‘Ammanettida Wozannaama Ashkkaray Oonee?’

1, 2. Yesuusi ha wodiyan ayyaanaabaa qumaa o baggaara mizii, nuuni hegaa shaakkidi eriyoogee keehippe koshshiyoy aybissee?

“ISHANTTOO, taani keehi koyido wodiyan taassi koshshiyaabay deꞌiyo xuufiyaa intte giigissido wodee qoodinkka wurenna.” Issi michiyaa Yihoowa Markkatu waanna biiruwan deꞌiya ishanttussi xaafido dabddaabbiyan, eta nashshiyoogaa hegaadan gaada qonccissaasu. Ne qofaykka iigaa malee? Nuuppe daroti hegaadan qoppoos. Nuuni hegan garamettana koshshii? Koshshenna.

² Nuuni koshshiya wodiyan demmiyo ayyaanaabaa qumay gubaaꞌiyau Huuphe gidida Yesuusi nuna mizanau gelido qaalaa naagiyoogaa bessees. I o baggaara hegaadan oottiiddi deꞌii? Yesuusi ba yiyo wodiyaa malaataa yootiyo wode, ‘ammanettida wozannaama ashkkaraa’ baggaara “ba so asau qumaa koshshiyo wodiyan” immanaagaa odiis. (Maatiyoosa 24:45-47 nabbaba.) Yesuusi tumuppe bana kaalliyaageeta ha wurssetta wodiyan ayyaanaabaa qumaa miziyoy he ammanettida ashkkaraa baggaara. Nuuni ammanettida ashkkaraa shaakkidi eriyoogee keehippe koshshiyaaba. Nuuni Xoossaa dabbo gididinne ayyaanaaban payya gididi deꞌana danddayiyoy he ashkkaraa baggaara.—Maa. 4:4; Yoh. 17:3.

3. Ammanettida ashkkaran leemisidi yootidoogaabay nu xuufiyan kase aybi qonccidee?

³ Yaatin, Yesuusi ammanettida ashkkaran leemisidi yootidoogaabaa nuuni ayba ogiyan akeekana koshshii? Kase, nu xuufiyan hagaappe kaallidi deꞌiyaagaadan qoncciis: PHenxxaqosxxe gallassi 33 M.Ln, Yesuusi ba so asaa bolli ammanettida ashkkaraa sunttiis. Hegaappe simmin issi wode saꞌan deꞌiya tiyettida Kiristtaaneti ubbay issippe he ashkkara. Qassi he tiyettidaageeti huuphiyan huuphiyan so asa. Yesuusi 1919n, he ammanettida ashkkaraa “babaa ubbaa bolli” woykko Kawotettaara gayttidaagan saꞌan deꞌiya ubbabaa bolli sunttiis. SHin, gujjidi loytti xannaꞌidi, qassi woossidinne wotti dentti qoppidi, Yesuusi ammanettida wozannaama ashkkaraabaa yootidobaa nuuni akeekido qofaa laammana koshshiyoogaa erida. (Lee. 4:18) Nuuni saluwaa biyo hidootay deꞌiyoogeeta gidin woy saꞌaa laattiyo hidootay deꞌiyoogeeta gidin, he leemisuwan nubay waanidi odettidaakko ane pilggoos.

HA LEEMISUWAN ODETTIDABAY POLETTIYOY AWUDEE?

4-6. Yesuusi ammanettida ashkkaran leemisidobay polettiyoogaa doommiyoy 1914ppe simmiina giidi nuuni qoppana danddayiyoy aybissee?

⁴ Ammanettida wozannaama ashkkaran leemisido leemisuwaa yuushuwan deꞌiya qofay bessiyoogaadan, hegee polettiyoogaa doommidoy 33 M.L. PHenxxaqosxxe gallassaana gidennan, ha wurssetta wodiyaana. Geeshsha Maxaafay nuuni hegaadan kuuyanaadan maaddiyoy ayba ogiyaanakko ane beꞌoos.

⁵ Ammanettida ashkkaran leemisido qofay Yesuusi ba “yuussaayyoonne [‘i qonccidi takkiyo wodiyaunne,’ NW] wodiyaa wurssettaayyo” malaata gidiyaabaa yootido hiraagan deꞌiya qofaappe issuwaa. (Maa. 24:3) Maatiyoosa 24:4-22n deꞌiya he hiraagaa koyro kifilee naaꞌꞌutoo polettees; koyro, 33 M.Lppe biidi 70 M.L. gakkanaassi deꞌiya wodiyan polettiis; qassi naaꞌꞌantto, keehi aaho hanotan nu wodiyan polettees. Yaatikko, Yesuusi ammanettida ashkkaran leemisidi yootidobaykka naaꞌꞌutoo polettees giyoogee? CHii, gidenna.

⁶ Yesuusi Maatiyoosa 24:29ppe doommidi yootidobay nu wodiyan haniyaaba. (Maatiyoosa 24:29, 30, 42, 44 nabbaba.) I iita waayiyaa wode hananabaa yootiyo wode, “Asa Na7ai, . . . saluwaa shaara giddoora yiishin” asay beꞌanaagaa yootiis. Hegaappe simmidi, wurssetta gallassan deꞌiyaageeti naagetti uttanaadan zoriis; I, ‘Simmi intte Goday ay gallassi yaanaakkonne intte erekketa’; qassi “Taani, Asa Na7ai, intte qoppenna saatiyan yaana” yaagiis.a Ha sohuwan, Yesuusi wurssettaa gallassi haniyaabaa haasayiyo wode, ammanettida ashkkaraabaa leemisuwaa yootiis. Yaatiyo gishshau, i ammanettida ashkkaraabaa yootidobay polettiyoogaa doommiyoy wurssettaa gallassay 1914n doommi simmiina giidi qoppana danddayoos. Hegaadan qoppiyoogee bessiyaaba. Aybissi?

7. Cahaa wodee doommido wode keehippe koshshiya ayba oyshay denddidee, qassi aybissi?

⁷ Ane issi kutti ha oyshaabaa qoppa: “Ammanettida wozannaama ashkkari [tumuppe] oonee?” Koyro xeetu layttan, he oyshaa oychanaadan oottiyaabi baawa gaana danddayettees. Nuuni hagaappe kasetiya huuphe yohuwan beꞌidoogaadan, kiitettidaageeti Xoossay banttana maaddiyoogaa bessanau maalaalissiyaabaa oottananne ubba qassi haratussi maalaalissiyaabaa oottiyo imotaa immana danddayoosona. (Oos. 5:12) Yaatiyo gishshau, sintta xeera gididi kaalettanaadan Kiristtoosi tumuppe sunttidoy oonee giidi he wode issi uri oychanaadan oottiyaabi baawa. SHin, 1914n hanotay keehi dummatiis. Cahaa wodee he laytti doommiis. Zardduwaa gisttiyaappe shaakkiyo wodee wurssettan gakkiis. (Maa. 13:36-43) Yaatiyo gishshau, cakkiyo wodee doommin, ‘Daro worddo Kiristtaaneti banttana Yesuusa kaalliyaageeta giyo gishshau, gistteti woy tiyettida Kiristtaaneti aybin erettana danddayiyoonaa?’ giya, keehippe koshshiya oyshay denddiis. Ammanettida ashkkaran leemisido leemisuwan hegaa zaaroy deꞌees. He wode ayyaanaabaa loyttidi miyaageeti Kiristtoosa kaalliya ayyaanan tiyettidaageeta.

AMMANETTIDA WOZANNAAMA ASHKKARAY OONEE?

8. Ammanettida ashkkaray saꞌan deꞌiya tiyettida Kiristtaanetuppe sunttettiyoogee bessiyaaba gididoy aybissee?

⁸ He ammanettida ashkkaray saꞌan deꞌiya tiyettida Kiristtaanetuppe sunttettidaagaa gidana koshshees. Hegeeti “kawo qeeseta” geetettidosona; qassi “Xoossai xumaappe garamissiya ba poo7uwau” xeesidi, ba “ooratta oosuwaa yootanau” eta kiittiis. (1 PHe. 2:9) ‘Kawo qeesetu’ yarati bantta mala Kiristtaaneta tumaa tamaarissiyoogee bessiyaaba.—Mil. 2:7; Ajj. 12:17.

9. Tiyettidaageeti ubbay ammanettida ashkkaree? Qonccissa.

⁹ Saꞌan deꞌiya tiyettidaageeti ubbay ammanettida ashkkaree? CHii, gidokkona. Alame yuushuwan deꞌiya bantta mala Kiristtaanetussi ayyaanaabaa qumaa shiishshiyaageeti tiyettidaageeta ubbaa gidokkona. Gubaaꞌiyau oottiyaageeta woy gubaaꞌe cima gidida tiyettida ishantti gisttiyan leemisettidaageetuppe amaridaageeta. Eti bantta gubaaꞌiyaaninne sooppe soo biidi tamaarissoosona; qassi waanna biiruwaappe imettiya kaaletuwaa ammanettidi kaalloosona. SHin, alame yuushuwan deꞌiya ishanttu maabarau ayyaanaabaa qumaa immiyay eta gidokkona. Qassi tiyettidaageetuppe amaridaageeti gubaaꞌiyan tamaarissanau mule qoppenna, bantta huuphiyaa kawushshiya michota.—1 Qor. 11:3; 14:34.

10. Ammanettida wozannaama ashkkaray oonee?

¹⁰ Yaatikko, ammanettida wozannaama ashkkaray oonee? Yesuusi amaridaageetu baggaara darota mizidoogaara maayettiya ogiyan, he ashkkaray Kiristtoosi qonccidi takkiyo wodiyan ayyaanaa qumaa giigissiyoonne immiyo oosuwaa oottiya, tiyettida amarida ishanttu cita. Wurssettaa gallassa ubban, ammanettida ashkkara gididi oottiya tiyettida ishantti waanna biiruwan haggaazoosona. Mata wodeppe haa simmin, he ashkkaraynne Yihoowa Markkata Bolla Gididi Heemmiyaagee issuwaa gididabadan odettiis. SHin, Yesuusa leemisuwan “ashkkaraa” giya qaalay selle qoodaa qonccissiya qaala; hegee ashkkaraa citaa bessiyaaba gidiyoogaa akeeka. Yaatiyo gishshau, Bolla Gididi Heemmiyaagaa yarati kuuyiyoobaa issippe kuuyoosona.

SO ASAY OONEE?

11, 12. (a) Ammanettida wozannaama ashkkaray sunttettiyo naaꞌꞌubay aybee? (b) Yesuusi ammanettida ashkkaraa ba so asaa bolli sunttidoy awudee, qassi oona dooridee?

¹¹ Yesuusi yootido he leemisuwan, ammanettida wozannaama ashkkaray naaꞌꞌuban sunttettidoogee akeekana bessiyaaba. Koyruwan, so asaa bolli sunttettiis; naaꞌꞌanttuwan, godaabaa ubbaa bolli sunttettiis. He leemisoy polettiyoy ha wurssetta wode xallaana gidiyo gishshau, naaꞌꞌubaa bollikka sunttettidoy 1914n Yesuusi kawo gidi yiidi haariyoogaa doommi simmiina.

¹² Yesuusi ba so asaa bolli ammanettida ashkkaraa sunttidoy awudee? Hegaa zaaruwaa demmanau, cahaa wodee doommido 1914 guyye simmidi qoppana koshshees. Nuuni kase beꞌidoogaadan, he wode daro citati banttana Kiristtaane goosona. Yesuusi ammanettida ashkkaraa awugaa citaappe dooridi sunttidee? Inne a Aaway yiidi beetamaqidasiyaa, woy ayyaanaaban goynuwau giigissidobaa 1914ppe biidi 1919 doomettaa heeri gakkanaassi qorido wode he oyshaa zaaroy erettiis.b (Mil. 3:1) Eti Yihoowanne a Qaalaa wozanappe koyiyoogaa bessida, amarida ammanettida Geeshsha Maxaafaa Tamaaretun ufayttidosona. Amarida ogiyan he asati geeyana koshshidaba gidikkonne, paacciyoonne geeshshiyo wode eti bantta huuphiyaa kaushshidosona. (Mil. 3:2-4) Ha ammanettida Geeshsha Maxaafaa Tamaareti gisttiyan leemisettida tumu Kiristtaaneta. Ayyaanaaban zaarettidi minnido 1919n, Yesuusi ammanettida wozannaama ashkkara gidanaadan ayyaanan tiyettida ishantta eta giddoppe dooriis; dooridi ba so asaa bolli sunttiis.

13. A so asaa geetettidaageeti oonee oonee, qassi aybissi?

¹³ SHin, a so asati oonee? Eti qumaa miziyoogeeta. Wurssettaa gallassaa doomettan, a so asati ubbay ayyaanan tiyettidaageeta. Guyyeppe, hara dorssata gidida zawi baynna daro asati a so asa gididosona. Ha wodiyan Kiristtoosi kaalettiyo ‘issi wudiyaappe’ dariya baggay hara dorssata. (Yoh. 10:16) Naaꞌꞌu citaykka ammanettida ashkkaray koshshiyo wodiyan shiishshiyo ayyaanaa qumaa mees. Ammanettida wozannaama ashkkaraa citan deꞌiya, ha wodiyan Bolla Gididi Heemmiyaagaa yara gididaageeti shin? Ha ishanttikka ayyaanaa qumaa maana koshshees. Yaatiyo gishshau, Yesuusa kaalliya hara ubbatudan, etikka huuphiyan huuphiyan a so asa gidiyoogaa akeekoosona.

14. (a) Ammanettida ashkkarau imettida aawatettay aybee, qassi hegee ay ay gujjii? (b) Ammanettida wozannaama ashkkaray naagettanaadan Yesuusi ay yootidee? (“Ashkkarai Iita Gidikko” giya saaxiniyaa xeella.)

¹⁴ Yesuusi ammanettida wozannaama ashkkarau gita aawatettaa immiis. Beni wode, ammanettida ashkkaray, issi keettan alaafe gididi sunttettees. (Luq. 12:42) Yaatiyo gishshau, ammanettida wozannaama ashkkarau ba godaa son deꞌiya ubbabaa ayssanaadan aawatettay imettiis. He aawatettay sabbakiyo oosuwaa, gita shiiquwaa prograamiyaa, qassi gubaaꞌiyau, buzo xinaatiyaunne haggaazuwau goꞌettiyo Geeshsha Maxaafaa qofay deꞌiyo xuufeta giigissiyoogaanne godaa aquwaa kaalliyoogaa gujjees. Ashkkaraa citay giigissiyo ayyaanaa qumay ubbay so asau koshshees.

HE ASHKKARAY GODAABA UBBAA BOLLI SUNTTETTIYOY AWUDEE?

15, 16. Yesuusi ammanettida ashkkaraa babaa ubbabaa bolli sunttiyoy awudee?

¹⁵ Naaꞌꞌanttuwan, Yesuusi “babaa ubbaa bolli” he ashkkaraa sunttidoy awudee? Yesuusi, “I hegaadan oottishin, a godai yiidi demmiyo ashkkarai anjjettidaagaa. Taani intteyyo tumaa odais; godai he ashkkaraa babaa ubbaa bolli sunttana” yaagiis. (Maa. 24:46, 47) Yesuusi naaꞌꞌanttuwaa sunttanay i yiidi he ashkkaray ayyaanaabaa qumaa immiyoogan ammanettidi “oottishin” beꞌi simmidi gidiyoogaa akeeka. Yaatiyo gishshau, naaꞌꞌuban sunttidoy issi wode gidenna. Yesuusi babaa ubbabaa bolli he ashkkaraa waatidi, qassi awude sunttanaakko akeekanau nuuni, i awude yiyaakkonne abaa geetettidabay ay ay gujjiyaakko erana koshshees.

¹⁶ Yesuusi yiyoy awudee? Zaaroy he xiqisiyaa yuushuwan deꞌees. Hegaappe kasetiya xiqisee Yesuusa ‘yuussaa’ yootiyo qofay qonccissiyoy i ha alamiyaa wurssettan pirddidi he pirddaa polanau yiyo wodiyaabaa gidiyoogaa hassaya.c (Maa. 24:30, 42, 44) Hegaa gishshau, Yesuusi ammanettida ashkkaran leemisido leemisuwan odettida a yuussay iita waayiya wode.

17. Yesuusabaa geetettidabay ay ay gujjii?

¹⁷ ‘Yesuusabay ubbay’ ay ay gujjii? Yesuusi “ubbaa” giya qaalaa goꞌettidoy babay saꞌan deꞌiyaba xalla gaanaassa gidenna. Yesuusau saluwan gita maatay deꞌees. I, “Maata ubbai saluwaaninne sa7an taayyo imettiis” yaagiis. (Maa. 28:18; Efi. 1:20-23) Ha wodiyan abay i bana kaalliya tiyettidaageetuura issippe haarana, 1914ppe doommidi assi imettida Mase Kawotettaa gujjees.—Ajj. 11:15.

18. Yesuusi ammanettida ashkkaraa babaa ubbaa bolli sunttiyoogan ufayttiyoy aybissee?

¹⁸ Nuuni qommoora beꞌidobaappe, ay kuuyana danddayiyoo? Yesuusi iita waayiyaa wodiyan pirddanau yiyo wode, ammanettida ashkkaray a so asau koshshiyo wodiyan ayyaanaa qumaa ammanettidi immishin demmana. Hegaappe simmin, Yesuusi he ashkkaraa naaꞌꞌanttuwan babaa ubbaa bolli ufayttidi sunttana. Ammanettida ashkkaraa yara gididaageeti Kiristtoosaara issippe haariyaageeta gididi saluwan woytuwaa ekkiyo wode he sunttatettaa demmana.

19. Ammanettida ashkkaray saluwan ekkana woytoy tiyettida haratuugaappe aadhii? Qonccissa.

¹⁹ Ammanettida ashkkaray saluwan ekkana woytoy tiyettida haratuugaappe aadhii? CHii, aadhenna. Issi wode amaridaageetussi odettida woytuwaa wurssettan haratikka ekkana danddayoosona. Leemisuwau, Yesuusi hayqqanaappe kase qammi i kiittido ammanettida 11tussi yootidobaa qoppa. (Luqaasa 22:28-30 nabbaba.) Yesuusi he amarida attuma asati ammanettido gishshau gita woytuwaa demmanaagaa yootiis. Eti aara issippe kawotana. SHin i daro layttappe guyyiyan, 144,000ti ubbay araatan uttidi banaara kawotanaagaa yootiis. (Ajj. 1:1; 3:21) Hegaara issi mala ogiyan, Maatiyoosa 24:47n odettidaagaadan, i ammanettida ashkkaraa yara gidida ayyaanan tiyettida amarida attumaageeta babaa ubbaa bolli sunttanau qaalaa geliis. Aara saluwan 144,000ti ubbaykka gita maataa ekkana.—Ajj. 20:4, 6.

20. Yesuusi ammanettida ashkkaraa sunttidoy aybissee, qassi neeni ay oottanau murttadii?

²⁰ Ammanettida wozannaama ashkkaraa baggaara, Yesuusi koyro xeetu layttaagaadan amaridaageetu baggaara darota mizees. Yesuusi tiyettidaageeta gidin hara dorssata gidin, tumuppe bana kaalliyaageeta koshshiyo wodiyan ha wurssetta gallassan ayyaanaa qumaa ubbatoo mizanaadan ammanettida ashkkaraa sunttiis. He ammanettida wozannaama ashkkaraa yara gidida ayyaanan tiyettida ishantta ammanettidi maaddiyoogan, nashshiyaageeta gidiyoogaa bessanau murttoos.—Ibr. 13:7, 17.