Waati Woossanee?—Nuuni Woossana Bessiyoy Godaa Woosa Xallee?
Geeshsha Maxaafay yootiyoobaa
Godaa Woosay, nuuni waati woossanaakkonne aybaa xeelliyaagan woossanaakko eranawu maaddiya kaaletuwaa yootees. Yesuusi I erissiyo ashkkarati, “Godau, . . . nuuni woigi woossanaakko, nuna tamaarissa” gi oychchido wode he woosaa yootiis. (Luqaasa 11:1) Gidikkonne, Xoossay siyiyo woosay Godaa Woosaa, woy Nu Aawawu giyo woosaa xalla gidenna.a SHin Xoossay siyiyo woosay ay malakko tamaarissanawu Yesuusi hegaa yootiis.
Ha huuphe yohuwan beꞌanabata:
Godaa Woosay woygii?
Maatiyoosa 6:9-13n deꞌiya Godaa Woosay daro Geeshsha Maxaafaa birshshettatun dumma dumma ogiyan xaafettiis. Naaꞌꞌu leemisota beꞌa.
Ooratta Alamiyaa Birshshettaa: “Saluwan deꞌiya nu Aawawu, ne sunttay geeyo. Ne Kawotettay yo. Ne shenee saluwan hanidoogaadan saꞌankka hano. Hachchi nuussi koshshiya qumaa hachchi imma. Nuuni nuna naaqqidaageetuyyo atto giyoogaadan, neenikka nu naaquwaa atto ga. Nuna iitaappe ashshappe attin, paaciyan gelissoppa.”
Wolayttatto Geeshsha Maxaafaa: “Saluwan de7iya nu Aawau, ne geeshsha sunttai anjjetto. Ne kawotettai yo; ne shenee saluwan hanidoogaadan, sa7ankka hano. Hachchi hachchi koshshiya qumaa nuuyyo hachchi imma. Nuuni nuna naaqqidaageetuyyo atto giyoogaadan, neenikka nu naaquwaa atto ga. Nuna iitabaappe ashshanaappe attin, paacen gelissoppa.” b
Godaa Woosaa birshshettay aybee?
Yesuusi tamaarissidobay Geeshsha Maxaafan deꞌiya hara xiqisetuura maayettees; hegaa gishshawu, Godaa Woosaa birshshettaa eranawu hara xiqiseti maaddana danddayoosona.
“Saluwan deꞌiya nu Aawawu”
Xoossay nuna medhdhido gishshawunne nuuyyo deꞌuwaa immido gishshawu, “nu Aawawu” giidi A xeesiyoogee bessiyaaba.—Isiyaasa 64:8.
“Ne sunttay geeyo”
Yihoowa giyo Xoossaa sunttaa nuuni bonchchananne geeshshabadan xeellana koshshees. Asay Xoossaa eeshshatubaanne A halchchuwaabaa haratussi yootiyo wode, Xoossaa sunttay geeyanaadan oottees.—Mazamure 83:18; Isiyaasa 6:3.
“Ne Kawotettay yo”
Xoossaa Kawotettay Yesuusi Kawo gidido, saluwan deꞌiya kawotetta. Ha kawotettay saꞌa ubbaa haarana mala nuuni woossanaadan Yesuusi tamaarissiis.—Daaneela 2:44; Ajjuutaa 11:15.
“Ne shenee saluwan hanidoogaadan saꞌankka hano”
Saluwan iitatettay woy hayqoy baynnaagaadan, saꞌaanikka asay merinawu sarotettaaninne ufayssan deꞌanaadan Xoossay koyees.—Mazamure 37:11, 29.
“Hachchi nuussi koshshiya qumaa hachchi imma”
Nuussi qumaanne deꞌuwawu koshshiya harabata, Medhdhidaagee nuussi immiyoogaa hassayana koshshees.—Oosuwaa 17:24, 25.
“Nuuni nuna naaqqidaageetuyyo atto giyoogaadan, neenikka nu naaquwaa atto ga”
Asa ubbay nagaraa oottiyo gishshawu, maarotay koshshees. Xoossay nuussi atto gaanaadan koyikko, nuuni haratu naaquwaa atto gaana koshshees.—Maatiyoosa 6:14, 15.
“Nuna iitaappe ashshappe attin, paaciyan gelissoppa”
Xoossaa Yihooway iitabaa oottanaadan nuna paaccenna. (Yaaqooba 1:13) SHin ‘iita’ gidida Seexaanaa Dabloosi nuna paaccees; qassi I “paacciyaagaa” geetettiis. (1 Yohaannisa 5:19; Maatiyoosa 4:1-4, NW) Nuuni balabaa oottanaadan paacettiyo wode, Yihoowawu azazettidi deꞌanaadan maaddana mala A oychchoos.
Nuuni ubbatoo Godaa Woosa xallaa zaaretti zaarettidi woossana koshshii?
Godaa Woosaa Yesuusi leemisodan yootiis. Hegaa nuuni ubbatoo zaarettana koshshenna. Yesuusi Godaa Woosaa tamaarissanaappe guuttaa kasetidi hagaadan giis: “Intte woossiyo wode, . . . mela [issibaa zaari zaaridi] biddoppite.” (Maatiyoosa 6:7) Waati woossanaakko I tamaarissido hara wode, hegaappe dummatiya qaalaa goꞌettiis.—Luqaasa 11:2-4.
Nuuni qoppiyoobaanne nuussi siyettiyaabaa Xoossawu wozanappe yootana koshshees.—Mazamure 62:8.
Nuuni waati woossana koshshii?
Godaa Woosay nuuni Xoossay siyiyo ogiyan waati woossanaakko tamaarissees. Hegee woosaabaa yootiya hara xiqisetuura waani maayettiyaakko akeeka.
Xoossaa xallaa woossa
Xiqisiyaa: “Xoossaa intte woossiyo woosa ubban a keehi galatiiddi, inttena koshshiyaabaa ubbau [woossite].”—Piliphphisiyuusa 4:6.
Hegee woygiyoogee? Nuuni Yesuusa, Mayraamo, woy geeshshata gidennan, Xoossa xallaa woossana koshshees. Godaa Woosaa doomettan, “Nu Aawawu” giyaagee nuuni Xoossaa Yihoowa xallaa woossana koshshiyoogaa qonccissees.
Xoossaa sheniyaara maayettiyaaba xallaa woossa
Xiqisiyaa: “Xoossai koyiyoogaadan, ainne nuuni a woossikko, i [siyees].”—1 Yohaannisa 5:14.
Hegee woygiyoogee? Nuuni Xoossaa sheniyaara maayettiya aybanne woossana danddayoos. Godaa Woosan Yesuusi, ‘ne shenee hano’ giidi woossanaadan tamaarissiyoogan, Xoossaa sheniyaa xeelliyaagan woossiyoogee keehi koshshiyaaba gidiyoogaa tamaarissiis. Nuuni Geeshsha Maxaafaa xannaꞌiyoogan, Xoossay saꞌawunne asawu halchchidobaa erana danddayoos.
Nena qofissidabaa xeelliyaagan woossa
Xiqisiyaa: “Ne toohuwaa Xoossan wotta; i nena zemppissana.”—Mazamure 55:22.
Hegee woygiyoogee? Xoossi nuussi qoppees. Godaa Woosan Yesuusi nuussi koshshiya dumma dummabata woossanaadan tamaarissidoogaadan, nuuni galla galla deꞌuwawu koshshiyaabaa immanaadan, gitabaa kuuyiyo wode kaalettanaadan, metuwaa wode maaddanaadaaninne nu nagaraa atto gaanaadan woossana danddayoos.c
a Leemisuwawu, Yesuusinne I erissiyo ashkkarati, Godaa Woosan odettidabatu xallaa gidennan harabatakka woossidosona.—Luqaasa 23:34; Piliphphisiyuusa 1:9.
b Wolayttatto Geeshsha Maxaafay Godaa Woosaa wurssettan hagaadan gees: “Kawotettai, wolqqainne bonchchoi merinaukka neessa. Amin77i.” Xoossaa sabbiyo ha qonccissoy amarida Geeshsha Maxaafaa birshshettatun deꞌees. SHin, Zi Jirom Bayblikal Kommenttary giyo xuufee qonccissiyoogaadan, he qonccissoy “ammanttiya [duuqqi xaafido] beni xuufetuppe daruwan baawa.”
c Yihooway atto gaanaadan koyiyaageeti, bantta mooridobaa gaasuwan woossanawu metootana danddayoosona. SHin Yihooway hegaa mala asata, “ane zorettoos” giidi shoobbees. (Isiyaasa 1:18) Yihooway atto gaanaadan wozanappe koyiya oonanne ixxenna.