Kumetta Wozanan Xillotettaa Siiqite

“Neeni xillotettaa siiqaasa.”—MAZ. 45:7.

1. ‘Xillotettaa ogiyaa’ kaallanau nuna aybi maaddanee?

YIHOOWAY ba Qaalaa baggaaranne ba geeshsha ayyaanan ba asaa “xillotettaa ogiyan kaalettees.” (Maz. 23:3) Gidikkokka, nuuni polo asa gidenna gishshau, nu wozanay he ogiyaappe wora simmanau qaaqqatees. Hegaa aggidi suurebaa oottanau minnidi baaxetana koshshees. Suure ogiyan baanau nuna aybi maaddanee? Yesuusaagaadan, nuuni xillobaa oottiyoogaa siiqana bessees.—Mazamure 45:7 nabbaba.

2. ‘Xillotettaa ogee’ aybee?

² ‘Xillotettaa ogee’ aybee? Ha sohuwan oge geetettidaagee loosso. He ogee baasettidoy Yihooway kessido xillotettaa maaraana. “Xillotettay” Ibraysxxenne Giriiketto qaalan kandduwaa maaraa mintti kaalliyoogaa qonccissiya “suuretettaa” malaatees. Yihooway “xillotettay merinau deꞌiyo soho” gidiyo gishshau, kaallana koshshiya, kandduwaaban suure ogiyaa shaakki eranau ayyo goynniyaageeti ufayssan akko xeelloosona.—Erm. 50:7, NW.

3. Nuuni Xoossaa xillotettaabaa kaseegaappe aaruwan tamaarana danddayiyoy ayba ogiyaanee?

³ Nuuni Xoossaa keehippe ufayssana danddayiyoy, i kessido xillotettaa maaraara moggidi deꞌanau nu kumetta wozanaappe baaxetiyoogaa xalaalaana. (Zaa. 32:4) Hegaa doommiyoy, Xoossaa Yihoowabaa a Qaalaa, Geeshsha Maxaafaappe nuuni danddayiyo ubbabaa tamaariyoogaana. Nuuni kaseegaappe aaruwan abaa tamaariyo wode, galla galla akko matatti matatti boos; kaseegaappe aaruwan a xillotettaa siiqoos. (Yaaq. 4:8) Nu deꞌuwan keehippe koshshiya kuushshaa kuuyana bessiyo wode, ayyaanaa kaaletuwan xaafettida Xoossaa Qaalay yootiyoobaakka kaallana bessees.

Xoossaa Xillotettaa Koyite

4. Xoossaa xillotettaa koyiyoogee ay gujjii?

⁴ Maatiyoosa 6:33 nabbaba. Xoossaa xillotettaa koyiyoogee, nuuni Kawotettaa mishiraachuwaa sabbakiyoogan wodiyaa aattiyoogaappe aadhiyaaba gujjees. Nu haggaazoy Yihoowa ufayssiyaagaa gidanaadan, nu eeshshay i kessido xoqqa maaraara ubbatoo moggiyaagaa gidana bessees. Yihoowa xillotettaa koyiyaageeti ubbay ay oottana bessii? Eti “tumu xillotettaaninne geeshshatettan Xoossaa leemisuwan merettida ooratta asatettaa” maayana bessees.—Efi. 4:24.

5. Hidootaa qanxxanaadan oottiyaabaa xoonanau nuna aybi maaddii?

⁵ Nuuni balabaa oottiyo gishshau, Xoossaa xillotettaa maaraadan deꞌanau baaxetiyo wode, issi issitoo hidootaa qanxxana danddayoos. Hitissiya hidootaa qanxxiyoogaa xoonanau, qassi xillotettaa siiqiyoogaanne xillobaa oottiyoogaa tamaaranau nuna aybi maaddana danddayii? (Lee. 24:10) Nuuni “suure wozanaara, tumu ammanuwaara” ubbatoo Yihoowakko woossana bessees. (Ibr. 10:19-22) Nuuni ayyaanan tiyettida Kiristtaaneta gidin, saꞌan deꞌiyo hidootay deꞌiyoogeeta gidin, Yesuus Kiristtoosa wozuwaa yarshshuwaaninne i Qeese Ubbatu Halaqa gididi oottiyooban ammaniyoogaa oosuwan bessoos. (Roo. 5:8; Ibr. 4:14-16) Kiitettida Yohaannisi, “Yesuus Kiristtoosa suuttai nagara ubbaappe nuna ashshees” yaagidi xaafiis. (1 Yoh.1:6, 7) Geeshsha Maxaafay nu “nagarai baaraadan zo77ikkokka, shachchaadan booxxana” yaagees. Yihooway ba alꞌꞌo Naꞌaa wozuwaa yarshshuwaa baggaara keehi maalaaliyaaba nuussi giigissiis!—Isi. 1:18.

Ayyaanaaban Intte Ola Miishshaa Akeekan Xeellite

6. Ayyaanaaban nu ola miishshaa akeekan xeelliyoogee keehippe koshshiyoy aybissee?

⁶ “Tiran wottiyo ola miishshadan xillotettaa” maayiyoogee, Xoossay immiyo ayyaanaabaa ola miishshan keehi koshshiyaaba gidiyo gishshau, ubbatoo nuuni a maayana bessees. (Efi. 6:11, 14) Nuuni mata wode nu huuphiyaa Yihoowayyo geppidaageeta gidin woy daro layttau au haggaaziiddi takkidaageeta gidin, ayyaanaaban nu ola miishshaa ubbatoo akeekan xeelliyoogee keehippe koshshiyaaba. Aybissi giikko, Dabloosinne daydanttati saluwaappe duge saꞌau olettido gishshataassa. (Ajj. 12:7-12) Seexaanay yiillotiis; qassi baayyo attida wodee guutta gidiyoogaa erees. Yaatiyo gishshau, Xoossaa asaa bolli qohuwaa darissiis. “Tiran wottiyo ola miishshadan xillotettaa” maayiyoogee keehippe koshshiyoogaa akeekiyoo?

7. “Tiran wottiyo ola miishshadan xillotettaa” maayiyoogee nuussi koshshiyoogaa akeekikko, hegaa ayba ogiyan bessiyoo?

⁷ Tiran wottiyo ola miishshay wozanaa naagees. Nuuni polo asa gidenna gishshau, nu leemiso wozanay cimmanaunne iitabaa oottanau kajjeelees. (Erm. 17:9) Nu wozanay iitabaa oottanau koyiyo gishshau, a loohissiyoogeenne seeriyoogee keehippe koshshiyaaba. (Doo. 8:21) “Tiran wottiyo ola miishshadan xillotettaa” maayiyoogee nuussi koshshiyoogaa akeekikko, Xoossay ixxiyooban wodiyaa aattanau koyiyoogan guutta wodiyau he maayidobaa qaari wottokko; woykko iitabaa oottanau amottokko. Daro saatiyau televizhiiniyaa xeelliyoogan alꞌꞌo wodiyaa coo xayssokko. Hegaappe, Yihoowa ufayssiyaabaa oottanau ubbatoo baaxetoos. Nuuni guutta wodiyau nagarancha ashuwaa amuwan kunddikkokka, Yihoowa maaduwan denddana.—Leemiso 24:16 nabbaba.

8. ‘Gita gonddalle mala gidida ammanoy’ nuuyyo koshshiyoy aybissee?

⁸ Ayyaanaabaa ola miishshatuppe issoy, ‘gita gonddalle mala gidida ammanuwaa.’ Hegee “xalahe halaqai dafidi yeddiyo wonddafiyaa tama ubbaa toissanau” nuna maaddees. (Efi. 6:16) Ammanoynne Yihoowa kumetta wozanappe siiqiyoogee, nuuni xillobaa oottanaadaaninne ubbatoo merinaa deꞌuwaa ogiyan hemettanaadan maaddees. Kaseegaappe aaruwan Yihoowa siiqiyo wode, a xillotettaa kaseegaappe aaruwan xoqqu oottidi xeelloos. Nu zoriya wozanaa xeelliyaagan shin? Nuuni xillotettaa siiqanau baaxetiyo wode i waatidi maaddii?

Loꞌꞌo Zoriya Wozanaa Naagidi Deꞌite

9. Loꞌꞌo zoriya wozanaa naagidi deꞌiyoogan nuuni waanidi goꞌettiyoo?

⁹ Nuuni xammaqettido wode, ‘loꞌꞌo zoriya wozanay’ deꞌanaadan Yihoowakko woossida. (1 PHe. 3:21) Yesuusa wozuwan ammaniyoogaa nuuni oosuwan bessiyo gishshau, a suuttay nu nagaraa kammees; hegaappe denddidaagan Xoossaa sinttan xillo gidoos. SHin Xoossaa sinttan xillo gididi deꞌanau loꞌꞌo zoriya wozanaa naagidi deꞌanau koshshees. Issi issitoo nu zoriya wozanay qumꞌꞌiyo wodenne akeekissiyo wode, suure oottiiddi deꞌiyo gishshau Xoossaa galatana koshshees. Nu zoriya wozanay hegaadan haniyoogee, Yihoowa xillotettaa ogiyaara gayttidaagan donjjillibeennaagaa bessees. (1 Xim. 4:2) SHin zoriya wozanay xillotettaa siiqanau koyiyaageeta hara ogiyankka maaddana danddayees.

10, 11. (a) Geeshsha Maxaafaa maaran loohida nu zoriya wozanay giyoobaa siyana koshshiyoy aybissakko qonccissiya temokruwaa yootite. (b) Xillotettaa siiqiyoogee nuuni keehi ufayttanaadan oottana danddayiyoy aybissee?

¹⁰ Balabaa oottiyo wode nu zoriya wozanay nuna qumꞌꞌana danddayees. Issi yelagay ‘xillotettaa ogiyaappe’ wora simmiis. Yaatin, pornograafiyaa beꞌiyoogee ayyo amale gidiis; qassi maariwaana giyo jallissiyaabaa sijaaradan uyiyoogaa doommiis. I gubaaꞌiyaa shiiquwaa biyo wode, bana mooranchadan xeellees; qassi haggaazuwan shaahettiyo wode bana loꞌꞌo milatiya iita asadan xeellees; yaatiyo gishshau, he ayyaanaabaa oosotun shaahettiyoogaa aggibayiis. I, “Taani oottidobau ta zoriya wozanay mootanaagaa erabeykke” yaagiis. Gujjidikka, “Oyddu layttau hegaa mala eeyyatetta oosuwaa oottaydda deꞌaas” yaagiis. Hegaappe simmin tumaa ogiyau simmanau qoppiyoogaa doommiis. I ba woosaa Yihooway siyennabadan qoppidaba gidikkokka woossiis; qassi baayyo atto gaanaadan a oychiis. Hegaappe simmin tammu daqiiqa kumennan a aayyiyaa a oychanau yaada, i shiiquwan beettiyoogaa doommanaadan minttettaasu. I shiiquwau Kawotettaa Addaraashaa biidi, issi cimay bana xannaꞌissanaadan oychiis. Guyyeppe xammaqettiis; qassi ba shemppuwaa ashshido gishshau Yihoowa galatees.

¹¹ Xillobaa oottiyoogan keehippe ufayttana danddayiyoogaa akeekibookkonii? Nuuni xillotettaa siiqiyoogaa tamaaridi, kaseegaappe aaruwan hegaa oosuwan peeshshiyo wode, saluwan deꞌiya nu Aawaa ufayssiyaabaa oottiyoogan keehi ufayttoos. Ane hagaa qoppite! Ubba asaa zoriya wozanan qumꞌꞌiyaabi mule deꞌenna, eti polo hanotan Xoossaa leemisuwaa qonccissiyo wodee yiiddi deꞌees. Yaatiyo gishshau, haꞌꞌi xillotettaa wozanappe siiqiyaageetanne Yihoowa ufayssiyaageeta gidoos.—Lee. 23:15, 16.

12, 13. Nu zoriya wozanaa waatidi loohissana danddayiyoo?

¹² Nu zoriya wozanaa loohissanau ay oottana danddayiyoo? Nuuni Geeshsha Maxaafaanne an baasettida xuufeta xannaꞌiyo wode, “xillo asi haasayanaappe kasetidi qoppees” giyaagaa akeekiyoogee keehippe koshshees. (Lee. 15:28) Oosuwaara gayttidaagan kuuyana bessiyaabay merettiyo wode hegee waatidi goꞌꞌiyaakko qoppite. Issi oosoy Geeshsha Maxaafay yootiyoobaara moggennaagee qoncce gidikko, nuuppe daroti ammanettida wozannaama ashkkaray giigissido kaaletuwaa kaalloos. SHin, issi oosuwaara gayttida oyshau zaaroy qoncce gidana xayikko, hegau haniya Geeshsha Maxaafaa baaso siraataa akeekana, qoppananne hegaa xeelliyaagan woossana koshshees.a Haratu zoriya wozanaa qohennaadan naagettana koshshiyoogaara gayttida baaso siraatata xeelliyaagankka hegaadan oottana bessees. (1 Qor. 10:31-33) Nuuyyo Yihoowaara deꞌiya dabbotaara gayttida baaso siraataa aybippenne aaruwan qoppana koshshees. Yihooway nuuyyo qoncci beettikko, koyruwan, ‘Taani ha oosuwaa oottikko Yihoowa lanccissiyaanaa, qassi i seelettanaadan oottiyaanaa?’ yaagidi nuna oychana koshshees.—Maz. 78:40, 41.

¹³ Wochiyo Keelaa Xinaatiyau woykko Gubaaꞌiyaa Geeshsha Maxaafaa Xinaatiyau giigettiyo wode, nuuni xannaꞌiyoobaa wotti dentti qoppana koshshiyoogaa hassayana bessees. Ubbatoo oyshaa zaaruwaa sohuwaara malaatidi kaalliya menttuwau pinniyoo? Hegaadan xannaꞌiyoogee nuuni xillotettaa mintti siiqanaadan woy loꞌꞌo zoriya wozanay nuuyyo deꞌanaadan oottennan aggana danddayees. Nuuni xillotettaa siiqiyaageeta gidanau, minttidi xannaꞌananne Xoossaa Qaalaappe nabbabidoban wotti dentti qoppana koshshees. Nu kumetta wozanan xillotettaa siiqiyoogaa tamaaranau baaxetana koshshees!

Xillotettaa Namisettitenne Saamettite

14. Xoossaa Yihoowaynne Yesuus Kiristtoosi nuuni geeshsha oosuwaa oottiyo wode waananaadan koyiyoonaa?

¹⁴ Xoossaa Yihoowaynne Yesuus Kiristtoosi nuuni geeshsha oosuwaa oottiyo wode ufayttanaadan koyoosona. Nuuni ufayttanaadan oottiyaabay aybee? Xillotettaa siiqiyoogaa. Yesuusi Deriyaa Bolla Timirttiyan, “Namisettiyaageetinne saamettiyaageeti kattaa haattaa koyiyoogaadan, xillobaa oottanau laamotiyaageeti anjjettidaageeta; aissi giikko, Xoossai eta kalissana” yaagiis. (Maa. 5:6) Xillotettaa siiqanau koyiyaageetuyyo ha qofay keehippe koshshiyoy aybissee?

15, 16. Ayyaanaaban namisettiyaageeti kallananne saamuwaa alana danddayiyo ogeti awugeetee?

¹⁵ Nuuni deꞌiyo alamiyaa haariyaagee iitaa, xalahe halaqaa. (1 Yoh. 5:19) Awu biitta gaazeexaaninne gidin, iitatettaynne makkalay keehippe daridoogaa yootiyaabaa nabbaboos. Asay asaayyo meqettaa iitiyoogee xillo asay qoppanaukka metiyaaba. (Era. 8:9) Nuuni Yihoowa siiqiyaageeta gidiyoogaadan, xillotettaa tamaaranau koyiya, ayyaanaaban namisettiyaageetinne saamettiyaageeti kallanaadan oottana danddayiyay a xalaala gidiyoogaa eroos. Xoossaa ufayssennaageeti mata wode xayana; qassi higgiyau azazettennaageetu gaasuwaaninne eta iita oosuwaa gaasuwan gakkiya metoy xillotettaa siiqiyaageeta gakkenna. (2 PHe. 2:7, 8) Hegee ayba woppissiyaaba gidanee!

¹⁶ Nuuni Yihoowayyo oottiyaageetanne Yesuus Kiristtoosa kaalliyaageeta gidiyoogaadan, xillotettaa namisettiyaageetanne saamettiyaageeta ‘Xoossay kalissanaagaa’ eroos. Xoossay giigissido, ‘xilloy deꞌana’ ooratta saluwaaninne ooratta saꞌan eti kumetta hanotan kallana. (2 PHe. 3:13) Yaatiyo gishshau, huqqunnaynne makkalay Seexaanaa alamiyan xillotettaa xayssidoogan nuuni hidootaa qanxxana woykko maalaalettana koshshenna. (Era. 5:8) Ubbaappe Xoqqiya Yihooway hanettiyaabaa erees; qassi xillotettaa siiqiyaageeta i mata wode ashshana.

Xillotettaa Siiqiyoogan Goꞌettite

17. Xillotettaa siiqiyoogan demmiyo anjjotuppe amaridaageeti awugeetee?

¹⁷ Mazamure 146:8y xillotettaa ogiyaa kaalliyoogan demmiyo gita anjjuwaa qonccissees. Mazamuraawee, “GODAI xillota siiqees” yaagidi yexxiis. Ubbabaa Haariyaagee nuuni xillotettaa siiqiyo gishshau nuna siiqiyoogaa qoppite! Yihooway siiqiyaagaa gidiyo gishshau, nuuni nu deꞌuwan Kawotettaabaa kaseyiyo wode, i nuuyyo koshshiyaabaa kunttanaagaa ammanettoos. (Mazamure 37:25; Leemiso 10:3 nabbaba.) Wurssettan, kumetta saꞌay xillotettaa siiqiyaageetuba gidana. (Lee. 13:22) Xillobaa oottidoogan, Xoossaa asaappe dariya baggay demmiyo anjjoy zawi baynna ufayssaanne loꞌꞌiya gannate saꞌan merinaa deꞌuwaa. Xoossaa xillotettaa siiqiyaageeti ha wodiyankka anjjuwaa demmoosona; hegeekka so giddooninne gubaaꞌiyan moggottidi deꞌanaadan oottiya garssa sarotettaa.—Pili. 4:6, 7.

18. Yihoowa gallassaa naagiiddi ubbatoo ay oottana bessii?

¹⁸ Nuuni Yihoowa gita gallassaa naagiiddi, ubbatoo a xillotettaa koyana bessees. (Sof. 2:2, 3) Yaatiyo gishshau, suure gidida Xoossaa Yihoowa ogiyaa wozanappe siiqiyoogaa bessiyaageeta gidoos. Hegee nu leemiso wozanaa naaganau “tiran wottiyo ola miishshadan xillotettaa” ubbatoo maayiyoogaa gujjees. Qassi, nunanne saluwan deꞌiya nu Xoossaa wozanaa ufayssiya loꞌꞌo zoriya wozanaa ubbatoo naagidi deꞌana koshshees.—Lee. 27:11.

19. Nuuni ay oottanau murttana koshshii, kaalliya huuphe yohuwan ay beꞌanee?

¹⁹ “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees.” (2 Odi. 16:9) Balbbuqettay, makkalaynne iitatettay gujji gujji biyo ha metiya alamiyan suurebaa oottiyo wode, ha qofay nuna ay keena minttettiyaabee! Nuuni suure ogiyaa kaalliyoogee, Xoossaappe haakkida daro asaa naata garamana danddayiyoogee tuma. SHin Yihoowa xillotettaa mintti kaalliyoogan nuuni keehippe goꞌettoos. (Isi. 48:17; 1 PHe. 4:4) Yaatiyo gishshau, nu kumetta wozanaappe xillotettaa siiqanaunne xillobaa oottanau murttidaageeta gidoos; hegee nuuni ubbatoo ufayttanaadan oottees. Gidoppe attin, polo wozanay deꞌiyoogeeta gidiyoogee iitabaa ixxiyoogaakka gujjees. Hegee woygiyoogaakko kaalliya huuphe yohoy qonccissees.

[Tohossa qofaa]

Woygada Zaaruutii?

• Wozuwaa goꞌꞌaa akeekiyoogee xillotettaa siiqanau keehippe koshshiyoy aybissee?

• “Tiran wottiyo ola miishshadan xillotettaa” maayiyoogee keehippe koshshiyoy aybissee?

• Nu zoriya wozanaa waatidi loohissana danddayiyoo?

[Sinttaa 26n deꞌiya misiliyaa qonccissuwaa]

Loohida zoriya wozanay oosuwaara gayttidaagan kuuyiyoobay merettiyo wode nuna maaddees