomettaappe wurssettaa gakkanawu nabbabiyoogee ufayssennaba milatikko, nena ufayssiya shaahuwaa nabbabiyoogan doommana danddayaasa. Geeshsha Maxaafan qonccida erettida asatubaa eranawu, eta taarikiyaa danddayaasa. Hagawu maaddiya, “Geeshsha Maxaafan Qonccida Asaabaa Eranawu Xannaꞌa” yaagiya saaxiniyaa beꞌa. Woy qassi huuphe yohuwan dummayada woy hanidabaa kasiyaa kaaluwan Geeshsha Maxaafaa nabbabana danddayaasa. Hagaappe issuwaa mala beꞌana danddayaasa.

Geeshsha Maxaafay hara maxaafaa mala gidenna. A giddon Medhidaagaa zoree deꞌees. (2 Ximootiyoosa 3:16) Geeshsha Maxaafay yootiyoobay nuna keehi goꞌꞌees. Qassi “Xoossaa qaalai paxa de7eesinne oottees” yaagees. (Ibraawe 4:12) Geeshsha Maxaafay nuuni nu deꞌuwaa giiga oottanaadan naaꞌꞌu ogiyan maaddees; hegeekka, galla galla deꞌuwawu maaddiya zoriyaa yootees; qassi Xoossaanne i gelido qaalaa eranaadan maaddees.​—⁠1 Ximootiyoosa 4:8; Yaaqooba 4:⁠8.

Haꞌꞌi ne deꞌuwaa giiga oottees. Geeshsha Maxaafaa zoree nena keehi maaddana danddayees. Kaallidi deꞌiya allaalletuura gayttidaagan zorees.

• Hara asaara deꞌiya gaytotettaa.​—Efisoona 4:​31, 32; 5:​22, 25, 28, 33.

• Guuggiyaanne bollaa payyatettaa.​—Mazamure 37:8; Leemiso 17:⁠22.

• Kandduwaa.​—1 Qoronttoosa 6:​9, 10.

• Asatettawu koshshiyaabaa.​—Leemiso 10:4; 28:19; Efisoona 4:​28.a

Isiyan deꞌiya yelaga azinaynne machiyaa Geeshsha Maxaafaa zoriyaa keehi nashshoosona. Aqo oyqqiya daroti koyro heeran metootiyoogaadan, etikka issoy issuwaa eeshshaa meezetanawunne issoy issuwaara suure haasayanawu metootidosona. SHin eti Geeshsha Maxaafaappe nabbabidobaa oosuwan peeshshiyoogaa doommidosona. Yaatidi ayba ayfe demmidonaa? Azinay, Vesenti hagaadan giis: “Geeshsha Maxaafaappe nabbabidobay taani aqo deꞌuwan issi issibaa siiquwan gencca aattanaadan maaddiis. Geeshsha Maxaafay yootiyoogaadan deꞌiyoogee nuuni ufayttanaadan maaddiis.” A machiyaa, Anelukka a qofaa maayawusu; a hagaadan gaasu: “Geeshsha Maxaafan deꞌiya leemiso gidiya asatubaa nabbabidoogee nuna maaddiis. Haꞌꞌi taani nu aqo deꞌuwaaninne nuuni halchiyooban keehi ufayttays.”

Xoossaa Eriyoogaa. Vesenti aqo deꞌuwawu xalla gidennan, “Geeshsha Maxaafaa nabbabiyoogee Yihoowakko kaseegaappe aaruwan shiiqanaadan” maaddidoogaakka yootiis. Vesenti issi keehi koshshiyaaba, hegeekka, Geeshsha Maxaafay Xoossaa loytti eranawu maaddiyoogaa akeekiis. Yaatiyoogan, Xoossaa zoriyan goꞌettiyoogaa xalla gidennan, mata dabbodan a loytta erana danddayaasa. Qassi sinttappe demmana “tumu de7uwaa,” hegeekka merinaa deꞌuwaa xeelliyaagan i yootido ufayssiyaabaa neeni akeekana. (1 Ximootiyoosa 6:19) Hegee hara maxaafi yootana danddayennaba.

Geeshsha Maxaafaa nabbabiyoogaa doommiyaabanne aggennan nabbabiyaaba gidikko, neenikka he goꞌꞌaa demmana; yaatiyoogee ne deꞌoy haꞌꞌi giiga gidanaadaaninne neeni Xoossaa eranaadan maaddees. SHin neeni Geeshsha Maxaafaa nabbabiyo wode daro oyshaa qoppana danddayaasa. Yaanikko, 2,000 layttappe kase deꞌida, Toophiyaa mureessaa leemisuwaa kaallana bessiyoogaa hassaya. I Geeshsha Maxaafay yootiyoobaara gayttidaagan daro oyshaa qoppiis. I nabbabiyoogaa akeekiyaakkonne oyshettido wode, “Tau odidi akeekissiya asi bainnan waanidi akeekettii?” yaagiis.b Geeshsha Maxaafaa qofaa loytti tamaarissiya, Yesuusa kaallida koyro asatuppe issuwaa gidida, Piliphoosi maaddanaadan i koyiis. (Oosuwaa 8:​30, 31, 34) Hegaadan, neenikka Geeshsha Maxaafaabaa gujja eranawu koyikko, www.pr2711.com saytiyan deꞌiya qitsiyaa kunttanaadan woy ha maxeetiyan deꞌiya adarashatuppe neessi injjetiyaasa xaafanaadan minttettoos. Ne heeran deꞌiya Yihoowa Markkatuura gayttana woy eta Kawotettaa Addaraashaa baana danddayaasa. Hachi Geeshsha Maxaafaa nabbabanaadaaninne a zoriyaa kaallada ne deꞌoy kaseegaappe giiga gidanaadan oottana mala minttettoos.