“Ne Kawotettai Yo” Awude Yaanee?

1, 2. (a) Asay qooqe mala gidanaadan oottana danddayiyaabay aybee? (b) Xoossaa Kawotettaabaa nuuni ay eriyoo?

ISSIBAA beꞌida asay hassayiyoobay darotoo dumma dumma gidiyoogaa akeekennan aggakka. Hegaadankka, issi uri marammaretti simmidi dottoree bau yootidobaa loytti hassayanau metootana danddayees. Woy qassi issi uri qulppee woy manaaxxiree ba matan deꞌishin demmanau metootennan waayi aggana. Hegaadan haniyoy aybissee? Nuuni issi kutti darobaa oottanau maliyo wode qooqe mala gidiyoogaa eranchati yootoosona. Nu guuggee issitoo loytti qoppana danddayiyoy issibaa xallaa gidennan aggenna.

² Ha wodiyan alamiyan haniyaabaa xeelliyaagan daro asay hegaadan qooqe mala. Eti 1914ppe haa simmin alamee keehi laamettidoogaa maayana danddayoosona; shin hegee aybissi haniyaakko akeekokkona. Nuuni Geeshsha Maxaafaa tamaare gidiyoogaadan, Yesuusi 1914n saluwan Kawo gidido wode Xoossaa Kawotettay yiidoogaa eroos. SHin, “Ne kawotettai yo; ne shenee saluwan hanidoogaadan, sa7ankka hano” yaagiya woosay muleera polettichibeenna. (Maa. 6:10) Ha iita alamee xayiyo wode ha woosay muleera polettana. Xoossaa shenee saluwan haniiddi deꞌiyoogaadan saꞌankka hananay he wode.

3. Xoossaa Qaalaa xannaꞌiyoogee nuuni ay akeekanaadan maaddii?

³ Nuuni Xoossaa Qaalaa ubbatoo xannaꞌiyo gishshau, he hiraagay ha wodiyan polettiiddi deꞌiyoogaa akeekana danddayoos. Hegee daro asaagaappe keehi dumma! Eti bantta deꞌuwaunne harabau bichaariyo gishshau, Kiristtoosi 1914ppe doommidi haariyoogaanne mata wode Xoossaa pirddaa pirddanaagaa qonccissiya naqaashaa xaasayidi xeelloosona. ‘Ha alamiyaa xayoy keehi matattidoogaanne haniiddi deꞌiyaabay hegaa qonccissiyoogaa haꞌꞌikka ammaniyaanaa?’ yaagada nena oycha. Neeni Yihoowa Markka gididoy mata wode gidikkokka, neeni ubbatoo qoppiyoy aybee? Neeni ha oyshau zaariyoobay ayba gidikkonne, Xoossaa shenee ha saꞌan mata wode polettanaagaa nuuni eranaadan maaddiya heezzu waanna gaasota ane beꞌoos.

PARAASATI QONCCIYAA KIYIDOSONA

4, 5. (a) Yesuusi 1914ppe doommidi ay oottii? (Ha huuphe yohuwaa doomettan deꞌiya misiliyaa xeella.) (b) Heezzu paraasati aybau leemisoo, qassi ha hiraagay waanidi polettidee?

⁴ Bootta paraa toggidabadan qonccida Yesuus Kiristtoosi 1914n saluwan kallachaa goxxiis. Sohuwaara i Seexaanaa iita siraataa muleera xoonanau kiyiis. (Ajjuutaa 6:1, 2 nabbaba.) Ajjuutaa shemppo 6n leemisuwan qonccida hiraagay Xoossaa Kawotettay eqqi simmin alamiyaa hanotay iitanaagaa, hegeekka olay, koshay, wurssiya harggeenne woriya harabay eesuwan dari dari baanaagaa qoppanaadan oottees. Heezzu paraasati Yesuus Kiristtoosa geeduwaa kaallidi kiyidoogee he hanotaa qonccissees.—Ajj. 6:3-8.

⁵ Asaa naati alame yuushuwan hashetidi issippetettan oottanau qaalaa gelikkonne, kasetidi odettidaagaadan ‘saꞌan olay denddiis,’ woykko sarotettay xayiis. Alamiyan mata wode haniyaabay qonccissiyoogaadan, Koyro Alamiyaa Olay wolqqaama olatussi doometta geetettana danddayees. Qassi 1914ppe haa simmin ikkonoomeenne saynisee keehi diccidaba gidikkonne, koshay alamiyaa hirggissiyoogaa aggibeenna. Hegaa bollikka, bosha qommo ubbay, meretay gattiyo daafabaynne wurssiya harggee layttan layttan miilooniyan qoodettiyaageeta woriiddi deꞌees. Hageeti kaseegaappe yaa iitidosona; yaa daridosona; qassi awudeegaappenne aaruwan daro asaa woroosona. Hagee haniyoy aybissakko akeekay?

6. Geeshsha Maxaafaa hiraagay polettidoogaa akeekidaageeti oonee, qassi hegee eti waatanaadan denttettidee?

⁶ Koyro Alamiyaa Olaynne Isppaanish infiluwenzzaa geetettiya harggee doommido wode daro asaa qofay shaahettiis. SHin, ayyaanan tiyettida Kiristtaaneti 1914y ‘Ayhuda gidenna asaa wodee polettiyo’ laytta gidiyoogaa yeemottidi naagiiddi takkidosona. (Luq. 21:24) Eti aybi hananaakko shaakki eribookkona. Gidikkokka, 1914y Xoossaa haaruwaara gayttidaagan gitabay haniyo wode gidiyoogaa eridosona. Eti Geeshsha Maxaafaa hiraagay polettidoogaa akeeki simmidi, sohuwaara Xoossaa haaroy doommidoogaa asau xalan yootidosona. Eti Kawotettaabaa sabbakiyoogaa gaasuwan eta wolqqaama yedettay gakkiis. Daro biittan hegaadan hanidoogeekka hiraagay polettidoogaa bessiyaaba. Hegaappe simmin daro layttau Xoossaa Kawotettaa morkketi higgiyaa goꞌettiyoogan, danobaa oottiyoogan, qashissiyoogan woy woriyoogan sabbakennaadan digganau malidosona.—Maz. 94:20; Ajj. 12:15.

7. Alamiyan haniiddi deꞌiyaabay tumuppe aybissi haniyaakko daro asay akeekennay aybissee?

⁷ Xoossaa Kawotettay saluwan eqqidoogau hegaa keena daro naqaashay deꞌishin, daro asay hegaa akeekennay aybissee? Alamiyan haniyaabay Xoossaa asay daro layttau yootidoogaadan Geeshsha Maxaafaa hiraagaa polo gidiyoogaa eti aybissi akeekokkonaa? Eti beꞌiyoy beꞌanau koyiyooba xalaalee? (2 Qor. 5:7) Eti bantta deꞌuwaabau bichaariyoogee Xoossay oottiyoobaa beꞌennaadan diggidee? (Maa. 24:37-39) Seexaanaa alamee etappe amaridaageetu qofay shaahettanaadan oottidee? (2 Qor. 4:4) Saluwan haniiddi deꞌiyaabaa eranau ammanoynne ayyaanaabaa akeekay koshshees. Nuuni aybi haniiddi deꞌiyaakko akeekiyoogee keehi ufayssiyaaba!

IITATETTAY YAA IITI IITI BEES

8-10. (a) Naaꞌꞌantto Ximootiyoosa 3:1-5y waanidi polettidee? (b) Nuuni iitatettay yaa iiti iiti bees gaana danddayiyoy aybissee?

⁸ Xoossaa Kawotettay mata wode saꞌaa haaranaagaa nuuni eriyo naaꞌꞌantto gaasoy, iitatettay asaa giddon yaa iiti iiti biyoogaa. Xeetu laytta gidiya wodiyau, 2 Ximootiyoosa 3:1-5n kasetidi odettidabay polettiiddi takkiis. He xiqisiyan odettida eeshshay alamiyan ubbasaa gakkiis. Hegaa akeekabeykkii? Ane amarida leemisuwaa beꞌoos.—2 Ximootiyoosa 3:1, 13 nabbaba.

⁹ Ha wodiyan ooso sohuwan, allaxxiyoosan, ispporttiyaaninne paashiniyan asay oottiyoobaynne haniyoobay 1940 woy 1950 heeran pokko giyoobaappe ay keena dummatiyaakko qoppa. Wolqqaama danobaa oottiyoogeenne keehi shori baynnabaa haniyoogee ubbasan meeze gidiis. Asay ooppenne aaruwan hanqqettanau, pokkobaa oottanau woy meqettaa iitanau annaacettees. Televizhiiniyan asay 1950 heeran beꞌanau dosennabay ha wodiyan so asay keehi ufayttiyooba gidiis. Attumay attumaara maccay maccaara asho gaytotettaa poliyaageeti allaxxiyoobaaninne paashiniyan keehi naanidoogaanne bantta deꞌuwaa maaraa asau erissiyoogaa daroti akeekidosona. Xoossay hegaa waatidi xeelliyaakko nuna erissido gishshau, a keehi galatoos!—Yihudaa 14, 15 nabbaba.

¹⁰ Woykko ha wodiyan haniyaabay 1950 heeran deꞌida yelagatu makkalaappe ay keena dummatiyaakko issi Kiristtaanee qoppana danddayees. He wode naati sijaaraa woy ushshaa uyiyoonaashsha, woy shori baynnabaa qaaqqatanaadan oottiya durssaa duriyoonaashsha giidi aawaynne aayyiyaa hirggoosona. Ha wodiyan daganttiyaabaa siyiyoogee meeze gididaba: Layttay 15 gidido tamaaree banaara tamaariyaageetu bolli massaariyaa tokkosidi etappe 2 woriis; qassi 13 qohiis. Mattottida naati uddufun laytta naꞌiyo woridi i aawaanne i dabbuwaa bukkidosona. Isiyan issi biittan tammu layttan hanida danobaappe baggaa oottiday yan deꞌiya yelagata. Ha wodiyan hanotay yaa iiti iiti biyoogaa ooninne kashi geenna.

11. Hanotay yaa iiti iiti biyoogaa daro asay akeekennay aybissee?

¹¹ Kiitettida PHeexiroosi hagaadan giidi geeshshidi yootiis: “Wodiyaa wurssettan, asa toochchiya bantta amuwaadan de7iyaageeti asa toochchiiddi [denddana]. . . . Eti, ‘I “Yaana” yaagiis. Gibeennee? Yaatin awan de7ii? Aissi giikko, nu aawati haiqqiichchidosona; shin ubbabaikka sa7ai merettoosappe doommidi de7iyoogaadankka de7ees’ yaagana.” (2 PHe. 3:3, 4) Issi issi asay hagaadan haniyoy aybissee? Asay issibaa darotoo beꞌiyo wode, kaseegaadan wudenna. Nu mata laggiyaa eeshshay qoppennan laamettiyo wode, dagammana danddayoos. SHin daro asaa eeshshaynne qofay loddan loddan laamettikko, hegaa akeekennan aggana danddayoos. Gidoppe attin, asaa kanddoy loddan loddan moorettiyoogee keehi qohiyaaba.

12, 13. (a) Alamiyan haniyaaban nuuni hidootaa qanxxana koshshennay aybissee? (b) Nuuni ay akeekiyoogee “waissiya” hanotaa genccanaadan maaddii?

¹² Kiitettida PHauloosi “wurssetta gallassi” deꞌiya hanotay ‘wayssiyaagaa’ gidanaagaa yootiis. (2 Xim. 3:1) Gidoppe attin, genccana danddayettiyaaba gidiyo gishshau, nuuni hegaappe geemmi attiyoosaa koyana bessenna. Yihooway, a ayyaanaynne Kiristtaane gubaaꞌee maaddin, nuuni hidootaa qanxxanaadan woy yayyanaadan oottiya aybiininne genccana danddayoos. Nuuni ammanettidi deꞌana danddayoos. “Ubbaappe aadhdhiya wolqqai” Xoossaagaappe attin, nuugaa gidenna.—2 Qor. 4:7-10.

¹³ PHauloosi wurssetta gallassaabaa hiraagaa yootiyoogaa doommiyo wode “akeeka” yaagidoogaa wozanan wottiyoogee loꞌꞌoba. He qaalay ha hiraagay polettanaagaa ammanettanaadan oottees. Yihooway xayssana gakkanaassi ha iita alamee yaa iiti iiti baanaagee qoncce. Asaa kanddoy keehi moorettiyo wode issi issi deretettay woy kawotettay kunddidoogaa taarikiyaa eranchati yootoosona. Gidoppe attin, alamiyan ubbasan asaa kanddoy ha wodiyaagaa keena mooretti erenna. Ha ubbabay haniyo gaasuwaa daro asay xaasayi xeellana danddayees; shin 1914ppe haa simmin haniya dummabay Xoossaa Kawotettay mata wode iitatettaa ubbaa xayssanaagaa nuuni ammanettanaadan oottana koshshees.

HA YELETAY HAYQQIICHENNA

14-16. Xoossaa Kawotettay mata wode ‘yaanaagaa’ nuuni ammananaadan oottiya heezzantto gaasoy aybee?

¹⁴ Xoossaa asaa taarikee alamee xayiyo wodee matidoogaa nuuni ammanaadan oottiya heezzantto gaasuwaa qonccissees. Leemisuwau, Xoossaa kawotettay saluwan eqqanaappe kase, ayyaanan tiyettida ammanettida amaridaageeti Xoossau minnidi haggaaziiddi takkidosona. Eti 1914n hanana giidi naagidobaappe amaridaagee polettennan attido wode, waatidonaa? Etappe daroti metoynne yedetay deꞌishinkka ammanettidaageeta gididi Yihoowau haggaaziyoogaa aggibookkona. Hegaappe haa simmin deꞌiya daro layttan, he tiyettidaageeta ubbaa gidana xayikkokka etappe daroti hayqqana gakkanaassi ammanettidi deꞌidosona.

¹⁵ Yesuusi wodiyaa wurssettaabaa yootido hiraagan, “Ha ubbabai hanana gakkanaassi, ha wodiyaa asai [“yeletay,” NW] haiqqiichchenna” yaagiis. (Maatiyoosa 24:33-35 nabbaba.) Yesuusi ‘ha yeletaa’ yaagidoogeetu giddon ayyaanan tiyettida naaꞌꞌu cita Kiristtaaneti deꞌiyoogaa akeekoos. Koyro citay 1914n giigi uttiis; qassi eti Kiristtoosi he layttan qonccidoogaa bessiya malaataa sohuwaara akeekidosona. He citan deꞌiyaageeti 1914n paxa deꞌiyoogaa xalla gidennan, he layttaappe kase woy he laytti Xoossaa ayyaanan tiyettidi a naata gididosona.—Roo. 8:14-17.

¹⁶ ‘Ha yeletaappe’ naaꞌꞌantto citay koyro citan deꞌiyaageetuura issi wode deꞌidaageeta; etikka ayyaanan tiyettidosona. Eti koyro citan deꞌiyaageetuura issi wode deꞌiyoogaa xalla gidennan, koyro citan deꞌiyaageeti saꞌan deꞌiyo wode geeshsha ayyaanan tiyettidosona. Yaatiyo gishshau, Yesuusi ‘ha yeletaa’ giidoogeetu giddon deꞌiyaageeti ha wodiyan deꞌiya, ayyaanan tiyettida ubbata gidokkona. Naaꞌꞌantto citan deꞌiyaageetikka ha wodiyan cimidosona. SHin Yesuusi yootido Maatiyoosa 24:34n deꞌiya qofay iita waayee doommanaappe kase ‘ha yeletaappe’ amaridaageeti hayqqennaagaa nuuni ammanettanaadan oottees. Hegee nuuni Xoossaa Kawotettaa Kawoy iitata xayssidi nuna xillotettay kumido ooratta alamiyaa gelissanau attida wodee keehi guutta gidiyoogaa mintti ammanaadan oottana koshshees.—2 PHe. 3:13.

KIRISTTOOSI MATAN MULEERA XOONANA

17. Nuuni xannaꞌido heezzu naqaashay ay akeekanaadan maaddii?

¹⁷ Nuuni xannaꞌido Geeshsha Maxaafaa hiraagati ha wodiyan waani polettiiddi deꞌiyaakko akeekadii? Nuuni gallassaanne saatiyaa erennaagaa Yesuusi yootiis. (Maa. 24:36; 25:13) SHin PHauloosi yootidoogaadan nuuni “wodiyaa,” hegeekka wurssetta gallassaa eroos. (Roome 13:11 nabbaba.) Nuuni he wodiyan deꞌoos. Nuuni Geeshsha Maxaafaa hiraagaa, qassi Xoossaa Yihoowaynne Yesuus Kiristtoosi oottiiddi deꞌiyoobaa wozanan wottikko, alamee xayanau keehi matido wodiyan deꞌiyoogaa qonccissiya naqaashaa akeekanau metootokko.

18. Xoossaa Kawotettau haarettennaageeti waananee?

¹⁸ Bootta paraa toggida, gita maatay deꞌiyo Yesuus Kiristtoosau haarettennan ixxiyaageeti, bantta mooruwaa mata wode erana. Eti bantta bolli gakkana pirddaappe kessi ekkokkona. He wode daro asay yayyidi, “Danddayanai oonee?” yaagana. (Ajj. 6:15-17) SHin, Ajjuutaa maxaafan kaallidi deꞌiya shemppuwan he oyshaa zaaroy deꞌees. Tiyettidaageetinne saꞌaa laattiyo hidootay deꞌiyoogeeti Xoossay maaddin he gallassi ‘danddayidi’ attana. Hara dorssatu yara gidida ‘zaway baynna daro asay’ he wode iita waayiyaappe attana.—Ajj. 7:9, 13-15.

19. Neeni ha alamee xayanau matidoogaa ammanaasa; yaatin ay demmanau hidootan naagay?

¹⁹ Nuuni Geeshsha Maxaafaa hiraagay ha wodiyan polettiyoogaa wozanan wottikko, Seexaanaa alamee nu qofay shaahettanaadan oottenna. Qassi ha alamiyan haniyaabay aybissi haniyaakko akeekanau metootokko. Kiristtoosi mata wode wurssetta olaa xillotettan olettidi Xoossau azazettenna asaa xayssiyoogan muleera xoonana. (Ajj. 19:11, 19-21) Nuuni hegaappe simmin ay keena ufayttanaakko qoppa!—Ajj. 20:1-3, 6; 21:3, 4.