Yihoowa Markkati So Asaa Deꞌuwaa Laaliyoonaayye Minttiyoonaa?

Nuuni Yihoowa Markkati nu so asaa deꞌuwaakka nu shoorotuugaakka minttanawu baaxetoos. Xoossay so asaa Medhdhidaagaa gidiyo gishshawu nuuni A bonchchoos. (Doomettaabaa 2:21-24; Efisoona 3:14, 15) I Geeshsha Maxaafan, kumetta saꞌan deꞌiya asay minonne ufayssiya aqo deꞌo deꞌana mala maaddiya maaraa tamaarissees.

Yihoowa Markkati So Asaa Deꞌoy Minnanaadan Waati Maaddiyoonaa?

Geeshsha Maxaafaa zoriyaa kaalliyoogee nuuni loꞌꞌo azina, machcho, aawa woy aayo gidanaadan maaddiyo gishshawu, he zoriyaa kaallanawu baaxetoos. (Leemiso 31:10-31; Efisoona 5:22–6:4; 1 Ximootiyoosa 5:8) Geeshsha Maxaafan deꞌiya zoree hara haymaanootiyaa kaalliya uri deꞌiyo keettaa asaakka maaddees. (1 PHeexiroosa 3:1, 2) Yihoowa Markka gidennaageeti bantta aqo laggee Yihoowa Markka gidin yootidobaa beꞌa:

• SHin Iveta Yihoowa Markka gida simmada, keehi siiqiya asanne danddayanchcha gidaasu. A hegaadan laamettidoogee nu aqo deꞌoy laalettennaadan maaddiis.”—Kiloꞌira, Braazileppe.

• SHin he wodeppe doommada, Geeshsha Maxaafay nu aqo deꞌuwawu tumuppe maaddidoogaa akeekaas.”—Agneso, Zambbiyaappe.

Nuuni haggaazuwan, Geeshsha Maxaafay yootiyo zoree nu shooroti

• Aqo laggiyaa akeekan dooranaadan

• Aqo oyqqoosappe laytta kumanaashin genccanaadan

• Bollo keettaara maayettanaadan

• Miishshaa maara oyqqanaadan

• Ooshshaa agganaadan

• Atto giyoogaa tamaaranaadan

• Naata loohissanaadan waati maaddiyaakko yootoos

Haymaanootiyaa laammiyoogee aqo deꞌuwan ooshshay merettanaadan oottii?

Ee tuma, issi issitoo oottees. Leemisuwawu, Sofres giyo dirijjitee pilggidi 1998n demmidobay, 20 aqo deꞌuwaa giddon 1n metoy merettidoogaa bessees; hegeetu ubban aqo laggetuppe issoy Yihoowa Markka gidiis.

Yesuusi ba timirttiyaa kaalliyaageeta issi issitoo eta so asay qohanaagaa kasetidi yootiis. (Maatiyoosa 10:32-36) Taarikiyaa eranchchay Wil Duranti Rooma Haaruwaa wode, “Kiristtaanetu ammanoy so asaa laalees”a giidi asay mootidoogaa yootiis; ha wodiyankka asay amarida Yihoowa Markkata hegaadan mootees. SHin hegaa giyoogee metoy merettanaadan oottiday Yihoowa Markka gidida ura giyoogee?

Awurooppaa Asaa Maataa Pirdda Keettay Yihoowa Markkati so asaa deꞌoy laalettanaadan oottoosona giyo mootuwaa xeellido wode, so asaappe Yihoowa Markka gidenna uri “ba ammanuwaa oosuwan bessanawunne kaallanawu bantta dabbuwawu deꞌiya maataa ammananawunne bonchchanawu” koyenna gishshawu darotoo metoy merettiyoogaa yootiis. He Pirdda Keettay hagaadankka giis: “Aqo laggetu haymaanootee dumma dumma gidido keetta ubban hegee meeze gididaba; Yihoowa Markkatu hanotaykka hegaappe dummatenna.”b SHin Yihoowa Markkati bantta haymaanootiyaa gaasuwan asay ixxishinkka, Geeshsha Maxaafay hagaadan zoriyoobaa kaallanawu baaxetoosona: “Ooninne intteyyo iitabaa oottikko, he urau iitabaa ootti zaaroppite. . . . Asa ubbaara sarotettan de7anau, intte baggaara, intteyyo danddayettidabaa ubbaa oottite.”—Roome 12:17, 18.

Yihoowa Markkati bantta haymaanootiyaa kaalliya asa xallaa ekkana woy gelana bessees giidi ammaniyoy aybissee?

Yihoowa Markkati, Geeshsha Maxaafay “Godaa ammaniya asaa wogan,” hegeekka, bantta ammanuwaa kaalliya asa ekkanaadan woy gelanaadan yootiyo zoriyaa mintti kaalloosona. (1 Qoronttoosa 7:39) Hegee Geeshsha Maxaafaa azazonne keehi maaddiya zore. Leemisuwawu, 2010n Jornal of Merej end Femili giyo maxeetiyan kiyida qofay “issi haymaanootiyaa, meeziyaanne ammanuwaa kaalliya aqo laggetu giddon” keehi mino dabbotay deꞌiyoogaa yootiis.c

Gidoppe attin, Yihoowa Markkati bantta ammanuwaa kaalliya uri Yihoowa Markka gidenna aqo laggiyaappe shaahettanaadan minttettokkona. Geeshsha Maxaafay hagaadan gees: “Ammanenna machchiyaa de7iyo ammaniya asi ooninne de7ikko, a machchiyaa aara issippe de7iyoogaa i dosikko, o yeddoppo. Qassi ammanenna azinai de7iyo ammaniya machchiyaa de7ikko, i azinai iira issippe de7iyoogaa a dosikko, appe shaahettuppu.” (1 Qoronttoosa 7:12, 13) Yihoowa Markkati ha azazuwaa kaalloosona.