Xoossaa Kawotettay Aybee?

“Kawotettaa wonggeliyaa mishiraachchoi . . . ”—MAA. 24:14.

YESUUSI i tamaarissido keehi erettiya, Deriyaa Bollaa Timirttiyan hagaappe kaallidi deꞌiyaagaadan Xoossaakko woossiyoogaa gujjiya leemiso woosaa tamaarissiis: “Ne kawotettai yo.” Miilooniyan qoodettiya asay ha woosaa hassayees; qassi zaaretti zaarettidi darotoo woossees. Issi Inssaykiloppiidee, ha woosay, “goynuwan ubba Kiristtaaneti woossiyo waanna woosa” gidiyoogaa yootiis. Gidoppe attin, he woosaa zaaretti zaarettidi woossiya daroti Xoossaa Kawotettay aybakko woy i yiyo wode ay oottanaakko erokkona.—Maa. 6:9, 10.

Hegee garamissiyaabaa gidenna. Kiristtaane giyo haymaanootiyaa kaalettiyaageeti Xoossaa Kawotettaa xeelliyaagan issoy issuwaara moggottenna, kirqqi giidanne muttumurettida qofaa tamaarissoosona. Xoossaa Kawotettay, “asa wolqqaappe aadhiyaaba, . . . deꞌo Xoossaara deꞌiya gaytotetta . . . , attumay maccay Xoossaappe atotettaa demmiyo hanota” gidiyoogaa issi xaafee xaafiis. Haray qassi Kawotettaa wonggelee “woosa keettaabaa tamaarissiyaaba” yaagidi qonccissiis. Katekiizim of ze Kaatolik CHerch giyo maxaafay, “Xoossaa kawotettay Geeshsha Ayyaanay immiyo xillotetta, sarotettanne ufayssa” yaagidi qonccissees.

Ha maxeetiyan sinttaa 2n hegaa xeelliyaagan qoncce qofaa beꞌana danddayaasa. Hegee hagaadan gees: ‘Xoossaa Kawotettay, giishin saluwan deꞌiya tumu aysoy, mata wode iitatetta ubbaa xayssidi saꞌaa gannatiyau laammana.’ Geeshsha Maxaafay he qofaa waatidi qonccissiyaakko ane beꞌoos.

Kumetta Saꞌaa Sinttappe Haariyaageeta

Kawotettay, kawoy haariyo ayso. Xoossaa Kawotettaa Kawoy hayquwaappe denddida Yesuus Kiristtoosa. Saluwan i kawotanaagee hananabaa yootiya Daaneelayyo ajjuutan qonccin hagaadan xaafiis: “Taani he qamma ajjuutan, asa na7a [Yesuusa] milatiyaagee saluwaa shaaraara yiyaagaa be7aas. Yiidaagee Merinaasappe De7iyaagaakko [Xoossaa Yihoowakko] shiiqin, eti a a sintti aattidosona. Asai ubbai, kawotettati ubbainne dumma dumma qaalan haasayiya zareti ubbai ayyo haarettana mala, maatai, bonchchoinne kawotettai ayyo imettiis. A maatai merinau shaarettenna maataa; a kawotettai mulekka xayennaagaa.”—Dane. 7:13, 14.

Xoossay he Kawotettaa minttidi essanaagaa, he Kawotettay asaa naatu aysuwaa ubbaa muleera gaaceretti xayssanaagaanne i merinau eqqidi daanaagaakka Daaneela Maxaafay qonccissees. Baabiloone kawoy geeshsha ayyaanay denttettin aymuwan beꞌido, issoy issuwaappe simmidi kawotiya alamiyaa kawotettata malaatiya gita misiliyaa shemppo 2y yootees. Hananabaa yootiya Daaneeli he aymuwaa birshshiis. I hagaadan giidi xaafiis: “Wurssetta gallassatun,” “saluwaa Xoossai mulekka kunddenna, hara asaukka imettenna kawotettaa essana. He eqqida kawotettai he kawotettata ubbaa gaaceretti xaissana; shin i merinau eqqidi daana.”—Dane. 2:28, 44.

Xoossaa Kawotettaa kawoy haariyoy barkka gidenna. Yesuusi i kiittido ammanettidaageetussi, etinne harati hayquwaappe denddidi saluwan araatan uttanaagaa i saꞌan haggaaziyo wode geeshshidi yootiis. (Luq. 22:28-30) Yesuusi yootidoogaadan Kawotettay saluwaana gidiyo gishshau, he araatay leemiso hanotaana. Geeshsha Maxaafay aara issippe haariyaageeti “qommo ubbaappe, dumma dumma biitta qaala ubbaappe, yara ubbaappenne zare ubbaappe” wozettiyoogaa yootees. ‘Nu Xoossaayyo oottana mala, eti kawotettanne qeeseta gidana. Qassi eti saꞌan haarana.’—Ajj. 5:9, 10.

Kawotettaabaa Yootiyoobay Mishiraacho Gididoy Aybissee?

Kiristtoos Yesuusi “qommo ubbaappe, dumma dumma biitta qaala ubbaappe, yara ubbaappenne zare ubbaappe” wozettida asaa haaranaagaanne aara issippe kawotiyaageeti ‘saꞌaa haaranaagaa’ akeeka. He wode, ha Kawotettau haarettanay oonee? Ha wodiyan sabbakettiiddi deꞌiya kawotettaa mishiraachuwau suure zaaruwaa immiyaageeta. He Kawotettau haarettanaageetu giddon saꞌan merinau deꞌuwaa demmana danddayiya, hayquwaappe denddiyaageetikka deꞌoosona.

Asay he Kawotettaa haaruwan demmana anjjuwaa Geeshsha Maxaafay geeshshidi yootees. Hegaappe amaridaageeti hagaappe kaallidi deꞌosona:

“I sa7aa gaxaa gakkanaassi de7iya olaa teqqees; wonddafiyaa menttees; tooraa kinchchees; gonddalliyaakka taman xuuggees.”—Maz. 46:9.

“He wodetun asati keettata keexxidi, etan de7ana; woiniyaa turatakka tokkidi, eta aifiyaa maana. Eti keexxin, harai de7enna; harai maanau tokkiyoobaa tokkokkona.”—Isi. 65:21, 22.

“Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—Ajj. 21:3, 4.

“He wode, qooqetu aifee dooyettana; tulletu haittaikka siyana. Wobbeti genessadan guppana; duudetikka ufaissan yexxana.”—Isi. 35:5, 6. 

“Duufuwan de7iyaageeti a [Yesuusa] cenggurssaa siyiyo wodee yees. Siyidi eti duufuwaappe gaxi kiyana; lo77obaa oottidaageeti de7anau denddana.”—Yoh. 5:28, 29.

“Ashkketi biittaa laattana; eti sarotettaaninne duretettaani ufaittidi daana.”—Maz. 37:11.

Hagee tumuppe mishiraacho! Hegaappe harabay, Geeshsha Maxaafay yootin polettida hiraagaappe akeekiyoogaadan, Xoossaa Kawotettay saꞌaa xillotettan haariyo wodee matattiis.

Mishiraachoy Aybee?

“Mishiraachchoi . . . ”​—MAA. 24:14.

KAWOTETTAA mishiraachoy aybakko qonccissiyoogan, qassi he kawotettay sinttappe saꞌaa xillotettan ayssiya haaro gidiyoogaa asau yootiyoogan, Kiristtaaneti ‘kawotettaa mishiraachuwaa’ sabbakana koshshees. Gidikkonne, ‘mishiraachuwaa’ giya qaalaa Geeshsha Maxaafay hara ogiyankka goꞌettees. Leemisuwau, “Ashshiyo mishiraachchuwaa” (Maz. 96:2); “Xoossaa wonggeliyaa mishiraachchuwaa” (Roo. 15:16); qassi “Yesuus Kiristtoosa wonggeliyaa mishiraachchuwaa” yaagiyaagee dees.—Mar. 1:1.

Qanttan, mishiraachoy Yesuusi tamaarissidonne i erissiyo ashkkarati xaafido tumaa ubbaa gujjees. Yesuusi saluwaa baanaappe kase bana kaalliyaageetussi hagaadan giis: “Intte biidi, asa ubbaa tana kaalliyaageeta oottite; Aawaa sunttan, Na7aa sunttaaninne Geeshsha Ayyaanaa sunttan eta xammaqite. Taani inttena azazidobaa ubbaa eti naagana mala, eta tamaarissite.” (Maa. 28:19, 20) Yaatiyo gishshau, tumu Kiristtaanetu oosoy haratuyyo Kawotettaabaa yootiyoogaa xalla gidenna; eti asaa erissiyo ashkkara oottanaukka baaxetana koshshees.

Hagaa xeelliyaagan woosa keettati ay oottiiddi deꞌiyoonaa? Xoossaa Kawotettay aybakko akeekibeenna daroti hegaabaa suure tamaarissana danddayokkona. Hegaappe, asay ufayttanaadan oottiya hanotan, nagara atto giyoogaabaanne Yesuusan ammaniyoogaabaa tamaarissoosona. Eti asau deꞌoy kaseegaappe giiganaadan oottiyoogan woy hosppitaaliyaa, timirtte keettaanne hiyyeesatuyyo keettaa keexxiyoogan asay haymaanootiyaa laammanaadan koyoosona. Hegaadan oottiyoogee woosa keetti biya asaa corayana danddayiyaaba gidikkonne, Yesuusi tamaarissido timirttiyaara moggidi daanau koyiya ashkke asata, giishin tumu Kiristtaaneta ayfana danddayenna.

Haymaanootiyaa erancha issoy hagaadan giis: “Haymaanootiyaa eranchatuppenne kaalettiyaageetuppe daroti nuuni asaa Yesuusi erissiyo ashkkara oottananne i tamaarissidobaa ubbaa harati polanaadan tamaarissana koshshiyoogaa yootoosona. . . . SHin, ha allaalliyaa xeelliyaagan Yesuusa azazoy keehi qoncce. Nuuni i giidoogaa oottokko. Hegaa nuuni wozanappe oottokko. Qassi hegaa waatidi oottanaakko nuuni eriyaaba milatenna.”

Hegaadankka, Amerkkan deꞌiya Kaatoliketuppe xeetaappe 95 kushe asay kawotettaa mishiraachuwaa sabbakiyoogee eta ammanuwau koshshiyaabaa gidiyoogaa maayidoogaa issi xinaatee qonccissiis. Gidoppe attin, etappe dariya baggay, hegaadan oottiyo ubbaappe aadhiya ogee hegaabaa yootiyoogaana gidennan, haratuyyo leemiso gidiya ogiyan deꞌiyoogaana giidi qoppees. Etappe issinniyaa, “Wonggeliyaa mishiraachuwaa yootiyoogee daro qaalaa haasayiyoogaappe dummatiyaaba. Nuuni Mishiraachuwaadan daana koshshees” yaagaasu. Woosa keettay mata wode, “ashuwaa gaytotettaa xeelliyaagan polido borssobaa gishshaunne tamaarissiyo gelenna timirttiyaa gishshau,” eta yametuppe daroti bantta ammanuwaabaa yootanau mammottiyoogaa, he xinaatiyau aawatiya Yu Es Kaatolik giyo maxeetee qonccissiis.

Harasan qassi, Meetodistte Haymaanootiyaa phaaphaasee banttau imettida kiitaa polanau minotetti baynnaagaanne woosa keettaa yiya asay hara asaagaa malabaa oottiyoogaa, bantta woosa keettay shaahettidoogaanne haniyoobaa xayidoogaa azzanidi yootiis. Hidootaa qanxxidoogaa bessiya hanotan i hagaadan oychiis: “Aawatettaa ekkidi, Kawotettaa wonggeliyaa yootanay oonee?”

He phaaphaasee ba oyshau zaaro yootibeenna. SHin hegau zaaroy dees. Hegaa neeni kaalliya huuphe yohuwan beꞌana.

[Sinttaa 6n deꞌiyaagaa]

Mishiraachoy Xoossaa Kawotettaabaanne Yesuus Kiristtoosan ammanidi attiyoogaabaa yootiyaaba