Yesuusi Tamaarissidobay Ne Xeelaa Laammo
“Xoossai kiittidoogee Xoossaa qaalaa yootees.”—YOHAANNISA 3:34.
1, 2. Yesuusi Deriyaa Bolli Tamaarissido Timirttee aybin leemisettana danddayii? He timirttee ‘Xoossaa qaalan’ baasettiis gaana danddayiyoy aybissee?
ALMAAZE giyo alꞌꞌo shuchan ha wodiyan erettiya keehi gitatuppe issoy, 530u kaaraate gidida Isttaar of Afirikaa geetettiyaagaa. Hegee tumukka keehi alꞌꞌoba! Gidikkokka, Yesuusi Deriyaa Bollan hegaappekka keehi alꞌꞌo gidida goꞌꞌiya timirttiyaa tamaarissiis. Hegee alꞌꞌo gididoy, Yesuusa timirttiyau pulttoy Yihoowa gidiyo gishshataassa. Yesuusa xeelliyaagan Geeshsha Maxaafay: “Xoossai kiittidoogee Xoossaa qaalaa yootees” yaagees.—Yohaannisa 3:34-36.
2 Deriyaa Bolla Timirttee imettidoy bagga saatiyaappe guuxxiya wodiyaana gidana danddayikkonne, Ibraysxxe Geeshsha Maxaafaa xuufetu hosppunatuppe ekettida 21 qofaa oyqqiis. Yaatiyo gishshau, he timirttiyau mino baaso gididay “Xoossaa qaalaa.” Xoossay siiqiyo Naꞌay tamaarissido maalaalissiya alꞌꞌo timirttetuppe issota issota nu deꞌuwan waatidi oosuwan peeshshana danddayiyaakko ane beꞌoos.
“Kasetada Ne Ishaara Sigettaichcha”
3. Hanqqoy kaalettiyoobaa bana kaalliyaageetussi akeekissi simmidi, Yesuusi immido zoree aybee?
3 Kiristtaane gidiyoogaadan, Xoossaa ayyaanay nuuyyo deꞌiyo gishshau, nuuni ufayttiyaageetanne sarotettaa medhiyaageeta; qassi Xoossaa ayyaanaa ayfee sarotettaanne ufayssaa gujjees. (Galaatiyaa 5:22, 23) Yesuusi bana kaalliyaageeti bantta sarotettaanne ufayssaa xayanaadan koyibeenna gishshau, hanqqettidi takkiyoogee hayquwaa kaalettana danddayiyoogaa akeekissiis. (Maatiyoosa 5:21, 22 nabbaba.) I kaallidi hagaadan giis: “Hegaa gishshau, neeni yarshshiyoosan yarshshishin, ne ishaa naaqqidobai neeyyo hegan hassayettikko, ne yarshshuwaa he sohuwankka yeggabayada ba; kasetada ne ishaara sigettaichcha; hegaappe guyyiyan yaada, ne yarshshuwaa yarshsha.”—Maatiyoosa 5:23, 24.
4, 5. (a) Maatiyoosa 5:23, 24n Yesuusi yootido ‘yarshshoy’ aybee? (b) Lanccida ishaara sigettiyoogee ay keena koshshiyaabee?
4 Yesuusi yootido ‘yarshshoy’ Yerusalaamen beeta maqidasiyan shiishshiyo yarshsho awugaakka malaatees. Leemisuwau, mehiyaa yarshshoy Yihoowa asay ayyo goynniyo goynuwaa bagga gidiyo gishshau, keehippe koshshiyaaba. Gidikkokka, Yesuusi hegaappekka aadhi koshshiyaabaa qonccissiis; hegeekka, Xoossaayyo yarshshuwaa shiishshanaappe kase lanccida ishaara sigettiyoogaa.
5 Yaatin, Yesuusi yootido ha timirttiyaappe ay tamaarana danddayiyoo? Nuuyyo haratuura deꞌiya gaytotettay Yihoowaara deꞌiya gaytotettaa keehippe bochees. (1 Yohaannisa 4:20) Issi uri ba mala asaa bessiyaagaadan oyqqana xayikko, beni wode Xoossaayyo shiishshiyo yarshshoy waagi baynnaba gidiyoogee qoncce.—Mikkiyaasa 6:6-8 nabbaba.
Nu Huuphiyaa Kawushshiyoogee Keehippe Koshshees
6, 7. Nuuni lanccissido ishaara zaarettidi sarotettaa medhanau baaxetiyo wode, nu huuphiyaa kawushshiyoogee koshshiyoy aybissee?
6 Lanccida ishaara sigettiyoogee issi uri ba huuphiyaa kawushshiyoogaa paacciyaaba gidana danddayees. Ba huuphiyaa kawushshiya uri ba maata giyoobaa naagissanau ba mala Kiristtaaniyaara palamettenna woykko ooyettenna. Hegee beni Qoronttoosa Kiristtaanetu giddon merettidaagaa mala qohiya hanotay merettanaadan oottees. Hegaa xeelliyaagan kiitettida PHauloosi: “Issoi issuwaa mootiyoogee intte giddon de7ikko, hegee intte kunddidoogaa bessees. Hegaappe intte naaqettiyoogeenne cimettiyoogee kehennee?” yaagidi qoppanaadan oottiyaabaa yootiis.—1 Qoronttoosa 6:7.
7 Yesuusi nuuni nu ishaakko baana koshshiyoy nuuni likke gidiyoogaanne i mooridoogaa ammanttanaassa gibeenna. Nu halchoy zaarettidi sarotettaa medhanaassa gidana koshshees. Sarotettaa medhanau, nuuyyo siyettiyaabaa wozanappe yootana bessees. Nu ishaykka qohettidabadan au siyettidoogaa nuuni ammanidi ekkana koshshees. Mooriday nuna gidikko, nu huuphiyaa kawushshidi nu mooruwaa ammananau koyanaagee qoncce.
“Ne Ushachcha Aifee Nena Nagara Ootissikko”
8. Maatiyoosa 5:29, 30n Yesuusi yootidobaa qanttan qonccissa.
8 Deriyaa Bolla Timirttiyan, Yesuusi kandduwaa xeelliyaagan loꞌꞌo zoriyaa immiis. Polotettay paccido nu asatetta bollay nuna iitabau denttettana danddayiyoogaa i erees. Yaatiyo gishshau, Yesuusi: “Ne ushachcha aifee nena nagara ootissikko, neeppe shoddada ola baya; aissi giikko, ne bollai muleera Gaannabiyaa taman olettanaagaappe, appe issoi xayiyoogee neeyyo keha. Qassi ne ushachcha kushee nena nagara ootissikko, neeppe qanxxada ola baya; aissi giikko, ne bollai muleera Gaannabiyaa taman olettanaagaappe, appe issoi xayiyoogee neeyyo keha” yaagiis.—Maatiyoosa 5:29, 30.
9. Nu “aifee” woykko nu “kushee” nuna waatidi nagaraa ootissana danddayii?
9 Yesuusi yootido “aifee” issibaa bolli nu qofaa wottiyo abbiyaa malaatees; qassi “kushee” nuuni nu kushiyan oottiyoobaa malaatees. Nuuni naagettana xayikko, nu asatetta bollay nuna nagaraa ootissanaunne ‘Xoossaara hemettennaadan’ digganau danddayees. (Doomettaabaa 5:22; 6:9) Yaatiyo gishshau, nuuni Yihoowau azazettennaadan paacettiyo wode, ayfiyaa shoddi oliyoogaanne kushiyaa qanxxi oliyoogaa mala mino tangguwaa ekkana koshshees.
10, 11. SHori baynna asho gaytotettaappe haakkanau nuna aybi maaddana danddayii?
10 Nu ayfee shori baynnabaa xeellennaadan oottana danddayiyoy ayba ogiyaanee? Xoossau yayyiya Iyyoobi “Maccaasa xeellada amottennaadan, taani ta aifiyaara maachchaa maacettaas” yaagiis. (Iyyooba 31:1) Iyyoobi Xoossay kandduwaaban kessido higgiyaa kanttennaadan murttida, machida asa. Nuuni ekkida woy gelida asa gidin aggin, nu xeelay hegaa mala gidana koshshees. Nuuni shori baynna asho gaytotettaappe haakkanau, Xoossaa siiqiyaageeti bantta huuphiyaa naagiyoogaa ayfanaadan oottiya, Xoossaa geeshsha ayyaanaa kaaletuwaa kaallana koshshees.—Galaatiyaa 5:22-25.
11 SHori baynna asho gaytotettaappe haakkanau, ‘Maxaafan, televizhiiniyan woykko intterneetiyan kumida shori baynnabau ta ayfee ta koshshaa denttettanaadan oottiyaanaa?’ yaagidi nuna oychiyoogee loꞌꞌo gidana danddayees. Erissiyo ashkkaraa Yaaqoobi: “Asi huuphiyan huuphiyan ba huuphe iita amuwan gooshettiyo wodenne cimettiyo wode paacettees. Hegaappe guyyiyan, amoi shahaaridi, nagaraa yelees; qassi nagarai diccidi, haiquwaa yelees” yaagidoogaakka hassayana koshshees. (Yaaqooba 1:14, 15) Bana Xoossaayyo geppida ooninne mattuman baappe dummatiya ura ‘amuwan xeellikko,’ ayfiyaa shoddi oliyoogaa mala gita laamiyaa oottana koshshees.—Maatiyoosa 5:27, 28 nabbaba.
12. SHori baynna amuwaara baaxetanaadan nuna maaddana danddayiya PHauloosa zoree awugee?
12 Nu kushiyaa bessenna ogiyan goꞌettiyoogee Yihooway kessido kandduwaa maaraa ixxis gaanaadan oottana danddayiyo gishshau, kandduwaaban geeshsha gididi deꞌanau murttana bessees. Yaatiyo gishshau, “inttenan de7iya ha sa7aa amota worite; hegeetikka shaaramuxiyoogaa, tunatettaa, shaaramuxanau koyiyoogaa, iita amuwaa, miishsha amottiyoogaa. Miishsha amottiyoogee eeqau goinniyoogaappe dummatenna” yaagiya PHauloosa zoriyaa nuuni siyana koshshees. (Qolasiyaasa 3:5) “Worite” yaagiya qaalay shori baynna ashuwaa amuwaara baaxetanau mino tangguwaa ekkanau bessiyoogaa qonccissees.
13, 14. SHori baynna qofaappenne oosuwaappe haakkiyoogee keehi koshshiyoy aybissee?
13 Issi uri ba shemppuwaa ashshanau, haakime keettan kushiyaa woy tohuwaa qanxxettanau eeno gaana danddayees. Nuna ayyaanaaban worana danddayiya shori baynna qofaappenne oosuwaappe haakkanau, leemiso guussan nu ayfiyaa shoddidinne nu kushiyaa qanxxidi ‘oliyoogee’ keehi koshshiyaaba. Merinaa xayuwaa leemiso gidida Gaannabiyaappe attana danddayiyoy, qofan, kandduwaaninne ayyaanaaban geeshsha gidiyoogaa xallaana.
14 Nuuni laattido nagaraappenne polotettaa pacaappe denddidaagan, kandduwan geeshsha gididi deꞌanau baaxiyaa koshshees. PHauloosi: “Taani haratussi yootidoogaappe guyyiyan, ta huuphen olettidaagaa gidenna mala, ta bollaa yimppada haarissais” yaagiis. (1 Qoronttoosa 9:27) Yaatiyo gishshau, Yesuusa yarshshuwau galata xayiyoogaa bessiyaabaa mule oottennaadan, kandduwaa xeelliyaagan i immido zoriyaa oosuwan peeshshanau murttoos.—Maatiyoosa 20:28; Ibraawe 6:4-6.
“Immite”
15, 16. (a) Immiyoogan Yesuusi waanidi leemiso gidii? (b) Luqaasa 6:38n Yesuusi giidobay woygiyoogee?
15 Yesuusa timirtteenne laggetiyaabi baynna a leemisoy immiyoogaa minttettees. Polo gidenna asaa naatu goꞌꞌau saꞌaa yiyoogan i kehatettan immiyaagaa gidiyoogaa bessiis. (2 Qoronttoosa 8:9 nabbaba.) Yesuusi asa gidanaunne amaridaageeti aara Kawotettaa laattidi saluwan anjjuwaa demmanaadan nagarancha asaa naatuyyo ba shemppuwaa immanau, saluwan deꞌiya ba bonchuwaa agganau eeno giis. (Roome 8:16, 17) Qassi Yesuusi kaalliyaagaadan giido wode immiyoogaa minttettiis:
16 “Immite; Xoossai intteyyo immana. Baqqi naaqqidi siilli kunttin, palahidi wora laalettiyaagaa Xoossai intte kiyuwan idinttidi immana. Aissi giikko, intte harau immanau likkidi makkiyooban Xoossai intteyyo likkidi immana.” (Luqaasa 6:38) Beni wode qumaayido maayuwaa dakkoyidi giyan shammidobaa an oyqqiyo meezee deꞌees; ‘kiyuwan idinttiyoogee’ he meeziyaa malaatiyaaba. Nuuni wozanappe kehatettan immiyoogee, geella metootiyo wode, kumi palahidabaa nuunikka demmanaadan oottana danddayees.—Eranchchaa 11:2, NW.
17. Yihooway immiyoogan loꞌꞌo leemiso gididoy ayba ogiyaanee? Nuuyyo ufayssaa demissana danddayiyay ay immiyoogee?
17 Ufayssan immiyaageeta Yihooway siiqeesinne anjjees. Ba Naꞌan “ammaniya ubbai merinaa de7uwaa ekkanaappe attin, xayenna mala” Yihooway ba mexi issi Naꞌaa immidi loꞌꞌo leemiso gidiis. (Yohaannisa 3:16) PHauloosi: “Daro zerettaa zeriya urai qassi daro kattaa cakkana. Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo” yaagidi xaafiis. (2 Qoronttoosa 9:6, 7) Nu wodiyaa, nu wolqqaanne nu aquwaa tumu goynuwaa kaafanau goꞌettiyoogee, ufayssaanne daro anjjuwaa demissiyoogee qoncce.—Leemiso 19:17; Luqaasa 16:9 nabbaba.
“Awaajissoppite”
18. Saluwan deꞌiya nu Aawaappe ‘woytuwaa’ demmennay ayba hanotaanee?
18 “Intte ammano [“xillotetta,” NW] oosuwaa asa bessanau asa sinttan oottenna mala naagettite; hegee xayikko, saluwan de7iya intte Aawai intteyyo woituwaa immenna.” (Maatiyoosa 6:1) Yesuusi “xillotetta” giidoy Xoossaa sheniyaara moggottiya eeshshaa. Yesuusi ba erissiyo ashkkarati bantta ‘pooꞌuwaa asa sinttan pooꞌissanaadan’ yootido gishshau, Xoossaa oosoy qoncciyan mule oosettana koshshenna gaanau koyibeenna. (Maatiyoosa 5:14-16) SHin tiyaatiriyaa bessiya uradan nuuni oottiyoobaa ‘asa bessanaunne’ nashettanau oottiyaaba gidikko, saluwan deꞌiya nu Aawaappe ayba ‘woytonne’ demmokko. Nuuyyo hegaa mala koshshay deꞌiyaaba gidikko, Xoossaara mata dabbotaa medhokko woykko Kawotettaa haaruwan merinaa anjjuwaa demmokko.
19, 20. (a) Yesuusi “hiyyeesau immiyo wode” “awaajissoppite” giidoogee woygiyoogee? (b) Ushacha kushee oottiyoobaa haddirssa kushee erennaadan waatidi oottiyoo?
19 Nuuyyo suure xeelay deꞌiyaba gidikko, Yesuusi: “Intte aibakko hiyyeesau immiyo wode, lo77o milatiya iitati banttana bonchchissanau, Aihuda woosa keettatuuninne ogetun awaajissiyoogaadan awaajissoppite; taani intteyyo tumaa odais; eti bantta woituwaa ekkiichchidosona” yaagido zoriyaa kaalloos. (Maatiyoosa 6:2) ‘Hiyyeesau immiyooba’ geetettiday metootidaageeta maaddanau immiyoobaa. (Isiyaasa 58:6, 7 nabbaba.) Yesuusinne i kiittidoogeetikka hiyyeesatuyyo immidosona. (Yohaannisa 12:5-8; 13:29) Hiyyeesau immiyo wode awaajissenna gishshau, Yesuusi “hiyyeesau immiyo wode” “awaajissoppite” giidoy yohuwaa minttanaassa gidiyoogee qoncce. Ayhuda Parisaawetuugaadan hegaa mala imotaa asa bessanau immana koshshenna. Eti metootidaageetuyyo immiyoobaa “Aihuda woosa keettatuuninne ogetun” awaajissiyo gishshau, Yesuusi eta loꞌꞌo milatiya iitata yaagiis. He loꞌꞌo milatiya iitati “bantta woituwaa ekkiichchidosona.” Yihooway etayyo aybanne immenna gishshau, eti demmiyo woytoy asan nashettiyoogaanne geella erettida asttamaaretuura Ayhuda woosa keettan sinttan uttiyoogaa xalla. (Maatiyoosa 23:6) Yaatin, Yesuusi erissiyo ashkkarati ay oottana koshshii? Yesuusi etassinne nuussi hagaadan giis:
20 “SHin intte hiyyeesau immiyo wode, geeman immanaadan, intte ushachcha kushee oottiyoogaa intte haddirssa kushee eroppo; geeman be7iya intte Aawai intteyyo qoncciyan immana.” (Maatiyoosa 6:3, 4) Darotoo nu kusheti issippe oottoosona. Yaatiyo gishshau, ushachcha kushee oottiyoogaa haddirssa kushee erana bessenna giyoogee, nuuni hiyyeesaassi immiyoobaa nu naaꞌꞌu kushee matattiyoogaadan nuuyyo matattiyaageetuyyokka gidin yootana bessenna giyoogaa.
21. ‘Geeman beꞌiyaagee’ immiyoobay ay gujjii?
21 Nuuni haratuyyo immiyooban ceeqettennaba gidikko, ‘hiyyeesau immiyoobaa’ geeman immoos. Yaatikko, “geeman be7iya” nu Aaway nuuyyo kushiyaa zaarana. Saluwan deꞌiya nu Aawaa asaa naati beꞌana danddayenna gishshau, asaa naatuyyo i ‘geema.’ (Yohaannisa 1:18) ‘Geeman beꞌiyaagee’ immiyoobay, Yihooway nuna baayyo mata dabbo oottiyoogaa, nu nagaraa atto giyoogaanne merinaa deꞌuwaa immiyoogaa gujjees. (Leemiso 3:32; Yohaannisa 17:3; Efisoona 1:7) Hegee asappe galataa demmiyoogaappe keehi aadhiyaaba!
Nashshana Koshshiya Alꞌꞌo Timirtteta
22, 23. Nuuni Yesuusa timirttiyaa nashshana koshshiyoy aybissee?
22 Deriyaa Bolla Timirttee daro loꞌꞌo qofaa oyqqida ayyaanaaban alꞌꞌobay kumidoba gidiyoogee tuma. Metoy kumido ha wodiyankka nuuni ufayssaa demmanaadan oottana danddayiya alꞌꞌo qofaa hegee oyqqidoogau siree baawa. Nuuni Yesuusa timirttiyaa nashshiyaabanne nu xeelaanne nu deꞌuwaa laammanaadan oottiyaaba gidikko, ufayttiyaageeta gidana.
23 Yesuusa timirttiyaa ‘siyiyaanne’ “oottiya” ubbay anjjuwaa demmana. (Maatiyoosa 7:24, 25 nabbaba.) Yaatiyo gishshau, Yesuusa zoriyaara moggottidi deꞌanau murttoos. I Deriyaa Bollan Tamaarissidobaappe attidaageeta ha timirttiyau wurssetta huuphe yohuwan beꞌana.
Woygada Zaaruutii?
• Lanccida ishaara sigettiyoogee keehippe koshshiyoy aybissee?
• “Ushachcha aifee” nuna nagaraa ootissiyoogaappe haakkana danddayiyoy ayba ogiyaanee?
• Immiyoogaa xeelliyaagan nuuyyo ayba xeelay deꞌana koshshii?
[Sinttaa 15n deꞌiya misiliyaa]
Lanccida ne mala Kiristtaaniyaara ‘sigettiyoogee’ ayba loꞌꞌobee!
[Sinttaa 17n deꞌiya misiliyaa]
Ufayssan immiyaageeta Yihooway anjjees