Yihooway Ufayttiyo Ashkkaray Hageeho!

“Ta ashkkarai, ta shemppoi an ufaittiyoogee . . . hageeho.” —ISIYAASA 42:1.

1. Kiristtoosa hayquwaa hassayiyo wodee matattiyo wode, Yihoowa asay ay oottanaadan minttettoy imettii? Aybissi?

KIRISTTOOSA hayquwaa hassayiyo wodee matattiyo wode, PHauloosi “nu ammanuwau huuphenne polo gidiya Yesuusa xeelloos” giido zoriyaa Xoossaa asay kaallanaadan minttettoy imettees. PHauloosi gujjidi: “Intte intte wozanaa bayidi daafurenna mala, nagaranchchati bana daro ixxinkka genccida Yesuusa qoppite” yaagiis. (Ibraawe 12:2, 3) Kiristtoosi bana yarshshido hanotan kuuyettida, i ammanettidi kaallido ogiyan xeelaa wottiyoogee, tiyettida Kiristtaanetinne etaara issippe oottiya hara dorssati Yihoowayyo ammanettidi ubbatoo oottanaadaaninne ‘wozanaa bayenna’ mala maaddees.—Galaatiyaa 6:9⁠ra gatta xeella.

2. Xoossaa Naꞌaa xeelliyaagan Isiyaasi yootido hiraagatuppe nuuni ay tamaarana danddayiyoo?

² Hananabaa yootiya Isiyaasa baggaara, Yihooway ba Naꞌaabaa yootiya daro hiraagay xaafettanaadan oottiis. Ha hiraagati nuuni “nu ammanuwau huuphenne polo gidiya” Kiristtoos Yesuusa tishshi oottidi xeellanaadan maaddoosona.a He hiraagati a oonatettaa, a gakkida metuwaanne i nu Kawonne nuna Ashshiyaagaa gididi xoqqu xoqqu gidoogaa aahuwan qonccissoosona. He hiraagati ha laytti Hamuusa, Hosppune 9n away wulli simmin bonchettiya Godaa Kahuwaa xeelliyaagan nuussi deꞌiya akeekaa gujjoosona.

Ashkkaray Erettiis

3, 4. (a) Isiyaasa maxaafan “ashkkaraa” giya qaalay ay malaatii? (b) Isiyaasa shemppo 42n, 49n, 50n, 52⁠ninne 53n Ashkkaraa geetettidaagaa Geeshsha Maxaafay waati qonccissii?

³ “Ashkkaraa” giya qaalay Isiyaasa maxaafan darosan deꞌees. Hegee issi issitoo hananabaa yootiya Isiyaasakka malaatees. (Isiyaasa 20:3; 44:26) Issi issitoo kumetta Israaꞌeele deriyaa woykko Yaaqooba zaretakka malaatees. (Isiyaasa 41:8, 9; 44:1, 2, 21) SHin Isiyaasa shemppo 42n, 49n, 50n, 52⁠ninne 53n deꞌiya dumma hiraagan Ashkkaraa geetettidaagaa xeelliyaagan woygana danddayettii? Kiristtaane Giriike Geeshsha Maxaafaa Xuufeti, he shemppotun Yihoowa Ashkkaraa geetettidaagee oonakko geeshshidi yootoosona. Oosuwaa maxaafan qonccida, Toophiyaa mureessay he hiraagatuppe issuwaa nabbabishin, geeshsha ayyaanay wonggeliyaa yootiya Piliphoosa kaalettidi akko baanaadan oottiis. He mureessay nabbabiyo Geeshsha Maxaafaa kifilee, haꞌꞌi Isiyaasa 53:7, 8n deꞌiyaagaa gidishin, Piliphoosa: “Hananabaa yootiyaagee hagaa obaa odii? Babaa odiiyye woi hara asabaa odii? Tau odarkkii” yaagidi oychiis. Isiyaasi odidoy Masiyaa Yesuusabaa gidiyoogaa Piliphoosi sohuwaara qonccissiis.—Oosuwaa 8:26-35.

⁴ Yesuusi gacino naꞌa gididi deꞌiyo wode, xillo asa gidida Simooni geeshsha ayyaanay kaalettin, Isiyaasa 42:6⁠ninne 49:6n kaseti odettidoogaadan ‘guutta naꞌaa Yesuusi’ “Israa7⁠eela gidenna asau [Xoossaabaa] bessiya poo7⁠o mala” gidiyoogaa yootiis. (Luqaasa 2:25-32) Hegaa bollankka, Yesuusa pirddau shiishshido qammi a bolli gakkida kawushshay Isiyaasa 50:6-9n kaseti odettida hiraaga. (Maatiyoosa 26:67; Luqaasa 22:63) Kiitettida PHeexiroosi PHenxxaqosxxe gallassi 33 K.S., Yesuusi Yihoowa “Ashkkaraa” gidiyoogaa geeshshidi qonccissiis. (Isiyaasa 52:13; 53:11; Oosuwaa 3:13, 26 nabbaba.) Masiyaara gayttida ha hiraagatuppe nuuni ay tamaarana danddayiyoo?

Yihooway Ba Ashkkaraa Loohissiis

5. He Ashkkaray ayba loohisso demmidee?

⁵ Xoossaa Ashkkaraa xeelliyaagan, Naꞌay asa gididi yelettanaappe kase Yihoowa giddooninne a bayra Naꞌaa giddon deꞌiya mata gaytotettaa Isiyaasa hiraagatuppe issoy akeekanaadan maaddees. (Isiyaasa 50:4-9 nabbaba.) Ashkkaray ba huuphe Yihooway bana ubbatoo loohissiyoogaa hagaadan qonccissiis: “I . . . beegottidi, taani tamaariya asadan siyanaadan, ta haittaa ezggissees.” (Isiyaasa 50:4) He wode ubban, Yihoowa Ashkkaray ba Aawaa siyiisinne appe tamaariis; hegaappe denddidaagan au haarettiya ashkkara gidiis. Saluwaanne saꞌaa Medhidaagaappe tamaaridaagaa gidiyoogee ayba gita maatee!

6. He Ashkkaray ba Aawaassi polo ogiyan haarettiyoogaa waatidi bessidee?

⁶ Ha hiraagan, he Ashkkaray ba Aawaa: ‘Ubbaa Haariya GODAA’ yaagiis. Hagee, Yihooway ubbaa haariyaagaa gidiyoogaa xeelliyaagan waanna tumaa he Ashkkaray akeekidoogaa bessees. Polo ogiyan ba Aawaassi haarettidoogaa qonccissiiddi hagaadan giis: “Ubbaa Haariya GODAI ta haittaa dooyiis; taanikka makkalanchcha gidabeikke; guyyekka simmabeikke.” (Isiyaasa 50:5) Yihooway saluwaa, saꞌaanne asaa naata medhiyo wode, i “a matan waanna oosanchcha.” “[Yihooway] medhdhidobai ubbai, sa7aikka asaa naatikka [Xoossaa Naꞌaa,]” he ‘waanna oosanchaa’ ufayssoosona.—Leemiso 8:22-31.

7. He Ashkkaray bana metoy gakkido wode ba Aawaa maaduwan ammanettidoogaa bessiyay aybee?

⁷ He Ashkkaray demmido loohissoynne asaa naata i siiqiyoogee, i saꞌaa yiido wode gakkida wolqqaama ixuwau giigettanaadan oottiis. Wolqqaama yedetay a gakkiyo wodekka gidin, ubbatoo ba Aawaa sheniyaa poliyoogan ufayttiis. (Mazamure 40:8; Maatiyoosa 26:42; Yohaannisa 6:38) Saꞌan deꞌiyo wode bana gakkida meto ubban, Yesuusi ba Aaway banan ufayttiyoogaanne bana maaddiyoogaa ammanettiis. Isiyaasa hiraagan kaseti odettidoogaadan, Yesuusi hagaadan gaana danddayiis: “Tana shatinttiyaagee matan de7⁠ees; yaatin, tana mootiyaagee oonee? . . . Be7⁠ite, Ubbaa Haariya GODAI tana maaddees.” (Isiyaasa 50:8, 9) Isiyaasa hiraagay haray bessiyoogaadan, Yihooway ba ammanettida Ashkkaray saꞌan haggaaziyo wode ubban a maaddiis.

Ashkkaray Saꞌan Oottido Oosuwaa

8. Isiyaasa 42:1n kasetidi odettidoogaadan, Yesuusi Yihoowan ‘doorettidaagaa’ gidiyoogaa qonccissiyaabi aybee?

⁸ Yesuusi 29 K.S., xammaqettido wode hanettidabaa Geeshsha Maxaafay yootiiddi yaagees: “Geeshsha Ayyaanai . . . a bolli wodhdhiis. Qassi saluwaappe, ‘Taani siiqiyo ta Na7ai nena; tana nebai ufaissees’ yaagiya qaalai yiis.” (Luqaasa 3:21, 22) Isiyaasa hiraagan odettida, ba ‘dooridoogaa’ Yihooway hegaadan geeshshidi qonccissiis. (Isiyaasa 42:1-7 nabbaba.) Yesuusi saꞌan oottido wode, he hiraagaa loꞌꞌo ogiyan poliis. Maatiyoosi ba wonggeliyan, Isiyaasa 42:1-4n deꞌiya qaalati Yesuusan polettidoogaa yootiis.—Maatiyoosa 12:15-21.

9, 10. (a) Yesuusi haggaazido wode Isiyaasa 42:3 waatidi polidee? (b) Kiristtoosi saꞌan deꞌiyo wode waatidi ‘suure pirddaa ehiidee?’ I ‘biittan suure pirddaa essanay’ awudee?

⁹ Ayhuda haymaanootiyaa kaalettiyaageeti, Ayhuda biittan deꞌiya coo asaa karoosona. (Yohaannisa 7:47-49) Asay iita hanotan oyqettido gishshau, “dinccettida shombboquwaa” woykko toꞌana haniya ‘lii7attidi eexxiya muqaaddaa’ mala gidiis. Gidikkonne, Yesuusi hiyyeesatuyyoonne metootanchatuyyo qarettiis. (Maatiyoosa 9:35, 36) Hegaa mala asata i: “Daafuranchchatoo, deexuwaa tookkiyaageetoo, ubbati taakko haa yiite; taani inttena shemppissana” yaagidi loꞌꞌo shoobiyaa shoobbiis. (Maatiyoosa 11:28) Hegaa bollankka, Yesuusi likkenne likke gidennabay aybakko Yihoowa maaraa tamaarissiyoogan ‘suure pirddaa ehiis.’ (Isiyaasa 42:3) Bessiyaagaadan haniyoogaaninne maariyoogan Xoossaa Higgiyaa oosuwan peeshshana koshshiyoogaakka qonccissiis. (Maatiyoosa 23:23) Yesuusi hiyyeesatuyyoonne duretuyyo shaakkennan sabbakiyoogankka suure pirddaa qonccissiis.—Maatiyoosa 11:5; Luqaasa 18:18-23.

¹⁰ Yihooway “dooridoogee” ‘biittan suure pirddaa essanaagaakka’ Isiyaasa hiraagay kaseti yootiis. (Isiyaasa 42:4) Hagee, i Masiyaa Kawotettaa Kawo gidiyoogaadan, polotikaa ayso ubbaa xayssidi, ba xillo haaruwan laammiyo mata wodiyan polettana. I “xilloi de7anasaa,” ooratta alamiyaa ehaana.—2 PHeexiroosa 3:13; Daaneela 2:44.

“Poo7⁠o” nne “Maachcha”

11. Yesuusi koyro xeetu layttan “Aihuda gidennaageetussi poo7⁠o” gididoy ayba ogiyaanee? Ha wodiyanshin hegaadan gidiyoy ayba ogiyaanee?

¹¹ Isiyaasa 42:6, 7 poluwaa maaraadan Yesuusi “kawotettatussi poo7⁠o” gididoogee tumuppe qoncciis. I saꞌan haggaazido wode, koyruwan Ayhuda asau ayyaanaa pooꞌuwaa pooꞌissiis. (Maatiyoosa 15:24; Oosuwaa 3:26) SHin Yesuusi: “Taani sa7au poo7⁠o” yaagidi yootiis. (Yohaannisa 8:12) I Ayhudatuyyoonne Ayhuda gidennaageetuyyo pooꞌo gididoy eti ayyaanaaban akeekanaadan oottiyoogaa xalla gidennan, ba polo deꞌuwaa asaa naatu ubbau wozo oottidi yarshshiyoogaana. (Maatiyoosa 20:28) Hayquwaappe denddi simmidi, ba erissiyo ashkkarati ‘saꞌaa gaxaa gakkanaassi’ babaa markkattanaadan kiittiis. (Oosuwaa 1:8) PHauloosinne Barnnaabaasi haggaaziyo wode, Ayhuda gidennaageetuyyo sabbakiyo oosuwaa malaatanau “Aihuda gidennaageetussi poo7⁠o” giya qaalaa goꞌettidosona. (Oosuwaa 13:46-48; Isiyaasa 49:6⁠ra gatta xeella.) “Aihuda gidennaageetussi poo7⁠o” gidida Yesuusa, asay ammananaadan maaddanau, tiyettida Yesuusa ishanttinne etaara issippe oottiyaageeti ayyaanaa pooꞌuwaa saꞌan pooꞌissanau he oosuwaa oottiiddi deꞌoosona.

12. Yihooway ayba ogiyan ba Ashkkaraa “asaayyo maachcha” oottidi immidee?

¹² He hiraagan, Yihooway ba doorido Ashkkaraa xeelliyaagan: “Taani . . . nena naagana. . . . Qassi asaassikka maachcha oottada immana” yaagees. (Isiyaasa 42:6, 7) Seexaanay Yesuusa xayssanaunne i saꞌan poliyo haggaazuwaa digganau aggennan baaxetiis; shin i hayqqanaadan keerettida wode gakkanaassi Yihooway Yesuusa naagiis. (Maatiyoosa 2:13; Yohaannisa 7:30) Hegaappe guyyiyan, Yihooway Yesuusa hayquwaappe denttidi, saꞌan deꞌiya asau “maachcha” oottidi immiis. Ha mino maachay, Xoossau ammanettida Ashkkaray ubbatoo, “Aihuda gidennaageetussi poo7⁠o” gididi ayyaanaaban xuman deꞌiyaageeta naxa kessanaagau ammanttiya naqaasha gidees.—Isiyaasa 49:8, 9 nabbaba.b

13. Yesuusi saꞌan haggaazido wode ‘xuman de7⁠iyaageeta’ kessidoy ayba ogiyaanee? Haꞌꞌi i hegaadan oottiiddi deꞌiyoy ayba ogiyaanee?

¹³ Ha maachaara moggiya ogiyan Xoossan doorettida Ashkkaray “qooqiyaa aifiyaa dooyana,” “omoodettidaageeta omooduwaa keettaappe kessana,” qassi “xuman de7⁠iyaageetakka” kessana. (Isiyaasa 42:7) Yesuusi saꞌan haggaaziyo wode, worddo haymaanootiyaa wogata qoncciyaa kessiyoogaaninne Kawotettaa mishiraachuwaa sabbakiyoogan hegaa oottiis. (Maatiyoosa 15:3; Luqaasa 8:1) I issi issi Ayhudata ayyaanaban aylle gidiyoogaappe naxa kessin, hegeeti guyyeppe a erissiyo ashkkarata gididosona. (Yohaannisa 8:31, 32) Hegaadan, miilooniyan qoodettiya Ayhuda gidennaageeti tumaa tamaaranaadan Yesuusi maaddiis. I bana kaalliyaageeta: “Intte biidi, asa ubbaa tana kaalliyaageeta oottite” yaagidi azaziisinne “wodiyaa wurssettai gakkanaassikka” i etaara deꞌanaagau qaalaa geliis. (Maatiyoosa 28:19, 20) Kiristtoos Yesuusi saluwan uttidi alamiyaa yuushuwan oosettiya sabbako oosuwaa kaalettiiddi deꞌees.

Yihooway “Ashkkaraa” Xoqqu Xoqqu Oottiis

14, 15. Yihooway ba Ashkkaraa ayba ogiyan xoqqu xoqqu oottidee? Aybissi?

¹⁴ Mase gidida Ashkkaraa xeelliyaagan hara hiraagay hagaadankka gees: “Be7⁠ite, ta ashkkarai akeekan oottana; i bonchchettidi, xoqqu xoqqu gaana; i keehi gitatana.” (Isiyaasa 52:13) Yihooway ubbaa haariyaagaa gidiyoogaa akeekidi, wozanappe haarettidonne keehippe gita paacee gakkishinkka baassi ammanettido gishshau, Yihooway ba Naꞌaa xoqqu xoqqu oottiis.

¹⁵ Kiitettida PHeexiroosi Yesuusabaa: “Saluwaa biidi Xoossaappe ushachcha baggan i uttidi, kiitanchcha ubbaa, maataara de7⁠iyaageetanne wolqqaamata haarees” yaagidi xaafiis. (1 PHeexiroosa 3:22) Hegaadan, kiitettida PHauloosikka kaallidi deꞌiyaagaadan giidi xaafiis: “Bana kaushshiis; haiquwau, ubba harai atto, [mittaa] bolla haiquwaukka azazettiis. Hegaa gishshau, Xoossai a keehi Xoqqu xoqqu oottiis; qassi suntta ubbaappekka aadhdhiya xoqqa sunttaa ayyo immiis. Hegaa gishshau, saluwaaninne sa7an sa7aappe garssan de7⁠iya ubbai Yesuusa sunttaa bonchchanau gulbbatana. Qassi asai ubbai Yesuus Kiristtoosa Goda yaagidi, Xoossaa Aawaa bonchchuwau markkattana.”—Piliphphisiyuusa 2:8-11.

16. Yesuusi 1914n ‘keehi gitatidoy’ ayba ogiyaanee? I he wodeppe doommidi ay poliiddi deꞌii?

¹⁶ Yihooway Yesuusa 1914n, ubba hegaappekka aaruwan xoqqu xoqqu oottiis. Yihooway a Masiyaa Kawotettaa Kawo oottidi sunttido wode, i ‘keehi gitatiis.’ (Mazamure 2:6; Daaneela 7:13, 14) Kiristtoosi he wodeppe doommidi, ‘ba morkketu’ giddon haariiddi deꞌees. (Mazamure 110:2) I koyro Seexaanaanne a daydanttata saꞌaa heeri oliyoogan eta haariis. (Ajjuutaa 12:7-12) Hegaappe, Gita Qiiroosa gididi, tiyettida ba ishanttuppe saꞌan attidaageeta ‘Gita Baabilooni’ aylletettaappe kessiis. (Ajjuutaa 18:2; Isiyaasa 44:28) I ba ayyaana ishatuppe attidaageeta shiishshiyo, hegaappe qassi “amarida dorssa wudiyau” ammanettida lagge gidida miilooniyan qoodettiya ‘hara dorssatakka’ shiishshiyo saꞌa yuusho sibikate oosuwaa kaalettiiddi deꞌees.—Ajjuutaa 12:17; Yohaannisa 10:16; Luqaasa 12:32.

17. “Ashkkaraa” xeelliyaagan odettida Isiyaasa hiraagaappe ay tamaaridoo?

¹⁷ Isiyaasa maxaafan deꞌiya dumma hiraagaa xannaꞌidoogee, nu Kawuwaanne nuna Ashshiya, Kiristtoos Yesuusa nuuni keehippe nashshanaadan oottidoogee qoncce. I saꞌan haggaaziyo wode naꞌadan haarettido hanotay, saꞌaa yaanaappe kase ba Aawaa matan loohissuwaa demmidoogaa qonccissees. I ba haggaazuwaaninne sabbakiyo oosuwaa ha wodiyaa gakkanaashin kaalettiyoogan “kawotettatussi poo7⁠o” gidiyoogaa qonccissiis. Kaallidi, i hayqqido gallassaa hassayiyo wodee matattiyo wode, Mase gidida Ashkkaraabaa loyttidi ‘qoppanaadan’ oottiyaabaa, i metuwaa beꞌidoogaanne nu goꞌꞌaassi giidi ba deꞌuwaa aattidi immidoogaa xeelliyaagan odettida hara hiraagaa beꞌana.—Ibraawe 12:2, 3.

[Footnotes]

Zaarettanau

• Isiyaasa hiraagan “ashkkaraa” geetettiday oonee? Hegaa waatidi erana danddayiyoo?

• Ashkkaray Yihoowappe ayba loohisso demmidee?

• Yesuusi “kawotettatussi poo7⁠o” gididoy ayba ogiyaanee?

• Ashkkaray xoqqu xoqqu giidoy ayba ogiyaanee?

[Sinttaa 24n deꞌiya misiliyaa]

Isiyaasi “ashkkaraa” giidoogee Yesuusa, Masiyaa gidiyoogaa Piliphoosi geeshshidi qonccissiis

[Sinttaa 25n deꞌiya misiliyaa]

Yihooway doorido Ashkkaraa gidiyoogaadan, Yesuusi hiyyeesatuyyoonne metootanchatuyyo qarettiis

[Sinttaa 26n deꞌiya misiliyaa]

Yesuusa a Aaway gitayiisinne Masiyaa Kawotettaa Kawo oottidi sunttiis