“Sarotettau Zawai De7enna”

Kawotettatu Issippetettay ubba asay issoy issuwaara hashetanaadan, asaa maataa bonchchanaadaaninne heeray moorettennaadan naaganaadan minttettees. Aybissi? Yu En Kornikil giyo maxeetiyan Maher Naaseri yootidoogaadan “Carkkuwaa hanotay laamettiyoogee, darajjayettidi danobaa oottiyoogee, naaqoy yaa dariyoogee, ooyettidi sigettennaagee, wolqqanttin daro asay ba deꞌiyoosaappe aggidi biyoogee, kumetta saꞌan deꞌiya shabbirssay, asappe asa oyqqiya harggeenne hegaa malabay” ubba biittan deꞌiya asaa qohees.

Harati hegaappe aadhdhiyaabaa oottidosona; eti kumetta alamiyaa ayssiya haaroy koshshees goosona. Xaaliyaa biittaa eranchay, danttuwaa xaafiyaanne polotikaa asa gidida Danteenne (1265-1321) piizikisiyaa eranchchay Albert Anesttayni (1879-1955) hegeetuppe amaridaageeta. Dantee polotikan shaahettida alamiyan sarotettay deꞌana danddayenna giidi ammanees. I, “Ba giddon shaakettiya kawotetta ubbai xayana” giidi, Yesuus Kiristtoosi odido qofaa yootiis.—Luqaasa 11:17.

Naaꞌꞌu atome bombeti xuuqqido Naaꞌꞌantto Alamiyaa Olaappe simmin takkennan, Albert Anesttayni Kawotettatu Issippetettaa Jeneral Asembliyawu dabddaabbiyaa xaafiis. I, “Kawotettatu Issippetettay kumetta alamiyaa ayssiya haaruwaa essanawu koshshiya ubbabaa oottiyoogan ubbasan woppaa ehaanawu eesuwaara oottana bessees” yaagiis.

SHin ha wolqqaama kawotettaa yame gidana polotikaa asati mule iitabaa oottennaageeta, danddayiyaageetanne mule naaqqennaageeta gidana giidi nuuni ammanettana danddayiyoo? Woy qassi eti haariya haratuugaadan iita gidanee? Ha oyshati Birttaaniyaa biittaa taarikiyaa eranchchay Lord Akteni, “Maatay moorobaa ootissees; zawi baynna maatay zawi baynna mooruwaa ootissees” yaagidi yootido qofaa nuna hassayissoosona.

Gidikkokka, asay tumu sarotettan maayettidi deꞌanawu, nuuyyo issippetettay deꞌana bessees. SHin hegaa waatidi demmana danddayettii? Hegee hanana danddayiyaabee? Issippetettan deꞌanaagaa Geeshsha Maxaafa yootees. Hegee demmana danddayiyooba. Waatidi? Iitabaa oottiya polotikaa asati essido kawotettan gidenna. SHin, Xoossay essiyo kawotettan hegee hanana. Xoossawu A mereta ubbaa haariyo maatay deꞌiyoogaa he kawotettay bessana. He kawotettay aybee? Geeshsha Maxaafay I “Xoossaa kawotettaa” gidiyoogaa yootees.—Luqaasa 4:43.

“NE KAWOTETTAI YO”

Yesuus Kiristtoosi, “Ne kawotettai yo; ne shenee . . . sa7ankka hano” giidi, tamaarissanawu woossido wode I Xoossaa Kawotettaa qoppiis. (Maatiyoosa 6:9, 10) Ee, Xoossaa Kawotettay maataa demmanawu keehi amottiyaanne bantta xallaa siiqiyaageetu sheniyaa gidennan, Xoossaa shenee saꞌan hananaadan oottana.

Xoossaa Kawotettay ‘saluwaa kawotettaakka’ geetettees. (Maatiyoosa 5:3) Waanidi? Saꞌan uttidi gidennan, saluwan uttidi saꞌaa haariyo gishshataassa. I saꞌaa haarana. Hegee woygiyoogaakko qoppa. He kawotettay giiraa malabawu miishsha oychchana koshshenna. Ayyo haarettiya asay keehi woppu gaana!

“Kawotettaa” giyo qaalay Xoossaa Kawotettay kawuwan haarettiyoogaa qonccissees. A Kawoy Xoossaappe maataa ekkida Yesuus Kiristtoosa. Yesuusa xeelliyaagan Geeshsha Maxaafay hagaadan gees:

• “Kawotettai a hashiyan wodhdhana; . . . A kawotettaa daruwaunne a sarotettau zawai de7enna.”—Isiyaasa 9:6, 7.

• “Asai ubbai, kawotettati ubbainne dumma dumma qaalan haasayiya zareti ubbai ayyo haarettana mala, maatai, bonchchoinne kawotettai ayyo imettiis. A maatai . . . shaarettenna maataa.”—Daaneela 7:14.

• “Sa7aa kawotettai ha77i nu Godaassanne [Xoossaassanne] a Kiristtoosassa.”—Ajjuutaa 11:15.

Yesuusi tamaarissido woosay polettiyo wode, Xoossaa Kawotettay Xoossaa shenee saꞌan muleera polettanaadan oottana. Xoossaa Kawotettaa haaruwan, ubba asay ha saꞌaa waati oyqqanaakko tamaariyo gishshawu, I geeshshanne deꞌuwan deꞌiyaabay kumido soho gidana.

Ubbaappe aaruwan, Xoossaa Kawotettay assi haarettiyaageeta tamaarissana. Ubbay issi mala maaraa tamaarana. Yan ooshshay woy shaahotettay deꞌenna. Isiyaasa 11:9y, “Ooninne qohettenna, woikko bayenna; aissi giikko, abbai haattan kumiyoogaadan, sa7ai GODAA eriyoogan kumana” yaagees.

Kawotettatu issippetettay poletana mala koyiyoogaadan, kumetta saꞌan deꞌiya asay issuwaa gidananne issoy issuwaara sarotettan deꞌana. Mazamure 37:11, “Eti sarotettaaninne duretettaani ufaittidi daana” yaagees. He wode, “danuwaa,” “hambbalaashuwaa,” “hiyyeesatettaa,” qassi “olaa” giyoogaa mala qaalati xayana. SHin hegee awude hananee? Xoossaa Kawotettay kumetta saꞌaa haariyoogaa doommiyoy awudee? I waatidi haaranee? Qassi neeni A haaruwan waata goꞌettana danddayay? Ane beꞌoos.