SHaahuwaa 9
Nuuni ‘Wurssetta Gallassan’ Deꞌiyoogaa Eriyo Ogiyaa
1, 2. Nuuni wurssetta gallassan deꞌiyoogaa waati erana danddayiyoo?
NUUNI Xoossaa Kawotettay haꞌꞌi deꞌiya asaa haaruwaa bolli tangguwaa ekkanau giigi utto wodiyan deꞌiyoogaa waati shaakki erana danddayiyoo? Xoossay iitatettaanne tugga ubbaa xayssiyo wodiyau nuuni keehi mati uttoogaa waati erana danddayiyoo?
2 Yesuus Kiristtoosi erissiyo ashkkaratikka he yohota eranau koyidosona. I Kawotettaa haariyo maataara qonccanay awudekkonne “wodiyaa wurssettaayyo malaatai” ayba gidanaakko oychchidosona. (Maatiyoosa 24:3) Yesuusi asaa naati ha siraataa ‘wurssetta wodiyan,’ ‘wurssetta gallassan’ deꞌiyoogaa bessiya alamiyaa qaattiya hanettiyaabatanne alamiyan deꞌana dantto hanotata aassidi qonccissiyoogan zaariis. (Daaneela 11:40; 2 Ximootiyoosa 3:1) Ha wodiyan he dantto malaatay polettishin beꞌidoo? Ee, ubba daroppe polettishin beꞌida!
Alamiya Olata
3, 4. Ha wodiyan denddida olati Yesuusa hiraagaara waani moggottiyoonaa?
3 Yesuusi ‘issi biittaa asay hara biittaa asaaranne issi kawotettay hara kawotettaara olettanaagaa’ yootiis. (Maatiyoosa 24:7) Hegaappe kase denddida olatun hanibeenna ogiyan 1914n alamee daro biittaa asaynne kawotettay salppido olan geliis. Hegaappe denddidaagan he wode taarikiyaa xaafiyaageeti he olaa Wolqqaama Olaa yaagidi xeegidosona. Taarikiyan appe kase hegaa malay denddibeenna olay, koyro alamiya olaa. Issi 20,000,000 gidiya wottadaratinne saro asay hayqqiis; hegeekka kase denddida ayba olankka gidin hayqqida asaappe keehi daro.
4 Koyro Alamiya Olay wurssetta gallassa doomettau malaata. Yesuusi hageenne hara hanotay “koiro leesso mala” gidiyoogaa yootiis. (Maatiyoosa 24:8) Naaꞌꞌantto Alamiya Olay ubba koyroogaappe dariya, 50,000,000 gidiya wottadaratanne saro asaa worido gishshau hegee tuma gidiis. Aadhdhida 20tta xeetu layttatun, olan 100,000,000ppe dariya asay hayqqiis; hegeekka appe kase aadhdhida 400 layttatu giddon denddida olatu ubban hayqqida asa ubbaappe oyddu kusheppe darees! Hagee asaa haaruwaa ay keena keehippe ixxissiya oosoo!
Hara Naqaashshata
5-7. Nuuni wurssetta gallassan deꞌiyoogaa bessiya hara issi issi naqaashshati awugeetee?
5 Yesuusi wurssetta gallassaa kallidi yiya harabata gujji yootiis: “Biittai wolqqappe qaaxxiyoogee, daro sohuwan koshai, wurssiya harggee yaana.” (Luqaasa 21:11) Ha hiraagay 1914ppe ha simmin, hagaa mala hanotatuppe yiya daro unꞌꞌoy keehippe darida iita hanotaara issi mala gidiis.
6 Wolqqaama biittaa qaattay darotoo gakkiyaagaa gidishin, daro asay an hyqqiiddi deꞌees. Koyro Alamiya Olaa kaallidi Hidaare harggiya geetettiya hargge xallay 20,000,000 asaa woriis; ubba issi issi asay hayqqida asaa qooday 30,000,000 woy hegaappekka darees giidi qoppees. Eedisee xeetu shꞌan qoodettiyaageeta woriis; sinttappe mata wode, miilooniyan qoodettiyaageeta worana danddayees. Layttan layttan miilooniyan qoodettiya asay wozanaa harggiyan, kansseriyaninne hara harggetun hayqqoosona. Miilooniyan qoodettiya harati qassi loddaara woriya namisan hayqqiiddi deꞌoosona. ‘Ajjuutaa paraasati’ 1914ppe doommidi, olan, koshaaninne wurssiya harggiyan daro qooday deꞌiyo asaa naata wurssiiddi deꞌiyoogau siree baawa.—Ajjuuttaa 6:3-8.
7 Yesuusi ubba heeran gujji gujji biya danoy deꞌanaagaakka yootiis. I hagaattuwa giis: “Makkalai dariyo gishshau, daro asaa siiqoi irxxana.”—Maatiyoosa 24:12.
8. Naaꞌꞌantto Ximootiyoosa shemppo 3n deꞌiya hiraagay nu wodiyaara waani maayettii?
8 Hegaa bollankka, Geeshsha Maxaafaa hiraagay, ha wodiyan alamiya ubbasan qonccidi beettiya kandduwaa mooruwaa yootiis: “wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana. Eti nu ammanuwaa bolla doonan ekkidabaa milatana; shin a tumu wolqqaa erikke gaana . . . Iita asatinne balettiyaageeti harata balettiiddinne bantta huuphiyau baliiddi, kaseppe iiti iiti boosona.” (2 Ximootiyoosa 3:1-13) Hagee ubbay polettishin nu ayfiyan beꞌida.
Harabaykka Deꞌees
9. Saꞌan wurssetta gallassay doommiyoogaara gayttidi saluwan aybi hanidee?
9 Ha wodiyan tuggay keehippe daranaadan oottida harabaykka deꞌees. Wurssetta gallassati 1914n doommiyoogaara gayttidi, asaa naata ubba wolqqaama daafan yeggidabay merettiis. Geeshsha Maxaafaa kifle gidida wurssetta maxaafan deꞌiya hiraagay he wode: “Saluwan olai denddiis. Mikaa7eeli [saluwan haariyo wolqqaa oyqqida Kiristtoosi] ba kiitanchchatuura issippe miimminttiyaara [Seexaanaara] olettiis; miimmintteekka ba kiitanchchatuura [daydanttatuura] gididi, zaarettidi olettiis. SHin miimminttee xoonettiis. Xoonettin miimminttiyaassinne a kiitanchchatussi saluwan sohoi xayiis. Gita miimminttee xalahe halaqaa woikko Seexaanaa giyoogee, beni shooshshai, sa7a ubbaa balettiyaagee olettiis; i ba kiitanchchatuura issippe duge sa7au olettiis” yaagees.—Ajjuutaa 12:7-9.
10, 11. Seexaanaynne dayidanttati saluwappe saꞌan olettido wode asaa naati waani qohettidonaa?
10 Hegee asaa naatu bolli aybi gakkanaadan oottidee? Hiraagay kaallidi: “Sa7aunne abbau aayye7ana! Aissi giikko, xalahe halaqai baayyo guutta wodee attidoogaa eriyo gishshau, wolqqaama hanqquwaara duge inttekko wodhdhiis” yaagees. Ee, Seexaanay ba siraatay xayanau matattoogaa erees; hegaa gishshau, inne a alamee xayanaappe kase, asay Xoossaara eqettanaadan bau danddyettida ubbabaa oottiiddi deꞌees. (Ajjuutaa 12:12; 20:1-3) He ayyaana meretati bantta dooriyo maataa bessenna ogiyan goꞌettidoogaappe denddidaagan ay keena bantta huuphiya tunisidonaa! Eti gattiyo qohuwan ubba qassi, 1914ppe haa simmin, saꞌan deꞌiya hanotati ay keena tuggayiyaaba gididonaa!
11 Yesuusi nu wodiyaabaa: “Sa7an de7iya issi issi dere asai . . . hananabai etassi erettennan ixxin metootana. Asai sa7aa bolli yaanabaa ubbaa naagiiddi, yashshan daafurana” yaagidi hiraagaa yootidoogee garamissenna.—Luqaasa 21:25, 26.
Asa Haaroynne Dayidanttatu Haaroy Xayanau Matattiis
12. Ha siraatay xayanappe kasetidi, wurssettan polettanau bessiya attida hiraagatuppe issoy awugee?
12 Xoossay ha siraataa xayssanaappe kase, polettanau bessiya attida Geeshsha Maxaafaa hiraagati aapunee? Keehippe guuttta! Hegeetuppe issoy 1 Tasalonqqe 5:3n: “ ‘Ubbabai saro; aibikka hanenna’ giishin, maccaasaa maaretai oiqqiyoogaadan, bashshai eti qoppennan eta bolli yaana” yaagiyaagaa. Hagee ha siraataa wurssettay gakkiyoy ‘saro aykko baawa yaagidi haasayishin’ gidiyoogaa bessees. Asay ba akeekan hidootaa wottido ubbabay saro aybikka hanenna yaagishin, alamee eti mule naagibeenna woykko guuttaanne qoppibeenna wodiyan bashshay puttu gaana.
13, 14. Yesuusi ayba iita waaye wode yaana giidee? Hegee waanidi kuuyettanee?
13 Seexaanay haariyo ha alamiyaassi wode wuriiddi deꞌees. Maatan Yesuusi: “Sa7ai merettoosappe hachchi gakkanaashin de7ibeennabainne qassi hagaappe sinttaukka mule de7enna iita waayee he wode de7ana” yaagidi yootido waaye wodiyan ha siraatay xayana.—Maatiyoosa 24:21.
14 Xoossaa olaa Armmageedooni ‘iita waayiyaassi’ kuushsha gidana. Hegeekka hananabaa yootiya Daaneelan odettidoogaadan he wode, Xoossay “he kawotettata ubbaa gaaceretti xaissana.” Hegeekka, ha wode deꞌiya Xoossaappe gaxi kiyida asaa haruwau ubbau wurssetta yaagiyooga. He wode saluwan gididi haariya a Kawotettay asaa naata mule ubbaban harana. Ayssiyo maatay zaarettidi ‘hara asau imettennaagaa’ Daaneeli kasetidi yootiis.—Daaneela 2:44; Ajjuutaa 16:14-16.
15. Seexaanaynne dayidanttati gattiyo qohoy waanana deꞌii?
15 He wode Seexaanaayinne dayidanttati ubbay gattiyo qohoy attana. He makkalanchcha ayyaana meretati ‘asa zareta naa77anttuwaa balettana’ danddayenna mala ogiyaappe kichchiichchana. (Ajjuutaa 12:9; 20:1-3) Eti hayqqanaadan pirddettidosonanne bashshaa naagoosona. Eti gattiyo tunissiya hanotaappe laꞌꞌa kiyiyoogee asaa naatussi ay keena woppissiyaabee!
Bashshaappe Attanay Oonee? Attennayshin Oonee?
16-18. Ha siraataa wurssettan oonee attanay? Qassi oonee attennay?
16 Xoossaa pirdday ha alamiyan polettiyo wode, bashshaappe attanay oonee? Attennayshin oonee? Geeshsha Maxaafay, Xoossaa haaruwaa koyiyaageeti naagettanaagaanne bashshaappe attanaagaa bessees. Xoossaa haaruwaa koyennaageeti Seexaanaa alamiyaara xayanaappe attin attokkona.
17 Leemiso 2:21, 22y: “suure asatinne [Xoossaa haaruwau azazettiyaageeti] boree bainna asati biittan gam77idi de7ana. SHin iitati [Xoossaa haaruwau azazettennaageeti] biittaappe xoqollettana; ammanttennaageetikka shodettidi xayana” yaagees.
18 Mazamure 37:10, 11kka: “Iitaa oottiyaageeti guutta wodiyaappe guyyiyan de7okkona . . . SHin ashkketi biittaa laattana; eti sarotettaaninne duretettaani ufaittidi daana.” Paydo 29y gujjidi: “Xilloti biittaa laattananne yan merinau de7ana” yaagees.
19. Wozanan nuuni wottana bessiya zoree awugee?
19 Mazamure 37:34n: “GODAN ufaissaa wottada, a ogiyaa naaga. Neeni biittaa laattana mala, i nena gitayana. Iita asati xoqollettidi xayishin, neeni be7ana” yaagiya zoriya nu wozanan wottana koshshees. Paydo 37ynne 38y: “Ane lo77o asa akeeka; suure asa be7a; aissi giikko, saro asaassi sintta yeletai de7ana. SHin mooranchchati mule xayana; iitatu yeletaikka xoqolletti xayana” yaagees.
20. Nuuni, ha wodee deꞌanau ufayssiyaagaa gaana danddayiyoy aybissee?
20 Xoossay nuussi qoppiyoogaanne mata wodiyan iitatettaanne tuggaa digganaagaa eriyoogee ay keena minttettiyaabeenne oosuwau denttettiyaabee! Ha bonchchettida hiraagatu poloy mata wodiyana gidiyoogaa eriyoogee ayba ufayssiyaabee!
[Sinttaa 20n deꞌiya misiliyaa]
Geeshsha Maxaafay wurssetta gallassi polettiya “malaatata” kaseti yootiis
[Sinttaa 22n deꞌiya misiliyaa]
Xoossaa haaruwau azazettennaageeti mata wode Armmageedoona olan xayoosona. Xoossaa haaruwau azazettiyaageeti bashshaappe attidi xillotettay kumido ooratta alamiyan deꞌana