TIMIRTTE 37
Geeshsha Maxaafay Oosuwaabaanne Miishshaabaa Woygii?
Oosuwaabawu woy miishshaabawu hirgga eray? Nuussi koshshiyaabaa kunttiiddi Yihoowawukka bessiyaagaadan goynnanawu metootana danddayoos. Geeshsha Maxaafay nuna hegawu maaddiya zoriyaa yootees.
1. Oosuwaabaa Geeshsha Maxaafay woygii?
Xoossay nuuni nu oosuwan ufayttanaadan koyees. Geeshsha Maxaafay, “Asassi go77a gidiyaabi aibee giikko, asi ba [daafuridoban] . . . ufaittiyoogaa” yaagees. (Eranchchaa 2:24) Yihoowi minni oottees. Nuuni minni oottiyoogan Yihoowa milatiyo wode ikka ufayttees, nuunikka ufayttoos.
Oosoy keehi koshshiyaaba gidikkonne, Yihoowawu goynniyoogaappe aaruwan nuussi koshshiyaaba ootti xeellana bessenna. (Yohaannisa 6:27) Nuuni nu deꞌuwan aybippenne aaruwan Yihoowawu haggaaziyo wode I nuussi koshshiyaaba immana.
2. Miishshaabaa suure qoppiyoogaa
Geeshsha Maxaafay, “Miishshai asa iitaappe kammidi [ashshiyoogaa]” yootikkonne, miishsha xallay nuuni ufayttanaadan oottana danddayennaagaakka odees. (Eranchchaa 7:12) Hegaa gishshawu, Geeshsha Maxaafay nuuni miishshaa siiqennaadaaninne “de7iyaagee [nuussi] gido” gaanaadan minttettees. (Ibraawe 13:5 nabbaba.) Nuuni nuussi deꞌiyaaban ufayttidi deꞌikko, ubbatoo miishshaa gujjanawu koyiyo hirggaappe attoos. Koshshennan acuwan gelokko. (Leemiso 22:7) Qassi ceereenne eesuwan dureyees giyo zalꞌꞌee gattiyo qohuwaappe attoos.
3. Nu miishshaa waati kehatettan immana danddayiyoo?
Yihoowi keha Xoossaa, qassi nuuni “kehiyaageetanne haratuura shaakki ekkiyaageeta” gidiyo wode A milatoos. (1 Ximootiyoosa 6:18) Nuuni nu miishshan galchchaa maadoy koshshiyo haratanne nu mala Kiristtaanetakka kehatettan maaddana danddayoos. Nuuni immidobaa likkiyaappe aaruwan immanawu nuna denttettidabay Yihoowa ufayssees. Nuuni wozanappe kehidi immiyo wode ufayttoos, Yihoowikka ufayttees.—Oosuwaa 20:35 nabbaba.
LOYTTA AKEEKA
Oosuwaabaa suure qoppiyoogeenne deꞌiyaaban ufayttiyoogee waati maaddiyaakko akeeka.
4. Ne oosuwan Yihoowi bonchchetto
Nuuni Yihoowaara dabbotido dabbotawu bessiyaagaadan nu oosuwaa xeellana koshshees. BIIDUWAA beꞌite; yaatidi kaallidi deꞌiya oyshata tobbite.
Neeni biiduwan beꞌidoogaadan, ooso sohuwan Jesena hanotaappenne eeshshaappe nena ufayssiday aybee?
I oosuwaabaa ubbatoo suure qoppanawu ay oottidee?
Qolasiyaasa 3:23, 24 nabbabite; yaatidi ha oyshaa tobbite:
Oosuwaabaa suure qoppiyoogee keehi koshshiyoy aybissee?
Oosoy keehi koshshiyaaba gidikkonne, Yihoowawu goynniyoogaappe aaruwan nuussi koshshiyaaba ootti xeellana bessenna
5. Nuussi deꞌiyaaban ufayttiyoogee goꞌꞌees
Daro asay bawu danddayettida keenan daro miishshaa demmanawu bichchaarees. SHin Geeshsha Maxaafay hegaappe dummatiyaabaa zorees. Koyro Ximootiyoosa 6:6-8 nabbabite; yaatidi ha oyshaa tobbite:
Geeshsha Maxaafay nuuni ay oottanaadan minttettii?
Nuussi deꞌiyaabay keehi guutta gidikkokka, ufayttana danddayoos. BIIDUWAA beꞌite; yaatidi kaallidi deꞌiya oyshaa tobbite.
Ha so asawu deꞌiya miishshay guutta gidikkokka, eti ufayttanaadan oottidabay aybee?
Nuussi daro miishshay deꞌishin haraa gujjanawu koyikko shin? Yesuusi hegee ay keena qohiyaakko qonccissiya issibaa yootiis. Luqaasa 12:15-21 nabbabite; yaatidi ha oyshaa tobbite:
Yesuusi yootido leemisuwaappe ay akeekadii?—Paydo 15 xeella.
Leemiso 10:22nne 1 Ximootiyoosa 6:10 nabbabidi geeddarssite. Yaatidi ha oyshata tobbite:
Nuussi keehi koshshiyay Yihoowaara dabbotiyoogeeyye daro miishshay deꞌiyoogee? Aybissi?
Miishshawu bichchaariyoogee ayba metuwan yeggii?
6. Yihoowi nuussi koshshiyaabaa kunttana
Oosuwaanne miishshaa metoy nuuni Yihoowan ammanettiyaakkonne akeekanawu maaddana danddayees. Hegaa mala metoy gakkiyo wode ay oottana danddayiyaakko akeekanawu, BIIDUWAA beꞌite; yaatidi kaallidi deꞌiya oyshata tobbite.
Ha biiduwan beꞌido ishaa gakkida metoti aybee?
I he metuwaa gencci aattanawu ay oottidee?
Maatiyoosa 6:25-34 nabbabite; yaatidi ha oyshaa tobbite:
Yihoowi babaa kaseyiyaageetussi ay oottanawu qaalaa gelidee?
ISSI ISSI ASAY HAGAADAN GEES: “Taani ta so asawu koshshiyaabawu minnada oottana koshshees. Saaminttan saaminttan galchchaa shiiquwaa shiiqana danddayikke.”
Yihoowabaa kaseyanawu kuuyiyoogee awudenne keehi loꞌꞌoba gidiyoogaa neeni ammananaadan oottiya xiqisee awugee?
AY AKEEKADII?
Oosoynne miishshay koshshikkonne, Yihoowawu oottiyoogaappe nuna mule sherꞌꞌi oottana koshshenna.
Zaaretuwaa
Oosuwaabaa suure qoppanawu nena aybi maaddanee?
Deꞌiyaaban ufayttiyoogee nena waati maaddii?
Yihoowi ba asawu koshshiyaabaa immana giidoogan ne ammanettiyoogaa waata bessana danddayay?
PILGGA
Geeshsha Maxaafay miishshay iitaba giyaakkonne akeeka.
“Miishshay Iitatetta Ubbawu Pulttoo?” (Nu websaytiyan deꞌiyaaba)
Nu miishshaa Yihoowa ufayssiya ogiyan waati goꞌettana danddayiyaakko akeeka.
“Geeshsha Maxaafay Immiyoogaa Xeelliyaagan Woygii?” (Nu websaytiyan deꞌiyaaba)
Issi bitanee ceeriyaanne wuussaa agganaadan aybi maaddidaakko akeeka.
“Paraa Togan Annaacettiyoogaa Dosays” (Wochchiyo Keelaa huuphe yohuwaa)