Yihoowa Gallassawu Ubbatoo Giiga Utta

1. Yihoowa gallassan attanawu nuuni waatana koshshii?

GEESHSHA MAXAAFAY ‘Yihoowa gallassaa’ yootiyo wode, Yihooway ba morkketa xayssiyoonne ba asaa ashshiyo wodiyaa qonccissees. Beni wode, Yihooway amarida dereta qaxxayiis. (Isi. 13:1, 6; Hiz. 13:5; Sof. 1:8) Ha wodiyan, ‘Yihoowa gallassay’ Gita Baabilooni xayuwan doommidi Armmageedoona olan kuuyettees. He ‘gallassan’ attanawu nuuni haꞌꞌi giigettana koshshees. Qassi nuuni ‘gita waayiyawu’ “giigi uttana” koshshiyoogaa Yesuusi tamaarissiis, hegee aggennan oottana bessiyaabaa qonccissees.—Maa. 24:21; Luq. 12:40.

2. Koyro Tasalonqqe maxaafay nuna waati maaddana danddayii?

² Kiitettida PHawuloosi Tasalonqqen deꞌiya Kiristtaanetuyyo ayyaanay kaalettin xaafido koyro dabddaabbiyan eti Yihoowa pirddaa gallassawu giigi uttanaadan maaddanawu amarida leemisota goꞌettiis. PHawuloosi Yihoowa gallassay he wode yeennaagaa erees. (2 Tas. 2:1-3) Gidikkonne, I ba ishantti he gallassay wontto yiyaabadan qoppidi giigettanaadan zoriis, qassi nuunikka he zoriyaa oosuwan peeshshana danddayoos. (1) Yihoowa gallassay waani yaanaakko, (2) he gallassan xayanaageeti oonakko, qassi (3) nuuni attanawu waani giigettana danddayiyaakko PHawuloosi yootidobaa ane pilggoos.

YIHOOWA GALLASSAY WAANI YAANEE?

3. Yihoowa gallassay kaysoy qammi yiyoogaadan waani yaanee? (Misiliyaakka xeella.)

³ “Kaisoi qammi yiyoogaadan.” (1 Tas. 5:2) Yihoowa gallassaa yuussaabaa qonccissiya heezzu leemisotuppe hagee koyroogaa. Kaysoti darotoo issibaa eesuwan oottoosona, qassi eti asay qoppibeenna wodiyan qamman hegaadan oottoosona. Yihoowa gallassaykka qoppennan yaana, hegan daro asay dagammana. Tumu Kiristtaanetikka eesuwan haniyaabatun dagammana danddayoosona. SHin he bashshay iita asaappe attin nuna qohenna.

4. Yihoowa gallassay maareta mala gidiyoy ayba ogiyaanee?

⁴ “Maccaasaa maaretai oiqqiyoogaadan.” (1 Tas. 5:3) SHahaara maccaasiyaa O leessoy doommana wodiyaa kasetada erana danddayukku. SHin O leessoy doommanaagaa A sirukku. Leessoy qoppennan doommidi sakkananne takkana danddayees. Hegaadankka, Yihoowa gallassay doommana gallassaanne saatiyaa erokko. Gidikkonne, nuuni he gallassay yaanaagaanne iitati qoppennan Xoossay sohuwaara eta bolli pirddanaagaa ammanettoos.

5. Gita waayee saꞌay wonttiyoogaa mala gidiyoy ayba ogiyaanee?

⁵ Saꞌay wonttiyoogaadan. PHawuloosi qonccissido heezzantto leemisoykka qamman wuuqqiya kaysotubaa yootees. SHin haꞌꞌi PHawuloosi Yihoowa gallassaa saꞌay wonttiyoogaara geeddarssiyaaba milatees. (1 Tas. 5:4) Qamman bookkidi woy menttidi geliya kaysoti saꞌay wonttiiddi deꞌiyoogaa akeekennan aggana danddayoosona. Saꞌay wonttiyo wode pooꞌiya pooꞌoy eti oyqettanaadaaninne erettanaadan oottana danddayees. Hegaadankka, gita waayee kaysodan ubbatoo Xoossaa ufayssennabaa oottiyoogan xuman deꞌiyaageeti erettanaadan oottees. Etappe dumma ogiyan nuuni Yihoowa ufayssennabaa oottennan aggiyoogaaninne “lo77otettaa, xillotettaanne tumatettaa ubbaa” kaalliyoogan giigi uttana danddayoos. (Efi. 5:8-12) PHawuloosi xayiyaageeta qonccissanawu kaallidi naaꞌꞌu leemisota yootiis.

YIHOOWA GALLASSAN XAYANAAGEETI OONEE?

6. Daro asay xiskkidoy ayba ogiyaanee? (1 Tasalonqqe 5:6, 7)

⁶ ‘Xiskkiyaageeta.’ (1 Tasalonqqe 5:6, 7 nabbaba.) PHawuloosi Yihoowa gallassan xayiyaageeta xiskkiya asatuura geeddarssiis. Eti bantta yuushuwan haniiddi deꞌiyaabaa woy wonttiiddi deꞌiyoogaa akeekokkona. Hegaa gishshawu, gitabay haniyo wode eti akeekana danddayokkona woy hegawu bessiyaabaa oottokkona. Ha wodiyan daro asay ayyaanaaban xiskkiis. (Roo. 11:8) Nuuni ‘wurssetta gallassan’ deꞌiyoogaanne gita waayee matidoogaa bessiyaabata eti ammanokkona. Ha alamiyan gitabay laamettiyo wode amarida asay Kawotettaa mishiraachchuwaa siyiyoogaa doommiis. SHin daroti beegottidi deꞌana koshshishin guyye xiskkidosona. Pirddaa gallassay deꞌiyoogaa ammaniya amaridaageetikka hegee takkees giidi qoppoosona. (2 PHe. 3:3, 4) SHin ubba galla nuuni beegottidi deꞌiyoogee keehi koshshiyaaba.

7. Mattottiyaageeti Xoossay xayssana asatu mala gidiyoy aybiinee?

⁷ ‘Mattottiyaageeta.’ PHawuloosi mattottiyaageeta Xoossay xayssana asatuura geeddarssiis. Mattottiyaageeti bantta yuushuwan haniiddi deꞌiyaabaara gayttidaagan oottana bessiyaabaa sohuwaara oottokkona, qassi eti loꞌꞌobaa kuuyokkona. Hegaadankka, iitati Xoossay yootiyoobaa siyokkona. Eti bashshawu efiya ogiyan deꞌanawu dooridosona. SHin Kiristtaaneti loytti qoppanaadan odettiis. (1 Tas. 5:6) Issi Geeshsha Maxaafaa eranchchay hagaadan giis, “Akeekanchcha asi woppu giidi deꞌeesinne dagammenna. I loytti qoppidi loꞌꞌobaa kuuyana danddayees.” Nuuni woppu giidi deꞌana koshshiyoy aybissee? Nuuni polotikaa woy deretettaa allaalletun gelenna gishshataassa. Yihoowa gallassay mati mati biyo wode nuuni issi baggawu exatanaadan asay iisettana. SHin nuuni waataneeshsha giidi hirggana bessenna. Xoossaa ayyaanay nuuni woppu giidi deꞌanaadaaninne loꞌꞌobaa kuuyanaadan maaddana danddayees.—Luq. 12:11, 12.

YIHOOWA GALLASSAWU GIIGETTANAWU WAATANA DANDDAYIYOO?

8. Nuuni giigi uttanaadaaninne akeekanchcha gidanaadan maaddiya eeshshata 1 Tasalonqqe 5:8y waati qonccissii? (Misiliyaakka xeella.)

⁸ ‘Tiran wottiyo ola miishshaa maaya, qassi birata qophiyaa huuphiyan wotta.’ PHawuloosi nuna giigi uttidanne ola miishshaa maayida wotaaddaratuura geeddarssiis. (1 Tasalonqqe 5:8 nabbaba.) Issi wotaaddaray olay deꞌiyo wode ubban olettanawu giigi uttiis giidi asay qoppees. Nu hanotaykka hegaa mala. Ammanuwaanne siiquwaa tiran wottiyo ola miishshadan maayiyoogaaninne hidootaa birata qophedan huuphiyan wottiyoogan Yihoowa gallassawu giigi uttidaageeta gidoos. Ha eeshshati nuna keehi maaddoosona.

9. Nu ammanoy nuna qohuwaappe waati naagii?

⁹ Tiran wottiyo ola miishshay issi wotaaddaraa wozanaa qohuwaappe naagees. Hegaadankka, ammanoynne siiqoy nu leemiso wozanaa qohuwaappe naagees. Ha eeshshati nuuni aggennan Xoossawu haggaazanaadaaninne Yesuusa leemisuwaa kaallanaadan maaddana. Ammanoy nu kumetta wozanaappe Yihoowa koyiyoogan I nuna woytanaagaa ammanettanaadan oottees. (Ibr. 11:6) Hegee nuuni metuwaa genccana koshshikkokka, nuna kaalettiya Yesuusawu ammanettidi deꞌanaadan oottees. Yedetay woy miishshaa metoy deꞌishinkka ha wodiyan ammanettidi deꞌidaageetuppe tamaariyoogan metuwaa genccanawu nu ammanuwaa minttana danddayoos. Hegaa bollikka, nuuni Kawotettaabaa kaseyanawu bantta deꞌuwaa sima oottidaageetu leemisuwaa kaallikko, miishshaanne aquwaa likkiyaappe aattidi siiqiyoogee kaalettiyo qohuwaappe naagettana danddayoos.b

10. Xoossaanne asaa siiqiyoogee aggennan sabbakanaadan nuna waati maaddii?

¹⁰ Nuuni giigi uttanaadaaninne akeekanchcha gidanaadan siiqoykka keehi koshshiyaaba. (Maa. 22:37-39) Nuuni sabbakiyoogee metuwaa gattana danddayikkokka, Xoossaa siiqiyoogee aggennan sabbakanaadan nuna maaddees. (2 Xim. 1:7, 8) Nuuni Yihoowa ammanennaageetakka siiqiyo gishshawu nu moottan deꞌiya asawu silkkiyaaninne dabddaabbiyan markkattiyoogaa gujjin, aggennan sabbakoos. Sinttappe asay laamettidi suurebaa oottanaagaa nuuni hidootoos.—Hiz. 18:27, 28.

11. Nu ishanttanne michchontta siiqiyoogee nuna waati maaddii? (1 Tasalonqqe 5:11)

¹¹ Nuuni nu ishanttanne michchonttakka siiqoos. ‘Issoy issuwaa minttettiyoogaaninne maaddiyoogan’ hegaa mala siiquwaa bessoos. (1 Tasalonqqe 5:11 nabbaba.) Hashetidi olettiya wotaaddaratuugaadan nuuni issoy issuwaa minttettana koshshees. Issi wotaaddaray olaa wode qoppennan ba mala wotaaddara qohana danddayikkonne, I eriiddi hegaadan mule oottenna. Hegaadankka nuuni nu ishanttanne michchontta eriiddi mule qohokko, woy iitaa gishshaa iitaa zaarokko. (1 Tas. 5:13, 15) Gubaaꞌiyan aawatettay deꞌiyo ishantta bonchchiyoogankka nuuni eta siiqiyoogaa bessoos. (1 Tas. 5:12) PHawuloosi ha dabddaabbiyaa xaafiyo wode, Tasalonqqe gubaaꞌee eqqoosappe issi laytta kumibeenna. Aawatettay deꞌiyo ishanttussi meezee waayi deꞌana; woy eti moorennan aggokkona. Gidikkokka, eti bonchchettana bessees. Gita waayee mati mati biyo wode, nuuni cimati immiyo kaaletuwan haꞌꞌiigaappe aaruwan ammanettiyoogee koshshana danddayees. Waanna biiruwaappenne macara biiruwaappe nuuni kaaletuwaa demmennan aggana danddayoos; yaaniyo gishshawu haꞌꞌi cimata siiqiyoogeenne bonchchiyoogee keehi koshshiyaaba. Hanotay ayba gidikkonne, nuuni eta balaa gidennan, Yihooway Kiristtoosa baggaara ha ammanettida attumaageeta kaalettiiddi deꞌiyoogaa qoppiyoogan akeekanchcha gidoos.

12. Nu hidootay nu qofaa waati naagii?

¹² Birataa qophee wotaaddaraa huuphiyaa qohuwaappe naagiyoogaadan atotettaa hidootay nu qofaa naagees. Nuussi ammanttiya hidootay deꞌiyo gishshawu, ha alamee immiyoobay aynne goꞌꞌennaagaa akeekoos. (Pili. 3:8) Nu hidootay nuuni woppu giidi deꞌanaadan maaddees. Afirkkan haggaaziya Walaasanne Lorindi hanotay hegee tuma gidiyoogaa bessees. Heezzu saaminttaa giddon, Lorindi aayyiyaanne Walaasa aaway hayqqidosona. Ubbasaa gakkiya koronaa harggiya gaasuwan eti so asaakko simmana danddayibookkona. Walaasi hagaadan giis: “Dendduwaa hidootay taani eti ha alamiyaa wurssetta gallassatun deꞌido hanotaa gidennan, ooratta alamiyan koyro gallassatun deꞌana hanotaa qoppanaadan maaddiis. Ha hidootay taani kayyottiyo wode woy azzaniyo wode woppu gaanaadan oottees.”

13. Geeshsha ayyaanaa demmanawu waatana danddayiyoo?

¹³ ‘Geeshsha ayyaanay oottiyoogaa diggoppite.’ (1 Tas. 5:19) Geeshsha ayyaanay nu giddon oottiyoogaa PHawuloosi yootiis. Nuuni I oottiyoogaa diggennan aggiyo wode, suurebaa minnidi wozanappe oottoos, qassi Yihooway nuuni awu oottanaadan wolqqaa immees. (Roo. 12:11) Nuuni geeshsha ayyaanaa demmanawu waatana danddayiyoo? Hegaa demmanawu woossana, ayyaanaa kaaletuwan xaafettida Xoossaa Qaalaa xannaꞌananne A ayyaanay kaalettiyo dirijjitiyaara hashetana danddayoos. Yaatiyoogee nuuni ‘ayyaanaa ayfiyaa’ ayfanaadan maaddana.—Gal. 5:22, 23.

14. Nuuni ubbatoo Xoossaa ayyaanaa demmanawu aybippe naagettana koshshii? (Misiliyaakka xeella.)

¹⁴ Xoossay nuussi ba geeshsha ayyaanaa immi simmin, ‘geeshsha ayyaanay oottiyoogaa diggennaadan’ nuuni naagettana koshshees. Geeshshabaa qoppiyaanne geeshsha kanddoy deꞌiyo asatu xallaassi Xoossay ba ayyaanaa immees. Nuuni geeshsha gidennabaa qoppiyoogaanne hegaa oottiyoogaa aggennaba gidikko, I ba ayyaanaa immiyoogaa aggees. (1 Tas. 4:7, 8) Nuuni geeshsha ayyaanaa ubbatoo demmanawu ‘hanana giidi yootido qaalaa karana’ koshshenna. (1 Tas. 5:20) “Hanana giidi yootido qaalaa” giyaagee Yihoowa gallassaanne nuuni eesoyiya wodiyan deꞌiyoogaa gujjin, ba geeshsha ayyaanaa baggaara nuussi yootiyo qofaa qonccissees. Yihoowa gallassay woy Armmageedooni nu deꞌiyo wodiyan yeenna giidi qoppana koshshenna. Ubba galla nuuni ‘Xoossaa milatiyoogaa bessiya oosuwaa’ minni oottiyoogaaninne geeshsha kandduwan deꞌiyoogan he gallassay matan yaana giidi naagiyoogaa woy qoppiyoogaa bessoos.—2 PHe. 3:11, 12.

“UBBABAAKKA PAACCITE”

15. Bala oduwaaninne dayddanttati yootiyo wordduwan cimettiyoogaappe naagettanawu waatana danddayiyoo? (1 Tasalonqqe 5:21)

¹⁵ Xoossaa morkketi mata wode “ubbabai saro; aibikka hanenna” giidi awaajjana danddayoosona! (1 Tas. 5:3) Dayddanttati yootiyo worddoy ubbasaa gakkananne hegan daroti cimettana. (Ajj. 16:13, 14) Nuuni shin? Nuuni ‘ubbabaakka paaccikko’ cimettokko. (1 Tasalonqqe 5:21 nabbaba.) “Paaccite” geetettidi birshshettida Giriiketto qaalay darotoo asay worqqaanne biraa mala biratati geeshshakkonne shaakki eranawu oottiyoobaa qonccissees. Hegaa gishshawu, nuuni siyiyoobay woy beꞌiyoobay tumakkonne eranawu paaccana koshshees. Yaatidoogee Tasalonqqen deꞌiya Kiristtaaneta maaddiis, qassi gita waayee mati mati biyo wode hegee nuna keehi maaddana. Harati yootiyo ubbabaa ammaniyoogaappe nuuni nabbabiyoobaa woy siyiyoobaa Geeshsha Maxaafaynne Yihoowa dirijjitee yootiyoobaara geeddarssanawu akeekan qoppoos. Yaatikko dayddanttati yootiyo wordduwan cimettokko.—Lee. 14:15; 1 Xim. 4:1.

16. Nuussi deꞌiya ammanttiya hidootay aybee, qassi waatanawu murttidoo?

¹⁶ Yihoowa asay gita waayiyaappe attanaagaa nuuni eroos. Wontto nuuni issoy issoy waananaakko erokko. (Yaaq. 4:14) Nuuni ammanetti deꞌikko, gita waayiyaa wode paxa deꞌin woy hegaappe kase hayqqinkka merinaa deꞌuwaa demmana. Tiyettidaageeti Kiristtoosaara saluwan deꞌana. Hara dorssati qassi gannate saꞌan deꞌana. Nuuni ubbay ufayssiya nu hidootaa qoppiyaageetanne Yihoowa gallassawu ubbatoo giigi uttidaageeta gidoos!