Ibraawetto Guutta Pitalee Ay Ammanettanaadan Oottii?

Xoossay qaalaa gelido ubbabay polettanaagaa ammanettana danddayiyoo? Yesuusi hegaa ammanettiis; qassi i tamaarissidobay a ezggiyaageeti bantta ammanuwaa minttanaadan maaddiis. Leemisuwawu, Yesuusi Deriyaa Bolla Timirttiyan yootido, Maatiyoosa 5:18n deꞌiya qofaa beꞌa; xiqisee, “Taani intteyyo tumaa odais: saloinne sa7ai aadhdhana gakkanaassi, qassi ubbabaikka polettana gakkanaassi, higgiyaappe issi qaalaikka woi issi pitaleekka xayenna” yaagees.

Ibraawetto qeeri pitalee י (yod) geetettees; Yihoowa giyo Xoossaa geeshsha sunttay xaafettido Tetragramateniyaa koyro pitalee hegaa.a Higgiyaa tamaarissiyaageetinne Parisaaweti Xoossaa Higgiyan deꞌiya qaalatunne pitaletu xallaa gidennan pitaliyaa malaataakka xoqqu ootti xeelloosona.

Higgiyan deꞌiya qii guuttabaykka polettennan attiyoogaappe saloynne saꞌay aadhiyoogee metennaba gidiyoogaa Yesuusi yootiis. SHin Geeshsha Maxaafay saloynne saꞌay merinawu deꞌanaagaa yootees. (Mazamure 78:69) I giidobay Higgiyan deꞌiya qii guuttabaykka polettennan attennaagaa akeekissiyaaba.

Xoossaa Yihoowa qii guuttabaykka qofissii? Ee, keehi qofissees. Ane hagaa qoppa: Paasikaa dorssaa meqettaappe issuwaanne menttennaadan beni Israaꞌeelatuyyo odettiis. (Kessaabaa 12:46) Hegee guuttaba milatana danddayees. Eti he meqettaappe issuwaanne menttana bessennay aybissakko akeekidonaa? Waayi akeekana. SHin ha qeeribay Masee mittan kaqettidi hayqqiyo wode, a meqettaappe issoynne meꞌennaagawu eesho gidiyoogaa Xoossaa Yihooway erees.—Mazamure 34:20; Yohaannisa 19:31-33, 36.

Yesuusi giidobaappe ay tamaariyoo? Nuunikka Xoossaa Yihooway qaalaa gelido ubbabay, ubba hegaara gayttida guuttabaykka polettanaagaa ammanettana danddayoos. Ee, Ibraawe qaalan deꞌiya ubbaappe guuxxiya pitalee keehi ammanettanaadan oottiyaaba!