WOOSAA

4 Ay Xeelliyaagan?

YESUUSI tamaarissido leemiso woosay Kiristtaaneti woossiyo woosa ubbaappe aaruwan zaaretti zaarettidi woossiyooba geetettiis. Hegee tuma gidin aggin, issi issitoo Godaa Woosaa woykko Nu Aawau geetettiya ha woosaa daro asay bala ogiyan akeekiyoogee tuma. Miilooniyan qoodettiya asay galla galla woy gallassaa giddon darotoo gidana danddayees, he woosaa coo mela biddees. SHin Yesuusi he woosaa asay hegaadan goꞌettanaadan halchibeenna. Hegaa waatidi eriyoo?

He woosaa yootanaappe kasetidi Yesuusi, “Xoossaa intte woossiyo wode, . . . mela biddoppite” yaagiis. (Maa. 6:7) Hegaa gi simmidi, hassayidi zaaretti zaaretti woossanabaa yootiyoogan Yesuusi ba giidobaa phalqqii? Hegaadan gidennaagee qoncce! Hegaappe, Yesuusi nuuni woossanabaa tamaarissiis; qassi nuuni woossiyo wode hassayana koshshiya kaseyiyoobaa yootiis. I giidobaa ane akeekan beꞌoos. He woosay Maatiyoosa 6:9-13n deꞌees.

Yesuusi tamaarissido leemiso woosaa qanttan qonccissido ha qofay, nuuni woossana danddayiyo ubba allaalliyaa yootenna. Koyro Yohaannisa 5:14y Xoossaa xeelliyaagan, “Xoossai koyiyoogaadan, ainne nuuni a woossikko, i siyiyoogaa” yootiyoogaa akeeka. Hegaa gishshau, Xoossaakko woossana koshshennaagaa keena ne metoy laafa gaada hirggoppa.—1 PHe. 5:7.

Siriyan kumida ha alamiyan, daroti woosay goꞌꞌiishsha giidi qoppoosona. Neenikka, ‘Xoossay ta woosaa siyidi zaaranee?’ gaada oychana danddayaasa.

“Saluwan de7⁠iya nu Aawau, ne geeshsha sunttai anjjetto.”

Yesuusi hegaadan giyoogan woosa ubbaa ba Aawaa, Yihoowakko woossana koshshiyoogaa bana kaalliyaageeta akeekissiis. SHin, Xoossaa sunttay keehippe koshshiyaaba gididoynne geeyana koshshidoy aybissakko eray?

Asaa naatu taarikee doommoosappe, Xoossaa geeshsha sunttay moorettiis. Xoossaa morkkee, Seexaanay Yihoowa worddancha, Ba medhidobaa ayssanau bessenna, ba xallaa siiqiyoogan Haariyaagaa yaagiis. (Doo. 3:1-6) Daroti Xoossay qarettennaagaa, meqetti baynnaagaa, halo kessiyaagaa giidi tamaarissiyoogan woykko I Medhidaagaa gidiyoogaa kaddiyoogan Seexaanaa qofaa maayidosona. Harati Yihoowa giya sunttaa Geeshsha Maxaafaa birshshettatuppe kessiyoogaaninne he sunttan goꞌettennaadan diggiyoogan a sunttaa mooridosona.

Bessenna ha ubbabaa Xoossay giigissanaagaa Geeshsha Maxaafay qonccissees. (Hiz. 39:7) Hegaadan oottiyoogan, i neeyyo koshshiya ubbabaa kunttana; qassi ne metuwaa ubbaa giigissana. Hegaa i waatidi oottanee? Yesuusa woosan kaallidi deꞌiya qofay hegaa zaaruwaa yootees.

“Ne kawotettai yo.”

Ha wodiyan, haymaanootiyaa asttamaareti Xoossaa Kawotettaa xeelliyaagan kirqqi gaanaadan oottiya darobaa tamaarissoosona. SHin Yesuusi giyoobaa ezggiyaageeti eriyoogaadan, Masee, Xoossay doorido Ashshiyaagee alamiyaa laammiya Kawotettan haaranaagaa, Xoossay kiittin hananabaa yootiyaageeti daro wodeppe kase yootidosona. (Isi. 9:6, 7; Dane. 2:44) He Kawotettay Seexaanaa worddoy qonccanaadan oottiyoogan, qassi anne a oosuwaa ubbaa xayssiyoogan Xoossaa sunttaa geeshshana. Xoossaa Kawotettay olaa, harggiyaa, koshaa—ubba hayquwaakka xayssana. (Maz. 46:9; 72:12-16; Isi. 25:8; 33:24) Neeni Xoossaa Kawotettay yaanaadan woossiyo wode, he hidootay ubbay polettanaadan woossaasa.

“Ne shenee saluwan hanidoogaadan, sa7ankka hano.”

Xoossaa shenee i deꞌiyo saluwan polettiiddi deꞌiyoogaadan saꞌankka polettanaagaa Yesuusi giidobay bessees. Xoossaa shenee saluwan polettennaadan teqqiyaabi baynnaagee qoncciis; saluwan Xoossaa Naꞌay Seexaanaanne a yametu bolli olaa denttidi, eta duge saꞌau oliis. (Ajj. 12:9-12) Leemiso woosan ha heezzantto qofay, koyro naaꞌꞌatuugaadan keehippe koshshiya allaalliyan, giishin nu sheniyan gidennan, Xoossaa sheniyan nu xeelaa wottanaadan maaddees. A shenee ubbatoo mereta ubbau keehi loꞌꞌobaa ehees. Yaatiyo gishshau, polo asa gidida Yesuusikka, ba Aawaayyo, “Neeni koyiyoobai hanoppe attin, taani koyiyoobai hanoppo” yaagiis.—Luq. 22:42.

“Koshshiya qumaa nuuyyo hachchi imma.”

Hegaappe simmidi, Yesuusi nuna koshshiyaabau woossana danddayiyoogaakka yootiis. Nuussi galla galla koshshiyaabau Xoossaa woossiyoogee bala gidenna. Hegaadan oottiyoogee, “de7⁠uwaa shemppuwaanne ubbabaa asa ubbaassi” immiyaagee Yihoowa gidiyoogaa nuuni hassayanaadan oottees. (Oos. 17:25) I ba naatussi koshshiyaabaa kunttiyoogan ufayttiya, siiqiya Aawa gidiyoogaa Geeshsha Maxaafay qonccissees. Gidoppe attin, loꞌꞌo aawaagaadan, i banttana goꞌꞌennabaa eti oychiyo wode immenna.

“Nu naaquwaa atto ga.”

Neeni Xoossaa naaqqidobi tumuppe deꞌii? Neeyyo a maarotay koshshii? Ha wodiyan daroti nagaray aybakko, qassi hegee keehi iitaba gidiyoogaa akeekokkona. SHin, nagaray asaa naati hayqqanaadan oottiya waannaba gidiyo gishshau, nuna gakkiya iita waayiyau gaaso gidiyoogaa Geeshsha Maxaafay yootees. Nagarancha gididi yelettido gishshau, nuuni ubbay darotoo nagaraa oottoos; qassi nuuyyo merinaa hidootay deꞌiyoy Xoossay nuuyyo atto giyoogaa xallaana. (Roo. 3:23; 5:12; 6:23) Geeshsha Maxaafay, “Abeet Godau, neeni kehanne atto giyaagaa” yaagiyoogaa eriyoogee woppissees.—Maz. 86:5.

‘Nuna iitaappe ashsha.’

Xoossaa naagoy neeyyo eesuwaaninne keehippe koshshiyoogaa akeekadii? Daroti ‘iitay,’ Seexaanay deꞌiyoogaakka ammanokkona. SHin, Yesuusi Seexaanaa ubba ‘ha saꞌaa haariyaagaa’ yaagiyoogan, i deꞌiyoogaa tamaarissiis. (Yoh. 12:31; 16:11) Seexaanay ba haariyo alamiyaa mooriis; qassi ne Aawaa, Yihoowaara mata dabbotaa minttennaadan digganau, nenakka mooranau keehippe koyees. (1 PHe. 5:8) Gidikkokka, Yihooway Seexaanaappe keehi wolqqaama; qassi Bana siiqiyaageeta naagiyoogan ufayttees.